२ हाङ् 16 - लिम्बुयहुदाबा हाङ् आहाज ( २ साप्मु २८:१-२७ ) 1 रमल्याहरे़ कुस्सा पेकहःल्ले़ कुहाङ्युक् ये़म् थिबोङ्ङाङ् नुसिगेक्पा तङ्बेओ योतामरे़ कुस्सा आहाजरे़ यहुदाओ हाङ्युक् चोःक्मा हेःक्तु॥ 2 आल्ल आहाजे़न् हाङ् पोःक्खे़ल्ले़ खुने़ॽ निबोङ् तङ्बे के़रे़आङ् वये़, हे़क्क्याङ् खुने़ॽ यरुसले़ःम्मो थिबोङ्ङाङ् तुक्सि तङ्बे हाङ्युक् चोगु॥ खुने़ॽ कुन्धे़बा दाउदरे़ चोगुबा कुइसिक् यहवे दाङ्बा निङ्वाॽफुमाङ्ङिल्ले़ कुनिमो आत्तिन् पाःन्निन् नुबा चोगे़ खे़न् मे़जोगुन्॥ 3 इस्राइलबा हाङ्हाॽरे़ मे़नाःत्तुबा लाम्मो खुने़ॽ लाङ्घेगे़॥ इस्राइलिहाॽरे़ खुन्छिॽ तगिलाम् यहवे दाङ्बे़ल्ले़ लःत्तुदेसुसिआङ् मे़वये़बा मनाहाॽरे़ खुन्छिॽ सिक्के़ले़ःङ्बा ये़प्ले़क्हाॽओ लाङ्घेगे़आङ् खुने़ॽ आप्फेक् कुस्सान्नाङ् मिओ मिधिङ्मनादेमनाबा सिदुङ्जभा तोःन्दु॥ 4 खुने़ॽ केःम्ब केःम्बा कोःक्मा फाङ्जङ्हाॽओ नु थे़गु माङ्वाहाॽओ हे़क्क्याङ् के़रे़क् हुम्बे़प्पा सिङ्बुङ् सिगाङ् सिदुङ्जभाहाॽ तोःन्दुआङ् सुक्पा हाःन्दु॥ 5 खे़ब्याङ् अरामबा हाङ् रसिन नु इस्राइलबा हाङ् रमल्याहरे़ कुस्सा पेकहःल्ले़ यरुसले़ःम्मिल्ले़ कुदक्ले़ङ्वाओ थङ् चोगे़सुआङ् किर्गप् कबे़सु, कर आहाजे़न् खुन्छिॽ नाःम्मा मे़सुक्ते़सुन्॥ 6 खे़न् ये़म्मो आरामबा हाङ् रसिनरे़ यहुदाबा मनाहाॽ नाःत्तुदेसुसिआङ् एलाते़न् आरामरे़ कुलागि याम्मो हुक्काप् चोगु॥ खे़ब्याङ् एदोमिहाॽ एलातओ मे़लासे़, हे़क्क्याङ् आइन्बा ये़न् थारिक् खे़प्मो मे़युङ्॥ 7 आहाजरे़ अस्सुरबा हाङ् तिग्लत-पिलेसेरओ अक्खे मे़त्तुसिआङ् इङ्साबाहाॽ पाङ्घुदेसुसि, “आङ्गाॽ आदाङ्बारे़ के़से़वारोबा नु आदाङ्बारे़ के़युक्कोबा के़से़वारोबाआरो॥ आङ्गाॽ थङ्ङो के़भप्पा अरामबा हाङ्ङिन् नु इस्राइलबा हाङ्ङिन्लाम् आदाङ्बा फे़रे़ॽआङ् से़ःप्ताङ्ङे़ॽओ॥” 8 खम्भ्याङ् आहाजरे़ यहवे दाङ्बे़ल्ले़ कुहिम्मो नु हाङ्हिम्मोबा थाःङ्हाॽओ खोसुबा साम्म्याङ् युप्पाहाॽ याङ्सिङ्ङाङ् हुक्वा कुइसिक् अस्सुरबा हाङ्ङे़ॽओ हाङुदेसु॥ 9 अस्सुरबा हाङ्ङिल्ले़ खुने़ॽ कुबाःन्निन् खे़प्सु, हे़क्क्याङ् दमस्कसे़न् थङ्ङो फत्तुआङ् खुने़ॽ खे़न् हुक्काप् चोगु॥ खुने़ॽ खे़प्मो के़युङ्बाहाॽ लःत्तुसिआङ् किरओ ते़म्सुदेॽरुसि, हे़क्क्याङ् खुने़ॽ रसिने़न् से़रु॥ 10 खे़ब्याङ् आहाज हाङ्ङिन् अस्सुरबा हाङ् तिग्लत-पिलेसेरे़न्नु तुम्से़ दमस्कस पे॥ खुने़ॽ दमस्कसओ ले़त्ति तोःम्मादे़न्निन् निसु, हे़क्क्याङ् खे़न् ले़त्ति तोःम्मादे़न्निल्ले़ के़रे़क् कुजोःङ्इत्ते़न् नु चाहा के़जोःक्पा पाःन्हाॽ निङ्वाॽफुसाम्बा उरियाहओ हाङुदेसु॥ 11 कल्ले़चोगुल्ले़ आहाज हाङ्ङिल्ले़ दमस्कसलाम् हाङुबा ले़त्ति तोःम्मादे़न्निल्ले़ के़रे़क् कुजोङ् कुइसिक् निङ्वाॽफुसाम्बा उरियाहःल्ले़ हाङ्ङिन् नुःङ्मा फे़म्मानुःल्ले़ तगि ले़त्ति तोःम्मादे़न् थिक् चोगुसुरु॥ 12 आल्ल हाङ्ङिन् दमस्कसलाम् नुःक्खे़ फे़रे़ल्ले़ खुने़ॽ खे़न् निसु, हे़क्क्याङ् खे़ल्ले़ कुबेसाङ् पेआङ् खे़प्मो सिदुङ्जभाहाॽ तोःन्दु॥ 13 खे़ल्ले़ मिधिङ्मनादेमनाबा सिदुङ्जभा नु पोगुगे़न् कुजा सिदुङ्जभा तोःन्दु, हे़क्क्याङ् चे़ल्ले़क्सेॽ सेजःङ्वा सिदुङ्जभान् हुक्खुआङ् तङ्जुम् सिदुङ्जभाःल्ले़ कुमाक्खिन् ले़त्ति तोःम्मादे़न् सम्धाङ् साक्खु॥ 14 यहवे दाङ्बे़ल्ले़ कुदगि के़युङ्बा कासा ले़त्ति तोःम्मादे़न्निन् खे़न् कुसङ् ले़त्ति तोःम्मादे़न्निन् नु माङ्हिम्मे़ल्ले़ कुलुम्मो युङे़ हे़क्क्याङ् आहाजरे़ खे़न् कासा ले़त्ति तोःम्मादे़न्निन् कुसङ् ले़त्ति तोःम्मादे़न्निल्ले़ थोहाङ् ले़प्माङ् युक्खु॥ 15 खे़न् एगाङ् आहाज हाङ्ङिल्ले़ निङ्वाॽफुसाम्बा उरियाहःन् अक्तङ्बा इङ्जाङ् पिरु—“कन् यम्बा ले़त्ति तोःम्मादे़न्नो तानाम् तोःम्मा के़बोङ्बा मिधिङ्मनादेमनाबा सिदुङ्जभा नु युःन्धो तोःम्मा के़बोङ्बा पोगुगे़न् सिदुङ्जभाःन्, हाङ्ङिल्ले़ मिधिङ्मनादेमनाबा कुसिदुङ्जभा नु खुने़ॽ पोगुगे़न् कुजा कुसिदुङ्जभाःन्, हे़क्क्याङ् लाजेॽबा के़रे़क् मनाहाॽरे़ मिधिङ्मनादेमनाबा खुन्छिॽ सिदुङ्जभा नु खे़ङ्हाॽरे़ खुन्छिॽ पोगुगे़न् कुजा सिदुङ्जभा खम्भ्याङ् चे़ल्ले़क्सेॽ थि सिदुङ्जभान् तोःन्दे़ॽ॥ ले़त्ति तोःम्मादे़न्नो मिधिङ्मनादेमनाबा सिदुङ्जभा नु वयागे़न् सिदुङ्जभाहाॽरे़ खुन्छिॽ के़रे़क् माक्खिॽहाॽ साक्खे़ॽ॥ कर कासा ले़त्ति तोःम्मादे़न्निन् आङ्गाॽ थुम्या इमारे़ लागि ओगप् चोगुङ्ॽ॥” 16 आहाज हाङ्ङिल्ले़ मुरामे़त्तुबा कुइसिःक्के निङ्वाॽफुसाम्बा उरियाहःल्ले़ चोगु॥ 17 आहाज हाङ्ङिल्ले़ चम्मना उःङ्मनाबा लाधाहाॽओलाम् खे़ल्ले़ कुगब्रिङ् के़बप्पा कुयाम्ले़ङ्बाहाॽ नु छे़ःङ्ग्याहाॽ खे़त्तुदेसु॥ खुने़ॽ पयम् यम्बा फसिन् के़दक्पाआङ् के़ये़प्पा कासा से़गम्बाहाॽ सम्धाङ्लाम् लःत्तुआङ् लुङ् कुयुक्नाओ युक्खु॥ 18 खुने़ॽ सबाथओ ओगप् चोःक्मनाबा यहवे दाङ्बे़ल्ले़ कुहिम्मो मे़जोगुआङ् वये़बा नाम्धेःक्मे़न् तेॽरु, हे़क्क्याङ् खुने़ॽ अस्सुरबा हाङ्ङिन् कुनिङ्वाॽ तामा पिमारे़ लागि यहवे दाङ्बे़ल्ले़ कुहिम् लाःक्कात् के़ये़प्पा हाङ् लाम्धेःत्तिन् खुने़ॽ खे़त्तुदेसु॥ 19 आहाजरे़ कुहाङ्युक् ये़म्मोबा वेॽ हिन्दोक्हाॽ नु खुने़ॽ चोगुबा याःम्बक्हाॽ थे खे़न् यहुदाबा हाङ्हाॽरे़ खुन्छिॽ साप्मुःन्धुम् साप्पन्नो साप्ते़आङ् मे़बप्ने़न्नाङ्बि? 20 आहाजे़न् खुने़ॽ कुसुधे़बा कुदाक्थे़बाहाॽनु तङ्सिङ्से़ पे, हे़क्क्याङ् दाउदरे़ कुये़क्यक्को खे़ङ्हाॽनु सोरिक् खुने़ॽ मे़जिक्खु॥ हे़क्क्याङ् खुने़ॽ कुएगाङ् कुस्सा हिजकियान् हाङ् पोःक्खे़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.