२ हाङ् 21 - लिम्बुयहुदाबा हाङ् मनस्से ( २ साप्मु ३३:१-२० ) 1 आल्ल मनस्सेन् हाङ् पोःक्खे़ल्ले़ खुने़ॽ थिबोङ्ङाङ् तङ्बे ने़त्छि योरे़, हे़क्क्याङ् खुने़ॽ यरुसले़ःम्मो ङाबोङ्ङाङ् तङ्बे ङासि हाङ्युक् चोगु॥ खुने़ॽ कुम्मारे़ कुमिङ् हेप्सिबा वये़॥ 2 इस्राइलिहाॽरे़ खुन्छिॽ तगिलाम् यहवे दाङ्बे़ल्ले़ नाःत्तुदेसुसिबा मे़न्छाम् सुवाङ्हाॽरे़ खुन्छिॽ सिक्के़ले़ःङ्बा ये़प्ले़क्हाॽ खुने़ॽ नाःत्तु तिम्दुआङ् यहवे दाङ्बे़ल्ले़ कुनिमो आत्तिन् पाःन्निन् ताप्फे़ःम्बा चोगे़ खुने़ॽ हाबा खे़न् चोगु॥ 3 खुने़ॽ कुम्बा हिजकियाःल्ले़ खाप्पुथ्यःङ् चोगुबा केःम्ब केःम्बादे़न्नोबा माङ्धाःङ्हाॽ खुने़ॽ याम्मो चोगु॥ इस्राइलबा हाङ् आहाबरे़ चोगुबा कुइसिक् खुने़ॽ बाल माङ्ङिल्ले़ कुलागि ले़त्ति तोःम्मादे़न्हाॽ चोगु, हे़क्क्याङ् असेरा माङ् सित्लाङ् थिक्काङ् चोगु॥ खुने़ॽ साबन् हबत् फन्छिङ्ङाङ् ताङ्साङ्बोबा खेःम्सिक्पाहाॽ से़वा मे़त्तुसि॥ 4 खुने़ॽ यहवे दाङ्बे़ल्ले़ कुहिम्मो ले़त्ति तोःम्मादे़न्हाॽ चोगु, खे़न् माङ्हिम्मे़ल्ले़ कुयाःम्बेओ यहवे दाङ्बे़ल्ले़ अक्खे पाःत्तुआङ् वये़, “यरुसले़ःम्मोए आङ्गाॽ आमिङ् युक्खुङ्लो॥” 5 यहवे दाङ्बे़ल्ले़ कुहिम्मोबा ने़प्माङ् लक्खुम्मो खुने़ॽ ताङ्साङ्बोबा खेःम्सिक्पाहाॽरे़ लागि ले़त्ति तोःम्मादे़न्हाॽ चोगु॥ 6 खुने़ॽ आप्फेक् कुस्सा ये़म्बित्छान् मिओ मिधिङ्मनादेमनाबा सिदुङ्जभा चोगु, मिक्ले़ःङ्मा कित्चाक् चोगु, हे़क्क्याङ् थुम्म्या इसुआङ् साम्माङ् च्याङ्हाॽ नु सिसाम्हाॽ मुरा मे़त्तुसि॥ खुने़ॽ यहवे दाङ्बे़ल्ले़ कुनिमो चाॽरिक् ताप्फे़ःम्बा चोगु हे़क्क्याङ् साॽरिक् कुसिक् फोःक्खु॥ 7 खुने़ॽ लक्तु खोःन्दुआङ् चोगुबा असेरा माङ् नावाइत्लान् खुने़ॽ खे़न् माङ्हिम्मो युक्खु, खे़ल्ले़ कुयाःम्बेओ यहवे दाङ्बे़ल्ले़ दाउदे़न् नु कुस्सा सोलोमने़न् अक्खे मे़त्तुसिआङ् वये़, “कन् माङ्हिम्मो नु इस्राइलबा के़रे़क् थाःक्हाॽओलाम् सेगुङ्बा यरुसले़ःम्मो सदादिङ् आङ्गाॽ आमिङ् युक्खुङ्ॽ॥ 8 आङ्गाॽ इङ्जाङ् पिरुङ्सिङ्बा के़रे़क् पाःन्हाॽ इःप्मा नाःप्मारे़ लागि खे़ङ्हाॽ सिङ्सिङ् ये़क्ये़क् मे़लॽ हे़क्क्याङ् आङ्गाॽ आसे़वारोबा मोसाःल्ले़ खे़ङ्हाॽ पिरुसिबा साम्योथिम् इङ्जाङ्हाॽ खक्पे़त् मे़इःत्तु मे़नाःत्तुने़भग्र, आङ्गाॽ खे़ङ्हाॽरे़ खुन्छिॽ पाधे़बाहाॽ पिरुङ्सिङ्बा लाजेॽओलाम् इस्राइलिहाॽरे़ खुन्छिॽ लाङ्हाॽ याम्मो ना नु कत्ना ताक्कम्माआङ् वाॽमा पोङ्ल मे़जोगुङ्ङिन्ॽ॥” 9 कर यहुदाबा मनाहाॽरे़ खे़म्घे़म्मे मे़ल्लाप्तुन्॥ मनस्सेःल्ले़ खे़ङ्हाॽ ले़क्सुदेॽरुसि, हे़क्क्याङ् इस्राइलिहाॽरे़ खुन्छिॽ तगि यहवे दाङ्बे़ल्ले़ खाप्पुथ्यःङ् मे़क्खुसिबा मे़न्छाम् सुवाङ्हाॽनुःल्ले़ आल्लसाङ् यरिक् ताप्फे़ःम्बा याःम्बक् खे़ङ्हाॽरे़ मे़जोगु॥ 10 यहवे दाङ्बे़ल्ले़ खुने़ॽ कुसे़वारोबा माङ्निङ्वाॽपान् के़बाःप्पाहाॽलाम् अक्खे पाःत्तु— 11 “यहुदाबा हाङ् मनस्सेःल्ले़ कन् याम्गे़सिङ्बा याःम्बक्हाॽ चोगुआङ् वाॽ॥ खे़ल्ले़ खुने़ॽनुःल्ले़ तगि तगिबा एमोरिहाॽनुःल्ले़ यरिक् याम्गे़सिङ्बा याःम्बक्हाॽ चोगुआङ् वाॽ, हे़क्क्याङ् खुने़ॽ कुनावाइत्लाहाॽलाम् यहुदान् लायो चोःक्मा पाङ्घुआङ् वाॽ॥ 12 कल्ले़चोगुल्ले़ यहवे दाङ्बा इस्राइलबा निङ्वाॽफुमाङ्ङिल्ले़ अक्खे पाःत्तुॽ—आङ्गाॽ यरुसले़ःम्मो नु यहुदाओ अक्तङ्बा मे़क्मासिमे़न् तारुङ्ॽ, हे़क्केलॽरिक् के़घे़म्बा के़रे़क्ले़ ने़क्खोन् लोःक्खुआङ् फिङ्ॽ॥ 13 आङ्गाॽ सामरियान् खुम्दिङ् पिरुङ्ङिल्ले़ याङुङ्बा वद्रान् नु आहाबरे़ कुहिम्सयङ्ङिन् खुम्दिङ् पिरुङ्ङिल्ले़ याङुङ्बा खिदोराःल्ले़ आङ्गाॽ यरुसले़ःम्मिन् खुम्दिङ् पिरुङ्ॽ॥ आक्खेलॽरिक् मनाःल्ले़ कुजे़त्थ्यान् इःक्खुआङ् साबन् फत्छुॽ, हे़क्केलॽरिक्के आङ्गाॽ यरुसले़ःम्मिन् वरे़ङ्ले़ङ् इःक्खुङ्ॽ॥ 14 आङ्गाॽ आलक्खोमो के़दाङ्बा के़याःक्पा आङ्गाॽ आप्फेक् आमनाहाॽ नाॽरुङ्सिङ्ॽ, हे़क्क्याङ् खे़ङ्हाॽ खुन्छिॽ निङ्मिहाॽरे़ खुनिॽ हुक्को थासुङ्सिङ्ॽ॥ खुन्छिॽ के़रे़क् निङ्मिहाॽरे़ खे़ङ्हाॽ मे़नाप्तुसिॽ हे़क्क्याङ् साक्के़ल्ले़क् खुन्छिॽ मे़गत्तुबा पाःन्हाॽ मे़देॽरु मे़बिरुसिॽ, 15 थेआङ्भे़ल्ले़ खे़ङ्हाॽरे़ आङ्गाॽ आनिमो आत्तिन् पाःन्निन् ताप्फे़ःम्बा चोगे़ आम्भा खे़न्ने मे़जोगुआङ् वाॽ, हे़क्क्याङ् मिस्र लाजेॽलाम् खे़ङ्हाॽरे़ खुन्छिॽ पाधे़बाहाॽ मे़धाङे़बा ये़न्नाङ्धो आइन्बा ये़न् थारिक् खे़ङ्हाॽरे़ आङ्गाॽ आसिक् मे़भोक्खुआङ् वाॽ॥” 16 कन्नुःल्ले़ वेॽ यरुसले़ःम्मिन् थिक् कुसुक्पोलाम् वेॽसमा कुसुक्पो थारिक् माक्खिल्ले़ तिम्से़आङ् ने़स्से़र थारिक् मनस्सेःल्ले़ यरिक् कुदोःप्मा मनाहाॽरे़ खुन्छिॽ माक्खिॽ से़सुआङ् वये़॥ हे़क्क्याङ् खुने़ॽ यहुदान् लायो चोःक्मा पाङ्घुआङ् वये़, खम्भ्याङ् खे़ङ्हाॽरे़ यहवे दाङ्बे़ल्ले़ कुनिमो आत्तिन् पाःन्निन् ताप्फे़ःम्बा चोक्, हाबा खे़न्ने मे़जोगु॥ 17 मनस्सेःल्ले़ कुहाङ्युक् ये़म्मोबा वेॽ हिन्दोक्हाॽ नु खुने़ॽ चोगुबा के़रे़क् याःम्बक्हाॽ, खुने़ॽ चोगुबा लायोहाॽआङ् सोसोरिक् थे खे़न् यहुदाबा हाङ्हाॽरे़ खुन्छिॽ साप्मुःन्धुम् साप्पन्नो साप्ते़आङ् मे़बत्ने़न्नाङ्बि? 18 मनस्सेन् खुने़ॽ कुसुधे़बा कुदाक्थे़बाहाॽनु सोरिक् तङ्सिङ्से़ पे, हे़क्क्याङ् खुने़ॽ आप्फेक् उज्जा कुभुङ्इक्को मे़जिक्खु॥ खे़ब्याङ् खुने़ॽ कुएगाङ् कुस्सा आमोने़न् हाङ् पोःक्खे़रो॥ यहुदाबा हाङ् आमोन 19 आल्ल आमोने़न् हाङ् पोःक्खे़ल्ले़ खुने़ॽ निबोङ्ङाङ् ने़त्छि तङ्बे योरे़, हे़क्क्याङ् खुने़ॽ यरुसले़ःम्मो तङ्बे ने़त्छि हाङ्युक् चोगु॥ खुने़ॽ कुम्मारे़ कुमिङ् मसुल्लेमेत वये़, खुने़ॽ हारुसरे़ कुस्सा मे़न्छुमा योत्बा के़युङ्मा वये़॥ 20 आमोने़ल्ले़ खुने़ॽ कुम्बा मनस्सेःल्ले़ चोगुबा हे़क्केए यहवे दाङ्बे़ल्ले़ कुनिमो आत्तिन् पाःन्निन् ताप्फे़ःम्बा चोगे़ हाबा खे़न्ने चोगु॥ 21 खुने़ॽ कुम्बारे़ के़रे़क् कुये़प्ले़क्हाॽओ लाङ्घेगे़, हे़क्क्याङ् खुने़ॽ कुम्बारे़ से़वा मे़त्तुसिबा नावाइत्लाहाॽ तगि साम्बोन् हबत् फन्छिङ्ङाङ् माङ्से़वा चोगे़॥ 22 खे़ल्ले़ यहवे दाङ्बा खुने़ॽ कुम्बा कुन्धे़बासिरे़ खुन्छिॽ माङ्ङिन् इःप्मा नाःप्मा नाॽरु, हे़क्क्याङ् यहवे दाङ्बे़ल्ले़ कुलाम्मो खुने़ॽ लाङ्मे़घेगे़न्॥ 23 आमोनरे़ कुसुहाङ्युक्पाहाॽरे़ खुने़ॽ कुदक्ले़ङ्वाओ चे़म्भन् मे़जोगु, हे़क्क्याङ् हाङ्ङिन् खुने़ॽए कुहाङ्हिम्मो मे़से़रु॥ 24 खे़ब्याङ् लाजेॽओबा मनाहाॽरे़ आमोन हाङ्ङिल्ले़ कुदक्ले़ङ्वाओ चे़म्भन् के़जोःक्पाहाॽ के़रे़क् मे़से़रुसि, हे़क्क्याङ् खुने़ॽ कुस्सा योसियाहन् खुने़ॽ कुले़क्वाओ हाङ् मे़जोगु॥ 25 आमोनरे़ कुहाङ्युक् ये़म्मोबा वेॽ हिन्दोक्हाॽ नु खुने़ॽ चोगुबा याःम्बक्हाॽ थे खे़न् यहुदाबा हाङ्हाॽरे़ खुन्छिॽ साप्मुःन्धुम् साप्पन्नो साप्ते़आङ् मे़बत्ने़न्नाङ्बि? 26 उज्जाबा कुभुङ्इक्को के़ने़बा आप्फेक् कुइपुङ्ङो खुने़ॽ मे़जिक्खु॥ हे़क्क्याङ् खुने़ॽ कुएगाङ् कुस्सा योसियाहन् हाङ् पोःक्खे़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.