२ हाङ् 5 - लिम्बुनामाने़न् होरिक्पा तुक्मालाम् वेःत् 1 नामाने़न् अरामबा हाङ्ङिल्ले़ कुधक्सुबाहाॽओबा थक्मोबा वये़॥ खुने़ॽ कुन्दाङ्बे़ल्ले़ कुनिमो लत्छा यम्बा मना नु साॽरिक् मिङ्सो इङ्धाङ्साबा मना वये़, खुने़ॽलाम्बाए यहवे दाङ्बे़ल्ले़ अरामे़न् थङ् के़नाःम्बा चोगुङ्आङ् वये़॥ खुने़ॽ साॽरिक् के़धुम्बा थक्लिहाङ् वये़, कर आलिःक्लिःक्पा होरिक्पा तुक्मे़ल्ले़आङ् तरुआङ् वये़॥ 2 थिक्ले़ङ् आरामलाम् हिम्गे़लिबाहाॽ मे़बेआङ् इस्राइललाम्बा लत्छा चुक्मा मे़न्छ्याधिक् मे़दे़म्सु मे़देॽरुआङ् वये़, हे़क्क्याङ् खे़ल्ले़ नामानरे़ कुमेःत्ते़न् याःम्बक् चोगु पिरुआङ् वये़॥ 3 खे़ल्ले़ कुन्दाङ्मे़न् मे़त्तु, “आङ्गाॽ आदाङ्बे़ल्ले़ सामरिया के़युङ्बा माङ्निङ्वाॽपान् के़बाःप्पे़न् तुमुबा हे़क्केःल्ले़, खे़ल्ले़ खुने़ॽ होरिक्पा तुक्मालाम् वेःन्दुबा वये़मे़न्!” 4 कल्ले़चोगुल्ले़ नामाने़न् खुने़ॽ कुन्दाङ्बाओ पेआङ् इस्राइललाम् मे़दे़म्सु मे़भे़त्तुमा खे़न् चुक्मे़ल्ले़ पाःत्तुबा पाःन्निन् मे़त्तु॥ 5 आरामबा हाङ्ङिल्ले़ नुगप् पिरु, “पोङ्ॽ, खे़ने़ॽ पेगे़ॽ॥ इस्राइलबा हाङ्ङिन् आङ्गाॽ लत्छा सक्इङ्घङ् हाक्तुङ्दे़सुङ्॥” कल्ले़चोगुल्ले़ नामाने़ल्ले़ ३०,००० युप्पा कुआत् नु ६,००० साम्म्याङ् कुआत् हे़क्क्याङ् थिबोङ् कुगाप् चाङ्हाॽ खुने़ॽ याङ्सिङ्ङाङ् फे़रे़॥ 6 खुने़ॽ इस्राइलबा हाङ्ङे़ओ तेॽरुबा सक्इङ्घङ्ङिन् अक्तङ्बा चोगे़रो—“कन् सक्इङ्घङ्ङिन्नु सोसोरिक् आङ्गाॽ आसे़वारोबा नामाने़न् पाङ्घुङ्ङाङ् वाॽ॥ आदाङ्बारे़ खे़ल्ले़ होरिक्पा कुदुक्मे़न् वेःन्दे़ पिरे़ॽओ॥” 7 इस्राइलबा हाङ्ङिल्ले़ खे़न् सक्इङ्घङ्ङिन् निरुनुमे़ःन्ने खुने़ॽ कुजाङ्ङिन् थे़ःक्खुआङ् पाःत्तु, “थे आङ्गाॽ निङ्वाॽफुमाङ्आबि? से़प्मा नु कुहिङ्वे़त् चोःक्मा सुक्तुङ्बि? कन् मनाःल्ले़ थेआङ् खे़न् होरिक्पा तुक्मालाम् वेःम्मारे़ लागि कुभा मनान् आङ्गाॽओ पाङ्घुबाबे? ओमे़त्ते़ साॽरे़त, खे़न् आङ्गाॽनु खे़माॽ चोःक्मा कोःत्ल वाॽ!” 8 आल्ल इस्राइलबा हाङ्ङिल्ले़ आप्फेक् कुजाङ्ङिन् थे़ःक्खुबा पाःन्निन् निङ्वाॽफुमाङ्ङिल्ले़ कुमना एलिसाःल्ले़ खे़प्सु, खे़ब्याङ् खुने़ॽ कन् इङ्घङ्ङिन् हाङ्ङिन् हाक्तु, “आदाङ्बारे़ थेआङ् के़जाङ्ङिन् के़धे़ःक्खुबाबे? खे़न् मनान् आङ्गाॽओ फे़न्ल, हे़क्क्याङ् खे़ल्ले़ इस्राइलओ माङ्निङ्वाॽपान् के़बाःप्पा थिक् वाॽरे़त्छ फाॽआङ् निङ्वाॽ खोसुॽ॥” 9 कल्ले़चोगुल्ले़ नामाने़न् कुअन्हाॽ हे़क्क्याङ् कुअन्लाधाहाॽनु पे, हे़क्क्याङ् एलिसाःल्ले़ कुलाम्धेःत्तो ये़म्सिङ्॥ 10 एलिसाःल्ले़ खुने़ॽ अक्खे मे़प्मारे़ लागि इङ्साबाधिक् पाङ्घु, “खे़ने़ॽ आप्फेक् पेगे़ॽआङ् यर्दन वहःङ्ङो नुसिले़ङ् वरुःम्सिङ्ङे़ॽ, हे़क्क्याङ् खे़ने़ॽ के़ने़क्सान् कुइसिःक्सिःक् पोङ्ॽ, हे़क्क्याङ् खे़ने़ॽ सुत्थो के़बोङ्ॽ॥” 11 कर नामाने़न् कुयाःक्ले़ॽरे़आङ् अक्खे लॽरे़र पेघे़रे़, “खुने़ॽ लाःक्कात् लःन्नाङ् यहवे दाङ्बा खुने़ॽ कुनिङ्वाॽफुमाङ्ङिल्ले़ कुमिङ् इङ्घु हे़क्क्याङ् आङ्गाॽ आदुक्मा के़बप्पा सम्धाङ् कुहुक्किन् हिक्खुआङ् होरिक्पा तुक्मे़ल्ले़ तराङ्बा आदुक्मान् वेःन्दु पिआबि फाॽआङ् आङ्गाॽ निङ्वाॽ इःत्तुङ्ङाङ् वये़॥ 12 थे इस्राइलबा वहःङ्हाॽनुःल्ले़ दमस्कसबा अबाना नु फारपर वहःङ्हाॽ नुबा मे़जोःक्ने़न्नाङ्बि? थे आङ्गाॽ खे़ङ्हाॽओए वरुःम्सिङ्माआङ् सुत्थो पोङ्मा मे़सुक्कान्नाङ्बि?” कल्ले़चोगुल्ले़ खुने़ॽ नुःक्खे़आङ् कुसिक् पोःक्मा इसेःङ् पेघे़रे़॥ 13 कर नामानरे़ कुसे़वारोबाहाॽ खुने़ॽओ मे़द्ये़आङ् मे़मे़त्तु, “आदाङ्बे, माङ्निङ्वाॽपान् के़बाःप्पे़ल्ले़ खे़ने़ॽ कुभा यम्बा याःम्बक् चोगे़ॽ के़मे़त्ते़ल्ले़ थे खे़ने़ॽ के़न्जोगुम्बा मे़वये़ने़न्नाङ्बि? खुने़ॽ वरुःम्सिङ्ङे़ॽआङ् सुत्थो पोःक्खे़ॽ लॽरिक् के़मे़त्ते़बाओ खे़ने़ॽ आल्लसाङ् थेआङ् के़न्जोगुन्बाबे?” 14 कल्ले़चोगुल्ले़ खुने़ॽ यो थासिङ् हे़क्क्याङ् निङ्वाॽफुमाङ्ङिल्ले़ कुमनाःल्ले़ मे़त्तुबा कुइसिक् यर्दन वहःङ्ङो आप्फेक् नुसिले़ङ् चिहुम् चिहुम् हुम्सिङ्, हे़क्क्याङ् खुने़ॽ कुने़क्सान् कुइसिःक्सिःक् पोःक्खे़आङ् नालिगे़न् थाङ्बे़न् हे़क्के सेसेबा पोःक्खे़॥ 15 खे़ब्याङ् नामाने़न् नु खुने़ॽ कुसे़वारोबाहाॽ के़रे़क् निङ्वाॽफुमाङ्ङिल्ले़ कुमनाओ मे़नुःक्खे़ मे़बे॥ खे़ङ्हाॽ के़रे़क् खुने़ॽ कुदगि मे़ये़म्सिङ् हे़क्क्याङ् नामानरे़ पाःत्तु, “इस्राइलओरक् निङ्वाॽफुमाङ् वाॽ के़रे़क् इक्सादिङ् खाम्बेःक्मो हाःत्ताङ् निङ्वाॽफुमाङ् होप् फाॽआङ् आल्ल आङ्गाॽ निङ्वाॽ खोसुङ्॥ चिसाजि आल्ल खे़ने़ॽ के़से़वारोबालाम् कुभा हुक्वा ताःक्ते़ॽओ॥” 16 एलिसाःल्ले़ नुगप् पिरु, “आङ्गाॽ माङ्से़वा मे़त्तुङ्बा, से़क्खाए यहवे दाङ्बे़न् कुहिङ्वे़त् वाॽबा कुइसिक् खुने़ॽ कुमिङ्ङो माङ्हे़क्कासिङ्ङाआङ् पाःत्तुङ्ॽ, आङ्गाॽ थेआङ् मे़दाःक्कान्॥” खे़न् ताःक्मारे़ लागि नामानरे़ खुने़ॽ के़साक्पा चाःत्तु करसाङ् खुने़ॽ ताःक्मा मे़दे़न्दे़न्॥ 17 नामानरे़ मे़त्तु, “आदाङ्बारे़ के़न्दाःक्तुन्ने़भग्र, के़से़वारोबे़न् अन्योक् ने़त्छिरे़ खुन्छिॽ कुगुबा खाम् तेॽमा फाःक्ताङ्ङे़ॽ॥ थेआङ्भे़ल्ले़ आल्लआङ्धो याम्मो आभे़ल्ले़आङ् आदाङ्बारे़ के़से़वारोबे़ल्ले़ यहवे दाङ्बे़न्नुःल्ले़ वेॽ आत्तिन् माङ्ङोआङ् मिधिङ्मनाबादेमनाबा वयागे़न् सिदुङ्जभाहाॽ नु हुक्वाहाॽ मे़दोन्दुन्ॽ॥ 18 कर कन् लत्छा पाःन्नोरक् आदाङ्बारे़ के़से़वारोबे़न् यहवे दाङ्बे़ल्ले़ ले़प्मि पिआर—आल्ल आङ्गाॽ आन्दाङ्बे़न् रिम्मोन माङ्हिम्मो साबोःन् हबत् फन्छिङ्माआङ् से़वा चोःक्मारे़ लागि आङ्गाॽ आहुक्को तक्सिङ्ङाङ् लाःत् हे़क्क्याङ् खुने़ॽ माङ्से़वा चोःक्किल्ले़ आङ्गाॽआङ् साम्बोन् पत्ता, कल्ले़ लागि आदाङ्बारे़ के़से़वारोबे़न् यहवे दाङ्बे़ल्ले़ ले़प्मि पिआर॥” 19 एलिसाःल्ले़ मे़त्तु, “निङ्वाॽ हाङ्हाङ् लॽरिक् पेगे़ॽ॥” नामाने़न् कुलाम्मो आजे़त् नानाक्लक् के़रे़र पत्छे़ल्ले़, 20 निङ्वाॽफुमाङ्ङिल्ले़ कुमना एलिसाःल्ले़ कुसे़वारोबा गेहजिन् कुनिङ्वाॽओ अक्खे लॽरे़, “आङ्गाॽ आन्दाङ्बे़ल्ले़ग कन् आरामि नामाने़ल्ले़ फे़त्तुबा हुक्वाहाॽ मे़न्दाःक्के पनुनुरिक् खे़न् पाङ्घुदेसु॥ से़क्खाए यहवे दाङ्बे़न् कुहिङ्वे़त् वाॽबा कुइसिक् आङ्गाॽ माङ्हे़क्कासिङ्ङाआङ् पाःत्तुङ्ॽ, आङ्गाॽ लोःक्का पेःक्काआङ् खुने़ॽ सिॽरुङ् हे़क्क्याङ् खुने़ॽलाम् कुभा हुक्वाहाॽ ताःक्तुङ्ॽ॥” 21 कल्ले़चोगुल्ले़ गेहजिन् नामानरे़ कुएगाङ् कुएगाङ् हाराहारा लोःक्ते़र पे॥ आल्ल नामानरे़ खे़न् खुने़ॽ ले़प्माङ् लोःक्ते़ फे़रे़र पत्छे़बा निसुआङ् खे़न्नु तुम्मारे़ लागि खुने़ॽ कुअन्लाधाओलाम् थासिङ्ङाङ् खे़न् सेःन्दोसु, “थे के़रे़क् नुबाए वाॽबि?” 22 गेहजिःल्ले़ नुगप् पिरु, “के़रे़क् नुबाए वाॽ॥ आङ्गाॽ आन्दाङ्बे़ल्ले़ अक्खे मे़त्ताङ्ङाङ् पाङ्घाङ् फे़न्छाङ्ङाङ् वाॽ, ‘एफ्राइमबा कोःक्मा लाजेॽओनु माङ्निङ्वाॽपान् के़बाःप्पा मनासुम्हाॽलाम् ने़प्फु थाङ्बे़न् मना आल्लो खारक् फे़रे़सिआङ् वाॽसि॥ चिसाजि खे़न् ने़प्फु मनाहाॽ ३,००० कुआःत् युप्पा नु कुगाप् ने़त्छि चाङ् पिरे़से़ॽओ॥’” 23 नामानरे़ मे़त्तु, “पोङ्ॽ, ६,००० कुआःत् युप्पाए तेॽरे़बा॥ खे़ङ्हाॽ तेॽमारे़ लागि खुने़ॽ गेहजिःन् पेलि फाक्तु, हे़क्क्याङ् खुने़ॽ खे़न् युप्पा कुआःत्हाॽ नु कुगाप् ने़त्छि चाङ्हाॽ कुसुङ्मा ने़त्छि सुक्वाओ इघेःक्खु पिरु॥ खुने़ॽ ने़प्फु कुसे़वारोबाहाॽ खे़न् कुसुङ्माहाॽ पिरुसि, खे़ब्याङ् खुन्छिॽ खे़न् कुसुङ्माहाॽ कुये़सुआङ् गेहजिःल्ले़ कुदगि कुदगि लाङ्घेगे़सि॥” 24 आल्ल गेहजिःन् कोःक्माओ के़रे़, खे़ब्याङ् खे़न् कुसुङ्माहाॽ खे़न् ने़प्फु सेवारोबाहाॽलाम् याङ्सिङ्ङाङ् हिम्मो युक्खु॥ खुने़ॽ खे़न् ने़प्फु पाङ्घुदेसुसिआङ् खुन्छिॽ पेघे़रे़सि॥ 25 खम्भ्याङ् खुने़ॽ सिगाङ् लासे़आङ् खुने़ॽ कुन्दाङ्बा एलिसाःल्ले़ कुदगि ये़म्सिङ्॥ एलिसाःल्ले़ खुने़ॽ सेःन्लाप्तु, “गेहजिए, खे़ने़ॽ आत्ति के़बेआङ् के़वये़बे?” गेहजिःल्ले़ नुगप् पिरु, “आदाङ्बारे़ के़याःम्बक् के़जोःक्पा के़से़वारोबे़न् आत्तिआङ् मे़म्बेःक्के वयाङ्लो?” 26 कर एलिसाःल्ले़ खुने़ॽ मे़त्तु, “आल्ल खे़न् मनान् कुअन्लाधाओलाम् थासिङ्ङाङ् खे़ने़ॽ तुम्मारे़ लागि नुःक्खे़ल्ले़ थे आङ्गाॽ आयाम्साम्मिन् खे़ने़ॽनु मे़वये़ने़न्नाङ्बि? याङ्सा इग्र तेःप्फुङ्, किग्र चैतुन सिङ्बुङ्हाॽ, चे़ल्ले़क्सेॽ इक्ताप्हाॽ, मे़ल्लुक् मे़ःन्दाहाॽ, पिप्मा पित्हाॽ नु योग्बा योःग्माहाॽ ताःक्मासिआङ् वाॽमा कन् ये़म्माङ्बि? 27 नामानरे़ आलिःक्लिःक्पा होरिक्पा कुदुक्मे़न् खे़ने़ॽ नु खे़ने़ॽ के़धिङ्दाङ् सायोबोराहाॽओ आप्फाल्ले़साङ् खिम्सिङ्ङाङ् वाॽ॥” खे़ब्याङ् गेहजिःन् खुने़ॽ कुदगिलाम् पेघे़रे़, हे़क्क्याङ् नाःङ् हे़क्के खे़न् फुत्त्रिःङ्यारिक् आलिःक्लिःक्पा होरिक्पा तुक्मे़ल्ले़ तरुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.