२ हाङ् 8 - लिम्बुसुनम्मि मे़न्छुमान् नुःक्खे़द्ये़ 1 आल्ल आत्तिन् मे़न्छुमाःल्ले़ कुस्सा ये़म्बित्छान् एलिसाःल्ले़ याम्मो कुहिङ्वे़त् चोगुआङ् वये़, खे़न् मे़न्छुमान् खुने़ॽ अक्खे मे़त्तु, “खे़ने़ॽ के़हिम्सयङ्हाॽनु सोरिक् कप्मोलाम् पेगे़घे़रे़ॽ, हे़क्क्याङ् कुभा ये़म् आत्ति पोङ्ॽ हाबा खे़प्मो युङे़ॽ, थेआङ्भे़ल्ले़ यहवे दाङ्बे़ल्ले़ इस्राइल लाजेॽओ तङ्बे नुसि थारिक् साक् पोःक्मा इङ्जाङ् चोगुआङ् वाॽ॥” 2 निङ्वाॽफुमाङ्ङिल्ले़ कुमनाःल्ले़ पाःत्तुबा हे़क्के खे़न् मे़न्छुमाःल्ले़ चोगु॥ खुने़ॽ कुहिम्सयङ्हाॽनु सोरिक् पेघे़रे़, हे़क्क्याङ् पलिस्तिहाॽरे़ खुन्छिॽ लाजेॽओ तङ्बे नुसि युङे़॥ 3 तङ्बे नुसि कुनुप्मो खुने़ॽ पलिस्तिहाॽरे़ खुन्छिॽ लाजेॽओलाम् नुःक्खे़ थाङे़, हे़क्क्याङ् खुने़ॽ कुहिम् कुधाःङ् नु कुलाजेॽ सिङ्बुङ्हाॽ याम्मो खोमारे़ लागि पेलि फाक्से़ खुने़ॽ हाङ्ङे़ओ पे॥ 4 खे़न् ये़म्मो हाङ्ङिन्ग निङ्वाॽफुमाङ्ङिल्ले़ कुमनाःल्ले़ कुसे़वारोबा गेहजिःन्नु अक्खेलॽरिक् ताॽजे़ङ्नु युङे़, “एलिसाःल्ले़ चोगुबा के़रे़क् पयम् यम्बा याःम्बक्हाॽरे़ कुयाःम्बेओ आङ्गाॽ मे़त्ताङ्ङे़ॽ॥” 5 आल्ल एलिसाःल्ले़ के़सिबा मनान् आक्खेलॽरिक् याम्मो कुहिङ्वे़त् चोगु लॽरिक् गेहजिःल्ले़ हाङ्ङिन् चे़क्तुर यागे़ल्ले़, खुने़ॽ कुस्सा ये़म्बित्छान् एलिसाःल्ले़ कुसिवे़त्लाम् कुहिङ्वे़त् चोगु पिरुआङ् के़वाॽमा मे़न्छुमान् खुने़ॽ आप्फेक् कुहिम् कुधाःङ् नु कुलाजेॽ सिङ्बुङ्हाॽरे़ लागि हाङ्ङिन् पेलि फाक्से़ त्ये़॥ हे़क्क्याङ् गेहजिःल्ले़ मे़त्तु, “आदाङ्बा पयम् हाङ्ङे, ‘हाबा कन् मे़न्छुमान्लो, हे़क्क्याङ् एलिसाःल्ले़ कुहिङ्वे़त् चोगुबा खुने़ॽ कुस्सा ये़म्बित्छान् हाबा कन्लो॥’” 6 हाङ्ङिल्ले़ खे़न् मे़न्छुमान् खे़ल्ले़ कुयाःम्बेओ सेःन्दोसु, हे़क्क्याङ् खे़न् मे़न्छुमाःल्ले़आङ् याङ्ना चे़क्तु॥ खे़ब्याङ् हाङ्ङिल्ले़ खे़ल्ले़ कुदुःन्देन् लत्छा सुहाङ्युक्पे़न् हुक्सुप्तुआङ् खे़न् मे़त्तु, “खे़न् मे़न्छुमाःल्ले़ के़रे़क् कुलाजेॽ सिङ्बुङ्हाॽ, लाजेन् नु कुहिम्मे़न् ले़रुआङ् पेबा ये़म्माङ्धो आल्लो थारिक्पा लाजेॽ सिङ्बुङ्हाॽओलाम् के़बोःक्पा पोगुगे़न् कुजाःल्ले़ कुमे़ल्लुङ्ङाङ् के़रे़क् खे़न् नुःक्ते़ पिरे़ॽओ॥” हजाएलरे़ बेन-हददे़न् से़रु 7 एलिसान् अरामबा हाङ्पाङ् दमस्कस पे, खे़न् ये़म्मो हाङ् बेन-हददे़न् तुगे़आङ् ने़स्से़॥ “निङ्वाॽफुमाङ्ङिल्ले़ कुमनान् कप्मो फे़रे़आङ् वाॽ” फाॽआङ् हाङ्ङिन् मे़मे़त्तुल्ले़, 8 खुने़ॽ कुसुहाङ्युक्पा हजाएले़न् मे़त्तु, “खे़ने़ॽ हुक्वाहाॽ तेॽरे़आङ् निङ्वाॽफुमाङ्ङिल्ले़ कुमनान् तुम्से़ पेगे़ॽ॥ खुने़ॽलाम् यहवे दाङ्बे़न् सुजा नाःक्ते़ॽआङ् सेःन्दोसे़ॽ, ‘थे कन् तुक्मोलाम् आङ्गाॽ हिङ्ङाबि?’” 9 हजाएलरे़ हुक्वा कुइसिक् दमस्कसबा के़रे़क् परिक्पा नुबा नुबा पाःन्हाॽ लिबोङ् उमेहाॽ कुःत्तुसिआङ् खुने़ॽ एलिसाओ पे॥ खुने़ॽ सिगाङ् लासे़आङ् माङ्निङ्वाॽपान् के़बाःप्पे़ल्ले़ कुदगि ये़म्सिङ्ङाङ् मे़त्तु, “आदाङ्बारे़ के़स्सा अरामबा हाङ् बेन-हददरे़ कन् पाःन्निन् सेःन्दोमारे़ लागि आङ्गाॽ आदाङ्बारे़ॽओ पाङ्घाङ्ङाङ् वाॽ, ‘थे कन् तुक्मोलाम् आङ्गाॽ वेःत्ताबि?’” 10 एलिसाःल्ले़ नुगप् पिरु, “खे़ने़ॽ पेगे़ॽआङ् खे़न् मे़त्ते़ॽ, ‘खे़ने़ॽ से़क्खाए के़वेःत्॥’ कर यहवे दाङ्बे़ल्ले़ आङ्गाॽ कन् पाःन्निन् ओःन्धाक्ताङ्ङाङ् वाॽ, से़क्खाःल्ले़ खुने़ॽ सिरो॥” 11 एलिसाःल्ले़ खुने़ॽ अदक्तक् लॽरिक् ओमे़त्तु फत्छु, हे़क्क्याङ् हजाएले़न् सिरिङ्ममो थ्ये़॥ खे़ब्याङ् निङ्वाॽफुमाङ्ङिल्ले़ कुमनान् हाःप्मा हेःक्ते़॥ 12 हजाएलरे़ सेःन्दोसु, “आदाङ्बाए, आदाङ्बा थेआङ् के़हाःप्पाबे?” एलिसाःल्ले़ नुगप् पिरु, “थेआङ्भे़ल्ले़ खे़ने़ॽ इस्राइलिहाॽ ताप्फे़ःल्लिक् मे़प्मा के़इःत्तुसिबान् आङ्गाॽ निसुङ्ॽ॥ खे़ने़ॽ खे़ङ्हाॽरे़ खुन्छिॽ यक्हाॽओ मि के़गेःत्तुॽ, हे़क्क्याङ् खे़ङ्हाॽरे़ खुन्छिॽ थाङ्बे़न् मनाहाॽ ताभेःल्ले़ के़से़रुसिॽ, खे़ङ्हाॽरे़ खुन्छिॽ चुजुक्सा अङे़ःक्वा साहाॽ खाम्बाङ्ङो के़धाप्सु के़से़रुसिॽ, कुस्सा के़याक्मा मे़न्छुमाहाॽरे़ खुन्छिॽ साप्पोःक्किन् के़जे़रु के़बिरुसिॽ॥” 13 हजाएलरे़ मे़त्तु, “आङ्गाॽ मे़न्जोबा लत्छा कोःत्चोःल्ले़ कम्म्याक् यम्बा याःम्बक्किन् आक्खेआङ् चोःक्मा सुक्तुङ्बे?” एलिसाःल्ले़ नोगप् पिरु, “खे़ने़ॽ अरामबा हाङ् के़बोङ्ॽ फाॽआङ् यहवे दाङ्बे़ल्ले़ आङ्गाॽ ओसेःन्धाक्ताङ्ङाङ् वाॽ॥” 14 खे़न् एगाङ् हजाएले़न् एलिसान्नु से़रे़, हे़क्क्याङ् खुने़ॽ कुन्दाङ्बो नुःक्खे़ फे़रे़॥ आल्ल बेन-हददरे़ खुने़ॽ सेःन्दोसु, “एलिसाःल्ले़ खे़ने़ॽ थे के़मे़त्ते़बे?” हजाएलरे़ नोगप् पिरु, “आदाङ्बा से़क्खाए के़वेःत् फाॽआङ् खुने़ॽ मे़त्ताङ्॥” 15 कर कुदाःन्दिक्मा खुने़ॽ लत्छा के़धुङ्बा खाम्देःत् थिक् याङ्सिङ् हे़क्क्याङ् च्वाःत्तो हुम्सुआङ् हाङ्ङिल्ले़ कुनारान् पन्छुबिरु, खे़ब्याङ् कम्भलॽरिक् हाङ्ङिन् स्ये़॥ खे़न् एगाङ् हजाएले़न् हाङ् पोःक्खे़रो॥ यहुदाबा हाङ् यहोराम ( २ साप्मु २१:१-२० ) 16 इस्राइलबा हाङ् आहाबरे़ कुस्सा योरामे़ल्ले़ हाङ्युक् चोगुबा ङासिगेक्पा तङ्बेओ, आल्ल यहोसापाते़न् यहुदाबा हाङ् वये़, खे़ब्याङ् यहोसापातरे़ कुस्सा यहोरामे़न् यहुदाबा हाङ् पोःक्खे़आङ् खुने़ॽ हाङ्जुम् चोःक्मा हेःक्तु॥ 17 आल्ल यहोरामे़न् हाङ् पोःक्खे़ल्ले़ खुने़ॽ सुम्बोङ्ङाङ् ने़त्छि तङ्बे के़रे़आङ् वये़, हे़क्क्याङ् खुने़ॽ यरुसले़ःम्मो तङ्बे ये़त्छि हाङ्युक् चोगु॥ 18 आहाबरे़ कुहिम्सयङ्हाॽरे़ मे़जोगुबा हे़क्केए खुने़ॽ इस्राइलबा हाङ्हाॽरे़ खुन्छिॽ लाम्मो लाङ्घेगे़, थेआङ्भे़ल्ले़ खुने़ॽ अहाबरे़ कुस्सा मे़न्छुमा थिक् ते़न्धाम् मेःक्खिम् मे़त्तु॥ यहवे दाङ्बे़ल्ले़ कुनिमो थेःन् ताप्फे़ःम्बा चोगे़ हाबा खे़न्ने खुने़ॽ चोगु॥ 19 करसाङ् कुसे़वारोबा दाउदरे़ चोगुल्ले़ यहवे दाङ्बे़ल्ले़ यहुदान् मे़ङ्मा निङ्वाॽ मे़जोगुन्॥ खुने़ॽ दाउदे़न् नु कुमुॽइदाङ्साहाॽरे़ लागि आभे़ल्ले़साङ् सदादिङ् के़दिःप्पाआङ् के़युङ्बा सेमि हाःम्मा माङ्हुप् चोगुआङ् वये़॥ 20 यहोरामरे़ कुये़म्मो यहुदाःल्ले़ कुदक्ले़ङ्वाओ एदोमे़न् पिफ्युङ्बा पोःक्खे़आङ् खुने़ॽ आप्फेक् कुलागि लत्छा हाङ् फोःक्खु॥ 21 कल्ले़चोगुल्ले़ यहोरामरे़ के़रे़क् कुअन्लाधाहाॽ तेॽरुसिआङ् जाइर पाङ्जुम्मो पे॥ एदोमिहाॽरे़ खुने़ॽ नु खुने़ॽ कुअन्लाधाहाॽओबा थक्मोबाहाॽ किर्गप् मे़गबुसि, कर खुने़ॽ पोगे़आङ् खे़ङ्हाॽ फत्तुसि हे़क्क्याङ् से़न्दिक्सा पिन्दे़घे़रे़॥ हे़क्केसाङ् खुने़ॽ कुधक्सुबाहाॽ मे़घे़त्छिङ्ङाङ् खुन्छिॽ हिम्मो मे़नुःक्खे़ मे़बे॥ 22 एदोमे़न् आइन्बा ये़न् थारिक्के यहुदाःल्ले़ कुदक्ले़ङ्वाओ पिफ्युङ्बा पोःक्खे़आङ् वाॽ॥ लिब्नाःन्नाङ् हाबा खे़न् ये़म्मोए पिफ्युङ्बा पोःक्खे़॥ 23 यहोरामरे़ हाङ्युक् ये़म्मोबा वेॽ हिन्दोक्हाॽ नु खुने़ॽ चोगुबा के़रे़क् याःम्बक्हाॽ थे यहुदाबा हाङ्हाॽरे़ खुन्छिॽ साप्मुःन्धुम् साप्पन्नो साप्ते़आङ् मे़बप्ने़न्नाङ्बि? 24 खे़ब्याङ् यहोरामे़न् खुने़ॽ कुसुधे़बा कुदाक्थे़बाहाॽनु तङ्सिङ्से़ पे, हे़क्क्याङ् खे़ङ्हाॽनु सोरिक् खुने़ॽ दाउदरे़ कुये़क्यक्को मे़जिक्खु॥ हे़क्क्याङ् खुने़ॽ कुएगाङ् कुस्सा अहज्याहन् हाङ् पोःक्खे़रो॥ यहुदाबा हाङ् अहज्याह ( २ साप्मु २२:१-६ ) 25 इस्राइलबा हाङ् आहाबरे़ कुस्सा योरामरे़ हाङ्युक् चोगुबा थिबोङ्ङाङ् निसिगेक्पा तङ्बेओ यहुदाबा हाङ् यहोरामरे़ कुस्सा अहज्याहःल्ले़ हाङ्युक् चोःक्मा हेःक्तु॥ 26 आल्ल अहज्याहन् हाङ् पोःक्खे़ल्ले़ खुने़ॽ निबोङ्ङाङ् ने़त्छि तङ्बे योरे़, हे़क्क्याङ् खुने़ॽ यरुसले़ःम्मो तङ्बे थिक् हाङ्युक् चोगु॥ खुने़ॽ कुम्मारे़ कुमिङ् अतल्याह वये़॥ खुने़ॽ इस्राइलबा हाङ् ओम्रिरे़ लत्छा कुम्मे़न्छाॽमा वये़॥ 27 अहज्याहःल्ले़ आहाबरे़ कुहिम्सयङ्हाॽरे़ खुन्छिॽ लाम्हाॽ नाःत्तु, हे़क्क्याङ् आहाबरे़ कुहिम्सयङ्हाॽरे़ मे़जोगुबा हे़क्के यहवे दाङ्बे़ल्ले़ कुनिमो आत्तिन् पाःन्निन् ताप्फे़ःम्बा चोगे़ हाबा खे़न्ने खुने़ॽ चोगु, थेआङ्भे़ल्ले़ ते़न्धाम् मेःक्खिम्मिल्ले़ चोगुल्ले़ खुने़ॽ कुगाॽइन् अहाबरे़ कुहिम्सयङ्हाॽनु वये़॥ 28 अरामबा हाङ् हजाएलरे़ कुदक्ले़ङ्वाओ थङ् चोःक्से़ अहज्याहन् आहाबरे़ कुस्सा योरामे़न्नु रामोत-गिलादओ पे॥ कर अरामिहाॽरे़ योरामे़न् मे़घाःन्दु॥ 29 कल्ले़चोगुल्ले़ अरामबा हाङ् हजाएले़न्नु थङ् चोःक्से़ पेःल्ले़ रामोत-गिलादओ काःन्दे़बा याङ्घेःक्कोलाम् वेःप्मारे़ लागि योराम हाङ्ङिन् यिजरेल नुःक्खे़ फे़रे़॥ खे़ब्याङ् यहुदाबा हाङ् यहोरामरे़ कुस्सा अहज्याहन् योरामरे़ कुदुम्से़ यिजरेल पे, थेआङ्भे़ल्ले़ खे़न् काःन्दे़आङ् वये़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.