२ हाङ् 18 - लिम्बुयहुदाबा हाङ् हिजकिया ( २ साप्मु २९:१-२ , ३१:१ ) 1 इस्राइलबा हाङ् एलाहरे़ कुस्सा होसियाःल्ले़ हाङ्युक् चोगुबा सुम्सिगेक्पा तङ्बेओ यहुदाबा हाङ् आहाजरे़ कुस्सा हिजकियाःल्ले़ हाङ्युक् चोःक्मा हेःक्तु॥ 2 आल्ल खुने़ॽ हाङ् पोःक्खे़ल्ले़ खे़न् निबोङ्ङाङ् ङासि तङ्बे योरे़, हे़क्क्याङ् खुने़ॽ यरुसले़ःम्मो निबोङ्ङाङ् फाङ्सि तङ्बे हाङ्युक् चोगु॥ खुने़ॽ कुम्मारे़ कुमिङ् अबिया वये़ खुने़ॽ जकरियाःल्ले़ कुस्सा मे़न्छुमा वये़॥ 3 कुन्धे़बा दाउदरे़ चोगुबा कुइसिक् हिजकियाःल्ले़ यहवे दाङ्बे़ल्ले़ कुनिमो आत्तिन् पाःन्निन् नुबा चोगे़ हाबा खे़न् चोगु॥ 4 खुने़ॽ केःम्ब केःम्बादे़न्नोबा माङ्धाःन्हाॽ इःक्सुदेसु, माङ्लुङ्हाॽ थुप्सुदेसु, हे़क्क्याङ् असेरा माङ् सित्लाङ्हाॽ सोःन्दुदेसु॥ मोसाःल्ले़ चोगुबा कासा असेःक्किन् कुम्जिक्मा चोगु, थेआङ्भे़ल्ले़ खे़न् ये़म्मो थारिक् इस्राइलिहाॽरे़ खे़प्मो सुक्पा मे़हाःन्दुआङ् वये़॥ खे़ङ्हाॽरे़ खे़न् नहुस्तान मे़मे़त्तु॥ 5 हिजकियाःल्ले़ यहवे दाङ्बा इस्राइलबा निङ्वाॽफुमाङ्ङो निङ्वाॽ युक्खु॥ यहुदाबा के़रे़क् हाङ्हाॽओ खुने़ॽनुःल्ले़ तगि इग्र खुने़ॽ कुएगाङ् के़दाबा हाङ्हाॽ आत्तिन्नाङ् खुने़ॽ हे़क्तङ्बा मे़बोःक्खे़न्॥ 6 खुने़ॽ यहवे दाङ्बे़ल्ले़ चिघे़ःप् के़घे़ःम्सिङ्बा कुसे़वारोबा पोःक्खे़आङ् वये़, हे़क्क्याङ् खुने़ॽ तिम्मा नाःप्मा मे़ले़रुन्॥ यहवे दाङ्बे़ल्ले़ मोसान् पिरुबा इङ्जाङ्हाॽ खुने़ॽ इःत्तु नाःत्तु॥ 7 हे़क्क्याङ् यहवे दाङ्बे़न् खुने़ॽनु वये़॥ खुने़ॽ चोगुबा के़रे़क् याःम्बक्को खुने़ॽ कुलिङ्दो के़गे़प्पा पोःक्खे़॥ खुने़ॽ अस्सुरबा हाङ्ङिल्ले़ कुदक्ले़ङ्वाओ पिफ्युङ्बा पोःक्खे़, हे़क्क्याङ् खुने़ॽ खे़ल्ले़ कुयाःम्बक् मे़जोगुन्॥ 8 खुने़ॽ पलिस्तिहाॽ नाःन्दुसि॥ खे़ङ्हाॽ मे़युङे़बादे़न् गाजा थारिक् नु खे़प्मो कब्रिङ्बा लाजेॽहाॽओ हे़क्क्याङ् चुजुक्सा पाङ्भेॽआङ्धो यम्बयम्बा ये़क्यक् थे़म्बा खुने़ॽ थङ् नाःन्दुसि॥ 9 हिजकियाःल्ले़ हाङ्युक् चोगुबा लिसिगेक्पा तङ्बेओ, इस्राइलबा हाङ् एलाहरे़ कुस्सा होसियाःल्ले़ हाङ्युक् चोगुबा नुसिगेक्पा तङ्बे के़रे़आङ् वये़, अस्सुरबा हाङ् सलमनेसेररे़ सामरियान् थङ्ङो फत्तुआङ् खे़न् कब्रिङ् किर्गप् कबु॥ 10 तङ्बे सुम्सि थारिक् कब्रिङ् किर्गप् मे़गबुआङ् अस्सुरिहाॽरे़ खे़न् हुक्काप् मे़जोगु॥ कम्भलॽरिक् हिजकियाःल्ले़ हाङ्युक् चोगुबा तुक्सिगेक्पा तङ्बेओ, इस्राइलबा हाङ् होसियाःल्ले़ हाङ्युक् चोगुबा तङ्बे फाङ्सि के़रे़आङ् वये़ल्ले़ सामरियान् हुक्काप् मे़जोगु॥ 11 अस्सुरबा हाङ्ङिल्ले़ इस्राइलिहाॽ अस्सुर लाजेॽओ तेॽरुसि, हे़क्क्याङ् हलह, हाबोर वहःङ्ङिल्ले़ कुयाओ के़ने़बा गोजान नु मादिहाॽरे़ खुन्छिॽ पाङ्जुम्हाॽओ खे़ङ्हाॽ युक्खुसि॥ 12 खे़ङ्हाॽरे़ यहवे दाङ्बा खुन्छिॽ निङ्वाॽफुमाङ्ङिल्ले़ कुबाःन्जाक्किन् मे़न्इःत्ते मे़न्नाःत्ते मे़वये़, कर खुने़ॽ कुमाङ्हुप्पिन्, हे़क्क्याङ् यहवे दाङ्बे़ल्ले़ कुसे़वारोबा मोसाःल्ले़ खे़ङ्हाॽ पिरुसिबा के़रे़क् इङ्जाङ्हाॽ खे़ङ्हाॽरे़ मे़भेःन्दुआङ् वये़॥ खे़ङ्हाॽरे़ इङ्जाङ्हाॽ निनि खे़म्घे़म् मे़ल्लाप्तुन्, खे़ङ्हाॽ मे़न्इःत्तुन् मे़न्नाःत्तुन्नाङ्॥ कल्ले़चोगुल्ले़ कन् के़रे़क् पाःन्हाॽ पोःक्खे़आङ् वये़रो॥ यरुसले़ःम्मिन् अस्सुरिहाॽनु किसे़ ( २ साप्मु ३२:१-१९ ; यसै ३६:१-२२ ) 13 हिजकियाःल्ले़ कुहाङ्युक् ये़म्मोबा थिबोङ्ङाङ् लिसिगेक्पा तङ्बेओ अस्सुरबा हाङ् सनहेरिबरे़ यहुदाओ यक् के़ने़बा के़रे़क् ये़क्यक्हाॽ थङ्ङो फत्तुआङ् खे़ङ्हाॽ हुक्काप् चोगु॥ 14 कल्ले़चोगुल्ले़ यहुदाबा हाङ् हिजकियाःल्ले़ लाकिस के़वाॽबा अस्सुरबा हाङ्ङे़ओ अक्खे पाःत्तुआङ् इङ्घङ् हाक्तु—“आङ्गाॽ याःम्बक् फेःन्दुङ्॥ आङ्गाॽ आलाजेॽओलाम् नुःक्खे़ पेगे़ॽओ, हे़क्क्याङ् आङ्गाॽलाम् खे़ने़ॽ थे के़नाःक्तुॽ, आङ्गाॽ खे़न् पाःन्हाॽ हुङुङ्लो॥” अस्सुरबा हाङ्ङिल्ले़ यहुदाबा हाङ् हिजकियान् थिबोङ् हे़न्छिङ् किलोग्राम युप्पा नु हे़न्छिङ् थिक् किलोग्राम साम्म्याङ् साम्बान् कुःत्तु॥ 15 कल्ले़चोगुल्ले़ हिजकियाःल्ले़ यहवे दाङ्बे़ल्ले़ कुहिम्मो नु हाङ्हिम्मो खोसुबा के़रे़क् युप्पाहाॽ खुने़ॽ पिरु॥ 16 खे़न् ये़म्मो यहुदाबा हाङ् हिजकियाःल्ले़ यहवे दाङ्बे़ल्ले़ कुहिम्मो खुने़ॽ आप्फेक् साम्म्याङ्ङिल्ले़ सुःप्तुआङ् के़ये़प्पा लाम्धेःत्हाॽ नु लाम्धेःत्तोबा सित्लाङ्हाॽलाम् साम्म्याङ्हाॽ लःत्तुआङ् अस्सुरबा हाङ् सनहेरिबे़न् पिरु॥ 17 अस्सुरबा हाङ्ङिल्ले़ खुने़ॽ के़रे़क्नुःल्ले़ यम्बा कुधक्मोबे़न्, खुने़ॽ तुम् कुसुहाङ्युक्पे़न् नु खाम्बाङ्ङो थङ् के़धक्पा कुधक्मोबे़न् यरिक् थक्सुबाहाॽनु सोरिक् लाकिसलाम् यरुसले़म हिजकिया हाङ्ङे़ओ पाङ्घुसि॥ खे़ङ्हाॽ मे़धोःक्सिङ्ङाङ् यरुसले़ःम्मो मे़भे़रे़, खम्भ्याङ् चाङ् वागे़हप्पे़ल्ले़ कुइक्ताप्पो पेःक्मा थोसमा वरक्कोबा वालाम्मिल्ले़ कुयाओ मे़ये़म्सिङ्॥ 18 खे़ङ्हाॽरे़ हिजकिया हाङ्ङिन् मे़उःत्तु, हे़क्क्याङ् हाङ्हिम् ओगे़मे़प्पा हिल्कियाहःल्ले़ कुस्सा एल्याकिमे़न्, सुहाङ्मिबा सेब्नान् नु खारात् के़युङ्बा आसापरे़ कुस्सा योआन् खे़ङ्हाॽरे़ खुन्छिॽ तुम्से़ मे़बेरो॥ सनहेरिबरे़ यरुसले़ःम्मिन् यङ्मासे़रु 19 खाम्बाङ्ङो थङ्गे़जोःक्पा थक्मोबे़ल्ले़ खे़ङ्हाॽ मे़त्तुसि, “हिजकियान् मे़त्ते़म्मे़ॽ— ‘अस्सुरबा पयम् हाङ्ङिल्ले़ अक्खे पाःत्तु, खिनिॽ हाःत्ले़ओ के़घे़ःम्मासिर के़वयिबे? 20 खे़ने़ॽनु थङ् चोःक्मा के़ले़बा हे़क्क्याङ् के़धुम्बा थक्सुबाहाॽ मे़वाॽ फाॽआङ् खे़ने़ॽ के़बाःत्तुबि? कर खे़ने़ॽग कुसुम् मे़न्दम्मनाबा पाःन्लक् के़बाःत्तुॽ॥ खे़ने़ॽ हाःत्ले़ओ के़घे़ःम्सिङ्ङाङ् आङ्गाॽ आदक्ले़ङ्वाओ पिफ्युङ्बा के़बोःक्खे़बे? 21 आल्ल ओमे़त्ते़ॽ, खे़ने़ॽ मिस्रओ के़घे़ःम्सिङ्ल के़वाॽ॥ खे़ङ्ग लत्छा के़ए़क्पा मिक्ला तक्कात् हे़क्तङ्बा चोक्, कुभा मनाहाॽ खे़प्मो मे़दक्सिङ्ने़भग्र खे़ल्ले़ मनाहाॽरे़ खुन्छिॽ हुक्हाॽ लक्तुआङ् मे़गान्॥ खे़प्मो के़घे़ःम्सिङ्बा के़रे़क्ले़ खुन्छिॽ लागि मिस्र लाजेॽबा फारो हाङ्ङिन् हाबा हे़क्तङ्बाए चोक्॥ 22 कर खिनिॽ आनिगे़ग यहवे दाङ्बा आनिगे निङ्वाॽफुमाङ्ङो खे़ःम्मासिगे़ फाॽआङ् खिनिॽ के़बाःत्तुम्ने़भग्र, हिजकियाःल्ले़ इःक्सुदेसुबा केःम्ब केःम्बा माङ्धाःन्हाॽ यहवे दाङ्बे़ल्ले़न् मेःन्नाङ्बि? हे़क्क्याङ् यहुदा नु यरुसले़मबा मनाहाॽ यरुसले़ःम्मो के़ने़बा कन् ले़त्ति तोःम्मादे़न्नो खिनिॽ साम्बोन् हबत्ताङ् माङ्से़वा चोःक्मा पोङ्ॽ फाॽआङ् मे़त्तुसिआङ् मे़वये़ने़म्बि? 23 “‘आल्ल अस्सुरबा हाङ् आङ्गाॽ आन्दाङ्बे़न्नु हादिङ् थक्ते़ॽ॥ अन्गे़युक्पाहाॽ खोमा के़सुक्तुसिने़भग्र आङ्गाॽ आदाङ्बा हे़न्छिङ् ने़त्छि अन्हाॽ पिने़॥ 24 आङ्गाॽ आन्दाङ्बे़ल्ले़ कुसुहाङ्युक्पाहाॽओ के़रे़क्नुःल्ले़ चुक्सा कुसुहाङ्युक्पा थिक् आदाङ्बारे़ आक्खेआङ् खे़प्मा के़सुक्तुबे? हे़क्केसाङ् आदाङ्बारे़ अन्लाधाहाॽ नु अन्गे़युक्पाहाॽरे़ खुन्छिॽ लागि आदाङ्बा मिस्र लाजेॽओ के़घे़ःम्सिङ्ॽ॥ 25 आल्लसाङ् यरिक् पाःन्, थे यहवे दाङ्बे़ल्ले़ कुबाःन्जाक् मेःन्ने थङ्ङो फप्मा नु कन् लाजेन् मे़ङ्मारे़ लागि आङ्गाॽ फे़राङ्बाबि? यहवे दाङ्बे़ल्ले़ए आङ्गाॽ अक्खे मे़त्ताङ्ङाङ् वाॽ, कन् लाजेन् थङ्ङो फत्ते़ॽआङ् खाप्पुथ्यःङ् चोगे़ॽ॥’” 26 खे़ब्याङ् हिल्कियाहरे़ कुस्सा एल्याकिम, सेब्ना नु योआसिरे़ खे़न् खाम्बाङ्ङो थङ् के़जोःक्पा थक्मोबे़न् मे़मे़त्तु, “चिसाजि आदाङ्बा के़से़वारोबाहाॽनु आरमेइक पाःन्दाङ्ङो पारे़ॽ, थेआङ्भे़ल्ले़ खे़न् पाःन्दाङ्ङिन् आनिगे कुसिङ् निःत्तुम्बे़॥ लुङ्धाक्को के़ये़प्पा मनाहाॽरे़ मे़घे़प्सुर यारिक् हिब्रु पाःन्दाङ्ङो मे़बारे़न्ने़ॽ॥” 27 कर थक्मोबे़ल्ले़ खे़ङ्हाॽ नुगप् पिरुसि, “थे आङ्गाॽ आन्दाङ्बाल्ले़ खे़निॽ नु खे़निॽ दाङ्बाल्लोरक् कन् पाःन्निन् पाःप्मारे़ लागि पाङ्घाङ्बाबि? थे खुने़ॽ लुङ्धाक्को के़ये़प्पा मनाहाॽओआङ् पाङ्घाङ्बा मेःम्बि? खिनिॽ कुसिक्के खे़ङ्हाॽरे़आङ् खुन्छिॽ आप्फेक् हि सेॽमाःत्हाॽ चामा के़बोङ्बा वाॽ॥” 28 खे़ब्याङ् खे़न् थक्मोबे़न् ये़म्सिङ्ङाङ् हिब्रु पाःन्दाङ्ङो अःक्ते़आङ् पाःत्तु, “अस्सुरबा पयम् यम्बा हाङ्ङिल्ले़ कुबाःन्निन् खे़प्से़म्मे़ॽ॥ 29 हाङ्ङिल्ले़ अक्खे पाःत्तु, हिजकिया हाङ्ङिल्ले़ खिनिॽ इङ्ले़क्को के़न्धासिन्ल॥ आङ्गाॽ आहुक्कोलाम् खुने़ॽ खिनिॽ से़ःप्मा के़न्छुक्तिन्॥ 30 ‘यहवे दाङ्बे़ल्ले़ से़क्खासाङ् आनिॽ ताङ्आसे़ःप्, हे़क्क्याङ् कन् ये़क्यक्किन् अस्सुरबा हाङ्ङिल्ले़ कुहुक्को मे़धासुन्ॽ’ फाॽआङ् यहवे दाङ्बे़ओ खे़ःम्सिङ्मारे़ लागि हिजकियाःल्ले़ खिनिॽ चक्मे़ल्लॽए के़ल्ले़मिन्ल॥ 31 “हिजकियाःल्ले़ कुबाःन्निन् मे़घे़प्से़म्मिन्ने़ॽ॥ अस्सुरबा हाङ्ङिल्ले़ अक्खे पाःत्तुॽ—आङ्गाॽनु नादङ् चोगे़म्मे़ॽ, हे़क्क्याङ् लःन्दे़म्मे़ॽआङ् आङ्गाॽओ त्ये़म्मे़ॽ॥ हाङ्ङिल्ले़ खिनिॽ आप्फेक् खिनिॽ लाजेॽ हे़क्तङ्बा वेॽ लाजेॽ थिक्को के़न्युक्खिन्ल थारिक्, 32 खिनिॽ के़रे़क्ले़ आप्फेक् आप्फेक् चे़ल्ले़क्सेल्ले़ कुजाॽहाॽ नु पःत्छेल्ले़ कुजाॽहाॽ के़जाम्ॽ॥ हे़क्क्याङ् खिनिॽ आप्फेक् वबाक्कोबा च्वाःत्तिन् के़धुङुम्ॽ॥ खुने़ॽ के़युक्खिबा लाजेॽओ चे़ल्ले़क्सेॽ थि के़लःम्बा चे़ल्ले़क्सेॽ इक्ताप् नु खरे़ःङ् ले़ःङ्मा पोगुगे़न् कुजा के़धोःक्पा इक्ताप् पोङ्ॽ॥ खे़न् चैतुन सिङ्बुङ्हाॽ के़युङ्बा नु सक्वाघु के़गुङ्बा लाजेॽ पोङ्ॽ॥ खुने़ॽ कुइङ्जाङ्हाॽ के़इःत्तुम् के़नाःत्तुने़भग्र खिनिॽ के़हिङिॽ कर के़न्छ्ये़ॽइन्॥ “यहवे दाङ्बे़ल्ले़ खिनिॽ के़से़ःप्तिॽ लॽरिक् हिजकियाःल्ले़ खिनिॽ इङ्ले़क्को के़न्धासिन्लरो॥ 33 आत्तिन् वेॽ सुवाङ्हाॽरे़ खुन्छिॽ माङ्हाॽरे़ खुने़ॽ कुलाजेन् अस्सुरबा हाङ्ङिल्ले़ कुहुक्कोलाम् से़ःप्मा सुक्तुआङ् वाॽबे? 34 हमात नु अर्पादबा माङ्हाॽ आत्ति मे़बेबे? सपर्बेम, हेना नु इब्बाबा माङ्हाॽ आत्ति मे़बेग? थे खे़ङ्हाॽरे़ सामरियान् आङ्गाॽ आहुक्कोलाम् ताङ्मा मे़सुक्तुबि? 35 थे कन् लाजेॽहाॽओबा के़रे़क् माङ्हाॽओ कुभारे़ खुन्छिॽ लाजेन् आङ्गाॽ आहुक्कोलाम् से़ःप्मा मे़सुक्तुआङ् वाॽबि? यहवे दाङ्बे़ल्ले़ यरुसले़ःम्मिन् आङ्गाॽ आहुक्कोलाम् आभेलॽरिक् ताङ्मा सुक्तुआङ्बे?” 36 कर मनाहाॽ स्वाःत् मे़म्बाःत्ते मे़युङे़ हे़क्क्याङ् थे़माआङ् नोगप् मे़म्बाःत्तुन्, थेआङ्भे़ल्ले़ हाङ्ङिल्ले़ अक्तङ्बा इङ्जाङ् िपरुसिआङ् वये़, “खुने़ॽ थेआङ् नुगप् मे़बिरे़म्मिन्ने़ॽ॥” 37 खे़ब्याङ् हाङ्हिम्मोबा लक्पे़न्साबा हिल्कियाहरे़ कुस्सा एल्याकिम, सुहाङ्मिबा सेब्ना नु आसापरे़ कुस्सा साप्ला के़साप्पा योआःल्ले़ खुन्छिॽ चाङ्हाॽ मे़धे़ःक्खु, हे़क्क्याङ् हिजकियाह हाङ्ङे़ओ मे़बेआङ् खाम्बाङ्ङो थङ् के़जोःक्पा थक्मोबे़ल्ले़ पाःत्तुबा पाःन्निन् मे़जे़क्तुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.