२ हाङ् 2 - लिम्बुयहवे दाङ्बे़ल्ले़ एलियान् साङ्ग्राम्पेदाङ् तेॽरु 1 आल्ल यहवे दाङ्बे़ल्ले़ खइक् खइक् के़इक्सिङ्बा सुरित् केजङ्लाम् एलियान् साङ्ग्राम्पेदाङ्ङो फोङ्मा तेॽमा चोगुआङ् वये़ल्ले़, एलियान् नु एलिसान् गिलगाले़न् ले़रुसिआङ् लाम्मो लाङ्घेगे़सिर पत्छे़सि॥ 2 खे़ब्याङ् एलियाःल्ले़ एलिसान् मे़त्तु, “खे़ने़ॽ आम्भा कप्मो युङे़ॽ, यहवे दाङ्बे़ल्ले़ आङ्गाॽ बेथेल पाङ्घाङ्ङाङ् वाॽ॥” कर एलिसाःल्ले़ मे़त्तु, “से़क्खाए यहवे दाङ्बे़न् कुहिङ्वे़त् वाॽबा कुइसिक् नु खे़ने़ॽ कुहिङ्वे़त् के़वाॽबा कुइसिक् आङ्गाॽ माङ्हे़क्कासिङ्ङाआङ् पाःत्तुङ्ॽ, आङ्गाॽ खे़ने़ॽ मे़ले़त्ने़न्ॽ॥” हे़क्क्याङ् खुन्छिॽ बेथेलओ थाने़सि ये़सि॥ 3 बेथेलओ माङ्निङ्वाॽपान् के़बाःप्पा सुम्हाॽ एलिसाओ मे़द्ये़आङ् सेःन्मे़दोसु, “यहवे दाङ्बे़ल्ले़ आइन् खे़ने़ॽ के़सिक्साम्बे़न् खे़ने़ॽलाम् तेॽरु फाॽआङ् थे खे़ने़ॽ निङ्वाॽ के़घोसुआङ् वाॽबि?” एलिसाःल्ले़ खे़ङ्हाॽ मे़त्तुसि, “ओवा, निङ्वाॽ खोसुङ्ङाङ् वाॽ॥ कर कल्ले़ कुयाःम्बेओ थेआङ् मे़बाःत्ते़म्मिन्ने़ॽ॥” 4 खे़ब्याङ् एलियाःल्ले़ एलिसान् मे़त्तु, “एलिसाए, खे़ने़ॽ हाबा कप्मो युङे़ॽ॥ यहवे दाङ्बे़ल्ले़ आङ्गाॽ यरिहो पाङ्घाङ्ङाङ् वाॽ॥” हे़क्क्याङ् खुने़ॽ नोगप् पिरु, “से़क्खाए यहवे दाङ्बे़न् कुहिङ्वे़त् वाॽबा कुइसिक् नु खे़ने़ॽ कुहिङ्वे़त् के़वाॽबा कुइसिक् आङ्गाॽ माङ्हे़क्सिङ्ङाआङ् पाःत्तुङ्ॽ, आङ्गाॽ खे़ने़ॽ मे़ले़त्ने़न्ॽ॥” हे़क्क्याङ् खुन्छिॽ यरिहो पेसि॥ 5 यरिहोओ माङ्निङ्वाॽपान् के़बाःप्पा सुम्हाॽ एलिसाओ मे़द्ये़आङ् सेःन्मे़दोसु, “यहवे दाङ्बे़ल्ले़ आइन् खे़ने़ॽ के़सिक्साम्बे़न् खे़ने़ॽलाम् तेॽरु फाॽआङ् थे खे़ने़ॽ निङ्वाॽ के़घोसुआङ् वाॽबि?” एलिसाःल्ले़ खे़ङ्हाॽ मे़त्तुसि, “ओवा, निङ्वाॽ खोसुङ्ङाङ् वाॽ॥ कर कल्ले़ कुयाःम्बेओ थेआङ् मे़बाःत्ते़म्मिन्ने़ॽ॥” 6 खे़ब्याङ् एलियाःल्ले़ खुने़ॽ मे़त्तु, “खे़ने़ॽ आम्भा कप्मो युङे़ॽ॥ यहवे दाङ्बे़ल्ले़ आङ्गाॽ यर्दन वहःङ्ङो पाङ्घाङ्ङाङ् वाॽ॥” हे़क्क्याङ् खुने़ॽ नोगप् पिरु, “से़क्खाए यहवे दाङ्बे़न् कुहिङ्वे़त् वाॽबा कुइसिक् नु खे़ने़ॽ कुहिङ्वे़त् के़वाॽबा कुइसिक् आङ्गाॽ माङ्हे़क्सिङ्ङाआङ् पाःत्तुङ्ॽ, आङ्गाॽ खे़ने़ॽ मे़ले़त्ने़न्ॽ॥” कल्ले़चोगुल्ले़ खुन्छिॽ ने़प्माङ् तगाङ् थाने़सि॥ 7 ङाबोङ् माङ्निङ्वाॽपान् के़बाःप्पा मनाहाॽरे़ खुन्छिॽ मे़दिम्दु मे़देॽरुसि, हे़क्क्याङ् यर्दन वहःङ्ङिल्ले़ कुयाओ एलियान् नु एलिसान् ये़बे़सिबादे़न् ले़प्माङ् ओमे़मये़र माङ्भा माःङ्घा मे़ये़म्सिङ्॥ 8 एलियाःल्ले़ खुने़ॽ हे़प्सुबा तेःत्तिन् फे़न्दु, हे़क्क्याङ् खे़न् कित्तुआङ् यर्दनबा च्वाःत्तिन् खे़ल्ले़ हिप्तु॥ च्वाःत्तिन् चुक्वा नु फे़ङ्वा कुलक् ने़त्छिओ से़न्छिङ्, खम्भ्याङ् खुन्छिॽ से़ङ्से़ङ्बा खाम्बाङ्ङो लाङ्घेगे़सिआङ् नाधाःम्बि पेसि॥ 9 वहःङ्ङिन् काःक्ते़ सुरे़सुआङ् एलियाःल्ले़ एलिसान् मे़त्तु, “खे़ने़ॽलाम् आङ्गाॽ फोङ्मा तेॽमानुःल्ले़ तगि खे़ने़ॽ के़लागि आङ्गाॽ थे चोगुङ् पिने़बे?” एलिसाःल्ले़ नुगप् पिरु, “आङ्गाॽ खे़ने़ॽ के़याम्साम्मिन् कुलक् ने़त्छि यारिक् खोमा युक् पिराङ्ङे़ॽ॥” 10 एलियाःल्ले़ मे़त्तु, “खे़ने़ॽग साॽरिक् के़साक्पा पाःन्निन्ने़ के़नाःक्तुबा॥ हे़क्केसाङ् खे़ने़ॽलाम् आङ्गाॽ मे़भोङ्ङा मे़देॽआबा के़निसुने़भग्र के़नाःक्तुबान् के़घोसुॽ—मेःन्ने़भग्र के़ङ्घोसुन्ॽ॥” 11 आल्ल खुन्छिॽ ताॽजे़क्खे़सिर तगाङ् लाङ्घेगे़ पेसे़त्छिर पत्छे़सिल्ले़, चघप् थिक्ले़ङ्ले़ लत्छा मिधुङ्दिङ् मिराःक् के़दिःप्पा अन्लाधा थिक् नु अन्हाॽ निमे़धाबे़, हे़क्क्याङ् खुन्छिॽ एॽए मे़से़न्दुसिआङ् खइक् खइक् के़इक्सिङ्बा सुरित् केजङ्ङो एलियान् थाःङ् साङ्ग्राम्पेदाङ् ले़प्माङ् मे़देॽरु॥ 12 एलिसाःल्ले़ कन् निसु हे़क्क्याङ् खुने़ॽ अःक्ते़आङ् मे़त्तु, “पानुदिङ् आम्बौ! पानुदिङ् आम्बौ! इस्राइलबा अन्लाधाहाॽ नु अन्गे़युक्पासे!” हे़क्क्याङ् एलिसाःल्ले़ एलियान् याम्मो आभे़ल्ले़आङ् मे़निसुन्॥ खे़न् एगाङ् खुने़ॽ मे़रिङ् थक्ते़र कुदेःत्तिन् ते़म्सुआङ् कुघे़ल्ले़क् ने़त्छि पोःक्खे़र ते़रे़क् थे़ःक्खु॥ 13 एलियाःल्ले़ हे़प्सुबा मक्के़धाबा कुदेःत्तिन् एलिसाःल्ले़ खस्सु हे़क्क्याङ् नुःक्खे़आङ् यर्दन वहःङ्ङिल्ले़ कुयाओ ये़म्सिङ्॥ 14 खे़ब्याङ् खे़प्मो खुने़ॽ एलियाःल्ले़ हे़प्सुबा मक्के़धाबा तेःत्तिल्ले़ च्वाःत्तिन् हिप्तु॥ खुने़ॽ पाःन्सेःन्दो चोगु, “यहवे दाङ्बा एलियाःल्ले़ कुनिङ्वाॽफुमाङ्ङिन् आल्ल आत्ति वाॽबे?” आल्ल खुने़ॽ च्वाःत्तिन् हिप्तुल्ले़, खे़न् चुप्साङ् नु फे़न्छाङ् ले़प्माङ् कुलक् ने़त्छिओ से़न्छिङ्, हे़क्क्याङ् खुने़ॽ कत्नाहाङ्दाङ् काःक्तुआङ् फे़रे़॥ 15 खे़न् निगे़धाःप्पा पाःन्निन् ओगे़मे़प्पाआङ् के़ये़प्पा यरिहोलाम् के़युबा माङ्निङ्वाॽपान् के़बाःप्पा सुम्हाॽरे़ मे़बाःत्तु, “एलियाःल्ले़ कुयाम्साम्मिन् एलिसाओ थ्ये़रत्छ॥” खे़ब्याङ् खे़ङ्हाॽ खुने़ॽ कुदुम्से़ मे़ये़, हे़क्क्याङ् खुने़ॽ कुदगि खाम्बाङ्ङो साम्बोन् हबत् मे़भन्छिङ्॥ 16 खे़ङ्हाॽरे़ खुने़ॽ मे़मे़त्तु, “ओमे़त्ते़ॽ, आनिगे खे़ने़ॽ के़से़वारोबाहाॽनु ङाबोङ् के़धुम्बा मनाहाॽ मे़वाॽ॥ खे़ङ्हाॽ पेःक्माआङ् खे़ने़ॽ के़सिक्साम्बे़न् कोःप्मा फाःक्ते़से़ॽओ॥ पोङ्मा सुक् यहवे दाङ्बे़ल्ले़ कुयाम्साम्मिल्ले़ खुने़ॽ फोःक्खु तेॽरुआङ् कुभा कोःक्माओ इग्र ने़ने़बादे़न्नो युक्खुआङ् युङ्बिला॥” एलिसाःल्ले़ खे़ङ्हाॽ नोगप् पिरुसि, “चिःत्, खे़ङ्हाॽ मे़बाङ्घाम्सिम्मिन्ने़ॽ॥” 17 कर खे़ङ्हाॽ खुने़ॽ कुनाधाधा लॽरे़र थारिक् हादिङ् मे़धक्ते़आङ् मे़बत्छे़॥ कल्ले़चोगुल्ले़ खुने़ॽ मे़त्तुसि, “खे़ङ्हाॽ पाङ्घे़म्देसे़म्सिम्मे़ॽ॥” हे़क्क्याङ् खे़ङ्हाॽरे़ ङाबोङ् मनाहाॽ मे़बाङ्घु मे़देसुसि॥ खे़ङ्हाॽरे़ सुम्यान् थारिक् एलियान् मे़गोःत्तुसाङ् खोमा मे़न्छुक्तुन्॥ 18 आल्ल एलिसान् यरिहो वये़रए खे़ङ्हाॽ खुने़ॽओ मे़नुःक्खे़ मे़द्ये़, खे़ब्याङ् खुने़ॽ खे़ङ्हाॽ मे़त्तुसि, “थे आङ्गाॽ खिनिॽ मे़बेगे़म्मिन्ने़ॽ फाॽआङ् मे़त्निङ्ङाङ् मे़वे़ने़म्बि?” एलिसाःल्ले़ निङ्वाॽ के़माबा कुयाःम्बक्हाॽ 19 खे़न् यरिहो ये़क्यक्कोबा मनाहाॽरे़ एलिसान् मे़मे़त्तु, “आदाङ्बे, ओमे़त्ते़ॽओ, कन् पाङ्जुम्मिन् नुरिक्काङ् चुक्ते़आङ् ने़रो, कर कप्मोबा च्वाःत्तिन् ताप्फे़ःम्बा चोक्, हे़क्क्याङ् थेआङ् मे़लिङ्ने़न्ॽ॥” 20 एलिसाःल्ले़ मे़त्तुसि, “लत्छा कुसङ् खोर्याधिक् आबिरे़म्मे़ॽ, हे़क्क्याङ् खे़प्मो युम्मिन् थे़क्ते़म्मे़ॽ॥” कल्ले़चोगुल्ले़ खे़ङ्हाॽरे़ युम् मे़याक्तुबा खे़न् खोर्यान् मे़दारु॥ 21 खे़ब्याङ् खुने़ॽ खे़न् च्वाःत् पुन्दाक्वाओ पेआङ् खे़प्मो खे़न् युम्मिन् से़सुआङ् मे़त्तुसि, “यहवे दाङ्बे़ल्ले़ अक्खे पाःत्तुॽ—‘आङ्गाॽ कन् सेसेबा चोगुङ्ङाङ् ने़रो॥ खे़ल्ले़ याम्मो आभे़ल्ले़आङ् सिमे़न् मे़दारुन्ॽ, हे़क्क्याङ् थेआङ् मे़ल्लिङ्मनाबाआङ् मे़जोगुन्ॽ॥’” 22 एलिसाःल्ले़ पाःत्तुबा कुइसिक् आइन्बा ये़न् थारिक्के खे़न् च्वाःत्तिन् सेसेबा पोःक्खे़आङ् ने़रो॥ हिन्जाॽहाॽरे़ एलिसान् मे़गेॽरु 23 खे़प्मोलाम् एलिसान् थो थोःक्सिङ्ङाङ् बेथेल पे॥ आल्ल खुने़ॽ लाम्मो पेर पत्छे़ल्ले़ ये़क्यक्कोलाम् चुजुक्सा हिन्जाॽहाॽ मे़भे़रे़आङ् अक्खे मे़लॽरे़र खुने़ॽ के़ॽमा मे़हेःक्तु, “कुधे़गेक् लिगोॽबे, खे़ने़ॽ थाःङ् पेगे़ॽ, कुधे़गेक् नरि के़होःप्पे, खे़ने़ॽ थाःङ् पेगे़ॽ!” 24 खुने़ॽ हिसिङ्ङाङ् खे़ङ्हाॽ ओमे़त्तुसिर यहवे दाङ्बे़ल्ले़ कुमिङ्ङो माङ्दे साङ्ग्रा मे़त्तुसि॥ खे़ब्याङ् ताम्भुङ्ङोलाम् माःॽयु ने़त्छि लःन्दे़सिआङ् खे़ङ्हाॽओबा लिबोङ्ङाङ् ने़त्छि हिन्जाॽहाॽ ते़रे़क् ते़रे़क् थे़ःक्खे़त्छुसि॥ 25 हे़क्क्याङ् खे़प्मोलाम् खुने़ॽ कर्मेल कोःक्माओ थोःक्सिङ्ङाङ् पे, खे़ब्याङ् खे़न् एगाङ् खुने़ॽ सामरिया नुःक्खे़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.