२ हाङ् 20 - लिम्बुहिजकिया हाङ्ङिन् तुक्मालाम् वेःत्ते़ ( यसै ३८:१-८ , २१-२२ ; २ साप्मु ३२:२४-२६ ) 1 खे़न् ये़म्मो हिजकिया हाङ्ङिन् तुगे़आङ् सिमा चोगे़आङ् ने़स्से़॥ आमोजरे़ कुस्सा माङ्निङ्वाॽपान् के़बाःप्पा यसैयान् खुने़ॽओ त्ये़आङ् मे़त्तु, “यहवे दाङ्बे़ल्ले़ हाबा कन् पाःत्तुॽ—खे़ने़ॽ के़हिम् के़धाःङ्हाॽ नुरिक् तङ्घे़ॽ चोगे़ॽ, थेआङ्भे़ल्ले़ खे़ने़ॽ के़सिरो, खे़ने़ॽ के़न्वेःत्ने़न्॥” 2 खे़ब्याङ् हिजकियान् लुङ्धाक् ले़प्माङ् हिसिङ्ङाङ् यहवे दाङ्बे़न् पेलि फाक्तु, 3 “यहवे दाङ्बाए, आङ्गाॽ आदाङ्बारे़ के़दगि आक्तङ्बा नसान् नु के़रे़क् सिक्लुङ्मारे़ माङ्से़वा चोःक्नु वाॽआ, हे़क्क्याङ् आदाङ्बारे़ के़निमो आत्तिन् पाःन्निन् नुबा चोक् खे़न् चोगुङ्ल वाॽआ फाॽआङ् आङ्गाॽ निङ्वाॽ इःत्ताङ्ङे़ॽओ॥” खम्भ्याङ् हिजकियान् उःक्काङ् उःक् हाबे़॥ 4 यसैयान् कुलुम्मोबा लक्खुम्मोलाम् लाःक्कात् लःम्मा पेःक्मानुःल्ले़ तगि यहवे दाङ्बे़ल्ले़ कन् कुइङ्घङ्ङिन् खुने़ॽओ के़रे़रो— 5 “खे़ने़ॽ नुःक्खे़ पेगे़ॽआङ् आङ्गाॽ आमनाहाॽरे़ खुन्छिॽ लाम्लोबा हिजकियान् मे़त्ते़ॽ, ‘खे़ने़ॽ के़सुधे़बा दाउदरे़ कुनिङ्वाॽफुमाङ् यहवे दाङ्बे़ल्ले़ अक्खे पाःत्तुॽ—आङ्गाॽ खे़ने़ॽ के़बेलिन् खे़प्सुङ् हे़क्क्याङ् खे़ने़ॽ के़मिक्वान् निसुङ्॥ आङ्गाॽ खे़ने़ॽ वेःन्ने़आङ् आइन्बा सुम्यान्ले़ खे़ने़ॽ यहवे दाङ्बे़ल्ले़ कुहिम्मो के़बेःक्लो॥ 6 आङ्गाॽ आल्लसाङ् थिबोङ्ङाङ् ङासि तङ्बे खे़ने़ॽ के़धाःक् फोसुङ् पिने़रो॥ हे़क्क्याङ् खे़ने़ॽ नाङ्ने़आङ् कन् ये़क्यक्किन् अस्सुरबा हाङ्ङिल्ले़ कुहुक्को थामालाम् से़ःप्तुङ्ॽ॥ आङ्गाॽ आप्फेक् आलागि नु आङ्गाॽ आसे़वारोबा दाउदरे़ कुलागि आङ्गाॽ कन् ये़क्यक्किन् से़ःप्तुङ्ॽ॥’” 7 खे़ब्याङ् यसैयाःल्ले़ मे़त्तुसि, “पःत्छेल्ले़ कुजाॽइन् इनानाबा चोगे़म्मे़ॽआङ् हुःत्ते़म्मे़ॽ॥” खे़ङ्हाॽरे़ हे़क्केए मे़जोगु, हे़क्क्याङ् खे़न् कुहोॽओ मे़हुःत्तु मे़बिरुआङ् खुने़ॽ वेःत्ते़॥ 8 हिजकियाःल्ले़ यसैयान् अक्खेलॽरिक् सेःन्दोसुआङ् वये़, “यहवे दाङ्बे़ल्ले़ आङ्गाॽ वेःन्ना हे़क्क्याङ् सुम्सिगेक्पा ये़न्नो यहवे दाङ्बे़ल्ले़ कुहिम्मो पेःक्का फाॽआङ् आङ्गाॽ थे़मा मिक्सेन् पिआबे?” 9 यसैयाःल्ले़ नुगप् पिरु, “यहवे दाङ्बे़ल्ले़ थे़मा माङ्हुप् चोगुआङ् वाॽ खे़न् के़त्, आदाङ्बारे़ के़लागि यहवे दाङ्बे़ल्ले़ कुमिक्सेन् हाबा कन् पोङ्ॽ॥ नाम्इःक्खङ्ङिन् थिबोङ् लाङ्गाङ् तगि पेःक्लबि, इ थिबोङ् लाङ्गाङ् एगाङ् नुःङ्लबि?” 10 हिजकियाःल्ले़ मे़त्तु, “नाम्इःक्खङ्ङिन् थिबोङ् लाङ्गाङ् तगि पेःक्माग उसुरु चोक्॥ परुमाल्ले़ खे़न् थिबोङ् लाङ्गाङ् एगाङ् नुःङ्ल॥” 11 खे़ब्याङ् माङ्निङ्वाॽपान् के़बाःप्पा यसैयाःल्ले़ यहवे दाङ्बे़न् पेलि फाक्तु, हे़क्क्याङ् यहवे दाङ्बे़ल्ले़ आहाज हाङ्ङिल्ले़ फत्छुबा कुनाहाङ्सेःक्कोबा नाम्इःक्खङ्ङिन् थिबोङ् लाङ्गाङ् एगाङ् नुःक्खे़र याःन्दुरो॥ बेबिलोनलाम् इङ्घङ् के़भे़प्पा मनाहाॽ ( यसै ३९:१-८ ) 12 हाबा खे़न् ये़म्मो बेबिलोनबा हाङ् बलदानरे़ कुस्सा मरोदक-बलदानरे़ हिजकियाओ साप्पेःत्ताहाॽ नु लत्छा हुक्वा हाङु फे़न्छु, थेआङ्भे़ल्ले़ खुने़ॽ हिजकियान् तुक्काङ् ने़ के़लॽबा इङ्घङ् खे़प्सुआङ् वये़॥ 13 हिजकियाःल्ले़ इङ्घङ् के़भे़प्पाहाॽ लाङ्दाःक् मे़त्तुसि हे़क्क्याङ् खे़ङ्हाॽ खुने़ॽ कुधाःङ्हाॽओ के़युङ्बा के़रे़क्—साम्म्याङ्, युप्पा, मारुक्, कुनाम्गे़नुॽबा निःङ्गेॽ—खुने़ॽ कुभे़जुम् कुभे़याहाॽ ने़मादे़न् हिम्हाॽ नु कुधाःङ्ङो के़ने़बा काक् सामाहाॽ ओःन्धाक्तुसि॥ हिजकियाःल्ले़ कुहाङ्हिम्मो नु खुने़ॽ के़रे़क् कुहाङ्जुम्मो खुने़ॽ खे़ङ्हाॽ ओःन्मे़धाक्तुसिन्बा सामा थेआङ् मे़याःक्ते़न्॥ 14 खे़ब्याङ् माङ्निङ्वाॽपान् के़बाःप्पा यसैयान् हाङ् हिजकियाओ त्ये़आङ् सेःन्दोसु, “खे़न् मनाहाॽरे़ थे मे़बाःत्तु? हे़क्क्याङ् खे़ङ्हाॽ आत्तिलाम् मे़द्ये़बारे़त्छ?” हिजकियाःल्ले़ मे़त्तु, “खे़ङ्हाॽ माःङ्घाबा लाजेॽ बेबिलोनलाम् मे़भे़रे़बारो॥” 15 खे़ब्याङ् माङ्निङ्वाॽपान् के़बाःप्पे़ल्ले़ सेःन्लाप्तु, “खे़ङ्हाॽरे़ आदाङ्बारे़ के़हाङ्हिम्मो थेधेहाॽ मे़निसुग?” हिजकियाःल्ले़ मे़त्तु, “खे़ङ्हाॽरे़ आङ्गाॽ आहाङ्हिम्मोबा के़रे़क् सामाहाॽ मे़निसु॥ आङ्गाॽ आधाःङ्ङो के़युङ्बा के़ने़बा के़रे़क् सामा पुमाहाॽओ खे़ङ्हाॽ ओःन्मे़धाक्तुङ्सिङ्ङिन्बा थे़माआङ् होप्॥” 16 खे़ब्याङ् यसैयाःल्ले़ हिजकियान् मे़त्तु, “यहवे दाङ्बे़ल्ले़ कुइङ्घङ्ङिन् खे़प्से़ॽ— 17 आल्ल खे़ने़ॽ के़हिम्मो के़वाॽबा के़रे़क् सामाहाॽ, हे़क्क्याङ् आइन्बा ये़न् थारिक् खे़ने़ॽ के़सुधे़बा के़दाक्थे़बाहाॽरे़ मे़लुप्सुबा पाःन्हाॽ खक्पे़त् बेबिलोनओ तेॽमा ये़म्मिन् से़क्खाए तारो॥ लत्छा सामाआङ् मे़ल्ले़रुन् मे़न्धने़न्, यहवे दाङ्बे़ल्ले़ पाःत्तुॽ॥ 18 खे़ने़ॽलाम् सागे़वाःन्छिङ्बा, खे़ने़ॽ के़ये़त् नु के़ने़क्सा, खे़ने़ॽ कुभा के़मुॽइदाङ्साहाॽ मे़दे़म्सु मे़देॽरुसिॽ॥ हे़क्क्याङ् बेबिलोनबा हाङ्ङिल्ले़ कुहाङ्हिम्मो खे़ङ्हाॽ याःम्बक् चोःक्से़ सिङ्गारु मे़जोगुसिॽ॥” 19 हिजकियाःल्ले़ मे़त्तु, “आदाङ्बारे़ के़बाःत्तुबा यहवे दाङ्बे़ल्ले़ कुइङ्घङ्ङिन् नुबाए चोक्॥” थेआङ्भे़ल्ले़ खुने़ॽ अक्तङ्बा निङ्वाॽ इःत्तु, “आङ्गाॽ आहिङ्हिङ्ग सनारुङ् पोङ्ॽ हे़क्क्याङ् ताप्थेक् याम्धेक् वाॽआरो॥” हिजकियाःल्ले़ कुनुप्मा कुहाङ्युक् ( २ साप्मु ३२:३२-३३ ) 20 हिजकियाःल्ले़ कुहाङ्युक् ये़म्मोबा वेॽ हिन्दोक्हाॽ, खुने़ॽ चोगुबा मुक्साम्बा याःम्बक्हाॽ नु खुने़ॽ आक्खेलॽरिक् वरक् थे़ङु हे़क्क्याङ् हङ्गारिङ्बा तयुआङ् ये़क्यक्को च्वाःत् थाक्तु के़लॽबा पाःन्हाॽ थे खे़न् यहुदाबा हाङ्हाॽरे़ खुन्छिॽ साप्मुःन्धुम् साप्पन्नो साप्ते़आङ् मे़बत्ने़न्नाङ्बि? 21 हिजकियान् खुने़ॽ कुसुधे़बा कुदाक्थे़बाहाॽनु सोरिक् तङ्सिङ्से़ पे, हे़क्क्याङ् खुने़ॽ कुएगाङ् कुस्सा मनस्सेन् हाङ् पोःक्खे़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.