२ हाङ् 23 - लिम्बुयोसियाहःल्ले़ नावाइत्ला से़वा मे़प्मे़न् खे़त्तु ( २ साप्मु ३४:३-७ , २९-३३ ) 1 खे़न् एगाङ् योसियाह हाङ्ङिल्ले़ यहुदा नु यरुसले़ःम्मोबा के़रे़क् लाम्लोबाहाॽ उःप्मा ताःप्मा पाङ्घुसि॥ 2 यहुदाबा मनाहाॽ, यरुसले़म के़युङ्बाहाॽ, निङ्वाॽफुसाम्बाहाॽ नु माङ्निङ्वाॽपान् के़बाःप्पाहाॽ, चुक्पा यम्बा के़रे़क् मनाहाॽनु सोरिक् खुने़ॽ यहवे दाङ्बे़ल्ले़ कुहिम्मो थोःक्सिङ् पे॥ यहवे दाङ्बे़ल्ले़ कुहिम्मो मे़घोसुबा माङ्हुप् साप्पन्नोबा के़रे़क् पाःन्जाःक्हाॽ खे़ङ्हाॽरे़ मे़घे़प्सुर निरु पिरुसि॥ 3 खे़ब्याङ् हाङ्ङिन् सित्लाङ्ङिल्ले़ कुबेसाङ् ये़बे़आङ् माङ्हुप्पिन् यहवे दाङ्बे़न्नु याम्मो कुसङ् चोगु—यहवे दाङ्बे़न् इःप्मा नाःप्मारे़ लागि नु खुने़ॽ कुइङ्जाङ्हाॽ, कुधिम्हाॽ हे़क्क्याङ् कुइङ्दत्हाॽ खुने़ॽ के़रे़क् कुसिक्लुङ्माॽ नु के़रे़क् कुयाम्साम्मिल्ले़ नाःप्मा तिम्मारे़ लागि, हे़क्क्याङ् कन् साप्पन्नो साप्ते़आङ् के़बप्पा माङ्हुप्पोबा पाःन्जाःक्हाॽ के़प्मारे़ लागि खुने़ॽ याम्मो निःन्धो चोगु॥ खे़न् एगाङ् के़रे़क् मनाहाॽरे़ खे़न् माङ्हुप्पिन् कुइसिक् वाॽमारे़ लागि खुन्छिॽ माङ्हुप् मे़जोगु॥ 4 खे़न् एगाङ् योसियाह हाङ्ङिल्ले़ निङ्वाॽफुसाम्बा हिल्कियाह, खे़ल्ले़ कुएगाङ् ताक्फा सिगाङ्बा निङ्वाॽफुसाम्बाहाॽ नु लाम्धेत् के़गोबाहाॽ यहवे दाङ्बे़ल्ले़ कुहिम्मोलाम् बाल माङ्ङिन् नु असेरा माङ्ङिन् हे़क्क्याङ् ताङ्साङ्बोबा खेःम्सिक्पाहाॽरे़ लागि मे़जोगुबा के़रे़क् पाःन्हाॽ खे़प्मादेमा पाङ्घुसि॥ खुने़ॽ कन्हाॽ के़रे़क् यरुसले़म लाःक्कात् किद्रोन ने़ने़बादे़न्नो मिधिक्खुदेसुसि, हे़क्क्याङ् खाप्पुःन्ग बेथेल तेॽरुआङ् पे॥ 5 यहुदाबा पाङ्जुम्हाॽओ नु यरुसले़म कुया कुयाओबा चन्जम्बादे़न्हाॽओ सुक्पा के़हाःम्बा निङ्वाॽफुसाम्बाहाॽ यहुदाबा हाङ्हाॽरे़ युक्तिङ् मे़जोगुसिआङ् वये़॥ खे़ङ्हाॽरे़ बाल माङ्, नाम् नु लाबा, हे़क्क्याङ् मे़न्छ्याबुरुक्माहाॽ नु खेःम्सिक्पा के़रे़क् तरःङ्दिङ् ताङ्साङ्बाल्ले़ लागि सुक्पा मे़हाःन्दु॥ योसियाह हाङ्ङिल्ले़ खे़ङ्हाॽ के़रे़क् लःत्तुदेसुसि॥ 6 खुने़ॽ यहवे दाङ्बे़ल्ले़ कुहिम्मोलाम् असेरा माङ् सित्लाङ्ङिन् लःत्तुआङ् यरुसले़म लाःक्कात् किद्रोन ने़ने़बादे़न्नो तेॽरुआङ् मिधिक्खुदेसु, हे़क्क्याङ् कुम्जिक्मा चोगु॥ खम्भ्याङ् खे़न् खुने़ॽ मे़न्जोबा मनाहाॽरे़ खुन्छिॽ इपुङ्हाॽओ से़सुदेसु॥ 7 खुने़ॽ के़त्निबाहाॽरे़ खुन्छिॽ युङ्मा हिम्हाॽ यसु पिरुसि, खे़ङ्हाॽ यहवे दाङ्बे़ल्ले़ कुहिम्सिगाङ् युङे़ हे़क्क्याङ् खे़प्मो मे़न्छुमाहाॽरे़ असेरा माङ्ङिन् खुःक्मारे़ लागि खिहाॽ मे़भयु॥ 8 योसियाहःल्ले़ यहुदाबा पाङ्जुम्हाॽओलाम् के़रे़क् निङ्वाॽफुसाम्बाहाॽ लःत्तुदेसुसि, हे़क्क्याङ् खे़ङ्हाॽरे़ सुक्पा हाःम्मा याःम्बक् मे़जोगुबा गेबालाम् बेर्सेबा थारिक्पा केःम्ब केःम्बादे़न्हाॽओ के़युङ्बा माङ्धाःन्हाॽ खुने़ॽ आसुत्थो चोगु पिरुसि॥ ये़क्यक्कोबा यम्बा लाम्धेःत्तिल्ले़ फे़न्छाङ् ले़प्माङ् ये़क्यक्कोबा हाङ्युक्पा यहोसुःल्ले़ कुलाम्धेत् तगाङ्बा माङ्युक्नाहाॽ खुने़ॽ यन्छु पिरुसि॥ 9 कन् केःम्ब केःम्बादे़न्हाॽओबा निङ्वाॽफुसाम्बाहाॽरे़ यरुसले़ःम्मो यहवे दाङ्बे़ल्ले़ कुहिम्मोबा ले़त्ति तोःम्मादे़न्नो माङ्से़वा मे़न्जोगुन्, कर खे़ङ्हाॽरे़ खुन्छिॽ आप्फेक् तेःङ्जुम् निङ्वाॽफुसाम्बाहाॽनु के़भङ्बा सिदाॽ मे़न्याक्केबा खरे़ःङ् मे़ज॥ 10 मोलोख माङ्ङिल्ले़ कुलागि आत्तिन्हाॽरे़आङ् खुन्छिॽ ये़म्बित्छा इग्र मे़न्छुमा साहाॽ मिधिङ्मनादेमनाबा सिदुङ्जभा मे़न्जोगुसिन्ल फाॽआङ् योसियाह हाङ्ङिल्ले़ बेन-हिन्नोमबा ने़ने़बादे़न्नो के़ने़बा तोपेत माङ्धाने़न् आसुत्थो चोगु॥ 11 यहवे दाङ्बे़ल्ले़ कुहिम्मोबा लाम्धेत्तो यहुदाबा हाङ्हाॽरे़ नाम्मिन् इङ्धाङ् पिमारे़ लागि मे़ये़प्सुसिबा नावाइत्ला अन्हाॽ खुने़ॽ खे़त्तुदेसुसि॥ खे़ङ्हाॽ नातान-मेलेक मिङ् के़वाःप्पा सुहाङ्युक्पा थिक्ले़ कुयाक्फाङ् निःत्ताङ्बा लक्खुम्मो मे़ये़बे़॥ खे़ब्याङ् नाम्मिल्ले़ लागि मे़दोन्दुसिबा अन्लाधाहाॽ योसियाहःल्ले़ मिधिक्खुदेसुसि॥ 12 आहाजरे़ थाःङ्समा कुयाक्फाङ्ङोबा निःत्ताङ्बा कुगौसिओ यहुदाबा हाङ्हाॽरे़ मे़ये़प्सुबा ले़त्ति तोःम्मादे़न्हाॽ नु यहवे दाङ्बे़ल्ले़ कुहिम्मोबा ने़प्माङ् लक्खुम्मो मनस्सेःल्ले़ चोगुबा ले़त्ति तोःम्मादे़न्हाॽ योसियाहःल्ले़ यन्छुदेसु॥ खुने़ॽ खे़ङ्हाॽ खे़प्मोलाम् इःक्खुआङ् लुङ् मुजिक्हाॽ किद्रोन ने़ने़बादे़न्नो लाप्फुसु॥ 13 यरुसले़म नाङ्गे़न् ले़प्माङ् चिःन्जिःन् के़घुबा मे़जोगुबा कोःक्माल्ले़ लाङ्गे़त् पिसाङ् इस्राइलबा हाङ् सोलोमनरे़ सिदोनिहाॽरे़ खुन्छिॽ याम्गे़सिङ्बा माङ्मा अस्तोरेत, मोआबबा सिक्के़ले़ःङ्बा माङ् कमोसे़न् नु अम्मोनबा मनाहाॽरे़ खुन्छिॽ याम्गे़सिङ्बा माङ् मोलोखरे़ कुलागि माङ्धाःन्हाॽ चोगुआङ् ने़स्से़, खे़न् माङ्धाःन्हाॽआङ् योसियाहःल्ले़ आसुत्थो चोगु॥ 14 खुने़ॽ मे़दोन्दुबा लुङ्हाॽ कुम्जिक्मा पोःक्खे़र यःप्सुदेसु, हे़क्क्याङ् असेरा माङ् सित्लाङ्हाॽ च्ये़प्तुआङ् खे़न् ते़न्हाॽओ के़सिबा मनाहाॽरे़ खुन्छिॽ ये़त्हाॽरे़ थिम्सु॥ 15 इस्राइले़न् लायो चोःक्मा के़बाङ्बा नाबातरे़ कुस्सा यारोबामरे़ चोगुबा बेथेलओ के़ने़बा केःम्बादे़न्निन् नु ले़त्ति तोःम्मादे़न्निन्नाङ् खुने़ॽ लुःन्दुदेसु॥ खुने़ॽ खे़न् केःम्बादे़न्निन् मिधिक्खुदेसु हे़क्क्याङ् खे़न् खाप्पुथ्यःङ् कुम्जिक्मा चोगु, खम्भ्याङ् असेरा माङ् सित्लाङ्ङिन्नाङ् मिधिक्खुदेसु॥ 16 खे़न् एगाङ् योसियाहन् ना नु कत्ना ओमये़ल्ले़ आल्ल खुने़ॽ कोःक्माल्ले़ कुयाओ के़ने़बा इपुङ्हाॽ निसु, खे़ब्याङ् खे़न् इपुङ्हाॽओलाम् ये़प्पाहाॽ लःप्मा पाङ्घुसि, हे़क्क्याङ् आसुत्थो चोःक्मारे़ लागि खे़न् ये़प्पा लुङ्सिहाॽ हाबा खे़न् ले़त्ति तोःम्मादे़न्नो मिधिक्खुदेसु॥ कन् पाःन्हाॽ माङ्निङ्वाॽपान् के़बाःप्पा निङ्वाॽफुमाङ्ङिल्ले़ कुमनाःल्ले़ पाःत्तुबा यहवे दाङ्बे़ल्ले़ कुबाःन्जाक् कुइसिक् योसियाहःल्ले़ कन् याःम्बक्हाॽ चोगु॥ 17 योसियाह हाङ्ङिल्ले़ सेःन्दोसुसि, “आङ्गाॽ निसुङ्बा कन् निङ्वाॽसोक् इःत्ते़न् थे़माबे?” खे़न् ये़क्यक्कोबा मनाहाॽरे़ खुने़ॽ मे़मे़त्तु, “कङ्ग निङ्वाॽफुमाङ्ङिल्ले़ कुमनाःल्ले़ कुइपुङ् मिक्सेःन्लो, खुने़ॽ यहुदालाम् फे़रे़आङ् बेथेलबा ले़त्ति तोःम्मादे़न्निल्ले़ कुदक्ले़ङ्वाओ आदाङ्बारे़ के़जोगुबा के़रे़क् याःम्बक्हाॽ माङ्निङ्वाॽपान् पाःत्तुआङ् वये़॥” 18 खुने़ॽ मे़त्तुसि, “हे़क्केने़भग्र खे़न् ले़रे़म् ने़स्से़म्मे़ॽ॥ खिनिॽ आत्तिन्हाॽरे़आङ् खे़ल्ले़ कुये़त्तिन् मे़सुसे़म्मिन्ने़ॽ॥” कल्ले़चोगुल्ले़ खे़ङ्हाॽरे़ खे़ल्ले़न् नु सामरियालाम् के़भे़म्बा माङ्निङ्वाॽपान् के़बाःप्पाहाॽरे़ खुन्छिॽ ये़प्पाहाॽ हाबा मे़ले़रुमे़ध॥ 19 खे़न्नुःल्ले़ वेॽ इस्राइलबा हाङ्हाॽरे़ सामरियाबा पाङ्जुम्हाॽओ मे़जोगुबा केःम्ब केःम्बादे़न्हाॽओबा के़रे़क् माङ्धाःन्हाॽरे़ यहवे दाङ्बे़ल्ले़ कुसाक्के़न् पोगे़बाल्ले़ चोगुल्ले़ योसियाहःल्ले़ बेथेलओ चोगुबा कुइसिक् खुने़ॽ खे़न् खे़त्तुदेसुआङ् आसुत्थो चोगु॥ 20 खे़प्मोबा केःम्ब केःम्बादे़न्हाॽओबा के़रे़क् माङ्निङ्वाॽपान् के़बाःप्पाहाॽ योसियाहःल्ले़ ले़त्ति तोःम्मादे़न्हाॽ सम्धाङ् से़रुसि, हे़क्क्याङ् खे़न् ले़त्ति तोःम्मादे़न्हाॽओ खुने़ॽ मनाहाॽरे़ खुन्छिॽ ये़प्पाहाॽ मिधिक्खु॥ खे़न् एगाङ् खुने़ॽ यरुसले़म नुःक्खे़ फे़रे़रो॥ योसियाहःल्ले़ चोःक्युम्भो तङ्नाम् तोसु ( २ साप्मु ३५:१-१९ ) 21 योसियाह हाङ्ङिल्ले़ के़रे़क् मनाहाॽ कन् इङ्जाङ्ङिन् पिरुसि, “यहवे दाङ्बा खिनिॽ निङ्वाॽफुमाङ्ङिल्ले़ कुजोःक्युम्भो तङ्नाम्मोबा कन् माङ्हुप् साप्पन्नो साप्ते़बा कुइसिक् तोसे़म्मे़ॽ॥” 22 इस्राइलिहाॽ लाम्गे़लोबा खासे़न्लोःम्बाहाॽरे़ खुन्छिॽ ये़न्हाॽआङ् कत्थो नु इस्राइलबा हाङ्हाॽ हे़क्क्याङ् यहुदाबा हाङ्हाॽरे़ खुन्छिॽ ये़म्मो अक्तङ्बा चोःक्युम्भो तङ्नाम् आभे़ल्ले़आङ् मे़न्दोए वये़॥ 23 कर योसियाह हाङ्ङिल्ले़ हाङ्युक् चोगुबा थिबोङ्ङाङ् ये़त्छिगेक्पा तङ्बेओ यरुसले़म ये़क्यक्को यहवे दाङ्बे़ल्ले़ कुलागि कन् चोःक्युम्भो खोमा तङ्नाम्मिन् मे़दोसुरो॥ योसियाहःल्ले़ तोःन्दुबा वेॽ याःम्बक्हाॽ 24 कन्नुःल्ले़ वेॽ यहवे दाङ्बे़ल्ले़ कुहिम्मो निङ्वाॽफुसाम्बा हिल्कियाहःल्ले़ खोसुबा साम्योथिम् इङ्जाङ् साप्पन्नो साप्ते़बा पाःन्हाॽ के़प्मारे़ लागि योसियाहःल्ले़ के़रे़क् खागे़इक्पाहाॽ, हे़क्क्याङ् फे़न्साम् मुरा के़मे़प्पाहाॽ, के़रे़क् हिम्साम्माङ्हाॽ नु नावाइत्लाहाॽ, खे़ब्याङ् यहुदाओ नु यरुसले़ःम्मो निगे़दे़प्पा के़रे़क् याम्गे़सिङ्बा पाःन्हाॽ थ्यःङ् मे़क्खु॥ 25 आप्फेक् के़रे़क् निङ्वाॽ, याम्साम् नु थुम्मिल्ले़ मोसाःल्ले़ के़रे़क् कुसाम्योथिम् इङ्जाङ्ङिन् के़इःप्पा के़नाःप्पाआङ् यहवे दाङ्बा ले़प्माङ् हे़क्केलॽरिक् के़नुःङ्बा आत्तिन् हाङ्ङिन्नाङ् योसियाहन् कुइसिक् तगि इग्र एगाङ् आभे़ल्ले़आङ् मे़म्बोङ्ङे वाॽ॥ 26 हे़क्केसाङ् यहवे दाङ्बे़न् आत्तातान्ने साॽरिक् कुसाक्के़न् पोःक्मोलाम् मे़नुःक्खे़न्, मनस्सेःल्ले़ कुयाःम्बक्किल्ले़ चोगुल्ले़ यहुदाःल्ले़ कुदक्ले़ङ्वाओ खुने़ॽ चाॽरिक् कुसिक् पोगे़आङ् वये़॥ 27 कल्ले़चोगुल्ले़ खुने़ॽ पाःत्तु—“आङ्गाॽ आक्खेलॽरिक् इस्राइले़न् लःत्तुङ्दे़सुङ्ङाङ् वये़, हे़क्केलॽरिक्के यहुदाःन्नाङ् आङ्गाॽ आदगिलाम् लःत्तुङ्देसुङ्ॽ॥ हे़क्क्याङ् आङ्गाॽ सेगुङ्बा यरुसले़म ये़क्यक्किन् नु आङ्गाॽ आमिङ्ङिन् खे़प्मो वाॽ फाॽआङ् पाःत्तुङ्ङाङ् वये़बा खे़न् माङ्हिम्मिन् आङ्गाॽ नाॽरुङ्लो॥” योसियाहःल्ले़ कुहाङ्युक्किन् नुप् ( २ साप्मु ३५:२०–३६:१ ) 28 योसियाहःल्ले़ कुहाङ्युक् ये़म्मोबा वेॽ हिन्दोक्हाॽ नु खुने़ॽ चोगुबा के़रे़क् याःम्बक्हाॽ थे खे़न् यहुदाबा हाङ्हाॽरे़ खुन्छिॽ साप्मुःन्धुम् साप्पन्नो साप्ते़आङ् मे़बप्ने़न्नाङ्बि? 29 आल्ल योसियाहन् हाङ् वये़ल्ले़ मिस्रबा हाङ् फारो नेकोल्ले़ अस्सुरबा हाङ्ङिन् फाॽमारे़ लागि खुने़ॽ युफ्रेतिस वहःङ्ङो ले़प्माङ् थोःक्सिङ् थाङे़॥ योसियाह हाङ्ङिन् खे़न्नु थङ् चोःक्से़ तगि थासिङ्, कर नेकोल्ले़ थङ् थक्ते़आङ् खुने़ॽ मगिद्दोओ स्ये़रु॥ 30 योसियाहःल्ले़ कुसे़वारोबाहाॽरे़ खुने़ॽ कुजेन् अन्लाधाओ मे़गेःत्तुआङ् यरुसले़म मे़युरु, हे़क्क्याङ् खुने़ॽ आप्फेक् कुइपुङ्ङो मे़जिक्खु॥ खे़न् एगाङ् लाजेॽओबा मनाहाॽरे़ योसियाहःल्ले़ कुस्सा यहोआहाजे़न् मे़याङ्सिङ्ङाङ् खुने़ॽ कुम्बारे़ कुले़क्वाओ हाङ् माङ्थोःक्मा मे़जोगुरो॥ यहुदाबा हाङ् यहोआहाज ( २ साप्मु ३६:२-४ ) 31 आल्ल यहोआहाजे़न् हाङ् पोःक्खे़ल्ले़ खुने़ॽ निबोङ्ङाङ् सुम्सि तङ्बे योरे़, हे़क्क्याङ् खुने़ॽ यरुसले़ःम्मो ला सुम्सि हाङ्युक् चोगु॥ खुने़ॽ कुम्मारे़ कुमिङ् हमुतल वये़, खुने़ॽ यर्मियाःल्ले़ कुस्सा लिब्ना के़युङ्मा वये़॥ 32 यहोआहाजे़ल्ले़ खुने़ॽ कुसुधे़बा कुदाक्थे़बाहाॽरे़ मे़जोगुबा कुसिक् यहवे दाङ्बे़ल्ले़ कुनिमो आत्तिन् पाःन्निन् ताप्फे़ःम्बा चोगे़ हाबा खे़न्ने चोगु॥ 33 खुने़ॽ यरुसले़ःम्मो हाङ्युक् मे़जोगुन्ल फाॽआङ् फारो नेकोल्ले़ खुने़ॽ थक्क्रङ्ङिल्ले़ इघेःक्खुआङ् हमात लाजेॽ रिब्लाओ युक्खु, हे़क्क्याङ् यहुदा लाजेन् ३,४०० किलोग्राम युप्पा नु सुम्बोङ्ङाङ् लिसि किलोग्राम साम्म्याङ् एःङ् हुङ्मा पाङ्घु॥ 34 फारो नेकोल्ले़ योसियाहःल्ले़ कुस्सा एल्याकिमे़न् खुने़ॽ कुम्बारे़ कुले़क्वा हाङ् चोगु, हे़क्क्याङ् एल्याकिमलाम् यहोयाकिम मिङ् वाःत्तु॥ कर खुने़ॽ यहोआहाजे़न् मिस्र लाजेॽओ तेॽरुआङ् युक्खु, हे़क्क्याङ् खुने़ॽ हाबा खे़प्मोए स्ये़॥ 35 फारोल्ले़ नाःक्तुबा साम्म्याङ् नु युप्पाहाॽ हुङ्मारे़ लागि यहोयाकिमे़ल्ले़ लाजेॽओ एःङ् फोःक्खु॥ हुङ्मा पाङ्घुसिबा एःङ् कुइसिक् लाजेॽओबा के़रे़क् मनाहाॽरे़ खुन्छिॽ हुङ्मा मे़सुक्तुबा यारिक् साम्म्याङ् नु युप्पाहाॽ खुने़ॽ फोःक्खुसिरो॥ यहुदाबा हाङ् यहोयाकिम ( २ साप्मु ३६:५-८ ) 36 आल्ल यहोयाकिमे़न् यहुदाबा हाङ् पोःक्खे़ल्ले़ खुने़ॽ निबोङ्ङाङ् ङासि तङ्बे योरे़, हे़क्क्याङ् खुने़ॽ यरुसले़ःम्मो थिबोङ्ङाङ् थिक् तङ्बे हाङ्युक् चोगु॥ खुने़ॽ कुम्मारे़ कुमिङ् जबिदा वये़, खुने़ॽ पदायाहरे़ कुस्सा रुमा के़युङ्मा वये़॥ 37 हे़क्क्याङ् खुने़ॽ कुसुधे़बा कुदाक्थे़बाहाॽरे़ मे़जोगुबा कुइसिक् यहवे दाङ्बे़ल्ले़ कुनिमो आत्तिन् पाःन्निन् ताप्फे़ःम्बा चोगे़ हाबा खे़न्ने चोगुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.