२ हाङ् 4 - लिम्बुमेमेदुमाल्ले़ कुनिःङ्गेॽ 1 माङ्निङ्वाॽपान् के़बाःप्पाहाॽओबा थिक्पारे़ कुमेःत्तिल्ले़ एलिसान् फे़ःक्तुआङ् मे़त्तु, “आदाङ्बारे़ के़से़वारोबा आङ्गाॽ आये़म्बान् मासिङ्घे़रे़॥ खुने़ॽ यहवे दाङ्बे़न् साॽरिक् मिङ्सो इङ्धाङ् पिरुआङ् वये़बा पाःन्निन् आदाङ्बारे़ के़निसुआङ्ङे वाॽ॥ कर आल्ल आङ्गाॽ ने़प्फु आस्सा ये़म्बित्छाहाॽ तेॽमासिआङ् योग्बा चोःक्मासिरे़ लागि खुने़ॽ कुसिङ्नात्साबे़न् तार पत्॥” 2 एलिसाःल्ले़ खे़न् मेमेदुमान् नोगप् पिरु, “आङ्गाॽ खे़ने़ॽ आक्खेलॽरिक् फाॽने़बे? खे़ने़ॽ के़हिम्मो थे के़गत्तुबे? आङ्गाॽ मे़त्ताङ्ङे़ॽ॥” खे़ल्ले़ मे़त्तु, “आदाङ्बारे़ केसे़वारोमे़ल्ले़ काःन्द्याओ आजे़ःत्छिक् निःङ्गेजिरक् कत्तुङ्ॽ वेॽ थेआङ् मे़गत्तान्ॽ॥” 3 एलिसाःल्ले़ मे़त्तु, “पोगे़आङ् खे़ने़ॽ के़रे़क् के़हिम्बेसाङ्बाहाॽ कुजाॽ मे़न्याक्मनाबा कान्द्याहाॽ नाःक्ते़ तारे़से़ॽ॥ सुःल्लिक्लक् मे़नाःक्ते़से़न्ने़ॽ॥ 4 खे़न् एगाङ् हिम्मो पेगे़ॽ हे़क्क्याङ् खे़ने़ॽ के़स्सा ने़त्छिहाॽआङ् सिगाङ् युक्खे़से़आङ् लाम्धेःत्ते़न् सुबे़ॽ॥ काःन्द्याओबा निःङ्गेन् खे़न् के़रे़क् खप्प्याहाॽओ लिङ्घे़ॽ, हम्भ्याङ् के़दिम्बा खप्प्याहाॽ लाःत्लाःत् युक्खे़ॽ॥” 5 खे़न् मे़न्छुमान् एलिसान् लाम्बा से़रे़आङ् पे, हे़क्क्याङ् खुने़ॽ कुस्सा ने़त्छिहाॽ सिगाङ् युक्खुसिआङ् लाम्धेःत्ते़न् सुबु॥ कुस्साहाॽरे़ खप्प्याहाॽ फे़त्ते़त्छु खे़ब्याङ् खुने़ॽ खे़न् खप्प्याहाॽ थिम्सुर तेॽरु॥ 6 आल्ल खे़ङ्हाॽ खक्पे़त् तिम्से़ चुरे़आङ् खुने़ॽ लत्छा कुस्साधिक् मे़त्तु, “वेॽसमा काःन्द्यान् फे़त्ते़ॽ॥” कर खे़ल्ले़ पाःत्तु, “आल्लग लत्छाआङ् काःन्द्या होप्॥ खे़ब्याङ् निःङ्गेॽ लःम्माआङ् नाॽरे़॥” 7 खे़न् मेमेदुमे़न् पेआङ् निङ्वाॽफुमाङ्ङिल्ले़ कुमनान् कन् पाःन्निन् मे़त्तु, हे़क्क्याङ् खे़ल्ले़ पाःत्तु, “पेगे़ॽआङ् खे़न् निःङ्गेन् सङ्घे़ॽ, हे़क्क्याङ् खे़ने़ॽ के़सिङ्नात्तिन् हुङे़ॽ॥ के़नम्बे़ल्ले़ खे़ने़ॽ नु के़स्साहाॽरे़ लागि हिम्ब्राङ् चोःक्मा के़सुक्तुरो॥” सुनम्मिःल्ले़ कुस्सान् याम्मो कुहिङ्वे़त् पोङ् 8 थिक्यान् एलिसान् सुनेम पाङ्जुम्मो पे॥ खे़प्मो याङ्सा कुन्धेसामा मे़न्छुमाधिक् वये़, एलिसान् चामा थुङ्मा पिमारे़ लागि खे़न् साॽरिक् हादिङ् थक्ते़॥ कल्ले़चोगुल्ले़ आल्ल एलिसान् आभे़ल्ले़साङ् खे़प्मोलाम् पोःक्खे़आङ् पेःल्ले़ चामा थुङ्मारे़लागि खुने़ॽ खे़प्मो लःन्दे़॥ 9 खे़न् मे़न्छुमाःल्ले़ कुये़म्बान् मे़त्तु, “आभे़ल्ले़साङ् कप्मो आनिॽलाम् के़बोङ्बाआङ् के़बेःक्पा मनान् निङ्वाॽफुमाङ्ङिल्ले़ कुसेसे मना फाॽआङ् आङ्गाॽ निसुङ्ङाङ् वाॽ॥ 10 खाम्बुओ खुने़ॽ कुलागि आनिॽ लत्छा चुक्पा याक्फाङ्धिक् चोगुम् पिरुम्ॽ, हे़क्क्याङ् खे़प्मो खुने़ॽ कुलागि लत्छा ने़त्ना, लत्छा चप्ते़न्, लत्छा एःक्नाःम्भेॽ नु सेमि थिक् युक्खुम् पिरुम्ॽ॥ खे़ब्याङ् खुने़ॽ कप्मो आनिॽओ ताःल्ले़ खे़प्मोए युङ्मा सुक्॥” 11 थिक्ये़न् एलिसान् त्ये़आङ् कौसिओबा कुयाक्फाङ्ङो पे हे़क्क्याङ् नाःम्सिङ्मा फाॽआङ् ले़राङ् काक्पे़त् ने़सिङ्॥ 12 खुने़ॽ कुसे़वारोबा गेहजिःन् मे़त्तु, “खे़न् सुनम्मि मे़न्छुमान् उःत्ते़ तारे़ॽ॥” खे़ल्ले़ खे़न् मे़न्छुमान् उःत्तु तारु, हे़क्क्याङ् माङ्निङ्वाॽपान् के़बाःप्पे़ल्ले़ कुदगि खे़न् ये़म्सिङ्॥ 13 एलिसाःल्ले़ कुसे़वारोबे़न् मे़त्तु, “खे़न् मे़न्छुमान् मे़त्ते़ॽ, ‘खे़ने़ॽ आन्छिगे लागि कन् के़रे़क् तुक्खेहाॽ के़जोगुआङ् वाॽ॥ आल्ल खे़ने़ॽ के़लागि थे चोःक्मा सुक्सुगे़बे? थे खे़ने़ॽ ले़प्माङ् हाङ्ङिन्नु इग्र थक्मोबे़न्नु आन्छिगे के़बान् पाःप्मा सुक्सुगे़बि?’” खे़ल्ले़ नुगप् पिरुसि, “आङ्गाॽ आप्फेक् आमनाहाॽरे़ खुन्छिॽ लुम्मो आङ्गाॽ आहिम् युङ्ॽ॥” 14 एलिसाःल्ले़ गेहजिन् मे़त्तु, “खे़ल्ले़ कुलागि आङ्गाॽ थे चोःक्मा पिमा सुक्तुङ्बे?” गेहजिःल्ले़ मे़त्तु, “खे़ल्ले़ कुस्सा ये़म्बित्छा होप्, हे़क्क्याङ् खे़ल्ले़ कुये़म्बाःन् काप्पोबा चोक्॥” 15 खे़ब्याङ् एलिसाःल्ले़ मे़त्तु, “खे़न् मे़न्छुमान् उःत्ते़ॽ॥” खम्भ्याङ् गेहजिःल्ले़ खे़न् उःत्तु तारु, हे़क्क्याङ् लाम्धेःत्तिल्ले़ कुबेसाङ् खे़न् ये़म्सिङ्॥ 16 खे़ब्याङ् एलिसाःल्ले़ खे़न् मे़न्छुमान् मे़त्तु, “हप्मे़न्, हाबा कन् ये़म् ए़त्निम्मा खे़ने़ॽ के़भक्थुङ्मो ये़म्बित्छा साधिक् के़गत्तुॽ॥” खे़ल्ले़ मे़त्तु, “मेःन्ना, मेःन्ना, आदाङ्बे, निङ्वाॽफुमाङ्ङिल्ले़ कुमनाए, खे़ने़ॽ के़से़वारोमान् इङ्मे़ले़क्ताङ्ङिन्ने़ॽओ॥” 17 कर खे़न् मे़न्छुक्मा पोःक्खे़ हे़क्क्याङ् के़दाबा तङ्बे एलिसाःल्ले़ मे़त्तुबा ये़म्मोए खे़ल्ले़ ये़म्बित्छा साधिक् सागत्तु॥ 18 खे़न् अङे़ःक्वान् च्यम्बा पोःक्खे़आङ् थिक्यान् खुने़ॽ कुम्बारे़ओ पे, खे़ल्ले़ कुम्बा चासुम्नु के़याक्पाहाॽनु सोरिक् वये़॥ 19 खुने़ॽ अःक्ते़आङ् कुम्बा मे़त्तु, “आङ्गाॽ आध्गेक्किन् तुक्का! आङ्गाॽ आध्गेक्किन् तुक्का!” खुने़ॽ कुम्बारे़ लत्छा से़वारोबा थिक् मे़त्तु, “खे़न् खुने़ॽ कुम्मारे़ओ तेॽरे़आङ् पेगे़ॽ॥” 20 खे़न् से़वारोबे़ल्ले़ चुक्पे़न् फोःक्खुआङ् कुम्मारे़ओ सधआङ् एगाङ् खे़न् चुक्पे़न् कुम्मारे़ कुभक्तुङ्मो ले़न्जो थारिक् हाबा युङे़गरे़, हे़क्क्याङ् खे़न् एगाङ् खे़न् स्ये़॥ 21 खे़न् मे़न्छुमान् पेआङ् थाःङ् निङ्वाॽफुमाङ्ङिल्ले़ कुमनाःल्ले़ कुयुक्नाओ चुक्पे़न् ने़स्सुध हे़क्क्याङ् खुने़ॽ लाम्धेःत्तिन् सुबुआङ् लाःक्कात् लःन्दे़ पे॥ 22 खे़ब्याङ् खुने़ॽ कुये़म्बाःन् उःत्तुआङ् मे़त्तु, “चिसाजि आङ्गाॽ आलागि से़वारोबा थिक् नु अदङ् थिक् पाङ्घे़ फे़न्छे़से़ॽ, हे़क्क्याङ् आङ्गाॽ आसुक्सुक् हाराए निङ्वाॽफुमाङ्ङिल्ले़ कुमनाओ पेःक्काआङ् नुःङ्ङा फे़न्ना॥” 23 कुये़म्बाःल्ले़ सेःन्दोसु, “आइन् खुने़ॽओ थेआङ् पेःक्मा पोःक्खे़बे? आइन् लादुप्पाङ् मेःन् नाःम्सिङ्मा ये़न् सबाथआङ् मेःन्॥” खुने़ॽ मे़त्तु, “च्यासाङ् नुॽ!” 24 खे़न् मे़न्छुमाःल्ले़ अदङ्ङो करेःल्लि युक्नाहाॽ खेःक्खुआङ् कुसे़वारोबे़न् मे़त्तु, “आङ्गाॽ मे़मे़त्ने़न्ल थारिक् नाःत्ते़ॽर तेॽरे़ॽ हे़क्क्याङ् मे़सुसे़न्ने़ॽ॥” 25 कम्भलॽरिक् खुने़ॽ पेआङ् कर्मेल कोःक्माओ निङ्वाॽफुमाङ्ङिल्ले़ कुमनाओ के़रे़॥ खे़न् माःङ्घालाम् फे़रे़र पत्छे़बा निसुआङ् निङ्वाॽफुमाङ्ङिल्ले़ कुमनाःल्ले़ कुसे़वारोबा गेहजिःन् मे़त्तु, “ओमे़त्ते़साॽरे़ॽ! खाना के़भे़म्मे़ङ्ग सुनम्मि मे़न्छुमान्लो! 26 खे़ने़ॽ लोःक्ते़ॽर पेगे़ॽ हे़क्क्याङ् खुने़ॽ तुमे़ॽआङ् सेःन्दोसे़ॽ, ‘थे खे़ने़ॽ के़नुॽ के़दाबि? के़ये़म्बाःन् नुॽबि? के़स्सान् नुॽआङ् वाॽबि?’” खे़न् मे़न्छुमाःल्ले़ गेहजिःन् मे़त्तु, “के़रे़क् नुबाए वाॽरो॥” 27 कर आल्ल खुने़ॽ कोःक्माओ निङ्वाॽफुमाङ्ङिल्ले़ कुमनाओ के़रे़ल्ले़ खुने़ॽ एलिसाःल्ले़ कुलाङ्ङिन् थाप् ते़म्सु॥ खुने़ॽ से़म्मारे़ लागि गेहजिःन् कत्नानाक् तगि फे़रे़, कर निङ्वाॽफुमाङ्ङिल्ले़ कुमनाःल्ले़ मे़त्तु, “खे़न् ले़रे़ॽ! खुने़ॽ साॽरिक् के़साक्पा तुमुआङ् वाॽ, कर यहवे दाङ्बे़ल्ले़ कन् पाःन्निन् आङ्गाॽलाम् माॽरुआङ् आङ्गाॽ थेआङ् मे़त्ताङ्बा होप्॥” 28 खे़न् मे़न्छुमाःल्ले़ मे़त्तु, “आदाङ्बे, थे आङ्गाॽ खे़ने़ॽ ये़म्बित्छासा नाःक्ने़आङ् वये़बि? ‘आङ्गाॽ निङ्साङ् चोःक्माआङ् निङ्साङ्पुक्मो मे़धासाङ्ङिन्ने़ॽ’ फाॽआङ् मे़त्ने़आङ् मे़वये़ने़म्बि?” 29 खे़ब्याङ् एलिसाःल्ले़ गेहजिःन् मे़त्तु, “खे़ने़ॽ के़हे़प्सुबा तेःत्तिल्ले़ के़गेङ्ङो खेःक्खे़ॽ॥ कन् आङ्गाॽ आदक्काःत्ते़न् तेॽरे़आङ् लोःक्ते़ पेगे़ॽ॥ खे़ने़ॽ लाम्मो कुभा के़दुमुसिने़भग्र खे़ङ्हाॽ से़वा मे़मे़त्ते़से़न्ने़ॽ हे़क्क्याङ् खे़ङ्हाॽरे़ से़वा के़म्मे़त्ने़भग्र खे़ङ्हाॽ पाःन्मे़साःत्ते़से़न्ने़ॽ॥ कन् आङ्गाॽ आदक्काःत्तिन् खे़न् चुक्पे़ल्ले़ कुनाओ ने़स्से़ पिरे़ॽ॥” 30 कर चुक्पे़ल्ले़ कुम्मारे़ एलिसान् मे़त्तु, “से़क्खाए यहवे दाङ्बे़न् कुहिङ्वे़त् वाॽबा कुइसिक् नु खे़ने़ॽ कुहिङ्वे़त् के़वाॽबा कुइसिक् आङ्गाॽ माङ्हे़क्कासिङ्ङाआङ् पाःत्तुङ्ॽ, आङ्गाॽ खे़ने़ॽ मे़ले़त्ने़न्ॽ॥” कल्ले़चोगुल्ले़ खुने़ॽ पोगे़आङ् खे़न् मे़न्छुमाःल्ले़ कुएगाङ् थासिङ्॥ 31 गेहजिःन्ग खुन्छिॽ तगि पेआङ् खान् तक्काःत्तिन् खे़न् चुक्पे़ल्ले़ कुनाओ ने़स्सु पिरु, कर खे़प्मो थेआङ् इक्ला इग्र मिक्सेन् मे़बोःक्खे़न्॥ कल्ले़चोगुल्ले़ एलिसान् तुम्मारे़ लागि गेहजिःन् नुःक्खे़आङ् पे, हे़क्क्याङ् खुने़ॽ मे़त्तु, “खे़न् चुक्पे़ङ्ग मे़बोगे़न्लो॥” 32 आल्ल एलिसान् हिम्मो के़रे़ल्ले़ खुने़ॽ कुयुक्नाओ कुम्मारे़ ने़स्सुबा खे़न् चुक्पे़न् स्ये़आङ् ने़स्से़बा तुमु॥ 33 खुने़ॽ याक्फाङ्ङो लासे़ हे़क्क्याङ् खुन्छिॽ ने़त्छिरक् सिगाङ् लासे़सिआङ् खुने़ॽ याक्फाङ्ङोबा लाम्धेःत्तिन् सुबु हे़क्क्याङ् खुने़ॽ यहवे दाङ्बे़न् पेलि फाक्तु॥ 34 खे़न् एगाङ् ने़त्नाओ थाःङ् लासे़आङ् खुने़ॽ कुम्ब्राःन् खे़न् चुक्पे़ल्ले़ कुम्ब्राओ, खुने़ॽ कुमिक्किन् खे़ल्ले़ कुमिक्को हे़क्क्याङ् खुने़ॽ कुहुक्किन् खे़ल्ले़ कुहुक्को ने़स्सुआङ् खुने़ॽ खे़न् अङे़ःक्वाःल्ले़ कुसम्धाङ् ले़म्बे़त् ने़सिङ्॥ आल्ल खुने़ॽ खे़ल्ले़ कुसम्धाङ् ले़म्बे़त् ने़सिङ्ङिल्ले़ खे़न् अङे़ःक्वाःल्ले़ कुधक्किन् कोसे़र पे॥ 35 खे़ब्याङ् एलिसान् पोगे़आङ् याक्फाङ्ङो ना नु कत्ना लाङ्घेगे़, हे़क्क्याङ् याम्मो थिक्ले़ङ् ने़त्नाओ थाःङ् लासे़आङ् खुने़ॽ खे़ल्ले़ कुसम्धाङ् ले़म्बे़त् ने़सिङ्॥ खे़ब्याङ् खे़न् चुक्पे़न् नुसिले़ङ् थारिक् हे़क्छिःङ्बा तेसे़आङ् कुमिक्किन् हन्दु॥ 36 खे़ब्याङ् एलिसाःल्ले़ गेहजिःन् उःत्तुआङ् मे़त्तु, “खे़न् मे़न्छुमान् उःत्ते़ॽ॥” खुने़ॽ खे़न् मे़न्छुमान् उःत्तु॥ खे़न् मे़न्छुमान् त्ये़आङ् एगाङ् एलिसाःल्ले़ मे़त्तु, “खे़ने़ॽ के़स्सा चुक्पे़न् तेॽरे़ॽआङ् पेगे़ॽ॥” 37 खुने़ॽ सिगाङ् लासे़आङ् खाम्बाङ्ङो साम्बोन् फन्छिङ् हे़क्क्याङ् एलिसान् कुलाङ्ङो चिघक् से़वा मे़त्तु॥ खे़न् एगाङ् खुने़ॽ कुस्सा चुक्पे़न् याङ्सिङ्ङाङ् लाःक्कात् लःन्दे़रो॥ एलिसाःल्ले़ कुजान् चामा के़नुॽबा चोगु 38 एलिसान् नुःक्खे़आङ् गिलगाल पे, हे़क्क्याङ् खे़न् ते़ङ्गप्पो साक् पोगे़आङ् ने़स्से़॥ आल्ल माङ्निङ्वाॽपान् के़बाःप्पा मनासुम्हाॽरे़ खुने़ॽ मे़दुमुर मे़वये़ल्ले़ खुने़ॽ कुसे़वारोबे़न् मे़त्तु, “मिओ यम्बा खप्प्यान् युक्खे़ॽआङ् कन् मनाहाॽरे़ खुन्छिॽ लागि आजे़त् हाःक्वाजि खन्छे़ॽ॥” 39 खे़ङ्हाॽओबा थिक्पाग सिसिम्भे़ना कोःत्छे़ इक्ताप्हाॽओ पे, हे़क्क्याङ् खुने़ॽ ताम्भुङ् इवाःत्हाॽ खोसुआङ् खे़ल्ले़ कुजाॽहाॽ कुदेःप्फे़रा कुले़ःम् सुङु तारु॥ खे़न् थेबे फाॽआङ् हाःत्ले़आङ् कुसिङ् मे़न्निःत्ते खे़न् सिङ्सेॽहाॽ हे़गुआङ् खे़न् हाःक्वा थोःक्मा खप्प्याओ केःत्तु॥ 40 मनाहाॽरे़ मे़जर फाॽआङ् खे़न् हाःक्वान् मे़धाबु, कर खे़ङ्हाॽरे़ खे़न् चामा मे़हेःक्तुल्ले़ खे़ङ्हाॽ मे़अःक्ते़आङ् मे़बाःत्तु, “निङ्वाॽफुमाङ्ङिल्ले़ कुमनाए, खे़न् खप्प्याओग आसिसिबा निङ्ङिन् याक्लो!” हे़क्क्याङ् खे़ङ्हाॽरे़ खे़न् चामा मे़न्छुक्तुन्॥ 41 एलिसाःल्ले़ मे़त्तुसि, “कुभा फेॽरुम्जि तारे़म्मे़ॽ॥” खुने़ॽ खे़न् खप्प्याओ थे़क्तुआङ् मे़त्तुसि, “आल्ल कन्हाॽ चामा पिरे़म्सिम्मे़ॽ॥” कन् ये़म्मो खे़न् खप्प्याओबा कुजाओ आममबा थेआङ् होःप्ते़॥ किप् थिक् मनाहाॽरे़ कुजा मे़ज 42 बाल-सलिसाबा कुभा मनाधिक्ले़ निङ्वाॽफुमाङ्ङिल्ले़ कुमनाःल्ले़ लागि तगि के़दुम्बा निबोङ् हःक्सि खरे़ःङ् नु कुभा खारक् के़दुम्बा कुजा ताप्माहाॽ तारुआङ् त्ये़॥ एलिसाःल्ले़ खे़न् मे़त्तु, “खे़न् कुजान् कन् मनाहाॽ चामा पिरे़से़ॽ॥” 43 खुने़ॽ कुसे़वारोबे़ल्ले़ मे़त्तु, “किप् थिक् मनाहाॽरे़ लागि कम्याःक्ले़रक्क आङ्गाॽ आक्खेआङ् ते़क्तुङ्सिङ्बाबे?” कर एलिसाःल्ले़ नोगप् पिरु, “खे़ने़ॽ मनाहाॽ कन् चामा पिरे़से़ॽ॥ थेआङ्भे़ल्ले़ यहवे दाङ्बे़ल्ले़ अक्खे पाःत्तुॽ—‘खे़ङ्हाॽरे़ मे़जआङ् कुभा नन्लो॥’” 44 खे़ब्याङ् खुने़ॽ खे़न् खे़ङ्हाॽरे़ खुन्छिॽ तगि युक्खु पिरुसि, हे़क्क्याङ् यहवे दाङ्बे़ल्ले़ पाःत्तुबा कुइसिक् खे़ङ्हाॽरे़ मे़जआङ् कुभा नरे़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.