आमोस 1 - लिम्बु1 तकोओ के़युङ्बा मे़ल्लुकम्बाहाॽओबा थिक्पा आमोसरे़ कन् कुइङ्घङ्लो॥ यहुदाबा हाङ् उज्जियाहन् नु येहोआसरे़ कुस्सा इस्राइलबा हाङ् यारोबामरे़ खुन्छिॽ ये़म्मो, लुप्लि के़प्मानुःल्ले़ तङ्बे ने़त्छि तगि खुने़ॽ इस्राइलरे़ कुयाःम्बेओ निसुआङ् वये़बा सुफोन् हाबा कन्लो॥ 2 कन् पाःन्निन् आमोसरे़ पाःत्तुरो, “यहवे दाङ्बे़न् सियोनलाम् हुःक्लो, हे़क्क्याङ् यरुसले़ःम्लाम् लोःक्खुरो॥ मे़ल्लुक्कम्बाहाॽरे़ खुन्छिॽ थक्सा चाराम्मादे़न्हाॽ हेबेःक्लो, हे़क्क्याङ् कर्मेल कोःक्माल्ले़ कुसम्मिन् इरे़म्लो॥” 3 यहवे दाङ्बे़ल्ले़ अक्खे पाःत्तुरो— “दमस्कसरे़ सुम्सि कुलायोहाॽ इग्र लिसि लायोहाॽरे़ चोगुल्ले़ आङ्गाॽ साॽरिक् आसिक् पोःक्मान् मे़घे़त्तुङ्ङिन्लो॥ खे़ङ्हाॽरे़ गिलादे़न् फे़न्जेॽ कुहाबोॽ के़युङ्बा चाधाम्मा ताःन्द्याःल्ले़ मे़धाप्सु चामे़नुगुबाल्ले़ चोगुल्ले़, 4 आङ्गाॽ हजाएलरे़ कुहिम्मो मि केःत्तुङ्लो हे़क्क्याङ् खे़ल्ले़ बेन-हददरे़ कुयक्हाॽ खाप्पुथ्यःङ् चोगुरो॥ 5 आङ्गाॽ दमस्कसरे़ कुलाम्धेःत्तिन् मे़क्खुङ्लो, आवनबा ने़ने़बादे़न्नो के़युङ्बा हाङ्ङिन् नु बेथ-अदनओ हाङ्तक्कात् के़याङ्सिङ्बे़न् मे़क्खुङ्लो॥ अरामबा मनाहाॽ लाजेॽलाम् मे़लःत्तु मे़देसुसिरो हे़क्क्याङ् खे़ङ्हाॽ किर लाजेॽओ मे़बेःक्लो,” यहवे दाङ्बे़ल्ले़ पाःत्तुरो॥ 6 यहवे दाङ्बे़ल्ले़ अक्खे पाःत्तुरो— “गाजाबा सुम्सि लायोहाॽ इग्र लिसिए लायोहाॽरे़ चोगुल्ले़ आङ्गाॽ साॽरिक् आसिक् पोःक्मान् मे़घे़त्तुङ्ङिन्लो॥ खे़ल्ले़ एदोमरे़ कुहुक्को थामासिरे़ लागि के़रे़क् सुवाङ्हाॽ ते़म्सुसिआङ् तेॽरुसिरो॥ 7 आङ्गाॽ गाजाबा लुङ्धाक्हाॽओ मि केःत्तुङ्लो, हे़क्क्याङ् खे़ल्ले़ कुयक्हाॽ के़रे़क् खाप्पुथ्यःङ् मिदिक्लो॥ 8 आङ्गाॽ अस्दोदबा हाङ्ङिन् नु अस्कलोनओ हाङ्तक्कात् के़याङ्सिङ्बे़न् मे़क्खुङ्सिङ्लो॥ के़दाङ्बा के़याःक्पा पलिस्तिहाॽ निन्धासेःक्ओ मे़न्छिने़न्ल थारिक् एक्रोनरे़ कुदक्ले़ङ्वाओ आङ्गाॽ हुक् नुःक्तुङ्लो॥” 9 यहवे दाङ्बे़ल्ले़ अक्खे पाःत्तुरो, “तुरोसबा सुम्सि लायोहाॽ इग्र लिसिए लायोहाॽरे़ चोगुल्ले़ आङ्गाॽ साॽरिक् आसिक् पोःक्मान् मे़घे़त्तुङ्ङिन्लो॥ खे़ल्ले़ के़रे़क् मे़दे़म्सु मे़देॽरुसिबाहाॽ एदोमरे़ कुहुक्को थासुसिबाल्ले़ चोगुल्ले़ हे़क्क्याङ् फुॽनुसाॽहाॽ लुम्मोबा नादङ्ङिन् निङ्वाॽ मे़न्इःत्तुम्बाल्ले़ चोगुल्ले़, 10 आङ्गाॽ तुरोसबा लुङ्धाक्हाॽओ मि केःत्तुङ्लो हे़क्क्याङ् खे़ल्ले़ कुयक्हाॽ खाप्पुथ्यःङ् मिधिक्खुरो॥” 11 यहवे दाङ्बे़ल्ले़ अक्खे पाःत्तुरो, “एदोमरे़ सुम्सि कुलायोहाॽ इग्र लिसिए कुलायोहाॽरे़ चोगुल्ले़ आङ्गाॽ साॽरिक् आसिक् पोःक्मान् मे़घे़त्तुङ्ङिन्लो॥ खे़ल्ले़ के़रे़क् लुङ्माॽ तुक्मासि पाःन्निन् ले़रुदेसु हे़क्क्याङ् ताभेन् याङ्सिङ्ङाङ् कुन्साॽसि नाःत्तुसिबाल्ले़ चोगुल्ले़, हे़क्क्याङ् खे़ल्ले़ चक्मे़ल्लॽए कुसिक् पोगे़बा नु सदादिङ्ले़ लागि कुसाक्के़न्निन् पोगे़बाल्ले़ चोगुल्ले़, 12 आङ्गाॽ तेमानओ मि केःत्तुङ्लो, हे़क्क्याङ् खे़ल्ले़ बोज्राबा यक्हाॽ खाप्पुथ्यःङ् मिधिक्खुरो॥” 13 यहवे दाङ्बे़ल्ले़ अक्खे पाःत्तुरो, “अम्मोनरे़ सुम्सि कुलायोहाॽ इग्र लिसि कुलायोहाॽरे़ चोगुल्ले़ आङ्गाॽ साॽरिक् आसिक् पोःक्मान् मे़घे़त्तुङ्ङिन्लो॥ खे़ल्ले़ कुइःन्दोहाॽ फोमारे़ लागि गिलादबा कुस्सा के़याक्मा मे़न्छुमाहाॽरे़ खुन्छिॽ साप्पोःक्किन् चे़रुबाल्ले़ चोगुल्ले़, 14 आङ्गाॽ रब्बाबा लुङ्धाक्हाॽओ मि केःत्तुङ्लो, हे़क्क्याङ् खे़ल्ले़ खे़प्मोबा यक्हाॽ खे़न् थङ् पोङ्बा ये़न्नो हयङ् किल्लिङ्नु सोसोरिक् सुरित् केजङ् हुबा ये़न्नो खे़न् पयम् यम्बा के़इक्सिङ्बा सुरित् केजङ्ङिल्ले़ खाप्पुथ्यःङ् चोगुरो॥ 15 हाङ्ङिन् नु कुसुहाङ्युक्पाहाॽ के़रे़क् लाजेॽलाम् मे़लःत्तु मे़देसुसिॽ,” यहवे दाङ्बे़ल्ले़ पाःत्तुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.