२ हाङ् 22 - लिम्बुयहुदाबा हाङ् योसियाह ( २ साप्मु ३४:१-२ ) 1 आल्ल योसियाहन् यहुदाबा हाङ् पोःक्खे़ल्ले़ खुने़ॽ तङ्बे ये़त्छि योरे़, हे़क्क्याङ् खुने़ॽ यरुसले़ःम्मो सुम्बोङ्ङाङ् थिक् तङ्बे हाङ्युक् चोगु॥ खुने़ॽ कुम्मारे़ कुमिङ् यदिता वये़॥ खे़न् अदायाहरे़ कुस्सा बोस्कत के़युङ्मा वये़॥ 2 योसियाहःल्ले़ यहवे दाङ्बे़ल्ले़ कुनिमो आत्तिन् पाःन्निन् नुबा चोगे़ खुने़ॽ हाबा खे़न् चोगु॥ खुने़ॽ चुप्साङ् फे़न्छाङ् मे़ल्लॽए खुने़ॽ कुसुधे़बा दाउदरे़ए के़रे़क् कुये़प्ले़क्हाॽ नाःत्तु तिम्दुरो॥ साम्योथिम् इङ्जाङ् साप्पन्निन् मे़घोसु ( २ साप्मु ३४:८-२८ ) 3 हाङ्युक् चोगुबा थिबोङ्ङाङ् ये़त्छिगेक्पा तङ्बेओ योसियाह हाङ्ङिल्ले़ मसुल्लामरे़ कुम्मे़न्छाॽ, असल्याहरे़ कुस्सा सुहाङ्मिबा सापाने़न् यहवे दाङ्बे़ल्ले़ कुहिम्मो पाङ्घु॥ 4 खुने़ॽ खे़न् मे़त्तु, “तुम् निङ्वाॽफुसाम्बा हिल्कियाहओ पेगे़ॽ, हे़क्क्याङ् लाम्धेत् के़गोबाहाॽरे़ मनाहाॽलाम् मे़दाःक्तुबा, यहवे दाङ्बे़ल्ले़ कुहिम्मो मे़दारुबा याङ्साहाॽ यारिप् चोगे़ॽ युक्खे़ॽ फाॽआङ् खे़न् मे़त्ते़ॽ॥ 5 माङ्हिम्मोबा याःम्बक् ओगे़मे़प्पाहाॽरे़ खुन्छिॽ हुक्को खे़न् पिरे़से़ॽ, हे़क्क्याङ् खे़ङ्हाॽरे़ यहवे दाङ्बे़ल्ले़ कुहिम् चाःङ्वा के़मे़प्पा मनाहाॽ मे़बिरुसिररो॥ 6 सिङ् के़गाम्बा, लुङ् के़से़प्पा नु के़जोःक्पाहाॽ मे़बिरुसिर॥ माङ्हिम्मिन् चाःङ्वा मे़प्मारे़ लागि सिङ्लुङ् नु खक्मनाबा लुङ्हाॽ खे़ङ्हाॽरे़ मे़इङुर॥ 7 खे़ङ्हाॽ मे़बिरुसिबा याङ्ङिन् खे़ङ्हाॽरे़ मे़ङ्गोःत्तुन्ल, थेआङ्भे़ल्ले़ खे़ङ्हाॽ कुदोःप्मा निरिक्काङ् याःम्बक् मे़जोःक्ल मे़याक्॥” 8 तुम् निङ्वाॽफुसाम्बा हिल्कियाहःल्ले़ सुहाङ्मिबा सापाने़न् मे़त्तु, “आङ्गाॽ यहवे दाङ्बे़ल्ले़ कुहिम्मो साम्योथिम् इङ्जाङ् साप्पन्निन् खोसुङ्ङाङ् वाॽ॥” खे़न् खुने़ॽ सापाने़न् पिरु, हे़क्क्याङ् खुने़ॽ खे़न् साप्पन्निन् निरु॥ 9 खे़ब्याङ् सुहाङ्मिबा सापाने़न् हाङ्ङे़ओ पेआङ् खुने़ॽ मे़त्तु, “आदाङ्बारे़ के़सुहाङ्मिबाहाॽरे़ यहवे दाङ्बे़ल्ले़ कुहिम्मो के़युङ्बा याङ्ङिन् मे़देॽरुआङ् माङ्हिम्मो याःम्बक् के़जोःक्पाहाॽ नु याःम्बक् ओगे़मे़प्पाहाॽ मे़बिरुसिआङ् वाॽ॥” 10 खे़न् एगाङ् सुहाङ्मिबा सापाने़ल्ले़ हाङ्ङिन् कन् पाःन्निन् मे़त्तु, “तुम् निङ्वाॽफुसाम्बा हिजकियाःल्ले़ आङ्गाॽ लत्छा साप्पन् पिराङ्ङाङ् वाॽ॥” हे़क्क्याङ् सापाने़ल्ले़ खे़न् साप्पन्निन् हाङ्ङिल्ले़ कुदगि निरु पिरु॥ 11 आल्ल साम्योथिम् इङ्जाङ् साप्पन्नो साप्ते़आङ् के़बप्पा पाःन्निन् हाङ्ङिल्ले़ खे़प्सुआङ् खुने़ॽ कुदेःत्तिन् थे़ःक्खु॥ 12 खुने़ॽ निङ्वाॽफुसाम्बा हिल्कियाह, सापानरे़ कुस्सा अहिकाम, मिकायारे़ कुस्सा अक्बोर, सुहाङ्मिबा सापान नु हाङ्ङिल्ले़ कुसे़वारोबा असायाहन् कन् इङ्जाङ्ङिन् पिरुसि— 13 “आङ्गाॽ आप्फेक् आलागि, आमनाहाॽरे़ खुन्छिॽ लागि नु यहुदाबा के़रे़क् मनाहाॽरे़ खुन्छिॽ लागि कन् खोमनाबा साप्पन्नो थे साप्ते़आङ् पत् फाॽआङ् पेगे़म्मे़ॽआङ् यहवे दाङ्बे़न् सेःन्दोसे़म्मे़ॽ॥ आनिॽ तक्ले़ङ्वाओ यहवे दाङ्बे़ल्ले़ आत्तातान्ने साॽरिक् कुसाक्के़न् पोगे़आङ् वाॽ, थेआङ्भे़ल्ले़ आनिॽ पाधे़बाहाॽरे़ कन् साप्पन्नोबा पाःन्जाःक्हाॽ मे़इःत्तु मे़नाःत्तुबा होप्॥ आनिॽ याःम्बेओ खे़प्मो साप्ते़आङ् के़बप्पा के़रे़क् पाःन्हाॽ कुइसिक् खे़ङ्हाॽरे़ मे़जोगुबा होप्॥” 14 कल्ले़चोगुल्ले़ निङ्वाॽफुसाम्बा हिल्कियाह, अहिकाम, अक्बोर, सापान नु असायाहन् हुल्दा मिङ् के़वाःप्मा मे़न्छुमाधिक्को पाःन्सेःन्दोसे़ मे़बे॥ खे़न् मे़न्छुमान् यरुसले़ःम्मिल्ले़ कुसङ् कुलक्को के़युङ्मा माङ्निङ्वाॽपान् के़बाःप्मा वये़॥ (तिक्भाःल्ले़ कुस्सा नु हरहसरे़ कुम्मे़न्छाॽ सल्लुमे़न् हुल्दाःल्ले़ कुये़म्बा वये़ हे़क्क्याङ् सल्लुमरे़ माङ्हिम्मोबा तेत्चाङ्हाॽ ओमे़प्मा चोःक्मा याःम्बक् चोगु॥) खे़ङ्हाॽरे़ के़रे़क् पाःन्हाॽ हुल्दाःन् मे़जे़क्तु॥ 15 खुने़ॽ खे़ङ्हाॽ मे़त्तुसि, “यहवे दाङ्बा इस्राइलबा निङ्वाॽफुमाङ्ङिल्ले़ हाबा कन् पाःत्तुॽ—खिनिॽ आङ्गाॽओ के़बाङ्बा मनान् मे़त्ते़म्मे़ॽ, 16 ‘यहवे दाङ्बे़ल्ले़ अक्खे पाःत्तुॽ—यहुदाबा हाङ्ङिल्ले़ निरुबा कन् साप्पन्नो साप्ते़आङ् के़बप्पा के़रे़क् पाःन्हाॽ कुइसिक् आङ्गाॽ कन् ते़न्नो नु कल्ले़ कुमनाहाॽओ मे़क्मासिमे़न् तारुङ्ॽ॥ 17 खे़ङ्हाॽरे़ आङ्गाॽ मे़नाॽराङ्ङाङ् वाॽ, हे़क्क्याङ् वेॽ माङ्हाॽओ सुक्पा मे़हाःन्दुआङ् वाॽ, खे़ब्याङ् आप्फेक् हुक्किल्ले़ मे़जोगुसिबा के़रे़क् नावाइत्लाहाॽरे़ आङ्गाॽ आसिक् मे़भोक्खुआङ् वाॽ॥ कल्ले़चोगुल्ले़ कन् ते़न्निल्ले़ कुदक्ले़ङ्वाओ आङ्गाॽ आयाक् ले़ॽरे़आङ् वाॽ, हे़क्क्याङ् आसिक् पोःक्मे़न् मे़जिःक्तुन्ॽ॥’ 18 यहवे दाङ्बे़न् पाःन्सेःन्दोमारे़ लागि के़बाङ्बा यहुदाबा हाङ्ङिन् आम्भा कन् पाःन्निन् मे़त्ते़म्मे़ॽ, ‘आदाङ्बारे़ के़घे़प्सुबा इङ्घङ्ङिल्ले़ कुयाःम्बेओ यहवे दाङ्बा इस्राइलबा निङ्वाॽफुमाङ्ङिल्ले़ हाबा कन् पाःत्तुॽ— 19 खे़ने़ॽ आप्फेक् के़नःम्सिङ्ङाङ् लायोलाम् के़हिःन्दे़बाल्ले़, हे़क्क्याङ् कन् लाजेन् नु कप्मोबा मनाहाॽरे़ खुन्छिॽ याःम्बेओ खे़ङ्हाॽ माङ्दे साक्मुरा मे़धाःॽ हे़क्क्याङ् खाप्पुथ्यःङ् मे़बोङ्ॽ के़लॽबा पाःन्निन् के़घे़प्सुआङ् यहवे दाङ्बे़ल्ले़ कुदगि खे़ने़ॽ के़द्ये़बाल्ले़, खे़ब्याङ् खे़ने़ॽ के़जाङ्ङिन् के़धे़ःक्खुआङ् आङ्गाॽ आदगि मे़रिङ् के़धक्ते़बाल्ले़ चोगुल्ले़, आङ्गाॽ खे़ने़ॽ के़बेलिन् खे़प्सुङ्ङाङ् वाॽ, यहवे दाङ्बे़ल्ले़ उवा चोगुॽ॥ 20 कल्ले़चोगुल्ले़ आङ्गाॽ खे़ने़ॽ के़सुधे़बा के़दाक्थे़बाहाॽनु सोरिक् फुङ्ने़ॽ, हे़क्क्याङ् खे़ने़ॽ निङ्वाॽ तुक्खे मे़न्जाए के़म्जिङ्ॽ॥ कन् ते़न्नो आङ्गाॽ तारुङ्बा के़रे़क् मे़क्मा सिमाहाॽ खे़ने़ॽ के़मिक्किल्ले़ निमा के़ङ्घोसुन्ॽ॥’” खे़ब्याङ् खे़ङ्हाॽरे़ हाङ् योसियाहओ कन् इङ्घङ्ङिन् मे़गे़त्तुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.