२ हाङ् 19 - लिम्बुहाङ्ङिल्ले़ यसैयान् सुजा नाःक्तु ( यसै ३७:१-७ ) 1 आल्ल हिजकिया हाङ्ङिल्ले़ खे़ङ्हाॽरे़ खुन्छिॽ पाःन्निन् खे़प्सु, खे़ब्याङ् खुने़ॽ कुजाङ्ङिन् थे़ःक्खुआङ् सागि तेत् चाक्सिङ् हे़क्क्याङ् यहवे दाङ्बे़ल्ले़ कुहिम्मो लासे़॥ 2 खुने़ॽ हाङ्हिम्मोबा युक्साबा, एल्याकिम, सुहाङ्मिबा सेब्नान् नु निङ्वाॽफुसाम्बाहाॽ के़रे़क् सागि तेत् मे़जाक्खुआङ् आमोजरे़ कुस्सा माङ्निङ्वाॽपान् के़बाःप्पा यसैयाओ पाङ्घुदेसुसि॥ 3 खे़ङ्हाॽरे़ खुने़ॽ मे़मे़त्तु, “हिजकियाःल्ले़ अक्खे पाःत्तु—अङे़ःक्वान् सावाःन्छिङ्मा चोःक्किल्ले़ खुने़ॽ सावाःम्मारे़ लागि थुम् होःप्पा कुइसिक् आइन्बा ये़न्निन् तुक्खे लाक्खे, खुम्दिङ् नु चाःत्थि पेःक्मा ये़न् पोःक्खे़आङ् वाॽ॥ 4 पोङ्मा सुक् खे़न् खाम्बाङ्ङो थङ् के़जोःक्पा थक्मोबे़ल्ले़ के़रे़क् कुबाःन्हाॽ यहवे दाङ्बा आदाङ्बारे़ के़निङ्वाॽफुमाङ्ङिल्ले़ खे़प्सुर, कुहिङ्वे़त् निङ्वाॽफुमाङ्ङिन् कुनामे़न्छाॽ मे़प्मारे़ लागि खे़न् खुने़ॽ कुन्दाङ्बा अस्सुरबा हाङ्ङिल्ले़ पाङ्घु फे़न्छुआङ् वये़, हे़क्क्याङ् यहवे दाङ्बा आदाङ्बारे़ के़निङ्वाॽफुमाङ्ङिल्ले़ खे़न् पाःन्निन् खे़प्सुआङ् खुने़ॽ खे़न् फे़ःक्तुर॥ कल्ले़चोगुल्ले़ के़हिङ्बाहाॽरे़ लागि आल्लसाङ् पेलिगे़न् तुवा तोःन्दे़ॽ॥” 5 आल्ल हिजकियाःल्ले़ पाङ्घुसिबा सुहाङ्युक्पाहाॽ यसैयाओ मे़द्ये़, 6 खे़ब्याङ् यसैयाःल्ले़ खे़ङ्हाॽ मे़त्तुसि, “खिनिॽ दाङ्बे़न् मे़त्ते़म्मे़ॽ, ‘यहवे दाङ्बे़ल्ले़ अक्खे पाःत्तु—अस्सुरबा हाङ्ङिल्ले़ कुसे़वारोबाहाॽरे़ आङ्गाॽ माङ्चे़ॽया मे़मे़त्ताङ्बा खे़ने़ॽ के़घे़प्सुबा पाःन्हाॽरे़ चोगुल्ले़ खे़ने़ॽ मे़गिसे़न्ने़ॽ॥ 7 खे़प्से़ॽ! आल्ल खुने़ॽ लत्छा इङ्घङ् थिक् खे़प्सुल्ले़, खुने़ॽ आप्फेक् कुलाजेॽओ नुःङ्माआङ् पेःक्मा के़बोङ्बा याम्साम्धिक् आङ्गाॽ खुने़ॽओ केःत्तुङ् पिरुङ्ॽ, हे़क्क्याङ् आङ्गाॽ खुने़ॽ आप्फेक् कुलाजेॽओ ताभेःल्ले़ मे़ज्ये़प्तु मे़से़रुर याःन्दुङ्सिङ्लो॥’” अस्सुरिहाॽरे़ यरुसले़ःम्मिन् थक्मा मे़साःत्तु ( यसै ३७:८-२० ) 8 अस्सुरबा हाङ्ङिल्ले़ लाकिस पाङ्जुम्मिन् ले़रुआङ् पे के़लॽबा इङ्घङ्ङिन् थङ्ङोबा थक्मोबे़ल्ले़ खे़प्सु, खे़ब्याङ् खुने़ॽ नुःक्खे़बे, हे़क्क्याङ् हाङ्ङिन् लिब्नाःल्ले़ कुदक्ले़ङ्वाओ थङ् चोःक्नु यागे़बा खुने़ॽ तुमु॥ 9 आल्ल कुसबा हाङ् तिर्हाकाहन् खुने़ॽनु ते़न्धङ् चोःक्से़ फे़न्ल पत् फाॽआङ् सनहेरिबरे़ इङ्घङ् खे़प्सु॥ कल्ले़चोगुल्ले़ खुने़ॽ याम्मो यहुदाबा हाङ् हिजकियाओ अक्खे मे़त्तुसिआङ् इङ्साबाहाॽ पाङ्घुसिरो— 10 “यहुदाबा हाङ् हिजकियान् मे़त्ते़म्मे़ॽ, ‘यरुसले़ःम्मिन् अस्सुरबा हाङ्ङिल्ले़ कुहुक्को मे़धाने़न्’ फाॽआङ् खे़ने़ॽ के़घे़ःम्सिङ्बा माङ्ङिल्ले़ खे़ने़ॽ इङ्ले़क्को के़न्धाने़न्ल॥ 11 अस्सुरबा हाङ्हाॽरे़ के़रे़क् लाजेॽहाॽ थे मे़मे़त्तुसिआङ् वाॽ, हे़क्क्याङ् खे़न् लाजेॽहाॽ आक्खेलॽरिक् खाप्पुथ्यःङ् मे़जोगुसिआङ् ने़ के़लॽबा पाःन्निन् खे़ने़ॽ से़क्खाए के़घे़प्सुआङ्ङे वाॽ॥ हे़क्केःल्ले़ खे़ने़ॽ के़दाङ्बि? 12 थे आङ्गाॽ आम्बा आन्धे़बासिरे़ मे़मे़क्खुसिबा गोजान, हारान, रेसेप सुवाङ्हाॽ तेल-अस्सारओ के़युङ्बा अदनबा मनाहाॽरे़ खुन्छिॽ माङ्हाॽरे़ खे़ङ्हाॽ मे़से़ःप्तुसिबि? 13 हमातबा हाङ्, अर्पादबा हाङ् हे़क्क्याङ् सपर्बेम ये़क्यक्कोबा हाङ्, हेनाबा नु इब्बाबा हाङ्हाॽ आत्ति मे़बे?” हिजकियाःल्ले़ पेलिगे़न् तुवा चोगु 14 हिजकियाःल्ले़ कन् सक्इङ्घङ्ङिन् इङ्साबाहाॽलाम् ताःक्तुआङ् निरु॥ खे़ब्याङ् खुने़ॽ यहवे दाङ्बे़ल्ले़ कुहिम्मो थोःक्सिङ्बे, हे़क्क्याङ् यहवे दाङ्बे़ल्ले़ कुदगि खे़न् फाःक्खुआङ् ने़स्सु॥ 15 हे़क्क्याङ् हिजकियाःल्ले़ यहवे दाङ्बाओ कन् पेलिन् तोःन्दु—“करुबहाॽरे़ खुन्छिॽ लुम्मो हाङ्युक्नाओ के़युङ्बा यहवे दाङ्बाए, इस्राइलबा निङ्वाॽफुमाङ्ङे, इक्सादिङ् खाम्बेःक्मोबा काक् हाङ्जुम्हाॽओ आदाङ्बारक् निङ्वाॽफुमाङ् के़वाॽ॥ साङ्ग्राम्पेदाङ् नु इक्सादिङ् खाम्बेःक्मान् खे़ने़ॽए नावागे़न् चइःत् के़जोगुबारो॥ 16 यहवे दाङ्बाए, के़ने़क्खोॽबान् याङ्याङ् मे़त्ते़ॽआङ् खे़प्से़ॽओ, के़मिक्किन् हन्दे़ॽआङ् ओमे़त्ते़ॽओ॥ कुहिङ्वे़त् निङ्वाॽफुमाङ्ङिन् कुनामे़न्छाॽ मे़प्मारे़ लागि सनहेरिबरे़ पाःत्तु फे़न्छुबा पाःन्हाॽ खे़प्से़ॽओ॥ 17 “यहवे दाङ्बाए, अस्सुरबा हाङ्हाॽरे़ कन् मे़न्छाम् सुवाङ्हाॽ नु कन्हाॽरे़ खुन्छिॽ लाजेॽहाॽ खाप्पुथ्यःङ् मे़जोगुआङ् ने़ कन् पाःन्निन् से़क्खारो॥ 18 खे़ङ्हाॽरे़ कन्हाॽरे़ खुन्छिॽ माङ्साम्माङ्हाॽ मिओ लाम्मे़भेसुसिआङ् वाॽ हन्नाङ् खाप्पुथ्यःङ् मे़जोगुसिआङ् वाॽरो, थेआङ्भे़ल्ले़ खे़ङ्हाॽग निङ्वाॽफुमाङ्सि मेःन्, कर मनाहाॽरे़ खुन्छिॽ हुक्किल्ले़ मे़जोगुसिबा सिङ् नु लुङ्सिरक्लो॥ 19 आल्ल यहवे दाङ्बा आनिगे निङ्वाॽफुमाङ्ङे, खे़ल्ले़ कुहुक्कोलाम् आनिगे आसे़ःप्ते़ॽओ, हे़क्केलॽरिक् इक्सादिङ् खाम्बेःक्मोबा के़रे़क् हाङ्जुम्हाॽरे़ यहवे दाङ्बा खे़ने़ॽरक् निङ्वाॽफुमाङ्ने़ फाॽआङ् कुसिङ् मे़निःत्तुररो॥” यसैयारे़ पाःत्तुबा माङ्निङ्वाॽपान् ( यसै ३७:२१-३८ ) 20 खे़ब्याङ् आमोजरे़ कुस्सा यसैयाःल्ले़ हिजकियाओ लत्छा इङ्घङ् हाङु, “यहवे दाङ्बा इस्राइलबा निङ्वाॽफुमाङ्ङिल्ले़ अक्खे पाःत्तुॽ—‘अस्सुरबा हाङ् सनहेरिबरे़ कुयाःम्बेओ खे़ने़ॽ के़दोःन्दुबा पेलिन् आङ्गाॽ खे़प्सुङ्॥ 21 खे़ल्ले़ कुदक्ले़ङ्वाओ यहवे दाङ्बे़ल्ले़ पाःत्तुबा पाःन्जाःक्किन् हाबा कन्लो— “‘सियोनरे़ कुस्सा सिसागे़न् मे़न्छ्याःल्ले़ खे़ने़ॽ चे़क्या इङ्दो के़मे़त्लो, हे़क्क्याङ् खे़ने़ॽ कुनामे़न्छाॽ के़मे़त्लो॥ खे़ने़ॽ के़घे़त्छिङ्ङाङ् के़बेःक्किल्ले़ यरुसले़ःम्मिल्ले़ कुस्सा मे़न्छुमाःल्ले़ खुने़ॽ कुधे़गेःक्किन् तघुम्तघुम् मे़त्तुरो॥ 22 “‘खे़ने़ॽ आत्तिन् कुनामे़न्छाॽ नु माङ्चे़ॽया के़मे़त्तुबे? हाःत्ले़ कुदक्ले़ङ्वाओ खे़ने़ॽ के़अःक्ते़बे, हे़क्क्याङ् आङ्दिङ् के़लॽरे़आङ् ओगे़मये़बे? थे इस्राइलरे़ कुसेसेबाल्ले़ कुदक्ले़ङ्वाओ मेःम्बि? 23 खे़ने़ॽ के़इङ्साबाहाॽलाम् खे़ने़ॽ दाङ्बे़ल्ले़ कुदक्ले़ङ्वाओ कुनामे़न्छाॽ पाःन्हाॽ के़लुप्सुरो, हे़क्क्याङ् खे़ने़ॽ अक्खे के़बाःत्तुरो, “यरिक् आअन्लाधाहाॽलाम् कोःक्माहाॽरे़ कुसम्हाॽरे़ ले़बनानबा के़रे़क्नुःल्ले़ केःम्बा थे़गु माङ्वाहाॽरे़ कुसम्हाॽ आङ्गाॽ लिङुङ्ङाङ् वाॽआरो॥ आङ्गाॽ खे़प्मोबा के़रे़क्नुःल्ले़ केःम्बा साम्माङ्सिङ्हाॽ खे़प्मोबा काक्नुःल्ले़ नुबा आःङ्सिङ्हाॽ सोःन्दुङ्लो॥ आङ्गाॽ खे़ल्ले़ नासमा कुयाओ, खे़प्मोबा के़रे़क्नुःल्ले़ नुबा ताम्भुङ्हाॽओ के़राङ्लो॥ 24 आङ्गाॽ वेॽ लाजेॽबा ते़न्हाॽओ वबाक् तयुङ्ङाङ् ने़रो, हे़क्क्याङ् आङ्गाॽ खे़प्मो च्वाःत् थुङुङ्ङाङ् वाॽरो॥ आङ्गाॽ आलाङ्ङोबा लाङ्दाप्पेल्ले़ आङ्गाॽ मिस्र लाजेॽबा वहःङ्हाॽ हेसुङ्लो॥” 25 “‘थे खिनिॽ मे़ङ्घे़म्मे के़वयिबि? उन्छोःन्ने आङ्गाॽ खे़न् युक्तिङ् चोगुङ्लो॥ उनाहुरिबा ये़न्नोए आङ्गाॽ खे़न् निङ्सेक् चोगुङ्लो आल्ल आङ्गाॽ कन् कुलिङ्दो के़त्तुङ्ङाङ् वाॽरो हे़क्केलॽरिक् खे़ने़ॽ यक् के़ने़बा ये़क्यक्हाॽ लुङ्हाॽ लुःप्पे़त् के़लुम्सिङ्बादे़न् के़जोगुआङ् ने़रो॥ 26 खे़न् ये़क्यक्हाॽओ के़युङ्बाहाॽरे़ खुन्छिॽ मुक्किन् युमे़रो हे़क्क्याङ् खे़ङ्हाॽ निङ्साम्मो मे़ध्ये़आङ् खुन्छिॽ नारा सिरेःप् लॽरो॥ खे़ङ्हाॽ इक्ताप्पोबा याःन्सुङ्हाॽ कुइसिक्, लिङ्घाम्बुओबा कुनःन्द्रुक् सरेःक्याःप्पा कुजःक् हे़क्के मे़लॽरो, लिङ्मानुःल्ले़ तगिए के़हेबा के़बेःक्पा यान् हे़क्के मे़लॽरो॥ 27 “‘खे़ने़ॽ आत्ति के़युङ् हे़क्क्याङ् खे़ने़ॽ आभे़ल्ले़ के़दा के़बेःक् खे़न् आङ्गाॽ निसुङ्ङाङ् वाॽरो, खे़ब्याङ् आङ्गाॽनु खे़ने़ॽ के़याःक्ले़ॽरे़आङ् वाॽबान् आङ्गाॽ कुसिङ् निःत्तुङ्ङाङ् वाॽरो॥ 28 खे़ने़ॽ के़हे़न्छिङ्मे़न् आन्भाक्को के़रे़बाल्ले़ चोगुल्ले़, आङ्गाॽ खे़ने़ॽ के़न्बोओ खेःङ्ङिल्ले़ वेॽने़रो खे़ने़ॽ के़म्ब्राओ करे़लिन् फत्छुङ्लो, खे़ब्याङ् खे़ने़ॽ के़द्ये़बा लाम्मो लाम्बाए आङ्गाॽ के़नुःङ् के़बेःक्ल याःन्ने़रो॥’” 29 हिजकियाए, खे़ने़ॽ के़लागि मिक्सेःन्ग कन् पोङ्लो— “आइन्लाम्बा खिनिॽ आप्फेक् के़लिङ्बा चाःन् के़जाम्लो, आत्निम्मा तङ्बेओ हाबा खे़न्लाम् के़लिङ्बे़न् के़जाम्लो॥ कर आत्छिम्मा तङ्बेओग खिनिॽ हेॽरे़म्मे़ॽआङ् सुप्से़म्मे़ॽओ, चे़ल्ले़क्सेॽ इक्ताप् लेःत्ते़म्मे़ॽआङ् कुजाॽहाॽ चे़म्मे़ॽओ॥ 30 सिङ्बुङ्ङिन् कुसाःप् लेःत्छिङ्ङाङ् कुजाॽ थोःक्पा हे़क्के यहुदारे़ कुहिम्सयङ्लाम् के़दाङ्बा के़याःक्पा मनाहाॽ याम्मो मे़बोन् मे़धे़ॽरो॥ 31 थेआङ्भे़ल्ले़ यरुले़मलाम् के़दाङ्बा के़याःक्पा कुलक् थिक्, हे़क्क्याङ् सियोन कोःक्मालाम् के़हिङ्बा के़याःक्पा लत्छा मनासुम्हाॽ मे़लन् मे़दारो॥ 32 कल्ले़चोगुल्ले़ अस्सुरबा हाङ्ङिल्ले़ कुयाःम्बेओ यहवे दाङ्बे़ल्ले़ अक्खे पाःत्तुरो— “खुने़ॽ कन् ये़क्यक्को मे़लाःत्ने़न्लो, इग्र खे़ल्ले़ तोङ् थिक्काङ् कप्मो मे़आबुन्लो॥ खुने़ॽ खोःन् याङ्सिङ्ङाङ् कल्ले़ कुदगि मे़दाने़न्लो, इग्र कल्ले़ कन् कब्रिङ् किर्गप् कप्मारे़ लागि खाम्मिन् उःक्चम्जम्बा थोःक्सिङ्दे़न् मे़जोगुन्लो॥ 33 आत्ति लाम्बा खे़न् फे़रे़ हाबा खे़न् लाम्मे पोङ्ङाङ् नुःङ्बेःक्लो, कन् ये़क्यक्को खुने़ॽ मे़लाःत्ने़न्लो, यहवे दाङ्बे़ल्ले़ हाबा कन् उवा चोगुरो॥ 34 आङ्गाॽ आलागि नु आसे़वारोबा दाउदरे़ कुलागि आङ्गाॽ कन् ये़क्यक्किन् नाङुङ्ॽ हे़क्क्याङ् से़ःप्तुङ्लो॥” 35 खे़न् से़न्दिक् यहवे दाङ्बे़ल्ले़ कुमाङ्लाइङ्बे़न् लःन्दे़ त्ये़, हे़क्क्याङ् खे़ल्ले़ अस्सुररे़ कुधक्सुबा ने़त्ना साःङ्गाहिम्मो लाङे़न्छिङ् थिक् नु ये़प्पोङ्ङाङ् ङासि हे़न्छिङ् मनाहाॽ से़रुसि॥ आल्ल तानाम् मनाहाॽ मे़बोगे़ल्ले़ खे़प्मो के़रे़क् पिसाङ् चेहाॽरक् मे़ने़स्से़॥ 36 कल्ले़चोगुल्ले़ अस्सुरबा हाङ् सनहेरिबरे़ कुधक्सुबा ने़त्ना साःङ्गाहिम्हाॽ यङुआङ् नुःक्खे़बे॥ खुने़ॽ निनवे नुःक्खे़ पेआङ् युङ्मा हेःक्ते़॥ 37 आल्ल थिक्यान् खुने़ॽ कुमाङ् निस्रोकरे़ कुमाङ्हिम्मो से़वा चोःक्नु यागे़ल्ले़ कुस्सा अद्रम्मलेक नु सरेसेरे़ल्ले़ खुने़ॽ ताभेःल्ले़ से़रे़त्छु, हे़क्क्याङ् खुन्छिॽ आरारात लाजेॽओ खे़त्ने़सिआङ् पेसे़त्छि॥ खुने़ॽ कुएगाङ् कुस्सा एसरहदोने़न् हाङ् पोःक्खे़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.