२ हाङ् 17 - लिम्बुइस्राइलबा हाङ् होसिया 1 यहुदाबा हाङ् आहाजरे़ हाङ्युक् चोगुबा थिबोङ्ङाङ् निसिगेक्पा तङ्बेओ एलाहरे़ कुस्सा होसियान् सामरियाओ इस्राइलबा हाङ् पोःक्खे़, हे़क्क्याङ् खुने़ॽ तङ्बे फाङ्सि हाङ्युक् चोगु॥ 2 खुने़ॽ यहवे दाङ्बे़ल्ले़ कुनिमो आत्तिन् पाःन्निन् ताप्फे़ःम्बा चोगे़ आम्भा खे़न्ने चोगु, कर खुने़ॽनुःल्ले़ तगिबा इस्राइलबा हाङ्हाॽरे़ मे़जोगुबा हे़क्तङ्बाएग मेःन्॥ 3 होसियान् थङ्ङो फप्मारे़ लागि अस्सुरबा हाङ् सलमनेसेरे़न् फे़रे़॥ खुने़ॽ कुयुक्को वये़आङ् होसियाःल्ले़ एःङ्याङ् हुङुर वये़॥ 4 कर अस्सुरबा हाङ् सलमनेसेररे़ होसियाःल्ले़ इङ्ले़क्तुबा निसु, थेआङ्भे़ल्ले़ खुने़ॽ मिस्र लाजेॽबा सो हाङ्ङे़ओ हाङ्लाइङ्बाहाॽ पाङ्घुसिआङ् वये़ हे़क्क्याङ् तङ्बे थक्मा हुङ्मा के़बोङ्बा एःङ् याङ्ङिन् हुङ्मा नाॽरे़आङ् वये़॥ कल्ले़चोगुल्ले़ सलमनेसेररे़ खुने़ॽ ते़म्सुआङ् पुङ्लाहिम्मो साक्तुरो॥ सामरियान् चोःन्दे़ 5 अस्सुरबा हाङ्ङिल्ले़ लाजेन् के़रे़क् फत्तु, हे़क्क्याङ् सामरियान् थङ्ङो फत्तुआङ् खे़न् तङ्बे सुम्सि थारिक् किर्गप् कबु ने़स्सु॥ 6 होसियाःल्ले़ हाङ्युक् चोगुबा फाङ्सिगेक्पा तङ्बेओ अस्सुरबा हाङ्ङिल्ले़ सामरियान् हुक्काप् चोगु हे़क्क्याङ् इस्राइलिहाॽ ते़म्सुसिआङ् अस्सुरओ तेॽरुसि॥ खुने़ॽ खे़ङ्हाॽ हलहओ, हाबोर वहःङ्ङिल्ले़ कुयाओ के़ने़बा गोजानओ नु मादिहाॽरे़ खुन्छिॽ पाङ्जुम्हाॽओ युक्खुसि॥ लायोल्ले़ चोगुल्ले़ इस्राइलिहाॽ मे़दे़म्सु मे़देॽरुसि 7 मिस्र लाजेॽबा हाङ् फारोल्ले़ कुमुक्कोलाम् मिस्र लाजेॽलाम् के़लःप्पा के़धाक्पा यहवे दाङ्बा खुन्छिॽ निङ्वाॽफुमाङ्ङिल्ले़ कुदक्ले़ङ्वाओ इस्राइलिहाॽरे़ लायो मे़जोगुआङ् वये़, कल्ले़चोगुल्ले़ कन् के़रे़क् पाःन्हाॽ पोःक्खे़आङ् वये़॥ खे़ङ्हाॽरे़ वेॽ माङ्हाॽ से़वा मे़मे़त्तुसि॥ 8 हे़क्क्याङ् यहवे दाङ्बे़ल्ले़ खे़ङ्हाॽरे़ खुन्छिॽ तगिलाम् लःत्तुदेसुसिबा वेॽ मे़न्छाम् सुवाङ्हाॽ नु इस्राइलबा हाङ्हाॽरे़ मे़नाःत्तु मे़दिम्दुबा ये़प्ले़क्कोआङ् खुन्छिॽ लाङ्मे़घेगे़॥ 9 यहवे दाङ्बा खुन्छिॽ निङ्वाॽफुमाङ्ङिल्ले़ कुदक्ले़ङ्वाओ आत्तिन् पाःन्निन् नुबा मे़जोगे़न् खे़न् स्वाःत्ताङ् इस्राइलिहाॽरे़ मे़जोगु॥ खे़ङ्हाॽरे़ खुन्छिॽ के़रे़क् ये़क्यक्हाॽओ, चुजुक्सा नु यम्बयम्बा पाङ्भेॽहाॽओ नावाइत्ला से़वा मे़प्मादे़न्हाॽ मे़जोगु॥ 10 केःम्बा कोःक्मा थक्मा नु हुम्बे़प्पा सिङ्बुङ् सिगाङ् थक्मा खे़ङ्हाॽरे़ लुङ्हाॽ हे़क्क्याङ् असेरा माङ् सित्लाङ्हाॽ मे़हाक्तु॥ 11 खे़ङ्हाॽरे़ खुन्छिॽ तगिलाम् मे़लःत्तु मे़देसुसिबा सुवाङ्हाॽरे़ मे़जोगुबा हे़क्केए केःम्ब केःम्बादे़न् थक्मा खे़ङ्हाॽरे़ सुक्पा मे़हाःन्दु॥ इस्राइलिहाॽरे़ ताप्फे़ःम्बा याःम्बक् मे़जोगु, खे़ल्ले़चोगुल्ले़ यहवे दाङ्बे़ल्ले़ कुयाःक्ले़ॽरे़आङ् खे़ङ्हाॽ खुने़ॽलाम् लःत्तुदेसुसि॥ 12 यहवे दाङ्बे़ल्ले़ खे़ङ्हाॽ अक्खे मे़त्तुसिआङ् वये़, “खिनिॽ अक्तङ्बा चोःक्मा मे़नुॽने़न्” हे़क्केसाङ् खे़ङ्हाॽरे़ नावाइत्लाहाॽ माङ्से़वा मे़मे़त्तुसि॥ 13 यहवे दाङ्बे़ल्ले़ खुने़ॽ के़रे़क् कुमाङ्निङ्वाॽपान् के़बाःप्पाहाॽ नु कुसुफो के़निबाहाॽलाम् इस्राइले़न् हे़क्क्याङ् यहुदान् साम्दिङ् पिरुसि—“खिन्छिॽ ताप्फे़ःम्बा ये़प्ले़क्हाॽ ले़रे़से़ॽ॥ आङ्गाॽ खे़न्छिॽ पाधे़बाहाॽ इःत्ते़म् नाःत्ते़म्मे़ॽ फाॽआङ् इङ्जाङ् पिरुङ्सिङ्ङाङ् वये़बा हे़क्क्याङ् आङ्गाॽ आसे़वारोबा माङ्निङ्वाॽपान् के़बाःप्पाहाॽलाम् खिनिॽ पिनिङ्ङाङ् वये़बा आङ्गाॽ आइङ्जाङ्हाॽ नु आइङ्भःन्हाॽ के़रे़क् साम्योथिम् इङ्जाङ् कुइसिक् इःत्ते़से़ॽ नाःत्ते़से़ॽ॥” 14 कर खे़ङ्हाॽ पान् खे़म्मा मे़न्दे़न्दे़न्, हे़क्क्याङ् यहवे दाङ्बा खे़ङ्हाॽरे़ खुन्छिॽ निङ्वाॽफुमाङ्ङिन् नासाॽमा मे़न्दे़म्मनाबा खुन्छिॽ पाधे़बाहाॽ कुइसिक् खे़ङ्हाॽ हादिङ् के़धक्पा मे़बोःक्खे़॥ 15 खे़ङ्हाॽरे़ खुने़ॽ कुइङ्भःन्हाॽ नु खुने़ॽ खे़ङ्हाॽरे़ खुन्छिॽ पाधे़बाहाॽनु चोगुबा माङ्हुप्पिन् हे़क्क्याङ् खुने़ॽ खे़ङ्हाॽ पिरुसिबा साम्दिङ्ङिन् खे़म्मा मे़न्दे़न्दे़न्, खे़ङ्हाॽ हने़ थेनाधेबा नावाइत्लाहाॽ मे़दिम्दुसि, खे़ब्याङ् खे़ङ्हाॽ आप्फेक्काङ् कुसुम् मे़न्दम्मनाबा मे़बोःक्खे़॥ “खे़ङ्हाॽरे़ मे़जोगुबा कुइसिक् खिनिॽ मे़जोगे़म्मिन्ने़ॽ” फाॽआङ् यहवे दाङ्बे़ल्ले़ मे़त्तुसिआङ् वये़साङ् खे़ङ्हाॽरे़ खुन्छिॽ कब्रिङ् ले़प्माङ् के़युङ्बा मे़न्छाम् याप्मिहाॽरे़ मे़जोगुबा पाःन्हाॽ मे़हुॽसिङ्॥ हे़क्क्याङ् यहवे दाङ्बे़ल्ले़ खे़ङ्हाॽ चोःक्मा मे़भाःक्तुसिम्बा पाःन्हाॽ खे़ङ्हाॽरे़ मे़जोगु॥ 16 खे़ङ्हाॽरे़ यहवे दाङ्बा खुन्छिॽ निङ्वाॽफुमाङ्ङिल्ले़ के़रे़क् कुइङ्जाङ्हाॽ मे़ले़रु मे़देसु, हे़क्क्याङ् खुन्छिॽ लागि मे़योन्दुआङ् मे़जोगुबा ने़त्छि पित्सात्हाॽ नु असेरा माङ्ङिल्ले़न् सित्लाङ् थिक् मे़जोगु॥ खे़ङ्हाॽ ताङ्साङ्बोबा के़रे़क् खेःम्सिक्पाहाॽ तगि साम्बोन् हबत् मे़भन्छिङ्, हे़क्क्याङ् बाले़न् माङ्से़वा मे़मे़त्तु॥ 17 खे़ङ्हाॽरे़ खुन्छिॽ ये़म्बित्छा नु मे़न्छुमा साहाॽ मिओ मिधिङ्मनादेमनाबा सिदुङ्जभा मे़जोगुसि॥ खे़ङ्हाॽरे़ थुम्म्या मे़इसु, हे़क्क्याङ् कित्चाक् मे़जोगु, खम्भ्याङ् यहवे दाङ्बे़ल्ले़ कुनिमो आत्तिन् पाःन्निन् ताप्फे़ःम्बा चोगे़ खे़न् चोःक्मारे़ लागि खुन्छिॽ आप्फेक् मे़सङ्सिङ्ङाङ् खुने़ॽ कुसिक् मे़भोःक्खु॥ 18 कल्ले़चोगुल्ले़ यहवे दाङ्बे़न् इस्राइलिहाॽनु साॽरिक् कुयाःक्ले़ॽरे़, हे़क्क्याङ् खे़ङ्हाॽ खुने़ॽ कुदगिलाम् लःत्तुदेसुसि॥ यहुदाबा थाःक्हाॽरक् मे़दाङे़, 19 हे़क्क्याङ् यहुदाबाहाॽआङ् यहवे दाङ्बा खुन्छिॽ निङ्वाॽफुमाङ्ङिल्ले़ कुइङ्जाङ्हाॽ मे़न्इःत्तुन् मे़न्नाःत्तुन्॥ इस्राइलरे़ नाःत्तु तिम्दुबा लाम्मो खे़ङ्हाॽ लाङ्मे़घेगे़॥ 20 कल्ले़चोगुल्ले़ यहवे दाङ्बे़ल्ले़ इस्राइलबा के़रे़क् मनाहाॽ नाॽरुसि॥ खुने़ॽ खे़ङ्हाॽ तुक्खे लाक्खे चाःत्तुसि, हे़क्क्याङ् खुने़ॽ कुदगिलाम् खे़ङ्हाॽ लाप्मे़देसुसिन्ल थारिक् के़नाप्पा के़हिप्पाहाॽरे़ खुन्छिॽ हुक्को थासुसि॥ 21 आल्ल यहवे दाङ्बे़ल्ले़ इस्राइले़न् दाउदरे़ कुहिम्सयङ्ङोलाम् लाःत्लाःत् चोगु, खे़ब्याङ् खे़ङ्हाॽरे़ नाबातरे़ कुस्सा यारोबामे़न् हाङ् मे़जोगु॥ यारोबामे़ल्ले़ इस्राइले़न् यहवे दाङ्बे़ल्ले़ कुलाम्मो लाङ्घेःक्मालाम् नुःक्तुआङ् लत्छा यम्बा लायो चोःक्मा पाङ्घु॥ 22 यारोबामरे़ के़रे़क् कुलायोहाॽओ इस्राइलिहाॽ चक्मे़ल्लॽए मे़बत्छे़, हे़क्क्याङ् खे़ङ्हाॽ चोःक्मा मे़ल्ले़रुन्॥ 23 पिप्मिरि कुसोःन्दिओ आक्खेलॽरिक् यहवे दाङ्बे़ल्ले़ कुसे़वारोबा माङ्निङ्वाॽपान् के़बाःप्पाहाॽलाम् साम्दिङ् पिरुसिआङ् वये़, हे़क्केलॽरिक्के खे़ङ्हाॽ खुने़ॽ कुदगिलाम् लाःत्लाःत् चोगुसि॥ कल्ले़चोगुल्ले़ इस्राइलबा मनाहाॽ मे़दे़म्सुसिआङ् खुन्छिॽ आप्फेक् लाजेॽ इस्राइललाम् अस्सुर मे़देॽरुसि॥ खे़ङ्हाॽ आइन् थारिक् खे़प्मोए मे़वाॽरो॥ अस्सुरिहाॽ इस्राइलओ मे़युङ् 24 अस्सुरबा हाङ्ङिल्ले़ बेबिलोन, कुता, अव्वा, हमात नु सपर्बेमलाम् मनाहाॽ फे़त्तुसिआङ् खे़ङ्हाॽ इस्राइलिहाॽरे़ खुन्छिॽ ले़क्वाओ सामरियाबा पाङ्जुम्हाॽओ युक्खुसि॥ खे़ङ्हाॽरे़ सामरियान् मे़युक्तु, हे़क्क्याङ् खे़ङ्हाॽ खे़प्मोबा पाङ्जुम्हाॽओ मे़युङ्सिङ्॥ 25 आल्ल खे़ङ्हाॽ तगि मे़युङे़ल्ले़ यहवे दाङ्बे़न् खुन्छिॽ माङ्से़वा मे़म्मे़त्तुन्॥ कल्ले़चोगुल्ले़ यहवे दाङ्बे़ल्ले़ खे़ङ्हाॽरे़ खुन्छिॽ लुम्मो खिरिङ्बाहाॽ पाङ्घु तासुसि, हे़क्क्याङ् खे़ङ्हाॽरे़ कुभा मनाहाॽ मे़से़रुसि॥ 26 अस्सुरबा हाङ्ङिन् अक्तङ्बा इङ्घङ् मे़हाक्तु—“आदाङ्बारे़ लाजेॽलाम् के़लःत्तु के़देॽरुसिआङ् के़बाङ्घु के़देसुसिबा सामरियाबा पाङ्जुम्हाॽओ के़युङ्बा मनाहाॽरे़ग खे़न् लाजेॽओबा माङ्ङिन् चाहा के़जोःक्पा याःम्बक्किन् मे़ल्ले़सुन्॥ खे़ङ्हाॽरे़ कन् मे़ल्ले़सुम्बाल्ले़ चोगुल्ले़ खे़न् माङ्ङिल्ले़ खे़ङ्हाॽरे़ खुन्छिॽ लुम्मो खिरिङ्बाहाॽ पाङ्घु तासुसिआङ् खे़न् मनाहाॽ मे़से़रुसिर मे़याक्॥” 27 खे़ब्याङ् अस्सुरबा हाङ्ङिल्ले़ कन् इङ्जाङ्ङिन् पिरुसि—“सामरियालाम् ते़म्मना फे़प्मनाबा कुभा निङ्वाॽफुसाम्बा थिक् खे़प्मो युङ्मारे़ लागि मे़बाङ्घु मे़दासुर, हे़क्क्याङ् खुने़ॽ मनाहाॽ खे़न् लाजेॽओबा माङ्ङिल्ले़ कुधिम्हाॽ हुॽरुसिर॥” 28 कल्ले़चोगुल्ले़ सामरियालाम् मे़लःत्तुसिआङ् वेॽ लाजेॽओ मे़देॽरुसिबा निङ्वाॽफुसाम्बा थिक् फे़रे़आङ् बेथेलओ युङ्मा हेःक्ते़, हे़क्क्याङ् यहवे दाङ्बे़न् आक्खेलॽरिक् माङ्से़वा मे़प्मा पोङ्ॽ फाॽआङ् खुने़ॽ खे़ङ्हाॽ हुॽरुसि॥ 29 हे़क्केसाङ् सुवाङ् थक्माबा मनासुम्हाॽरे़ खुन्छिॽ आप्फेक् आप्फेक् मे़युङे़बा पाङ्जुम्हाॽओ खुन्छिॽ आबाङे आबाङे माङ्हाॽ मे़जोगुसि, हे़क्क्याङ् सामरियाबाहाॽरे़ मे़जोगुबा केःम्ब केःम्बादे़न्हाॽओबा माङ्धाःन्हाॽओ खुन्छिॽ माङ्हाॽ मे़युक्खुसि॥ 30 बेबिलोनलाम् के़भे़म्बा मनाहाॽरे़ सुक्कोत-बनोते़न् मे़जोगु, कुताबा मनाहाॽरे़ नेर्गल नु हमातबा मनाहाॽरे़ असिमान् मे़जोगु, 31 अव्विहाॽरे़ नेभज नु तर्ताक्के़न् मे़जोगु, हे़क्क्याङ् सपर्बेमिहाॽरे़ खुन्छिॽ माङ् अद्रम्मलेक नु अनम्मलेकरे़ लागि खुन्छिॽ आप्फेक् साहाॽ वयागे़न् सिदुङ्जभा कुइसिक् मिओ मिधिङ्मनादेमनाबा सिदुङ्जभा मे़जोगुसि॥ 32 खे़ङ्हाॽरे़ यहवे दाङ्बे़न् माङ्से़वाग मे़मे़त्तु, हे़क्केसाङ् केःम्ब केःम्बादे़न्हाॽओ के़ने़बा माङ्धाःन्हाॽरे़ लागि निङ्वाॽफुसाम्बाहाॽ याःम्बक् चोःक्मारे़ लागि आबाङे खुन्छिॽ सुवाङ्लाम्माङ् खुन्छिॽ मनाहाॽ युक्तिङ् मे़जोगुसि॥ 33 खे़ङ्हाॽरे़ यहवे दाङ्बे़न् माङ्से़वाग मे़मे़त्तु, कर खुन्छिॽ आत्तिन् सुवाङ्हाॽलाम् मे़भे़त्तुसिआङ् मे़वये़, खे़ङ्हाॽरे़ खुन्छिॽ साक्थिम् कुइसिक् मे़वये़आङ् खुन्छिॽ आप्फेक् माङ्हाॽ से़वा मे़मे़त्तुसि॥ 34 खे़ङ्हाॽरे़ तगि तगिबा साक्थिम्हाॽ आइन्बा ये़न् थारिक्के मे़नाःत्तु मे़इःत्तुआङ् मे़वाॽ॥ खे़ङ्हाॽरे़ यहवे दाङ्बे़न् माङ्से़वा मे़म्मे़त्तुन्ॽ, खुने़ॽ याकुबे़न् नु कुमुॽइदाङ्साहाॽ पिरुसिबा कुइङ्भन् नु कुधिम्हाॽआङ् मे़न्नाःत्तुन् मे़न्दिम्दुन्ॽ, खे़ङ्हाॽए खुने़ॽ इस्राइल मिङ् वाःत्तुसिआङ् वये़॥ 35 आल्ल यहवे दाङ्बे़ल्ले़ इस्राइलिहाॽनु माङ्हुप् चोगुल्ले़ खुने़ॽ खे़ङ्हाॽ कन् इङ्जाङ्ङिन् पिरुसिआङ् वये़—“वेॽ आत्तिन् माङ्हाॽआङ् खिनिॽ माङ्से़वा मे़मे़त्ते़म्सिम्मे़न्ने़ॽ, इग्र खे़ङ्हाॽ तगि खिनिॽ साबन् हबत् मे़भन्नासिम्मे़न्ने़ॽ, किग्र खे़ङ्हाॽ से़वा मे़मे़त्ते़म्सिम्मे़न्ने़ॽ, इग्र खे़ङ्हाॽओ सिदुङ्जभा मे़दोःन्दे़म्मिन्ने़ॽ॥ 36 कर यम्बा मुक्साम् नु सन्छुबा कुहुक्लाम् मिस्र लाजेॽलाम् खिनिॽ के़लःप्पा के़भे़प्पा यहवे दाङ्बे़न्लक् माङ्से़वा मे़त्ते़म्मे़ॽ॥ खुने़ॽ कुदगिरक् खिनिॽ साबन् हप्पे़त् पत्छे़म्मे़ॽ, खुने़ॽओरक् खिनिॽ सिदुङ्जभा तोःन्दे़म्मे़ॽ॥ 37 खिनिॽ लागि खुने़ॽ साप्तुबा इङ्भःन्हाॽ, साक्थिम्हाॽ, साम्योथिम्हाॽ नु साम्योथिम् इङ्जाङ्हाॽ सिङ्सिङ् ये़क्ये़क्काङ् चक्मे़ल्लॽए इःत्ते़म् नाःत्ते़म्मे़ॽ॥ वेॽ माङ्हाॽ खिनिॽ माङ्से़वा मे़मे़त्ते़म्सिम्मे़न्ने़ॽ॥ 38 आङ्गाॽ खिनिॽनु चोगुङ्बा माङ्हुप्पिन् निङ्वाॽ मे़भेःत्छे़म्मिन्ने़ॽ, हे़क्क्याङ् वेॽ माङ्हाॽ खिनिॽ माङ्से़वा मे़मे़त्ते़म्सिम्मे़न्ने़ॽ॥ 39 परुमे़ल्ले़ यहवे दाङ्बा खिनिॽ निङ्वाॽफुमाङ्ङिन्लक् माङ्से़वा मे़त्ते़म्मे़ॽ॥ खुने़ॽए खिनिॽ निङ्मिहाॽरे़ खुन्छिॽ हुक्कोलाम् खिनिॽ के़से़ःप्तिॽ॥” 40 हे़क्केसाङ् खे़ङ्हाॽ खे़म्मा मे़न्दे़न्दे़न्, हे़क्क्याङ् खुन्छिॽ तगिबा ये़प्ले़क्हाॽ चक्मे़ल्लॽए मे़इःत्तु मे़नाःत्तुआङ् मे़बत्छे़॥ 41 यहवे दाङ्बे़न् माङ्से़वा मे़मे़त्तुसाङ् खे़ङ्हाॽरे़ खुन्छिॽ नावाइत्लाहाॽआङ् से़वा मे़मे़त्तुसि॥ आइन्बा ये़न् थारिक्के खे़ङ्हाॽरे़ खुन्छिॽ साएहाॽ नु मे़न्छाॽहाॽ खुन्छिॽ पाधे़बाहाॽरे़ खुन्छिॽ ये़प्ले़क्हाॽओ लाङ्मे़घेःक्ल मे़वाॽरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.