२ सामुए़ल 19 - लिम्बुदाउदे़न् यरुसले़म नुःङ् 1 अब्सालोमरे़ कुलागि हाङ्ङिन् हाःप्ल, मे़रिङ् चोःक्ल याक् के़लॽबान् योआबरे़ खे़प्सु॥ 2 हे़क्क्याङ् खे़न् ये़न्नोबा थङ् नाःम्मे़न् थक्सुबाहाॽरे़ लागि योम् पुॽमा पोःक्खे़, थेआङ्भे़ल्ले़ खे़ङ्हाॽरे़ हाङ्ङिन् कुस्सा अब्सालोमरे़ कुलागि मे़रिङ् चोःक्नु याक् के़लॽबान् मे़घे़प्सु॥ 3 थङ्लाम् मे़घे़त्छिङ्ङाङ् खुन्छिॽ नारा के़दे़प्पा मना कुइसिक् खे़ङ्हाॽ ये़क्यक् सिगाङ् स्वाःत् मे़लासे़॥ 4 हाङ्ङिल्ले़ कुनान् ते़प्तुआङ् यम्बा इक्लाओ हाबे़र पाःत्तु, “आङ्गाॽ आस्सा अब्सालोम! अब्सालोम ए! आङ्गाॽ आस्साए, आङ्गाॽ आस्साए!” 5 हे़क्क्याङ् हाङ्ङिल्ले़ कुहिम्सिगाङ् त्ये़आङ् योआबरे़ मे़त्तु, “आदाङ्बारे़ के़स्साहाॽ के़स्सा मे़न्छिन्हाॽ, के़मेःत्हाॽ नु के़मेःत् पाःक्माहाॽ के़से़ःप्पा आदाङ्बारे़ के़मनाहाॽ आइन् सिरिङ्ममाओ याप्मि के़धासे़॥ 6 आदाङ्बा के़जिःप्पा मनाहाॽ लुङ्माॽ के़दुक्तुसिॽ, हे़क्क्याङ् आदाङ्बा लुङ्माॽ के़दुक्पाहाॽ के़जिःत्तुसिॽ॥ आदाङ्बारे़ आनिगे थक्सुबारे़ लाम्लोबाहाॽ नु आनिगे मनाहाॽ आदाङ्बारे़ के़निमो थेआङ् मेःम्बा फाॽआङ् ओसेःन्दाङ् के़जोगु॥ कन्नाङ् ओसेःन्दाङ् के़जोगु-आइन् अब्सालोम हिङे़आङ् आनिगे के़रे़क् स्ये़इगे़ल्ले़ आदाङ्बा के़सःत्ते़बारो॥ 7 खे़ल्ले़चोगुल्ले़ आल्ल हारा पेगे़ॽआङ् के़मनाहाॽ हाङ्हाङ् मे़त्ते़से़ॽ॥ खे़ने़ॽ के़म्बेःक्ने़न्ने़भग्र यहवे दाङ्बे़ल्ले़ कुमिङ्ङो पाःत्तुङ्, आइन् से़न्दिक् लत्छाआङ् मना खे़ने़ॽनु मे़न्वाॽने़न्॥ आदाङ्बा के़जुक्ते़आङ्धो के़दुमुबा के़रे़क् तुक्खेन्नुःल्ले़आङ् कन् तुक्खेन् के़रे़क्नुःल्ले़ ताप्फे़ःम्बा पोङ्॥” 8 हे़क्क्याङ् हाङ्ङिन् पोगे़आङ् लाम्धेत् पुङ्ङो युङ्सिङ्॥ हे़क्क्याङ् हाङ्ङिन् पोगे़आङ् लाम्धेत् पुङ्ङो युङ् के़लॽबा मनाहाॽरे़ मे़घे़प्सु हे़क्केःल्ले़ खे़ङ्हाॽ के़रे़क् हाङ्ङिल्ले़ कुबेसाङ् मे़धाःम्सिङ्॥ खे़न् ये़म् थारिक्ले़ इस्राइलिहाॽ के़रे़क् आबाङे खुन्छिॽ हिम्हिम् मे़घे़त्छिङ् मे़बेआङ् मे़होःप्ते़॥ योआबरे़ दाउदे़न् फे़ःक्तु 9 इस्राइलबा के़रे़क् सुवाङ्हाॽरे़ मे़घे़प्सुर अक्खे मे़बाःत्तु, “हाङ्ङिल्ले़ आनिॽ निङ्मिहाॽलाम् हे़क्क्याङ् पलिस्तिहाॽरे़ खुन्छिॽ हुक्कोलाम् आसे़ःप्ते़, हे़क्क्याङ् आल्ल अब्सालेमरे़ चोगुल्ले़ हाङ्ङिन् लाजेॽलाम् खे़त्छिङ् पेआङ् वाॽ॥ 10 कर आनिॽ हाङ् आजोगुम्बा अब्सालोम्मिन् थङ्ङो स्ये़आङ् वाॽ॥ खे़ल्ले़चोगुल्ले़ आल्ल दाउद हाङ्ङिन् नुःक्माआङ् ताःप्मा पोङ्ॽ॥” 11 हे़क्क्याङ् दाउद हाङ्ङिल्ले़ सदोक नु अबियाथार निङ्वाॽफुसाम्बान् अक्तङ्बा इङ्घङ् हाक्तुसि, “यहुदाबा काप्पो तुम्साहाॽ सेःन्दोसे़से़ॽ, हाङ्ङिन् कुहिम्मो ताःप्मा खिनिॽ थेआङ् एगाङ् के़बोःक्खिबाबे? थेआङ्भे़ल्ले़ कन् पाःन्निन् इस्राइल लाजेॽओ के़रे़क् पान् पोङ्ल पत्, खे़न् पाःन्निन् हाङ्ङिल्ले़ कुहिम्मो के़रे़ चुरे़आङ् वाॽ॥ 12 खिनिॽग आम्भुॽ आन्साॽनिङ्लो, आङ्गाॽ आये़प्पा नु आने़क्सानिङ्लो॥ हाङ्ङिन् कुहिम्मो ताःप्मा थेआङ् खिनिॽ के़रे़क्नुःल्ले़ एगाङ् के़बोःक्खिबाबे? 13 हे़क्क्याङ् अमासान् मे़त्ते़म्मे़ॽ, ‘खे़ने़ॽग आङ्गाॽए आये़प्पा नु आने़क्साने़ मेःम्बि? खे़ने़ॽ योआबरे़ कुले़क्वा के़हिङ्हिङ् थारिक् थक्सुबाहाॽरे़ लाम्लोबा के़म्बोःक्खे़ङ्ग्र निङ्वाॽफुमाङ्ङिल्ले़ साॽरिक् खुम्दिङ् पिआर॥’” 14 दाउदरे़ कन् कुइङ्घङ्ङिल्ले़ यहुदाबा के़रे़क् मनाहाॽरे़ खुन्छिॽ निङ्वान् लत्छा मना निङ्वाॽ कुइसिक् चोगु॥ हे़क्क्याङ् खे़ङ्हाॽरे़ हाङ्ङिन् के़रे़क् के़मनाहाॽनु नुःक्खे़ॽओ फाॽआङ् पेलि मे़भाक्तु॥ 15 खे़ल्ले़चोगुल्ले़ हाङ्ङिन् नुःक्खे़आङ् यर्दन यङ्घङ् त्ये़॥ मनाहाॽ आल्ल हाङ्ङिन् कुदुम्से़ नु यर्दन वहःङ् नाहाङ् ले़प्माङ् तेॽसे़ यहुदाबा मनाहाॽ गिलगालओ मे़द्ये़आङ् मे़वये़॥ 16 बहुरिमबा बिन्यामिनरे़ कुस्सा सिमिन् दाउद हाङ्ङिन् कुदुम्से़ हाराहारा यहुदाबा मनाहाॽनु पे॥ 17 खुने़ॽनु सावलरे़ कुसुवाङ्बा कुहिम् कुधाःङ् ओगे़मे़प्पा सिवाःन्नाङ् थिबोङ्ङाङ् ङासि कुस्सा नु निबोङ् कुसे़वारोबा, हे़क्क्याङ् हे़न्छिङ्धिक् बिन्यामिनिहाॽ तेॽरुसिआङ् पे॥ खे़ङ्हाॽ यर्दन वहःङ्ङो हाङ्ङिन् वये़बादे़न्नो मे़लोःक्ते़आङ् मे़बे॥ 18 हाङ्ङिल्ले़ कुहिम्सयङ्हाॽ ताःत्छे़ खे़ङ्हाॽरे़ वहःङ्ङिन् मे़गाःक्तु, हे़क्क्याङ् हाङ्ङिल्ले़ मे़त्तुसिबा कुइसिक् मे़जोगु॥ हाङ्ङिल्ले़ यर्दन वहःङ्ङिन् काःक्तुर पत्छे़ल्ले़ गेराररे़ कुस्सा सिमिन् होःत्छिङ्ल साम्बोन् हबत् फन्छिङ्ङाङ् से़वा मे़त्तु, दाउदरे़ सिमिन् लुङ्माॽ तुक्तु 19 हे़क्क्याङ् हाङ्ङिन् मे़त्तु, “आदाङ्बारे़ यरुसले़म के़ले़रुआङ् के़बेःल्ले़ के़से़वारोबाल्ले़ याःम्बक् फेःन्दुङ्॥ खे़न् के़रे़क् आदाङ्बारे़ निङ्वाॽ मे़इःत्ते़न्ने़ॽ फाॽआङ् पेलि फाक्ने़रो॥ खे़न् पाःन्निन् हाङ्ङिल्ले़ के़निङ्वाॽओ मे़युक्खे़न्ने़ॽओ॥ 20 थेआङ्भे़ल्ले़ आङ्गाॽ ताप्फे़ःम्बा याःम्बक् चोगुङ् के़लॽबान् निसुङ्, कर आइन् आदाङ्बा के़दुम्से़ तगि के़दाबा योसेफरे़ कुसुवाङ्ङो आङ्गाॽएरो॥” 21 कर सरुयाहरे़ कुस्सा अबिसैःल्ले़ पाःत्तु, “यहवे दाङ्बाल्ले़ सेगुबा हाङ्ङिन् साक्मुरा मे़त्तुबाल्ले़ सिमिःङ्ग सिमा मे़बोङ्ने़म्बि?” 22 दाउदरे़ पाःत्तु, “सरुयाहरे़ कुस्सासे, खिनिॽ पाःप्मा पान् थेआङ् होप्, खे़निॽ आदक्ले़ङ्वाओ के़बोगिर के़बत्छिॽ॥ आइन् इस्राइलओ आत्तिन् मनाःन्नाङ् सिमा मे़नुॽने़न्, आइन् आङ्गाॽ याम्मो इस्राइलबा हाङ् पोःक्खाङ् के़लॽबान् मे़निआन्बि?” 23 हे़क्क्याङ् हाङ्ङिल्ले़ सिमिन् मे़त्तु, “खे़ने़ॽ मे़से़त्तासिगे़न्॥” हे़क्क्याङ् हाङ्ङिल्ले़ माङ्हे़क्सिङ्ङाङ् कन् पाःन्निन् निःन्धो चोगुरो॥ दाउदरे़ मपिबोसेते़न् लुङ्माॽ तुक्तु 24 सावलरे़ कुम्मे़न्छाॽ मपिबोसेते़न्नाङ् हाङ्ङिन् कुदुम्से़ यो थ्ये़॥ हाङ्ङिन् लःन्दे़ पेआङ् याम्मो नुरिक्काङ् मे़न्नुःङ् मे़न्दाए थारिक् खे़ल्ले़ कुलाङ् सेःन्दिन्नाङ् मे़घक्तुन्, कुम्धोॽइन्नाङ् मे़घक्तुन्, कुदेःत्ताङ् वामे़हप्तुन्॥ 25 हे़क्क्याङ् खुने़ॽ यरुसले़मलाम् हाङ्ङिन् कुदुम्से़ त्ये़, हे़क्केःल्ले़ दाउदरे़ मे़त्तु, “मपिबोसेते, खे़ने़ॽ थेआङ् आङ्गाॽनु के़म्बेने़म्बा?” 26 खुने़ॽ पाःत्तु, “आदाङ्बे, आङ्गाॽ आसे़वारोबा सिवाःल्ले़ इङ्ले़क्ताङ्॥ आङ्गाॽग हाङ्ङिन्नु पेःक्मारे़ लागि अदङ्ङिल्ले़ कुम्ब्राओ करेलि फम्मा पाङ्घुङ्सिङ्, थेआङ्भे़ल्ले़ आङ्गाॽ के़से़वारोबान् लाङ्सक्पा वाॽआ॥ 27 खे़ल्ले़ आदाङ्बा हाङ्ङिल्ले़ के़दगि आङ्गाॽ आदक्ले़ङ्वाओ पान् पाःत्तुआङ् वाॽ॥ आदाङ्बाग निङ्वाॽफुमाङ्ङिल्ले़ कुमाङ्लाइङ्बा कुइसिक् के़जोक्॥ आदाङ्बारे़ थे चोःक्मा के़सिराॽधाङ् हाबाघे़न् चोगे़ॽओ॥ 28 थेआङ्भे़ल्ले़ आङ्गाॽ आन्धे़बारे़ के़रे़क् कुहिम्सयङ्हाॽ आदाङ्बारे़ के़हुक्लाम्बा सिमा लाॽरुसिआङ् वये़, कर के़से़वारोबे़ङ्ग आदाङ्बानु सोरिक् के़युक्खाङ्ङाङ् चामा के़बिराङ्॥ कन्नुःल्ले़ यम्बा आङ्गाॽ थेःन् कोःत्तुङ्बाबे?” 29 हाङ्ङिल्ले़ मे़त्तु, “याःक्तु, पोःक्खे़॥ आङ्गाॽ आनिङ्वाॽओ इःत्तुङ् सुरुङ्ङाङ् वाॽ—खे़ने़ॽ नु सिवाल्ले़ लाजेॽ सिङ्बुङ्हाॽ हास्से़से़आङ् तेॽरे़से़ॽ॥” 30 मपिबोसेतरे़ पाःत्तु, “खे़ल्ले़ए के़रे़क् तेॽरुर, थेआङ्भे़ल्ले़ आदाङ्बा नुरिक्काङ् हिम्मो के़नुःक्खे़ के़द्ये़॥” दाउदरे़ बर्जिल्लैःन् लुङ्माॽ तुक्तु 31 गिलादि बर्जिलैन्नाङ् रागलिमलाम् यो थ्ये़, हे़क्क्याङ् हाङ्ङिन् यर्दन नाहाङ् सासे़ हाङ्ङिन्नु पे॥ 32 बर्जिलैन् ये़त्बोङ् तङ्बे के़गे़प्पा खदाक्मि मना वये़॥ हाङ्ङिन् महनोम युङे़ल्ले़ खुने़ॽए हाङ्ङिन् चामा कुजा तङ्गाम् चोगु पिरुआङ् वये़, थेआङ्भे़ल्ले़ खुने़ॽ साॽरिक् याङ्साकुन्धेसाबा वये़॥ 33 हे़क्क्याङ् हाङ्ङिल्ले़ बर्जिलैन् मे़त्तु, “आङ्गाॽनु नाहाङ् नाःक्खुम्माङ् पेगि, आङ्गाॽ खे़ने़ॽ के़लागि यरुसले़म्मो तङ्गाम् चोगुङ् पिने़॥” 34 बर्जिलैल्ले़ हाङ्ङिन् मे़त्तु, “आदाङ्बारे़ के़से़वारोबान् यरुसले़म खे़ने़ॽनु पेःक्मारे़ लागि साॽरिक् काप्पोबा तुम्से़आङ् वाॽ॥ 35 आङ्गाॽ ये़त्पोङ् तङ्बे के़राङ्जुराङ्॥ आल्ल नुबा नु ताप्फे़ःम्बा निङ्वाॽ कप्मा ले़रुङ्॥ आङ्गाॽ चाङ्बा थुङुङ्बा कुजाःल्ले़ कुलिम्मा कुलाःक्मा निङ्वाॽ मे़घोआन्॥ ये़म्बित्छाॽ नु मे़न्छुमाॽरे़ साम्मे़लोबा साम्लोन् से़म्मा मे़सुक्कान्॥ हे़क्केःल्ले़ आङ्गाॽ थेआङ् आदाङ्बारे़ के़लागि यम्बा कक् पोङ्ङाॽबाबे? 36 आदाङ्बारे़ के़से़वारोबे़न् यर्दन नाहाङ् थारिक्लक् पेःक्लो॥ कर हाङ्ङिल्ले़ आङ्गाॽ थेआङ् अक्तङ्बा थुम्घो के़बिआबाबे? 37 आङ्गाॽ नुःङ्मा आभाःक्ते़ॽ हे़क्क्याङ् आङ्गाॽ आम्बा आम्मारे़ खुन्छिॽ इःप्पुङ्बेसाङ्, आङ्गाॽ आफेक् आये़क्यक्को सिआर॥ कप्मोग खे़ने़ॽ के़से़वारोबा किमहाम वाॽ॥ खे़न् आदाङ्बारे़ नाहाङ् ले़प्माङ् तेॽरे़, हे़क्क्याङ् आदाङ्बारे़ खुने़ॽ कुलागि थे चोःक्मा निङ्वाॽ के़गत्तुॽ बाघे़न् चोगे़ॽ॥” 38 हाङ्ङिल्ले़ मे़त्तु, “हे़क्केग्र किमहाम आङ्गाॽनु नाहाङ्दाङ् पेःक्ल, हे़क्क्याङ् खे़ने़ॽ खुने़ॽ कुलागि थे चोगे़ॽ के़मे़त्ताॽ हाबाघे़न् खुने़ॽ कुलागि चोगुङ् पिरुङ्ॽ॥ हे़क्क्याङ् खे़ने़ॽ थे के़नाःक्तुॽ आङ्गाॽ के़लागि बाघे़न् चोगुङ् पिने़ॽ॥” 39 हे़क्क्याङ् के़रे़क् मनाहाॽ यर्दन नाहाङ् ले़प्माङ् मे़बे, खे़न् एगाङ् हाङ्ङिन् पे॥ हे़क्क्याङ् हाङ्ङिल्ले़ बर्जिलैन् चुप् मे़त्तु, हे़क्क्याङ् हाङ्वामुॽइ पिरु, हन्नाङ् बर्जिलैन् आबाङे कुहिम्मो नुःक्खे़॥ हाङ्ङिल्ले़ कुयाःम्बेओ यहुदा नु इस्राइल लुम्मो पाःन्धङ् 40 हाङ्ङिन् नाहाङ् ले़प्माङ् गिलगालओ पे, हे़क्क्याङ् किमहाम खुने़ॽनु वये़॥ यहुदाबा के़रे़क् थक्सुबाहाॽ नु इस्राइलबा कुभ्रे़ःङ् मनाहाॽरे़ हाङ्ङिन् यर्दन वहःङ् नाधाःम्बि मे़समे़ध॥ 41 खे़न् एगाङ् इस्राइलबा के़रे़क् मनाहाॽ सोरिक् मे़बोःक्खे़आङ् हाङ्ङिल्ले़ओ मे़द्ये़, हे़क्क्याङ् अक्खे मे़मे़त्तु, “आनिगे फुॽनुसाॽ यहुदाबा मनाहाॽरे़ आदाङ्बा थेआङ् के़म्देॽरे़बा, हे़क्क्याङ् हाङ्ङिन् नु खुने़ॽ कुहिम्सयङ् हे़क्क्याङ् खुने़ॽ कुमनाहाॽ यर्दन नाहाङ्दाङ् मे़देॽरुसिआङ् मे़दारुसिबा?” 42 यहुदाबा मनाहाॽरे़ मे़मे़त्तु, “थेआङ्भे़ल्ले़ हाङ्ङिङ्ग आबाङे आनिगे मनारो॥ कन् पाःन्नो आदाङ्बा थेआङ् आनिगे़नु के़सिक् पोःक्पाबे? आनिगे हाङ्ङिल्ले़ कुयाङ् चाम्बे़आङ् वाॽबि? आनिगे थे़मा सुङ्हाॽ ताःक्तुम्बे़आङ् वाॽबे?” 43 इस्राइलबा मनाहाॽरे़ यहुदाबा मनाहाॽ मे़मे़त्तुसि, “हाङ्ङिन् आनिगे़न् के़लॽबा थिबोङ्लक् कत्तुम्बे़, हे़क्क्याङ् दाउदरे़ओ खे़निॽइन्नुःल्ले़ यरिक् हाङ्ङिन् आनिगे़न् के़लॽबा युक् कत्तुम्बे़॥ आनिगे थेआङ् योयोक्पा याप्मि के़इःत्तिबा? हाङ्ङिन् नुःक्माआङ् ताःप्पा पाःन्निन् आनिगे तगि चोगुम्बे़बा मेःम्बि?” कर यहुदाबा मनाहाॽरे़ इस्राइलबा मनाहाॽनुःल्ले़ यम्बा यम्बा पान् मे़बाःत्तुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.