२ हाङ् 24 - लिम्बु1 यहोयाकिमरे़ हाङ्युक् चोगुबा ये़म्मो बेबिलोनबा हाङ् नबुकदनेसरे़ल्ले़ लाजेन् थङ्ङो फत्तु, हे़क्क्याङ् तङ्बे सुम्सि थारिक् यहोयाकिम हाङ्ङिन् खुने़ॽ कुयुक्को वये़॥ कर तङ्बे सुम्सि एगाङ् खुने़ॽ कुनिङ्वाॽ नुःक्तुआङ् नबुकदनेसरे़ल्ले़ कुदक्ले़ङ्वाओ पिफ्युङ् चोगु॥ 2 यहवे दाङ्बे़ल्ले़ खुने़ॽ कुदक्ले़ङ्वाओ बेबिलोनि, अरामि, मोआबि नु अम्मोनिबा के़नाप्पा के़हिप्पा मनासुम्हाॽ पाङ्घुसि॥ यहवे दाङ्बे़ल्ले़ खुने़ॽ कुसे़वारोबा माङ्निङ्वाॽपान् के़बाःप्पाहाॽलाम् माङ्निङ्वाॽपान् पाःत्तुबा कुइसिक् यहुदान् मे़ङ्मारे़ लागि खे़ङ्हाॽ पाङ्घु तासुसि॥ 3 मनस्सेःल्ले़ चोगुबा लायोहाॽ नु खुने़ॽ चोगुबा के़रे़क् याःम्बक्हाॽरे़ चोगुल्ले़ यहुदाबा मनाहाॽ खुने़ॽ कुदगिलाम् लःप्मादेमासि यहवे दाङ्बे़ल्ले़ निङ्वाॽ निःन्धो चोगुबान् के़प्मारे़ लागि से़क्खाए यहवे दाङ्बे़ल्ले़ कुइङ्जाङ् कुइसिक् कन् पाःन्हाॽ के़रे़क् यहुदाओ पोःक्खे़द्ये़॥ 4 हे़क्क्याङ् मनस्सेःल्ले़ कुदोःप्माहाॽरे़ खुन्छिॽ माक्खिॽ से़सुबाल्ले़ चोगुल्ले़ खे़ङ्हाॽरे़ खुन्छिॽ माक्खिल्ले़ यरुसले़ःम्मिन् थिम्सुआङ् ने़स्से़, हे़क्क्याङ् यहवे दाङ्बे़ल्ले़ ले़प्मि पिमा निङ्वाॽ मे़जोगुन्॥ 5 यहोयाकिम हाङ्ङिल्ले़ कुहाङ्युक् ये़म्मोबा वेॽ हिन्दोक्हाॽ नु खुने़ॽ चोगुबा के़रे़क् याःम्बक्हाॽ थे खे़न् यहुदाबा हाङ्हाॽरे़ खुन्छिॽ साप्मुःन्धुम् साप्पन्नो साप्ते़आङ् मे़बप्ने़न्नाङ्बि? 6 यहोयाकिमे़न् खुने़ॽ कुसुधे़बा कुदाक्थे़बाहाॽनु सोरिक् तङ्सिङ्से़ पे, हे़क्क्याङ् खुने़ॽ कुएगाङ् कुस्सा यहोयाकिने़न् हाङ् पोःक्खे़रो॥ 7 बेबिलोनबा हाङ्ङिल्ले़ मिस्रबा वहःङ्ङाङ् कत्ना युफ्रेतिस वहःङ् थारिक् खे़ल्ले़ के़रे़क् कुदे़ःङ्गप्हाॽ हुक्काप् चोगुआङ् ने़स्से़बाल्ले़ चोगुल्ले़ मिस्र लाजेॽबा हाङ्ङिन् खुने़ॽ आप्फेक् कुलाजेन् ले़रुआङ् याम्मो मे़नुःक्खे़न् मे़धाङे़न्लो॥ यहुदाबा हाङ् यहोयाकिन ( २ साप्मु ३६:९-१० ) 8 आल्ल यहोयाकिने़न् हाङ् पोःक्खे़ल्ले़ खुने़ॽ थिबोङ्ङाङ् ये़त्छि तङ्बे योरे़, हे़क्क्याङ् खुने़ॽ यरुसले़ःम्मो ला सुम्सि हाङ्युक् चोगु॥ खुने़ॽ कुम्मारे़ कुमिङ् नहसस्ता वये़॥ खुने़ॽ एल्नातानरे़ कुस्सा यरुसले़म के़युङ्मा वये़॥ 9 यहोयाकिनरे़ खुने़ॽ कुम्बारे़ चोगुबा कुइसिक् यहवे दाङ्बे़ल्ले़ कुनिमो आत्तिन् ताप्फे़ःम्बा चोगे़ खुने़ॽ आम्भा खे़न् चोगु॥ 10 खे़न् ये़म्मो बेबिलोनबा हाङ् नबुकदनेसररे़ कुसुहाङ्युक्पाहाॽ यरुसले़म ले़प्माङ् तगि मे़भे़रे़आङ् खे़न् ये़क्यक्किन् किर्गप् मे़गबु, 11 हे़क्क्याङ् खुने़ॽ कुसुहाङ्युक्पाहाॽरे़ ये़क्यक्किन् किर्गप् मे़गबुर मे़बत्छे़बा ये़म्मो नबुकदनेसरे़न् खुने़ॽ आप्फेक् ये़क्यक्को के़रे़भे़रे़॥ 12 यहुदाबा हाङ् यहोयाकिने़न्, खुने़ॽ कुम्मा, कुसे़वारोबाहाॽ नु कुसुहाङ्युक्पाहाॽ के़रे़क् खुन्छिॽ आप्फेक् आप्फेक् बेबिलोनबा हाङ्ङे़ओ हुक्मे़सुप्सिङ्॥ नबुकदनेसर हाङ्ङिल्ले़ हाङ्युक् चोगुबा ये़त्छिगेक्पा तङ्बेओ यहोयाकिने़न् पुङ्लाधाबा चोगु॥ 13 यहवे दाङ्बे़ल्ले़ उवा चोगुबा हे़क्केए यहवे दाङ्बे़ल्ले़ कुहिम्मोबा नु हाङ्हिम् थाःङ्हाॽओबा के़रे़क् चिगक्वा सामाहाॽ खुने़ॽ खे़त्तु, खे़ब्याङ् यहवे दाङ्बे़ल्ले़ कुहिम्मिल्ले़ लागि इस्राइलबा हाङ् सोलोमनरे़ थगुबा के़रे़क् साम्म्याङ् सामा पुमाहाॽ सुरुक् सुःन्दुआङ् तेॽरु॥ 14 खुने़ॽ यरुसले़ःम्मो के़युङ्बा के़रे़क् मनाहाॽ नु थक्लिहाङ्हाॽ, युक्साबाहाॽ हे़क्क्याङ् के़रे़क् चोबेगुहाॽ नु चोसाम्बाहाॽ के़रे़क् थिबोङ् हे़न्छिङ् मनाहाॽ ते़म्सु तेॽरुसि॥ साॽरिक् याङ्गे़साॽबा थेआङ् मे़ङ्गप्मनाबाहाॽरक् ले़रुधसि॥ 15 नबुकदनेसररे़ यहोयाकिने़न् पुङ्लाधाबा चोगुआङ् बेबिलोन तेॽरु॥ खुने़ॽ यरुसले़मलाम् हाङ्ङिल्ले़ कुम्मा, कुमेःत्हाॽ, कुसुहाङ्युक्पाहाॽ नु लाजेॽओबा लाम्लोबा कुधे़गेक् मनाहाॽ यरुसले़मलाम् बेबिलोन तेॽरुसि॥ 16 बेबिलोनबा हाङ् नबुकदनेसररे़ नुसि हे़न्छिङ् के़धुम्बा नु ते़न्धङ् चोःक्मारे़ लागि सुम्बोधाबासा थक्लिङ्हाङ्हाॽ हे़क्क्याङ् हे़न्छिङ् थिक् चोबेगुहाॽ नु चोसाम्बाहाॽआङ् बेबिलोन ते़म्सु तेॽरुसि॥ 17 खुने़ॽ यहोयाकिनरे़ कुम्भङा मत्तन्याहन् खुने़ॽ कुले़क्वाओ हाङ् चोगु, हे़क्क्याङ् खुने़ॽ कुमिङ् ले़क्खुआङ् सिदकियाह मिङ् वाःत्तुरो॥ यहुदाबा हाङ् सिदकियाह ( २ साप्मु ३६:११-१२ ; यर्मि ५२:१-३ ) 18 आल्ल सिदकियाहःन् हाङ् पोःक्खे़ल्ले़ खुने़ॽ निबोङ्ङाङ् थिक् तङ्बे योरे़, हे़क्क्याङ् खुने़ॽ यरुसले़ःम्मो थिबोङ्ङाङ् थिक् तङ्बे हाङ्युक् चोगु॥ खुने़ॽ कुम्मारे़ कुमिङ् हमुतल वये़, खुने़ॽ यर्मियाःल्ले़ कुस्सा लिब्ना के़युङ्मा वये़॥ 19 यहोयाकिमे़ल्ले़ चोगुबा कुइसिक् यहवे दाङ्बे़ल्ले़ कुनिमाओ आत्तिन् पाःन्निन् नुबा मे़जोगे़न् सिदकियाहःल्ले़ हाबा खे़न्ने चोगु॥ 20 यहवे दाङ्बे़ल्ले़ कुसाक्के़न्निल्ले़ चोगुल्ले़ कन् के़रे़क् पाःन्हाॽ यरुसले़म्मो नु यहुदाओ पोःक्खे़द्ये़॥ कुनुप्मो खे़ङ्हाॽ खुने़ॽ कुदगिलाम् लःत्तुदेसुसिरो॥ खे़ब्याङ् सिदकियाहःन् बेबिलोनबा हाङ्ङिल्ले़ कुदक्ले़ङ्वाओ पिफ्युङ्बा पोःक्खे़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.