२ हाङ् 25 - लिम्बुयरुसले़म ये़क्यक्किन् मे़गे़ ( २ साप्मु ३६:१३-२१ ; यर्मि ५२:३-११ ) 1 कल्ले़चोगुल्ले़ सिदकियाह हाङ्ङिल्ले़ हाङ्युक् चोगुबा फाङ्सिगेक्पा तङ्बे थिबोङ्गेक्पा ला थिबोङ्गेक्पा ये़न्नो बेबिलोनबा हाङ् नबुकदनेसरे़न् खुने़ॽ के़रे़क् कुधक्सुबाहाॽनु सोरिक् यरुसले़ःम्मिल्ले़ कुदक्ले़ङ्वाओ तगि थासिङ्ङाङ् फे़रे़, हे़क्क्याङ् खे़न् किर्गप् कबुआङ् थक्सुबा ने़त्ना साःङ्गाहिम् नु चन्छिङ्मा खाम्लुङ्हाॽ फोःक्खु॥ 2 सिदकियाहःल्ले़ हाङ्युक् चोगुबा थिबोङ्ङाङ् थिक् तङ्बे थारिक् ये़क्यक्किन् किर्गप् मे़गबु मे़ने़स्सु॥ 3 लिसिगेक्पा ला फाङ्सिगेक्पा ये़न्नो आत्तातान्ने साॽरिक् साक् पोगे़, मनाहाॽरे़ थेआङ् चामा कुजा मे़ङ्गत्तुन्॥ 4 हाबा खे़न् ये़म्मो ये़क्यक्कोबा लुङ्धाक्किन् लुःन्दे़ हे़क्क्याङ् बेबिलोनिहाॽरे़ ये़क्यक्किन् मे़गबुआङ् मे़ने़स्से़ल्ले़सा यहुदाबा के़रे़क् थक्सुबाहाॽ हाङ्ङिल्ले़ कुभुङ्इक् पेसाङ्बा नाहाङ् कत्नाहाङ्बा लुङ्धाक्किल्ले़ कुलुम्मोबा लाम्धेःत्तोलाम् से़न्दिक् मे़घे़त्छिङ् मे़घे़रे़॥ खे़ङ्हाॽ अराबा ने़ने़बादे़न् ले़प्माङ् मे़घे़त्छिङ् मे़बे॥ 5 कर बेबिलोनबा थक्सुबाहाॽरे़ सिदकियाह हाङ्ङिन् मे़नाःत्तु मे़देॽरुआङ् खुने़ॽ यरिहोबा ने़ने़बादे़न्नो मे़सिॽरु॥ खुने़ॽलाम् के़रे़क् कुधक्सुबाहाॽ लाःत्लाःत् मे़बोःक्खे़आङ् फुत्छिङ्ज्याङ् मे़से़रे़ मे़घे़रे़॥ 6 हे़क्क्याङ् खे़न् मे़दे़म्सुआङ् खुने़ॽ रिब्ला बेबिलोनबा हाङ्ङे़ओ मे़देॽरु, खे़प्मो खुने़ॽ खुम्दिङ् पिमा निःन्धो पोःक्खे़॥ 7 खे़ङ्हाॽरे़ सिदकियाहःल्ले़ कुस्सा ये़म्बित्छाहाॽ खुने़ॽ कुमिक्किल्ले़ निसुरए मे़से़रुसि॥ खे़ङ्हाॽरे़ सिदकियाहःल्ले़ कुमिक्हाॽ मे़भे़क्खु मे़बिरु, हे़क्क्याङ् खुने़ॽ कासा थक्क्रङ्ङिल्ले़ इमे़घेःक्खुआङ् बेबिलोन मे़देॽरुरो॥ माङ्हिम्मिन् मे़लुःन्दु ( यर्मि ५२:१२-२३ ) 8 बेबिलोनबा नबुकदनेसर हाङ्ङिल्ले़ हाङ्युक् चोगुबा थिबोङ्ङाङ् फाङ्सिगेक्पा तङ्बे, ङासिगेक्पा ला, नुसिगेक्पा ये़न्नो बेबिलोनबा हाङ्ङिल्ले़ कुसुहाङ्युक्पा हाङ् कम्ब्राङ् के़मे़प्पाहाॽरे़ खुन्छिॽ थक्मोबा नबुजरदाने़न् यरुसले़म के़रे़भे़रे़॥ 9 खुने़ॽ यहवे दाङ्बे़ल्ले़ कुहिम्मो नु हाङ्हिम्मो हे़क्क्याङ् यरुसले़ःम्बा के़रे़क् हिम्हाॽओ मिभाःत्त्रा केःत्तु॥ के़रे़क् यम्बयम्बा के़ये़क्पा हिम्हाॽ खुने़ॽ मिधिक्खुदेसु॥ 10 यरुसले़मबा काक् पिसाङ्बा लुङ्धाक्हाॽ बेबिलोनबा थक्सुबाहाॽरे़ मे़लुःन्दुल्ले़ खुने़ॽ खे़ङ्हाॽ के़रे़क् लाम्लोमासि याःम्बक् चोगुआङ् वये़॥ 11 थक्मोबा नबुजरदाने़ल्ले़ ये़क्यक्को के़वाॽबा के़याःक्पा नु के़दाङ्बा के़याःक्पा वेॽ मनाहाॽ हे़क्क्याङ् खुन्छिॽ हाङ्ङिन् के़ले़प्पाआङ् बेबिलोनिहाॽओ के़बप्पाहाॽ लाजेॽलाम् लःत्तुदेॽरुसि॥ 12 कर खे़न् थक्मोबे़ल्ले़ चे़ल्ले़क्सेॽ इक्ताप्पो नु इक्ताप्पो याःम्बक् चोःक्मारे़ लागि कुभा साॽरिक् याङ्गे़साॽबा मनाहाॽ खे़प्मो ले़रुधसि॥ 13 बेबिलोनिहाॽरे़ यहवे दाङ्बे़ल्ले़ कुहिम्मो के़युङ्बा कासा सित्लाङ्हाॽ, के़लोःक्पा कुयुक्नाहाॽ नु यम्बा कासा फसिन् फल्लाक् फल्लाक् मे़ए़क्खु हे़क्क्याङ् कुम्जिक्मा मे़जोगुआङ् कासाहाॽ बेबिलोन मे़देॽरु॥ 14 खे़ङ्हाॽरे़ खप्प्याहाॽ, खप्माःत्हाॽ, सेमिःल्ले़ कुभिःप्मा लाभिःत्हाॽ नु चल्लाङ्ना खोर्याहाॽ हे़क्क्याङ् हाङ्हिम्मोबा माङ्से़वा याःम्बक्को याङ्मनाबा के़रे़क् कासा सामा पुमाहाॽ मे़देॽरुआङ् मे़बे॥ 15 हाङ् कम्ब्राङ् के़मे़प्पाहाॽरे़ खुन्छिॽ थक्मोबे़ल्ले़ साङ्ते़रे़ःङ्हाॽ नु सामाक्खिॽ साङ्मा छे़ःङ्ग्याहाॽ हे़क्क्याङ् साम्म्याङ् इग्र युप्पालाम् थक्मनाबा के़रे़क् सामाहाॽ तेॽरु॥ 16 यहवे दाङ्बे़ल्ले़ कुहिम्मिल्ले़ लागि सोलोमनरे़ थगु चोगुबा ने़त्छि सित्लाङ्हाॽ, पयम् यम्बा फसिःन नु के़लोःक्पा कुयुक्नाहाॽओबा कासान् थाङ्मा सुक्मे़न्दे़प्मनाबा चोगे़॥ 17 सित्लाङ् थक्मा थिबोङ्ङाङ् ये़त्छि हुक्सिक् कुलिङ्गे़न् केःम्बा चोगे़॥ लत्छा सित्लाङ्ङिल्ले़ कुसम्धाङ्बा कासा मे़ःथे़न् हुक्सिक् सुम्सि कुलिङ्गे़न् केःम्बा चोगे़, हे़क्क्याङ् कासाबा चिॽलिङ्गेॽ नु फुॽले़सेॽ कुभुङ् लक्मनाबा कब्रिङ् तिम्से़आङ् पत्छे़॥ वेॽ सित्लाङ्ङिन् खे़प्मोबा चिॽलिङ्गेन्नु सोसोरिक् हाबा खे़न् परिक्पाए चोगे़रो॥ यहुदाबा मनाहाॽ बेबिलोन मे़दे़म्सु मे़देॽरुसि ( यर्मि ५२:२४-२७ ) 18 थक्कम्ब्राङ् के़मे़प्पाहाॽरे़ खुन्छिॽ थक्मोबे़ल्ले़ मानिङ्वाॽफुसाम्बा सरायाहन् नु निसिगेक्पा ताक्फाओबा निङ्वाॽफुसाम्बा सपन्याहःन् हे़क्क्याङ् लाम्धेत् के़गोबा सुम्सिआङ् पुङ्लाधाबा चोगुदेॽरुसि॥ 19 ये़क्यक्को आल्लसाङ् के़वाॽबा के़याःक्पाहाॽलाम् खुने़ॽ थक्लिहाङ्हाॽरे़ खुन्छि तुम् सुहाङ्युक्पे़न् नु ङासि हाङ् सुजासाबाहाॽ तेॽरुसि॥ खुने़ॽ लाजेॽओबा मनाहाॽ थक्सुबाओ के़गेःप्पा मा सुहाङ्युक्पा सुहाङ्मिबे़न् नु ये़क्यक्को याङ्घुसिबा खे़ल्ले़ तुक्पोङ् कुमनाहाॽआङ् तेॽरुसि॥ 20 थक्कम्ब्राङ् के़मे़प्पा थक्मोबा नबुजरदाने़ल्ले़ खे़ङ्हाॽ रिब्ला बेबिलोनबा हाङ्ङे़ओ खे़ङ्हाॽ के़रे़क् तेॽरुसि॥ 21 खे़प्मो हमात लाजेॽबा रिब्लाओ बेबिलोनबा हाङ्ङिल्ले़ खे़ङ्हाॽ से़प्मा पाङ्घुसि॥ कम्भलॽरिक् यहुदान् आप्फेक् कुलाजेॽलाम् मे़दे़म्सु मे़देॽरुरो॥ यहुदाबा चुक्सा हाङ् गदल्याह ( यर्मि ४०:७-९ , ४१:१-३ ) 22 बेबिलोनबा नबुकदनेसर हाङ्ङिल्ले़ सापानरे़ कुम्मे़न्छाॽ, अहिकामरे़ कुस्सा गदल्याहन् यहुदाओ ले़रुधसिबा मनाहाॽ सम्धाङ् युक्तिङ् चोगु॥ 23 आल्ल थक्सुबाहाॽओबा के़रे़क् सुहाङ्युक्पाहाॽ नु खे़ङ्हाॽरे़ खुन्छिॽ मनाहाॽरे़ बेबिलोनबा हाङ्ङिल्ले़ गदल्याहन् चुक्सा हाङ् युक्तिङ् चोगु के़लॽबा पाःन्निन् मे़घे़प्सु, खे़ब्याङ् खे़ङ्हाॽओ नतन्याहरे़ कुस्सा इस्माएल, कारेहरे़ कुस्सा योहानान, नतोपाति तन्हुमेतरे़ कुस्सा सरायाहन् नु माकातिरे़ कुस्सा याजन्याहन् हे़क्क्याङ् खे़ङ्हाॽरे़ खुन्छिॽ मनाहाॽ गदल्याहओ मिस्पा मे़बे॥ 24 गदल्याहःल्ले़ खे़ङ्हाॽ नु खुन्छिॽ मनाहाॽ माङ्हे़क्सिङ्ङाङ् आःन्छिङ्मा पिरुसि, हे़क्क्याङ् खुने़ॽ मे़त्तुसि, “बेबिलोनबा सुहाङ्युक्पाहाॽनु खिनिॽ मे़गिसे़म्मिन्निन्ने़ॽ॥ लाजेॽओ वये़म्मे़ॽ युङाम्मे़ॽआङ् बेबिलोनबा हाङ्ङिल्ले़ कुयाःम्बक् चोगे़म्मे़ॽ, खम्भ्याङ् खिनिॽ नुॽमा तामा पोङ्ॽ॥” 25 कर नुसिगेक्पा लाओ एलिसुमारे़ कुम्मे़न्छाॽ, नतन्याहरे़ कुस्सा इस्माएल, खुने़ॽ हाङ्हिम्सयङ्बा काॽइ वये़, खे़ल्ले़ थिबोङ् मनाहाॽ याङ्सिङ्ङाङ् त्ये़आङ् गदल्याहन् हे़क्क्याङ् खुने़ॽनु मिस्पाओ के़वाॽबा यहुदा नु बेबिलोनबा मनाहाॽ स्ये़रुसि॥ 26 कल्ले़चोगुल्ले़ के़रे़क् मनाहाॽ बेबिलोनिहाॽनु मे़गिसे़आङ् चुक्पाआङ्धो यम्बा थारिक्, थक्सुबा सुहाङ्युक्पाआङ् के़रे़क् मिस्र लाजेॽओ मे़घे़त्छिङ् मे़बेरो॥ पुङ्लाहिम्मोलाम् यहोयाकिने़न् लःन्दे़ ( यर्मि ५२:३१-३४ ) 27 यहुदाबा हाङ् यहोयाकिने़न् लाजेॽलाम् मे़लःत्तु मे़देॽरुबा सुम्बोङ्ङाङ् नुसिगेक्पा तङ्बेओ एबिल-मरोदके़न् बेबिलोनबा हाङ् पोःक्खे़॥ थिबोङ्ङाङ् निसिगेक्पा ला निबोङ्ङाङ् नुसिगेक्पा ये़न्नो एबिल-मरोदके़ल्ले़ यहोयाकिने़न् पुङ्लाहिम्मोलाम् ले़रु॥ 28 एबिल-मरोदके़ल्ले़ खुने़ॽ नुरिक् पाःन्छाःत्तु, हे़क्क्याङ् बेबिलोनओ खुने़ॽनु के़वाॽबा वेॽ हाङ्हाॽनुःल्ले़ आल्लसाङ् थोधोक्पा मिङ्सो इङ्धाङ्बा युक्नाओ खुने़ॽ युक्खु॥ 29 कम्भलॽरिक् यहोयाकिने़न् पुङ्लाहिम्मो चाक्खुबा चाङ्हाॽ ले़क्सिङ् हे़क्क्याङ् खुने़ॽ कुहिङ्हिङ् हाङ्ङिल्ले़ए कुजा चामादे़न्नो युङे़आङ् आभे़ल्ले़साङ् कुजा चरो॥ 30 खुने़ॽ कुलागि हाङ्ङिल्ले़ चक्मे़ल्लॽए कुहिङ्हिङ्ङे फाॽयाङ् पिरुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.