२ हाङ् 7 - लिम्बु1 एलिसाःल्ले़ मे़त्तु, “यहवे दाङ्बे़ल्ले़ कुइङ्घङ्ङिन् खे़प्से़ॽ॥ यहवे दाङ्बे़ल्ले़ अक्खे पाःत्तुॽ—ताःन्दिक् हाबा कन् ये़म्मो सामरियाबा यम्बा लाम्धेःत्तो कुआःत् थिक् युप्पारे़ किलोग्राम सुम्सि फेॽदुम् नु कुआत् थिक् युप्पारे़ किलोग्राम तुक्सि हःक्सि मे़इङु मे़सङ्घुॽ॥” 2 हाङ्ङिल्ले़ कत्तुबा सुहाङ्युक्पा से़वारोबे़ल्ले़ निङ्वाॽफुमाङ्ङिल्ले़ कुमनान् मे़त्तु, “ओमे़त्ते़ॽ, यहवे दाङ्बे़ल्ले़ साङ्ग्राम्पेदाङ्बा लाम्धेःत्हाॽ हन्दु आबिसाङ् अक्तङ्बा पोङ्मा थे सुक्काङ्बे?” एलिसाःल्ले़ नुगप् पिरु, “खे़ने़ॽ आप्फेक् के़मिक्किल्ले़ खे़न् के़निसुॽ, कर खे़ने़ॽ खे़प्मोलाम् थेआङ् चामा के़ङ्घोसुन्लो॥” अरामबा थक्सुबाहाॽ मे़घे़त्छिङ् 3 आल्ल खे़न् ये़क्यक्कोबा यम्बा लाम्धेःत्तिल्ले़ कुबेसाङ् आलिःक्लिःक्पा होरिक्पा तुक्मे़ल्ले़ तरुसिबा मना लिसि मे़युङे़॥ खे़ङ्हाॽ खुन्छिॽ लुम्मो अक्खे मे़मे़त्छिङ्, “आनिॽ थेआङ् आन्छिने़न्ल थारिक् कप्मो आयुङ्बाबे? 4 ‘ये़क्यक्को आनिॽ पेगि’ आबाःत्तुम्ने़भग्र खे़प्मो साक् पोगे़आङ् ने़रो हे़क्क्याङ् आनिॽ आसिरो॥ हे़क्क्याङ् कप्मो आनिॽ आयुङ्साङ् आसिरो॥ कल्ले़चोगुल्ले़ आल्ल अरामिहाॽरे़ खुन्छिॽ थक्सुबा ने़त्ना साःङ्गाहिम्मो पेगिआङ् हुक्सुप्पासिॽ॥ खे़ङ्हाॽरे़ आनिॽ आम्से़ःप्ने़भग्र आनिॽ आहिङ्ॽ॥ आनिॽ आम्से़त्ने़भग्र आनिॽ आसिरो॥” 5 खे़ब्याङ् युःन्छिक् माक्चिवजि लॽरे़ल्ले़ खे़ङ्हाॽ मे़बोगे़आङ् अरामिहाॽरे़ खुन्छिॽ थक्सुबा ने़त्ना साःङ्गाहिम् ले़प्माङ् मे़बे॥ आल्ल खे़ङ्हाॽ थक्सुबा ने़त्ना साःङ्गाहिम्मे़ल्ले़ कुयाओ मे़गे़रे़ल्ले़ खे़ङ्हाॽरे़ खे़प्मो लत्छा मनाआङ् मे़न्निसुन्॥ 6 थेआङ्भे़ल्ले़ अन्लाधाहाॽ, अन्हाॽ नु यरिक् थक्सुबाहाॽरे़ खुन्छिॽ इक्ला लाइःक्ते़बान् यहवे दाङ्बे़ल्ले़ अरामिहाॽरे़ मे़घे़प्सुर याःन्दुसिआङ् वये़, कल्ले़चोगुल्ले़ खे़ङ्हाॽ खुन्छिॽ लुम्मो अक्खे मे़मे़त्छिङ्, “ओमे़त्ते़म् साॽरे़म्मे़, इस्राइलबा हाङ्ङिल्ले़ग आनिॽ फप्मारे़ लागि हित्ति नु मिस्र लाजेॽबा हाङ्हाॽ याःल्लेक् साङु तारुसिआङ् वाॽ॥” 7 कल्ले़चोगुल्ले़ खे़ङ्हाॽरे़ युःन्छिक् खुन्छिॽ साःङ्गाहिम्हाॽ, अन्हाॽ, अदङ्हाॽ नु के़रे़क् पाःन्हाॽ मे़ले़रु मे़धआङ् हिङ्मारे़ लागि मे़घे़त्छिङ् मे़बेआङ् मे़वये़॥ थक्सुबा ने़त्ना साःङ्गाहिम्मिन्नाङ् हे़क्केलॽरिक्के मे़ले़रु मे़धआङ् ने़स्से़॥ 8 खे़न् लोगेॽ तुक्मे़ल्ले़ तरुसिबा मनाहाॽ थक्सुबा ने़त्ना साःङ्गाहिम्मिल्ले़ कुयाओ मे़गे़रे़ हे़क्क्याङ् साःङ्गाहिम्हाॽओबा लत्छाओ मे़लासे़आङ् कुजा मे़ज मे़धुङु, हे़क्क्याङ् साम्म्याङ्, युप्पा नु चाङ्वाःन्हाॽ थिक्नाहाङ् मे़देॽरुआङ् मे़जिक्खु मे़युक्खु॥ खे़न् एगाङ् खे़ङ्हाॽ याम्मो मे़द्ये़आङ् वेॽ साःङ्गाहिम्मो मे़लासे़ हे़क्क्याङ् चिगक्वा सामाहाॽ मे़देॽरुआङ् खे़ङ्हाॽआङ् मे़जिक्खु मे़ध॥ 9 खे़ब्याङ् खे़ङ्हाॽ खुन्छिॽ लुम्मो अक्खे मे़मे़त्छिङ्, “आनिॽ आजोगुम्बा कन् याःम्बक्किन् नुबा मेःन्॥ आइङ्ग सुनाइङ् ये़न्रे़त्छ, हे़क्क्याङ् आनिॽग स्वाःत् आयुङ् आजा॥ ताःन्दिक् तानाम् थे़म्बा आहाङ्घुम्माङ् आयुङ्ने़भग्र खुम्दिङ् आघोसुम्ॽ॥ आल्ल आनिॽ खिमो पेगिआङ् हाङ्हिम्मो कन् इङ्घङ्ङिन् मे़त्तुम्सिम्ॽ॥” 10 खम्भ्याङ् खे़ङ्हाॽ सामरिया मे़बेआङ् ये़क्यक्कोबा यम्बा लाम्धेःत्तो के़ये़प्पा इक्के़गोबाहाॽ मे़उःत्तुसिआङ् मे़मे़त्तुसि, “अरामि थक्सुबा ने़त्ना साःङ्गाहिम्मो आनिगे पेगिगे़ हे़क्क्याङ् लत्छाआङ् मना मे़निसुम्बे़न्॥ ससप् वयाक् के़लॽबा हाःत्ताङ् होप्—अन्हाॽ नु अदङ्हाॽ हाबा मे़घेःक्खुसिआङ् मे़ये़प्, हे़क्क्याङ् साःङ्गाहिम्हाॽआङ् आम्भा मे़ले़रु मे़धआङ् ने़रो॥” 11 खे़ब्याङ् लाम्धेःत्तो इक्के़गोबाहाॽ मे़अःक्ते़आङ् कन् इङ्घङ्ङिन् मे़मे़त्तुसि, हे़क्क्याङ् खे़न् इङ्घङ्ङिन् हाङ्हिम्मो मे़मे़त्तुसिरो॥ इस्राइलिहाॽरे़ साःङ्गाहिम्मो मे़नाप्तुसि 12 हाङ्ङिन् से़न्दिक्सा पोगे़आङ् कुसुहाङ्युक्पाहाॽ मे़त्तुसि, “अरामिहाॽरे़ थे मे़जोगुबा फाॽआङ् आङ्गाॽ खिनिॽ मे़त्निङ्ॽ॥ आनिॽ साक्के़ल्ले़ आसिर आबत् फाॽआङ् खे़ङ्हाॽरे़ मे़निसुॽ॥ कल्ले़चोगुल्ले़ खे़ङ्हाॽरे़ अक्तङ्बा निङ्वाॽ मे़इःत्तुआङ् थक्सुबा ने़त्ना साःङ्गाहिम्मिन् मे़ले़रु हे़क्क्याङ् कुया कुयाओबा इक्ताप्पाहाॽओ चिङ्सिङ्से़ मे़बेआङ् मे़वाॽ, ‘कन्हाॽ से़क्खासाङ् ये़क्यक्लाम् लाःक्कात् मे़लन्, हे़क्क्याङ् आनिॽ खे़ङ्हाॽ कुहिङ्वे़त् ते़म्सुम्मिम्माङ् ये़क्यक्को आनिॽ लासिरो॥’” 13 सुहाङ्युक्पाहाॽओबा थिक्पारे़ नुगप् पिरु, “आनिॽ ये़क्यक्को के़ये़प्पा ङासि अन्हाॽ मे़याङ्सिङ्ङाङ् कुभा मनाहाॽ मे़बेःक्ल याःन्दे़से़ॽओ॥ कप्मो के़वाॽबा के़याःक्पा इस्राइलिहाॽरे़ मे़दुमुबा तुक्खे हे़क्तङ्बाए खे़ङ्हाॽरे़ मे़दुमुॽ—ओवा से़क्खाए, खे़ङ्हाॽ कप्मो के़सिबा के़रे़क् इस्राइलिहाॽ हे़क्तङ्बाए मे़बोङ्ॽ॥ थे पोःक्खे़रे़त्छ फाॽआङ् थोःम्मारे़ लागि आनिॽ खे़ङ्हाॽ पाङ्घुम्सिम्ॽ॥” 14 खे़ब्याङ् खे़ङ्हाॽरे़ अन्लाधा ने़त्छि नु खे़प्मोबा अन्हाॽ मे़सेगुसि, हे़क्क्याङ् अरामि थक्सुबाहाॽ हे़न् मे़लॽरे़रे़त्छ फाॽआङ् निःन्धो चोःक्मारे़ लागि हाङ्ङिल्ले़ खे़ङ्हाॽ पाङ्घुदेसुसि॥ खुने़ॽ अन्लाधा के़लोङ्बाहाॽ अक्तङ्बा इङ्जाङ् पिरुसि, “पेसे़त्छे़आङ् थे पोःक्खे़रे़त्छ खे़न् थोःप्से़त्छे़ॽ॥” 15 खे़न् ने़प्फु यर्दन वहःङ् थारिक्के थोःप्से़त्छुर पेसि, हे़क्क्याङ् लाम् कुले़ःम् अरामिहाॽरे़ हाराहारा मे़घे़त्छिङ्ङिल्ले़ लाप्मे़देसु मे़धबा तेःप्फुङ्हाॽ नु फे़जुम्भे़या खजुम्घयाहाॽ खोसे़त्छु॥ खे़ब्याङ् इङ्साबाहाॽ त्ये़सिआङ् कन् इङ्घङ्ङिन् हाङ्ङिन् मे़त्ते़सु॥ 16 खे़ब्याङ् सामरियाबा मनाहाॽ लाःक्कात् मे़लःन्दे़आङ् अरामिहाॽरे़ खुन्छिॽ थक्सुबा ने़त्ना साःङ्गाहिम्मो मे़नाप्तुसि॥ कल्ले़चोगुल्ले़ यहवे दाङ्बे़ल्ले़ पाःत्तुबा कुइसिक् कुआःत् थिक् युप्पारे़ किलोग्राम सुम्सि फेॽदुम् नु कुआःत् थिक् युप्पारे़ किलोग्राम तुक्सि हःक्सि मे़इङु मे़सङ्घु॥ 17 आल्ल हाङ्ङिल्ले़ कत्तुबा कुभाॽबाङ् सुहाङ्युक्पे़न् यम्बा लाम्धेत् कोमा लक्पे़न् पिरुआङ् वये़॥ खे़न् मनान् मनाहाॽरे़ यम्बा लाम्धेःत्तो मे़दोॽरु मे़से़रु॥ हे़क्क्याङ् हाङ्ङिन् खुने़ॽ कुहिम्मो कुदुम्से़ पेःल्ले़ निङ्वाॽफुमाङ्ङिल्ले़ कुमनाःल्ले़ माङ्निङ्वाॽपान् पाःत्तुआङ् वये़बा पाःन्निन् के़रे़॥ 18 निङ्वाॽफुमाङ्ङिल्ले़ कुमनाःल्ले़ हाङ्ङिन् अक्खे मे़त्तुआङ् वये़, “ताःन्दिक् हाबा कन् ये़म्मो सामरियाबा यम्बा लाम्धेःत्तो कुआत् थिक् युप्पारे़ किलोग्राम सुम्सि फेॽदुम् नु कुआत् थिक् युप्पारे़ किलोग्राम तुक्सि हःक्सि मे़इङु मे़सङ्घुॽ॥” 19 खे़न् सुहाङ्युक्पे़ल्ले़ निङ्वाॽफुमाङ्ङिल्ले़ कुमनान् अक्खे मे़त्तुआङ् वये़, “ओमे़त्ते़ॽ, यहवे दाङ्बे़ल्ले़ साङ्ग्राम्पेदाङ्बा लाम्धेःत्हाॽ हन्दु आबिसाङ् अक्तङ्बा पोङ्मा थे सुक्काङ्बे?” निङ्वाॽफुमाङ्ङिल्ले़ कुमनाःल्ले़ खे़न् सुहाङ्युक्पे़न् अक्खे मे़त्तुआङ् वये़, “खे़ने़ॽ आप्फेक् के़मिक्किल्ले़ खे़न् के़निसुॽ, कर खे़ने़ॽ खे़प्मोलाम् थेआङ् चामा के़ङ्घोसुन्लो॥” 20 हे़क्क्याङ् खे़ल्ले़ कुलागि आत्तिआङ् मे़म्बेःक्के हाबा हे़क्तङ्बाए पोःक्खे़, थेआङ्भे़ल्ले़ मनाहाॽरे़ खुने़ॽ यम्बा लाम्धेःत्तो मे़दोॽरुआङ् खुने़ॽ स्ये़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.