२ हाङ् 9 - लिम्बुयेहुन् इस्राइलओ हाङ् पोङ्मारे़ लागि माङ्थोःक्मा मे़बिरु 1 माङ्निङ्वाॽपान् के़बाःप्पा एलिसाःल्ले़ माङ्निङ्वाॽपान् के़बाःप्पा मनासुम्हाॽओबा थिक्पा उःत्तुआङ् मे़त्तु, “के़भॽइन् युप्से़ॽ, हे़क्क्याङ् खे़ने़ॽ कन् निःङ्गेॽ के़याक्पा पर्यामान् तेॽरे़आङ् रामोत-गिलादओ पेगे़ॽ॥ 2 आल्ल खे़ने़ॽ खे़प्मो के़गे़त्तिल्ले़ निम्सिरे़ कुम्मे़न्छाॽ, यहोसापातरे़ कुस्सा येहुन् कोःत्ते़ॽ॥ खे़ने़ॽ खुने़ॽ वाॽबादे़न्नो पेगे़ॽ, खुने़ॽ कुजुम् कुदेःङ्हाॽलाम् लाःत्लाःत् उःत्ते़ॽआङ् सिगाङ् याक्फाङ्ङो तेॽरे़ॽ॥ 3 खे़ब्याङ् कन् पर्यामोबा निःङ्गेन् खे़ल्ले़ कुधे़गेःक्को हुक्खे़ॽआङ् अक्तङ्बा उवा चोगे़ॽ, ‘यहवे दाङ्बे़ल्ले़ अक्खे पाःत्तुॽ—आङ्गाॽ खे़ने़ॽ इस्राइलबा हाङ् पोङ्मारे़ लागि माङ्थोःक्ना पिने़रो॥’ खे़ब्याङ् लाम्धेःत्तिन् हन्दे़ॽआङ् खे़त्छिङ्ङे़ॽ, पःन्दॽ पःन्दॽ मे़सुसे़न्ने़ॽ॥” 4 कल्ले़चोगुल्ले़ माङ्निङ्वाॽपान् के़बाःप्पा खे़न् थाङ्बे़न्निन् रामोत-गिलाद पे॥ 5 आल्ल खुने़ॽ खे़प्मो के़रे़भे़रे़ल्ले़ खुने़ॽ थक्सुबा सुहाङ्युक्पाहाॽ सोरिक् मे़जुप्से़बा नु मे़युङे़ मे़गरे़बा तुमुसि॥ खुने़ॽ मे़त्तुसि, “सुहाङ्युक्पाए, आङ्गाॽ खिनिॽनु पान् पाःप्मा थिक् कत्तुङ्ॽ॥” येहुःल्ले़ सेःन्दोसु, “आनिगे लुम्मोबाहाॽओ हाःत्नुग?” खुने़ॽ मे़त्तु, “आदाङ्बानु, सुहाङ्युक्पाए॥” 6 येहुन् पोगे़आङ् हिम्मो लासे़॥ खे़न् माङ्निङ्वाॽपान् के़बाःप्पे़ल्ले़ खुने़ॽ कुधे़गेःक्को निःङ्गेन् हुक्खु हे़क्क्याङ् अक्खे पाःत्तुआङ् उवा चोगु, “यहवे दाङ्बा इस्राइलबा निङ्वाॽफुमाङ्ङिल्ले़ अक्खे पाःत्तुॽ—‘आङ्गाॽ खे़ने़ॽ यहवे दाङ्बे़ल्ले़ कुमना इस्राइलओ हाङ् पोङ्मारे़ लागि माङ्थोःक्ना पिने़रो॥ 7 खे़ने़ॽ के़न्दाङ्बा आहाबरे़ कुहिम्सयङ्हाॽ खाप्पुथ्यःङ् के़मे़क्खुसिर पोङ्ॽ, इजेबेलरे़ से़रुसिबा आङ्गाॽ आसे़वारोबाहाॽ, हे़क्क्याङ् माङ्निङ्वाॽपान् के़बाःप्पाहाॽरे़ खुन्छिॽ माक्खिॽ नु यहवे दाङ्बे़ल्ले़ कुसे़वारोबाहाॽरे़ खुन्छिॽ माक्खिल्ले़ कुले़क्वा आङ्गाॽ नुःक्तुङ्ॽ॥ 8 आहाबरे़ के़रे़क् कुहिम्सयङ्हाॽ मे़मे़क्॥ इस्राइलओ खे़ल्ले़ कुहिम्सयङ् थक्माबा ये़म्बित्छा, योक् मेःम्बा इग्र योक् आत्तिन्छाङ् आङ्गाॽ मे़क्खुङ्सिङ्ॽ॥ 9 आङ्गाॽ आहाबरे़ कुहिम्सङ्हाॽ नाबातरे़ कुस्सा यारोबाम नु अहियाहरे़ कुस्सा बासाःल्ले़ कुहिम्सयङ् कुइसिक् चोगुङ्सिङ्ॽ॥ 10 इजेबेले़न् यिजरेलबा लत्छा ते़न्नो कोःत्चोहाॽरे़ हाबाक् हाबाक् मे़बाक्तुॽ, हे़क्क्याङ् खे़न् आत्तिन्हाॽरे़आङ् मे़ल्लुप्तुन्ॽ॥’” खे़न् एगाङ् खुने़ॽ लाम्धेःत्ते़न् हन्दुआङ् लोःक्ते़घे़रे़॥ 11 आल्ल येहुन् याम्मो थक्सुबा सुहाङ्युक्पाहाॽओ लाःक्कात् लःन्दे़आङ् त्ये़ःल्ले़ खे़ङ्हाॽओबा लत्छारे़ खुने़ॽ सेःन्लाप्तु, “थे के़रे़क् नुबाए वाॽबि? खे़न् के़नाङ्बा मनान् थेआङ् खे़ने़ॽओ त्ये़बारे़त्छ?” येहुःल्ले़ नुगप् पिरुसि, “खिनिॽ खे़न् मनान् कुसेःन् के़निसुम्ॽ, हे़क्क्याङ् खे़ल्ले़ पाःत्तुॽ खे़ङ्ग खिनिॽ के़निसुम्माङ्ङे वाॽ॥” 12 खे़ङ्हाॽरे़ खुने़ॽ मे़मे़त्तु, “खे़न् पाःन्निन् से़क्खा मेःन्, कुदोःप्मा पान् आनिगे आजे़क्ते़ॽ॥” येहुःल्ले़ मे़त्तुसि, “खुने़ॽ आङ्गाॽ मे़त्ताङ्बा पाःन्निन्, हाबा कन्लो—‘यहवे दाङ्बे़ल्ले़ अक्खे पाःत्तुॽ—आङ्गाॽ खे़ने़ॽ इस्राइलओ हाङ् पोङ्मारे़ लागि माङ्थोःक्ना पिने़रो॥’” 13 खे़ब्याङ् खे़ङ्हाॽरे़ खिमो खुन्छिॽ लाकात्पा चाङ्हाॽ मे़भे़न्दुआङ् नाहाङ्सेःक्कोबा लुङ्हाॽओ खुने़ॽ लाङ्घेःक्मारे़ लागि मे़भे़सु मे़ने़स्सु॥ हम्भ्याङ् खे़ङ्हाॽरे़ थुत्तुरिःप्पा सादाङ्ङिन् मे़मुःत्तुआङ् मे़अःक्ते़आङ् मे़बाःत्तु, “येहुन् हाङ्लो!” इस्राइलबा योराम हाङ्ङिन् मे़से़रु 14 कल्ले़चोगुल्ले़ निम्सिरे़ कुम्मे़न्छाॽ, यहोसापातरे़ कुस्सा येहुःल्ले़ योरामरे़ कुदक्ले़ङ्वाओ चे़म्भन् चोगु॥ आल्ल योराम नु के़रे़क् इस्राइलिहाॽरे़ अरामबा हाङ् हजाएलरे़ कुदक्ले़ङ्वाओ रामोत-गिलादे़न् मे़से़ःप्तुर मे़यागे़, 15 कर योराम हाङ्ङिन्ग अरामबा हाङ् हजाएलरे़ कुदक्ले़ङ्वाओ थङ् थक्ते़ल्ले़ अरामिहाॽरे़ खुने़ॽ मे़घाःन्दुबा याङ्घेःक्कोलाम् वेःप्मारे़ लागि यिजरेल पेआङ् वये़॥ येहुःल्ले़ खुने़ॽनु के़वाॽबाहाॽ मे़त्तुसि, “खिनिॽ अक्तङ्बाए निङ्वाॽ के़गत्तुम्ने़भग्र, यिजरेलओ कन् इङ्घङ्ङिन् के़प्मारे़ लागि ये़क्यक्कोलाम् हाःत्ताङ् खे़त्छिङ्मा मे़घोने़न्लरो॥” 16 खे़ब्याङ् खुने़ॽ कुअन्लाधान् युक्तुआङ् यिजरेल पे, थेआङ्भे़ल्ले़ योरामे़न् खे़प्मो नाःम्सिङ्ल वये़, हे़क्क्याङ् यहुदाबा हाङ् अहज्याहन् खुने़ॽ तुम्मारे़ लागि खे़प्मो थासिङ् ये़आङ् वये़॥ 17 आल्ल यिजरेलबा चङ्हिम्मो के़ये़प्पागे़गम्बा इक्के़गोबे़ल्ले़ येहुःल्ले़ कुधक्सुबाहाॽ मे़ये़र मे़बत्छे़बा निसुसि, खे़ब्याङ् खुने़ॽ अःक्ते़आङ् मे़त्तुसि, “आङ्गाॽ कुभा थक्सुबाहाॽ मे़युर मे़बप्पा निसुङ्सिङ्लो॥” योरामरे़ इङ्जाङ् पिरुआङ् मे़त्तु, “अन्गे़युक्पा थिक् खे़ङ्हाॽरे़ खुन्छिॽ तुम्से़ पाङ्घे़देसे़ॽआङ् सेःन्दोसुसिर याःन्दे़ॽ, ‘थे आदाङ्बासि तङ्मारे़ लागि के़ये़ॽइबाबि?’” 18 खे़न् अन्गे़युक्पे़न् येहुःल्ले़ कुदुम्से़ पेआङ् मे़त्तु, “हाङ्ङिल्ले़ अक्खे पाःत्तुॽ—‘थे आदाङ्बा तङ्मारे़ लागि के़ये़बाबि?’” येहुःल्ले़ नुगप् पिरु, “तङ्मारे़ लागिमुए, खे़ने़ॽ के़धे सक्सक्पे? खे़ने़ॽ आङ्गाॽ आएगाङ् तिम्दाङ्ङे़ॽ॥” खे़न् इक्के़गोबे़ल्ले़ हाङ्ङिन् मे़त्तु, “खे़न् इङ्साबे़ल्ले़ खे़ङ्हाॽ तुम्माग तुमुसि, कर खे़न् याङ्ना मे़नुःक्खे़न् मे़भे़रे़न्लो॥” 19 खे़ब्याङ् हाङ्ङिल्ले़ वेॽ अन्गे़युक्पा थिक् पाङ्घुदेसु॥ आल्ल खुने़ॽ खे़ङ्हाॽरे़ओ के़रे़आङ् मे़त्तुसि, “हाङ्ङिल्ले़ अक्खे पाःत्तुॽ, ‘थे आदाङ्बासि तङ्मारे़ लागि के़ये़ॽइबाबि?’” येहुःल्ले़ नुगप् पिरु, “तङ्मारे़ लागिमुए, खे़ने़ॽ के़धे सक्सक्पे? खे़ने़ॽ आङ्गाॽ आएगाङ् तिम्दाङ्ङे़ॽ॥” 20 खे़न् इक्के़गोबे़ल्ले़ मे़त्तुसि, “खे़न् इङ्साबे़ल्ले़ खे़ङ्हाॽ तुम्माग तुमुसि, कर खे़न् याङ्ना मे़नुःक्खे़न् मे़भे़रे़न्लो॥ खे़न् अन्लाधा लोङ्मे़ङ्ग निम्सिरे़ कुस्सा येहुःल्ले़ लोःक्खुबा हे़क्के लॽ॥ खे़ल्ले़ के़नाङ्बा कुइसिक् लोःक्खुॽ॥” 21 योरामरे़ मे़त्तुसि, “आङ्गाॽ आअन्लाधान् यारिप् चोगे़म्मे़ॽ॥” आल्ल खे़ङ्हाॽरे़ खे़न् यारिप् मे़जोगु, खे़ब्याङ् इस्राइलबा हाङ् योराम नु यहुदाबा हाङ् अहज्याहन् खुन्छिॽ आप्फेक् आप्फेक् अन्लाधाहाॽ युक्तुसिआङ् येहुःल्ले़ कुदुम्से़ पेसे़त्छि॥ खे़न् ने़प्फुरे़ खुने़ॽ यिजरेलि नाबोतरे़ कुलाजेॽ लक्कोए तुमे़त्छु॥ 22 आल्ल योरामरे़ येहुन् निसुआङ् खुने़ॽ खे़न् सेःन्लाप्तु, “येहुए, थे खे़ने़ॽ तङ्मारे़ लागि के़ये़बाबि?” येहुःल्ले़ नुगप् पिरु, “के़म्मा इजबेलरे़ के़रे़क् कुनावाइत्लाहाॽ से़वा मे़प्मा नु के़रे़क् कुगित्चाक् चोःक्माहाॽ वाॽइल्ले़ थेःल्ले़ तङ्मारे़ लागिबे?” 23 योरामरे़ कुअन्लाधान् हिसुआङ् अहज्याहन् अक्खे मे़त्तुर खे़त्छिङ्, “अहज्याहए, चे़म्भन् पोःक्खे़रे़त्छ!” 24 खे़ब्याङ् येहुःल्ले़ खुने़ॽ कुलिन् खिङ्घिङ् ले़ॽरुआङ् योरामे़ल्ले़ कुभक्ताङ्हाॽरे़ कुलुम्मो आबु॥ खे़न् तोःङ्ङिल्ले़ खुने़ॽ कुलुङ्मे़न् फ्याक् लस्सु हे़क्क्याङ् खुने़ॽ कुअन्लाधाओए हर्जुॽ चोःन्दे़॥ 25 खे़ब्याङ् येहुःल्ले़ अन्लाधाबा सुहाङ्युक्पा बिदकारे़न् मे़त्तु, “खे़न् पक्खे़ॽआङ् यिजरेलि नाबोतरे़ कुलाजेॽ लक्को लाप्पुङ्देसे़ॽ॥ खे़ने़ॽ नु आङ्गाॽ खे़ल्ले़ कुम्बा आहाबरे़ कुएगाङ् सोसोरिक् अन्लाधाहाॽओ आबेसे़त्छिल्ले़ खे़ल्ले़ कुयाःम्बेओ आक्खेलॽरिक् यहवे दाङ्बे़ल्ले़ कन् माङ्निङ्वाॽपान्निन् पाःत्तुआङ् वये़, खे़न् खे़ने़ॽ के़निङ्वाॽ याक्लाॽबा, 26 ‘यहवे दाङ्बे़ल्ले़ अक्खेलॽरिक् उवा चोगुॽ, आङ्गाॽ आन्छे़न् नाबोते़न् नु खुने़ॽ कुस्साहाॽरे़ खुन्छिॽ माक्खिन् निसुङ्, हे़क्क्याङ् आङ्गाॽ से़क्खाए खे़ने़ॽ आम्भा कन् लाजेॽ लक्को कुले़क्वा नुःक्तुङ् पिने़॥’ कल्ले़चोगुल्ले़ यहवे दाङ्बे़ल्ले़ कुइङ्घङ् कुइसिक् खे़न् पक्खे़ॽआङ् हाबा कन् लाजेॽ लक्को लाप्फेसे़ॽ॥” यहुदाबा हाङ् अहज्याहन् मे़स्ये़रुॽ 27 आल्ल यहुदाबा हाङ् अहज्याहःल्ले़ कन् निसु, खे़ब्याङ् खुने़ॽ बेथ-हागान पेःक्मा लाम् पोःक्खे़आङ् खे़त्छिङ्॥ येहुःल्ले़ खुने़ॽ निसुआङ् नाःत्तुर अःक्ते़आङ् मे़त्तुसि, “खे़न्नाङ् से़रे़म्मे़ॽ!” खे़ङ्हाॽरे़ खुने़ॽ यिबलाम कुबेसाङ् गुरबा थाम्माङ् के़बेःक्पा लाम्मो खुने़ॽ अन्लाधाओए मे़घाःन्दु, कर खुने़ॽ खे़त्छिङ्ङाङ् मगिद्दो पे, हे़क्क्याङ् खे़प्मोए स्ये़॥ 28 खुने़ॽ कुसे़वारोबाहाॽरे़ खुने़ॽ कुजेन् अन्लाधाओलाम् यरुसले़ःम्मो मे़धाक्तुआङ् दाउदरे़ कुये़क्यक्को खे़ल्ले़ कुसुधे़बा कुधाःक्थे़बाहाॽनु खुने़ॽ कुइपुङ्ङो मे़जिक्खु॥ 29 (आहाबरे़ कुस्सा योरामरे़ कुहाङ्युक् ये़म् थिबोङ्ङाङ् थिक्सिगेक्पा तङ्बेओ अहज्याहन् यहुदाबा हाङ् पोःक्खे़रो॥) इजेबेल हाङ्मान् मे़से़रु 30 खे़ब्याङ् येहुन् यिजरेल थासिङ्॥ थेधे पोःक्खे़आङ् वये़ खे़न् इजेबेलरे़ खे़प्सु, खे़ब्याङ् खुने़ॽ कुमिक्हाॽओ माक्सुःन्दा चाःन्दु, हे़क्क्याङ् कुधे़गेःक्किन् फयुआङ् लत्छा पेधाःप्पोलाम् लाःक्कात् ओमये़॥ 31 आल्ल येहुन् यम्बा लाम्धेःप्पोलाम् सिगाङ् लासे़ल्ले़ इजबेलरे़ सेःन्दोसु, “आप्फेक् कुन्दाङ्बा के़से़प्पा जिम्रिए, थे खे़ने़ॽ तङ्मारे़ लागि के़ये़बाबि?” 32 येहुन् थाःङ् पेधाःप्पो ले़प्माङ् ओमुये़आङ् अःक्ते़र पाःत्तु, “आङ्गाॽ ले़प्माङ् हात् वाॽबे? हात् वाॽबे?” खे़ब्याङ् ने़त्छि सुम्सि सिङ्गारुहाॽरे़ लाःक्कात् खुने़ॽ ले़प्माङ् ओमे़मे़त्तु॥ 33 खुने़ॽ मे़त्तुसि, “खे़न् मे़न्छुमान् मु लाप्फुसे़म् युसे़म्मे़ॽ॥” कल्ले़चोगुल्ले़ खे़न् मु लाप्मे़भुसु मे़युसु, हे़क्क्याङ् खे़ल्ले़ कुभा कुमाक्खिॽहाॽ से़रे़आङ् लुङ्धाक्को नु खुने़ॽ चिराक् चिराक् के़लाःक्पा अन्हाॽ पित्तुसि॥ 34 खे़ब्याङ् येहुन् हाङ्हिम्मो लासे़आङ् कुजा च थुङु॥ खे़न् एगाङ् खुने़ॽ मे़त्तुसि, “माङ्दे साङ्ग्राःल्ले़ ते़त्तुमा कन् मे़न्छुमान् नुरिक् पक्खे़म् तेॽरे़म्मे़ॽआङ् लुप्ते़म्मे़ॽ॥ थेआङ्भे़ल्ले़ च्या पोःक्खे़साङ् कन् हाङ्ङिल्ले़ कुस्सा मे़न्छुमा वये़॥” 35 कर आल्ल खे़ङ्हाॽ खुने़ॽ लुप्मारे़ लागि यो मे़बेःल्ले़ खे़ल्ले़ कुमिक्खोक्, कुलाङ्हाॽ नु कुहुक्हाॽरक् मे़घोसु वेॽ थेआङ् मे़ङ्घोसुन्॥ 36 खे़ङ्हाॽ मे़नुःक्खे़ मे़धाङे़आङ् येहुन् मे़जे़क्तु॥ खुने़ॽ खे़ङ्हाॽ मे़त्तुसि, “यहवे दाङ्बे़ल्ले़ कुसे़वारोबा तिस्बि एलियालाम् खुने़ॽ पाःत्तुबा कुइङ्घङ्ङिन् हाबा कन् वये़रो, यिजरेलबा खे़न् लाजेॽ लक्को इजेबेलरे़ कुने़क्सान् ख्याबाहाॽरे़ मे़बाक्तुॽ॥ 37 इजेबेलरे़ कुजेन् यिजरेलबा हाबा खे़न् लाजेॽ लक्को थक्सा हि कुइसिक् ने़जारो, हे़क्केलॽरिक् ‘कन् इजेबेलरे़ कुजे’ फाॽआङ् हाःत्ले़आङ् पाःप्मा मे़सुक्तुन्लरो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.