२ हाङ् 6 - लिम्बुएलिसान्नु तःन्देॽ 1 माङ्निङ्वाॽपान् के़बाःप्पा मनासुम्हाॽरे़ एलिसान् मे़मे़त्तु, “ओमे़त्ते़ॽओ, आदाङ्बानु तुम्मारे़ लागि आनिॽ आयुङ्बा कन् ते़न्निन् आनिॽ लागि साॽरिक् चिहुॽहुॽबा चोक्॥ 2 यर्दन वहःङ्ङो आनिॽ पेगि, खे़प्मो के़रे़क्ले़ सिङ् खोमा मे़सुक्तुॽ, हे़क्क्याङ् आनिॽ लागि खे़प्मो युङ्मा हिम् चोगुम्॥” एलिसाःल्ले़ मे़त्तुसि, “लु पोङ्ॽ, खिनिॽ पेगे़म्मे़ॽ॥” 3 खे़ब्याङ् खे़ङ्हाॽओबा थिक्पारे़ खुने़ॽ मे़त्तु, “आदाङ्बा, खे़ने़ॽ के़से़वारोबाहाॽनु के़म्भे़न्ने़म्बि?” एलिसाःल्ले़ मे़त्तु, “आङ्गाॽ फे़न्ना॥” 4 हे़क्क्याङ् खुने़ॽ खे़ङ्हाॽनु सोरिक् पे॥ खे़ङ्हाॽ यर्दन वहःङ्ङो मे़गे़रे़आङ् सिङ्बुङ्हाॽ ताङ्मा मे़हेःक्तु॥ 5 लत्छा सिङ्बुङ् ताङुआङ् पत्छे़र थिक्पाःल्ले़ कुदःन्देन् कुलाओलाम् चुप्फाक् पिःक्खे़आङ् च्वाःत्तो सुरुम् लासे़॥ खुने़ॽ अःक्ते़आङ् पाःत्तु, “आदाङ्बे, कङ्ग आङ्गाॽ नाःक्तुङ्सिङ्ङाङ् तारुङ्बा तःन्देॽ वये़रो॥” 6 निङ्वाॽफुमाङ्ङिल्ले़ खे़न् कुमनाःल्ले़ सेःन्दोसु, “खे़न् आत्ति मक्थ्ये़बे?” आल्ल खे़ल्ले़ खुने़ॽ कन् मक्थ्ये़बादे़न्निन् ओःन्धाक्तु, खे़ब्याङ् एलिसाःल्ले़ तक्कात् थिक् आःत्तुआङ् खे़प्मो लाप्फुसु केःत्तु, हे़क्क्याङ् खे़न् तःन्देन् पक्खु थाक्तु॥ 7 खे़ब्याङ् खुने़ॽ खे़न् मे़त्तु, “लःत्ते़आङ् तेॽरे़ॽ॥” खम्भ्याङ् खे़न् मनाःल्ले़ कुहुक्किन् सन्छुआङ् खे़न् लःत्तुदेॽरुरो॥ एलिसाःल्ले़ अरामिहाॽ मिक्मे़न्निमनाबा चोगुसिआङ् ते़म्सुसि 8 आल्ल अरामबा हाङ्ङिन् इस्राइलबा हाङ्ङिन्नु थङ् चोगे़र वये़॥ खुने़ॽ कुसुहाङ्युक्पाहाॽनु सुजापान् तङ्घुआङ् पाःत्तु, “आङ्गाॽ अक्तङ्बा ते़न्हाॽ आधक्सुबा ने़त्ना साःङ्गाहिम् चोगुङ्ॽ॥” 9 निङ्वाॽफुमाङ्ङिल्ले़ कुमनाःल्ले़ अक्खे मे़त्तुआङ् इस्राइलबा हाङ्ङिन् इङ्घङ् हाक्तु, “खे़ने़ॽ खे़न् ते़न्नोलाम् पोङ्माआङ् पेःक्मारे़ लागि सिङ्सिङ् लॽरे़ॽओ॥ थेआङ्भे़ल्ले़ अरामिहाॽ खे़प्मो मे़बेःक्ल मे़बत्॥” 10 कल्ले़चोगुल्ले़ आत्तिन् ते़न्निल्ले़ कुयाःम्बेओ निङ्वाॽफुमाङ्ङिल्ले़ कुमनाःल्ले़ खुने़ॽ मिक्सेन् पिरुआङ् वये़, खे़प्मो इस्राइलबा हाङ्ङिल्ले़ इङ्साबाहाॽ पाङ्घुसिआङ् मनाहाॽ सिङ्सिङ् मे़लॽरे़ हे़क्क्याङ् एलिसाःल्ले़ हाङ्ङिन् ये़त्ले़ङ् सिङ्सिङ् लॽरे़ॽ मे़त्तु, खे़ल्ले़चोगुल्ले़ हे़क्तङ्बादे़न्हाॽओ खुने़ॽ सिङ्सिङ् मे़त्छिङ्ङाङ् वये़॥ 11 कल्ले़चोगुल्ले़ आरामबा हाङ्ङिन् साॽरिक् कुसाक्के़न् पोगे़॥ खुने़ॽ कुसुहाङ्युक्पाहाॽ उःत्तुसिआङ् खे़ङ्हाॽ चाॽरे़र सेःन्दोसुसि, “थे खिनिॽ आङ्गाॽ आगे़म्मे़त्ने़म्बि? खिनिॽ लुम्मोबाहाॽओलाम् आत्तिन्निग इस्राइलबा हाङ्ङिन् ले़प्माङ् लासे़आङ् वाॽ?” 12 खुने़ॽ कुसुहाङ्युक्पाहाॽओबा थिक्पारे़ खुने़ॽ मे़त्तु, “आदाङ्बा पयम् हाङ्ङे, आनिगे लुम्मोबाहाॽओ हाःत्ताङ् लासे़बा होप्, कर आदाङ्बारे़ के़इम्मादे़न् याक्फाङ्ङो के़बाःत्तुबा के़रे़क् पाःन्हाॽ इस्राइलबा माङ्निङ्वाॽपान् के़बाःप्पा एलिसाःल्ले़ इस्राइलबा हाङ्ङिन् चे़क्तुॽ॥” 13 हाङ्ङिल्ले़ इङ्जाङ् पिरु, “खे़ने़ॽ पेगे़ॽआङ् खे़न् आत्ति वाॽ योःक्थक्ते़ॽ, हे़क्क्याङ् आङ्गाॽ मनाहाॽ पाङ्घुङ्सिङ्ङाङ् खे़न् ते़म्सुङ्ॽ॥” हाङ्ङिन् अक्तङ्बा इङ्घङ् मे़बिरु, “एलिसान् दोतान वाॽ॥” 14 खे़ब्याङ् हाङ्ङिल्ले़ अन्हाॽ नु अन्लाधाहाॽ के़युक्पा मुक्के़गुबा थक्सुबा सुम्हाॽ खे़प्मो पाङ्घुसि॥ खे़ङ्हाॽ से़न्दिक् मे़बेआङ् खे़न् ये़क्यक्किन् किर्गप् मे़बगु॥ 15 आल्ल निङ्वाॽफुमाङ्ङिल्ले़ कुमनाःल्ले़ कुयाःम्बक् के़जोःक्पा से़वारोबे़न् तानाम् आन्देन् पोगे़आङ् लाःक्कात् लःन्दे़ल्ले़ अन्हाॽ नु अन्लाधा के़लोङ्बा थक्सुबाहाॽरे़ ये़क्यक्किन् कब्रिङ् किर्गप् मे़गबुआङ् ने़स्से़॥ खे़न् से़वारोबे़न् फे़रे़आङ् खुने़ॽ कुन्दाङ्बे़न् सेःन्दोसु, “आदाङ्बे, आल्ल आनिॽ थे आजोगुम्बाबे?” 16 खे़न् माङ्निङ्वाॽपान् के़बाःप्पे़ल्ले़ नोगप् पिरु, “मे़गिसे़न्ने़ॽ, खे़ङ्हाॽनु के़वाॽबाहाॽनुःल्ले़ आनिॽनु के़वाॽबाहाॽ यरिक् मे़वाॽ॥” 17 खे़ब्याङ् एलिसाःल्ले़ अक्खे पाःत्तुआङ् पेलिगे़न् तुवा चोगु, “यहवे दाङ्बाए, कल्ले़ कुमिक्किन् हन्दे़ पिरे़ॽओ, हे़क्क्याङ् कल्ले़ निमा सुक्तुररो॥” खे़ब्याङ् यहवे दाङ्बे़ल्ले़ खे़न् से़वारोबे़ल्ले़ कुमिक्किन् हन्दु पिरु, हे़क्क्याङ् खुने़ॽ एलिसाःल्ले़ कुगब्रिङ् पिसाङ्बा कोःक्माहाॽ, मिधुङ्दिङ् मिराःक् के़दिःप्पा अन्हाॽ नु अन्लाधाहाॽरे़ सधे़क् मे़धिम्सुबा निसु॥ 18 आल्ल निङ्मिहाॽ खुने़ॽ ले़प्माङ् मे़धासिङ् मे़ये़बा निसु, खे़ब्याङ् एलिसाःल्ले़ यहवे दाङ्बे़न् अक्खे मे़त्तुआङ् पेलि फाक्तु, “कन् मनाहाॽ मिक्मे़न्निमना मिक्फःम्बा चोगे़से़ॽओ॥” एलिसाःल्ले़ पेलि फाक्तुबा कुइसिक् यहवे दाङ्बे़ल्ले़ खे़ङ्हाॽ मिक्फःम्बा चोगुसि॥ 19 खे़ब्याङ् एलिसाःल्ले़ खे़ङ्हाॽ मे़त्तुसि, “कन् लाम् मेःन्॥ कन् ये़क्यक्काङ् मेःन्॥ आङ्गाॽ आएगाङ् थाआसिम्मे़ॽ, हे़क्क्याङ् आङ्गाॽ खिनिॽ के़गोःत्तुम्बा मनाओ आङ्गाॽ खिनिॽ सानिङ्धानिङ्ॽ॥” हे़क्क्याङ् खुने़ॽ खे़ङ्हाॽ सामरिया के़त्तुसि॥ 20 खे़ङ्हाॽ ये़क्यक्को मे़लासे़ मे़जुरे़आङ् एलिसाःल्ले़ अक्खे पाःत्तु, “यहवे दाङ्बाए, कन् मनाहाॽरे़ खुन्छिॽ मिक्किन् हन्दे़ पिरे़से़ॽओ, हे़क्क्याङ् खे़ङ्हाॽरे़ याम्मो निमा मे़सुक्तुररो॥” खम्भ्याङ् यहवे दाङ्बे़ल्ले़ खे़ङ्हाॽरे़ खुन्छिॽ मिक्हाॽ हन्दु पिरुसिआङ् खे़ङ्हाॽ ओमे़मये़ल्ले़ सामरियाओ मे़वये़बा मे़निसु॥ 21 आल्ल इस्राइलबा हाङ्ङिल्ले़ खे़ङ्हाॽ निसुसिआङ् खुने़ॽ एलिसान् सेःन्दोसु, “पानुदिङ् पाए, थे आङ्गाॽ कन्हाॽ से़रुङ्सिङ्बि? थे आङ्गाॽ कन्हाॽ से़रुङ्सिङ्बि?” 22 खुने़ॽ नोगप् पिरु, “खे़ने़ॽ खे़ङ्हाॽ मे़से़रे़से़न्ने़ॽ॥ थे आदाङ्बारे़ आप्फेक् के़दाभे नु के़लिःल्ले़ पुङ्लाधाबा के़जोगुसिबा मनाहाॽ के़से़रुसिआङ् वये़बि? आदाङ्बारे़ कन्हाॽरे़ खुन्छिॽ तगि चामा कुजा नु च्वाःत् युक्खे़ पिरे़से़ॽ, हे़क्केलॽरिक् कन्हाॽरे़ मे़ज मे़धुङुआङ् खुन्छिॽ दाङ्बाओ मे़बेःक्ल॥” 23 खे़ब्याङ् खुने़ॽ खे़ङ्हाॽरे़ खुन्छिॽ लागि लत्छा यम्बा साभःङ्जा चाःत्तुसि, हे़क्क्याङ् खे़ङ्हाॽरे़ मे़ज मे़धुङु मे़सुरुआङ् खुने़ॽ खे़ङ्हाॽ पाङ्घुदेसुसि, हे़क्क्याङ् खे़ङ्हाॽ खुन्छिॽ दाङ्बाओ मे़नुःक्खे़॥ कम्भलॽरिक् अरामि मनासुम्हाॽरे़ इस्राइलिहाॽ नाप्मासि फप्मासि मे़ले़रुरो॥ कब्रिङ् किर्गप् मे़गबुबा सामरियाओ साक्वान् पोगे़ 24 खे़ल्ले़ कुभा ये़म् एगाङ् अरामबा हाङ् बेन-हददरे़ के़वाॽ मे़न्वाॽ के़रे़क् कुधक्सुबाहाॽ फुक्खुसि हे़क्क्याङ् सामरिया ले़प्माङ् तगि थासिङ्ङाङ् खे़न् कब्रिङ् किर्गप् कबु॥ 25 ये़क्यक्को साॽरिक् यम्बा साक् पोगे़॥ अदङ्ङिल्ले़ लत्छा कुधे़गेःक्किन् ये़प्पोङ् कुआःत् युप्पा, हे़क्क्याङ् सोःल्लाक् थिक् पे़र्वा हिःन् कुआःत् ङासि युप्पा कुमे़न् पोःक्खे़र थे़म्बा किर्गप् कप्मा ये़म्मिन् केःम्बा पोःक्खे़॥ 26 आल्ल इस्राइलबा हाङ्ङिन् ये़क्यक्कोबा लुङ्धाक्को लाङ्घेगे़र पत्छे़ल्ले़ मे़न्छुमाधिक्ले़ खुने़ॽ फे़ःक्तुआङ् मे़त्तु, “आदाङ्बे, पयम् हाङ्ङे, आङ्गाॽ कुभाॽ पिराङ्ङे़ॽओ!” 27 हाङ्ङिल्ले़ नुगप् पिरु, “यहवे दाङ्बे़ल्ले़ए खे़ने़ॽ के़म्भाॽने़न्निल्ले़ आङ्गाॽ आत्तिलाम् खे़ने़ॽ कुभाॽ पिमा सुक्ने़बाबे? चाधाम्मा लक्लुम्मो लाम्बाबि इ चे़ल्ले़क्सेॽ एःम्मादे़न्नो लाम्बाबि?” 28 खे़ब्याङ् खुने़ॽ खे़न् मे़न्छुमान् सेःन्दोसु, “खे़ने़ॽ थे के़साक्पा के़दुमुबे?” खे़न् मे़न्छुमाःल्ले़ नोगप् पिरु, “कन् मे़न्छुमाःल्ले़ आङ्गाॽ मे़त्ताङ्, ‘आइन् आन्छिॽ चामारे़ लागि खे़ने़ॽ के़स्सा ये़म्बित्छान् पिराङ्ङे़ॽ॥ ताःन्दिक् चैँ आन्छिॽ आङ्गाॽ आस्सा ये़म्बित्छान् चासु॥’ 29 खे़ब्याङ् आन्छिगे आङ्गाॽ आस्सा ये़म्बित्छान् थोःक्ते़सुगे़आङ् चे़सुगे़॥ कुदाःन्दिक्मा आङ्गाॽ खे़न् मे़त्तुङ्, ‘आइन् चामारे़ लागि खे़ने़ॽ के़स्सा ये़म्बित्छान् तारे़ॽ,’ कर खुने़ॽ खे़न् चिक्खुदेसु॥” 30 खे़न् मे़न्छुमाःल्ले़ कुबाःन्निन् हाङ्ङिल्ले़ खे़प्सुआङ्, खुने़ॽ कुजाङ्ङिन् थे़ःक्खु॥ आल्ल खुने़ॽ लुङ्धाक्को लाङ्घेगे़आङ् वये़ल्ले़ मनाहाॽरे़ खुने़ॽ मे़निसु हे़क्क्याङ् हाङ्ङिल्ले़ कुधक्को सिगाङ् ले़प्माङ् सागि तेत् चाक्खुबा मे़निसु॥ 31 खुने़ॽ पाःत्तु, “आइन् साफातरे़ कुस्सा एलिसाःल्ले़ कुधे़गेःक्किन् मे़म्भुॽए कुभक्ताङ्ङोए पत्छे़ने़भग्र यहवे दाङ्बे़ल्ले़ अक्तङ्बा ताप्फे़ःल्लिक् मेःन्, कर आङ्गाॽ कन्नुःल्ले़आङ् साॽरिक् ताप्फे़ःल्लिक् मे़त्ताररो!” 32 आल्ल एलिसान्नु लाम्लोबाहाॽआङ् कुहिम्मोए खुने़ॽनुए सोरिक् मे़युङे़ मे़गरे़॥ हाङ्ङिल्ले़ इङ्घङ् के़साबा थिक् तगि पाङ्घुदेसु, कर खे़न् इङ्साबे़न् के़प्मा तामानुःल्ले़ तगिए एलिसाःल्ले़ साम्योसिक्साम्बाहाॽ मे़त्तुसि, “खे़न् मना के़से़प्पे़ल्ले़ आङ्गाॽ आध्गेक्किन् फुॽमारे़ लागि कुभा पाङ्घु तासुबा थे खिनिॽ के़न्निसुम्मिन्बि? ओमे़त्ते़म्मे़ॽ, खे़न् इङ्साबे़न् के़त्ताःल्ले़ लाम्धेःत्तिन् सुबे़म्मे़ॽ, आत्तातान्ने साॽरिक् चिदक् तक्ते़म् फत्छे़म्मे़ॽ॥ थे खे़ल्ले़ कुन्दाङ्बे़ल्ले़ कुलाङ्बुक्किन् खे़ल्ले़ कुएगाङ् कुएगाङ् तार पप्पा मेःम्बि?” 33 खुने़ॽ कम्भलॽरिक् खे़ङ्हाॽनु पारे़आङ् पत्छे़र खे़न् इङ्साबे़न् खा लिगक् के़रे़द्ये़॥ हे़क्क्याङ् हाङ्ङिल्ले़ पाःत्तु, “कन् खाप्पुथ्यःङ् मे़क्मासिमे़न् यहवे दाङ्बालाम् पोःक्खे़बाबि! आल्ल आङ्गाॽ यहवे दाङ्बे़न् थेआङ् हाङ्घुङ्ङाङ् युङ्ङाबाबे?” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.