२ हाङ् 15 - लिम्बुयहुदाबा हाङ् अजर्याह ( २ साप्मु २६:१-२३ ) 1 इस्राइलबा हाङ् यारोबामरे़ हाङ्युक् चोगुबा निबोङ्ङाङ् नुसिगेक्पा तङ्बेओ यहुदाबा हाङ् अमस्याहरे़ कुस्सा अजर्याहःल्ले़ हाङ्युक् चोःक्मा हेःक्तु॥ 2 आल्ल खुने़ॽ हाङ् पोःक्खे़ल्ले़ खे़न् थिबोङ्ङाङ् तुक्सि तङ्बे योरे़, हे़क्क्याङ् खुने़ॽ यरुसले़ःम्मो ङाबोङ्ङाङ् ने़त्छि तङ्बे हाङ्युक् चोगु॥ खुने़ॽ कुम्मारे़ कुमिङ् यकोल्याह वये़॥ खे़न् यरुसले़म के़युङ्मा वये़॥ 3 खुने़ॽ कुम्बा अमस्याहरे़ चोगुबा कुइसिक् यहवे दाङ्बे़ल्ले़ कुनिमो थेःन् नुबा चोगे़ आम्भा खे़न्ने चोगु॥ 4 हे़क्केसाङ् केःम्ब केःम्बा चन्जम्बादे़न्हाॽ मे़घे़त्तुन् मे़देसुन्॥ मनाहाॽरे़ आल्लसाङ् खे़प्मो सिदुङ्जभा तोःम्मा नु सुक्पा हाःम्मा याःम्बक् मे़जोगु॥ 5 यहवे दाङ्बे़ल्ले़ हाङ्ङिन् सिमालिङ्दो के़रे़र यारिक् आलिःक्लिःक्पा होरिक्पा तुक्मे़ल्ले़ कुहिङ्हिङ् थारिक् तरुर याःन्दु, हे़क्क्याङ् खुने़ॽ हिम् लाःत्लाःत् एःक् युङे़गरे़॥ हाङ्ङिल्ले़ कुस्सा योतामे़ल्ले़ए हाङ्हिम्मिन् ओमे़प्मा याःम्बक् चोगुआङ् वये़ हे़क्क्याङ् लाजेॽओबा मनाहाॽ सम्धाङ् युक् चोगु॥ 6 अजर्याहरे़ हाङ्युक् चोगुबा ये़म्मोबा वेॽ हिक्दोःक्हाॽ नु खुने़ॽ चोगुबा के़रे़क् याःम्बक्हाॽ थे खे़न् यहुदाबा हाङ्हाॽरे़ खुन्छिॽ साप्मुःन्धुम् साप्पन्नो साप्ते़आङ् मे़बप्ने़न्नाङ्बि? 7 अजर्याहन् खुने़ॽ कुसुधे़बा कुदाक्थे़बाहाॽनु सोरिक् तङ्सिङ्से़ पे, हे़क्क्याङ् खे़ङ्हाॽरे़ खुन्छिॽ पेसाङ् दाउदरे़ कुये़क्यक्को मे़जिक्खु॥ हे़क्क्याङ् खुने़ॽ कुएगाङ् कुस्सा योतामे़न् हाङ् पोःक्खे़रो॥ इस्राइलबा हाङ् जकरिया 8 यहुदाबा हाङ् अजर्याहरे़ हाङ्युक् चोगुबा सुम्बोङ्ङाङ् ये़त्छिगेक्पा तङ्बेओ यारोबामरे़ कुस्सा जकरियान् सामरियाबा हाङ् पोःक्खे़, हे़क्क्याङ् खुने़ॽ ला तुक्सि हाङ्युक् चोगु॥ 9 खुने़ॽ कुम्बा कुन्धे़बाहाॽरे़ मे़जोगुबा हे़क्केए यहवे दाङ्बे़ल्ले़ कुनिमो आत्तिन् पाःन्निन् ताप्फे़ःम्बा चोगे़ हाबा खे़न्ने चोगु॥ इस्राइले़न् चोक् पाङ्घुबा नाबातरे़ कुस्सा यारोबामरे़ कुलायोहाॽलाम् खुने़ॽ मे़नुःक्खे़न्॥ 10 याबेसरे़ कुस्सा सल्लुमरे़ जकरियाःल्ले़ कुदक्ले़ङ्वाओ चे़म्भन् चोगु॥ सल्लुमरे़ खे़न् मनाहाॽरे़ए खुन्छिॽ तगि साप्फ फत्तुआङ् से़रु, हे़क्क्याङ् खे़ल्ले़ कुएगाङ् खुने़ॽ हाङ् पोःक्खे़॥ 11 जकरियाःल्ले़ कुहाङ्युक् ये़म्मोबा वेॽ हिन्दोक्हाॽ इस्राइलबा हाङ्हाॽरे़ खुन्छिॽ साप्मुःन्धुम् साप्पन्नो साप्ते़आङ् पत्॥ 12 कम्भलॽरिक् यहवे दाङ्बे़ल्ले़ येहुन् मे़त्तुबा पाःन्निन् के़रे़—“खे़ने़ॽ के़मुॽइदाङ्साहाॽ लिसिगेक्पा थाःक् थारिक् इस्राइलबा हाङ्युक्नाओ मे़युङ्लो॥” इस्राइलबा हाङ् सल्लुम 13 यहुदाबा हाङ् अजर्याहःल्ले़ कुहाङ्युक् ये़म् सुम्बोङ्ङाङ् फाङ्सि तङ्बेओ याबेसरे़ कुस्सा सल्लुमे़न् हाङ् पोःक्खे़, हे़क्क्याङ् खुने़ॽ सामरियाओ लाधिक् हाङ्युक् चोगु॥ 14 खे़न् एगाङ् गदिरे़ कुस्सा मनहेमे़न् तिर्सालाम् सामरियाओ थो थोःक्सिङ्॥ खे़ल्ले़ सामरियाओ याबेसरे़ कुस्सा सल्लुमे़न् फत्तु, हे़क्क्याङ् खे़न् से़रुआङ् खुने़ॽ हाङ् पोःक्खे़॥ 15 सल्लुमरे़ कुहाङ्युक् ये़म्मोबा वेॽ हिन्दोक्हाॽ नु खुने़ॽ चोगुबा चे़म्भःन्हाॽ इस्राइलबा हाङ्हाॽरे़ खुन्छिॽ साप्मुःन्धुम् साप्पन्नो साप्ते़आङ् पत्॥ 16 आम्भा खे़न् ये़म्मो मनहेमरे़ तिर्सालाम् हेःक्तुआङ् तिफसा नु खे़ल्ले़ कुयाकुयाबा के़रे़क् थङ्ङो फत्तुसि, थेआङ्भे़ल्ले़ खे़ङ्हाॽरे़ खुने़ॽ कुलागि लाम्धेःत्हाॽ हम्मा मे़न्दे़न्दे़न्॥ खुने़ॽ तिफसाओबा के़रे़क् मनाहाॽ स्ये़रुसि, हे़क्क्याङ् कुस्सा के़याक्मा मे़न्छुमाहाॽरे़ खुन्छिॽ साप्पोःक्किन् चे़रु पिरुसिरो॥ इस्राइलबा हाङ् मनहेम 17 यहुदाबा हाङ् अजर्याहरे़ कुहाङ्युक् ये़म् सुम्बोङ्ङाङ् फाङ्सि तङ्बेओ गदिरे़ कुस्सा मनहेमे़न् इस्राइलबा हाङ् पोःक्खे़, हे़क्क्याङ् खुने़ॽ सामरियाओ तङ्बे थिबोङ् हाङ्युक् चोगु॥ 18 खुने़ॽ यहवे दाङ्बे़ल्ले़ कुनिमो आत्तिन् ताप्फे़ःम्बा चोगे़ हाबा खे़न्ने चोगु॥ इस्राइले़न् चोक् पाङ्घुबा नाबातरे़ कुस्सा यारोबामरे़ कुलायोहाॽलाम् कुहाङ्युक् ये़म् खाराक् खुने़ॽ मे़नुःक्खे़न्॥ 19 खे़ब्याङ् अस्सुरबा हाङ् पुलरे़ लाजेन् थङ्ङो फत्तु, हे़क्क्याङ् हाङ्जुम्मो खुने़ॽ कुहाङ्युक्किन् के़धुम्बा चोःक्मारे़ लागि मनहेमरे़ पुले़न् सुम्बोङ्ङाङ् लिसि हे़न्छिङ् किलोग्राम युप्पा पिरु॥ 20 मनहेमरे़ इस्राइललाम् कन् याङ्हाॽ साक्के़ल्ले़क् लःप्मा पाङ्घुसि॥ के़रे़क् याङ्साकुन्धेसाबा मनाहाॽरे़ अस्सुरबा हाङ्ङिन् ङाबोङ् सेकेल युप्पा पिमा के़बोङ्बा वये़॥ कल्ले़चोगुल्ले़ अस्सुरबा हाङ्ङिन् नुःक्खे़आङ् खे़न् लाजेॽओ मे़युङे़न्॥ 21 मनहेमरे़ कुहाङ्युक् ये़म्मोबा वेॽ हिन्दोक्हाॽ नु खुने़ॽ चोगुबा के़रे़क् याःम्बक्हाॽ थे खे़न् इस्राइलबा हाङ्हाॽरे़ खुन्छिॽ साप्मुःन्धुम् साप्पन्नो साप्ते़आङ् मे़बप्ने़न्नाङ्बि? 22 मनहेमे़न् खुने़ॽ कुसुधे़बा कुदाक्थे़बाहाॽनु सोरिक् तङ्सिङ्से़ पे, हे़क्क्याङ् कुस्सा पकहियान् खुने़ॽ कुएगाङ् हाङ् पोःक्खे़रो॥ इस्राइलबा हाङ् पकहिया 23 यहुदाबा हाङ् अजर्याहःल्ले़ कुहाङ्युक् ये़म् ङाबोङ्गेक्पा तङ्बेओ मनहेमरे़ कुस्सा पकहियान् सामरियाओ इस्राइलबा हाङ् पोःक्खे़, हे़क्क्याङ् खुने़ॽ तङ्बे ने़त्छि हाङ्युक् चोगु॥ 24 पकहियाःल्ले़ यहवे दाङ्बे़ल्ले़ कुनिमो आत्तिन् पाःन्निन् ताप्फे़ःम्बा चोगे़ हाबा खे़न्ने चोगु॥ इस्राइले़न् चोक् पाङ्घुबा नाबातरे़ कुस्सा यारोबामरे़ कुलायोहाॽलाम् खुने़ॽ मे़नुःक्खे़न्॥ 25 खुने़ॽ तुम् कुसुहाङ्युक्पाहाॽओबा थिक्पा, रमल्याहरे़ कुस्सा पेकहःल्ले़ खुने़ॽ कुदक्ले़ङ्वाओ चे़म्भन् चोगु॥ गिलादबा ङाबोङ् मनाहाॽ खुने़ॽनु सोरिक् तेॽरुसि हे़क्क्याङ् सामरियाबा हाङ्हिम् यक्को लासे़आङ् पेकहःल्ले़ पकहियान् नु अर्गोबे़न् हे़क्क्याङ् अरिहयाःन्नाङ् से़रुसि॥ कम्भलॽरिक् पेकहःल्ले़ पकहियान् से़रुआङ् खुने़ॽ कुएगाङ् खुने़ॽ हाङ् पोःक्खे़॥ 26 पकहियाःल्ले़ कुहाङ्युक् ये़म्मोबा वेॽ हिन्दोक्हाॽ नु खुने़ॽ चोगुबा के़रे़क् याःम्बक्हाॽ इस्राइलबा हाङ्हाॽरे़ खुन्छिॽ साप्मुःन्धुम् साप्पन्नो साप्ते़आङ् पत्लो॥ इस्राइलबा हाङ् पेकह 27 यहुदाबा हाङ् अजर्याहरे़ कुहाङ्युक् ये़म् ङाबोङ्ङाङ् ने़त्छिगेक्पा तङ्बेओ रमल्याहरे़ कुस्सा पेकहःन् सामरियाओ इस्राइलबा हाङ् पोःक्खे़, हे़क्क्याङ् खुने़ॽ निबोङ् तङ्बे हाङ्युक् चोगु॥ 28 खुने़ॽ यहवे दाङ्बे़ल्ले़ कुनिमो आत्तिन् पाःन्निन् ताप्फे़ःम्बा चोगे़ आम्भा खे़न्ने चोगु॥ इस्राइले़न् चोक् पाङ्घुबा नाबातरे़ कुस्सा यारोबामरे़ कुलायोहाॽलाम् खुने़ॽ मे़नुःक्खे़न्॥ 29 इस्राइलबा हाङ् पेकहःल्ले़ कुहाङ्युक् ये़म्मो अस्सुरबा हाङ् तिग्लत-पिलेसे़न् फे़रे़आङ् इयोन, हाबिल-बेथ-माका, यानोह, केदेस नु हासोरे़न् हुक्काप् चोगु॥ खुने़ॽ गिलाद नु गालिल नप्तालिबा के़रे़क् लाजेॽहाॽआङ् हुक्काप् चोगु, हे़क्क्याङ् मनाहाॽ अस्सुर लाजेॽओ ते़म्सुदेॽरुसि॥ 30 खे़ब्याङ् एलाहरे़ कुस्सा होसियाहःल्ले़ रमल्याहरे़ कुस्सा पेकहःल्ले़ कुदक्ले़ङ्वाओ चे़म्भन् चोगु॥ होसियाहःल्ले़ ताप्फे़ःम्बा पान् इसुआङ् खे़न् से़रु, हे़क्क्याङ् अजर्याहरे़ कुस्सा योतामरे़ हाङ्युक् चोगुबा निबोङ्गेक्पा तङ्बेओ खे़ल्ले़ कुएगाङ् खुने़ॽ हाङ् पोःक्खे़॥ 31 पेकहरे़ कुहाङ्युक् ये़म्मोबा वेॽ हिन्दोक्हाॽ नु खुने़ॽ चोगुबा के़रे़क् याःम्बक्हाॽ थे खे़न् इस्राइलबा खक्पे़त् हाङ्हाॽरे़ खुन्छिॽ साप्मुःन्धुम् साप्पन्नो साप्ते़आङ् मे़बत्ने़न्नाङ्बि? यहुदाबा हाङ् योताम ( २ साप्मु २७:१-९ ) 32 इस्राइलबा हाङ् रमल्याहरे़ कुस्सा पेकहःल्ले़ हाङ्युक् चोगुबा निसिगेक्पा तङ्बेओ यहुदाबा हाङ् अजर्याहःल्ले़ कुस्सा योतामरे़ हाङ्युक् चोःक्मा हेःक्तु॥ 33 आल्ल खुने़ॽ हाङ् पोःक्खे़ल्ले़ खुने़ॽ निबोङ्ङाङ् ङासि तङ्बे योरे़, हे़क्क्याङ् खुने़ॽ यरुसले़ःम्मो थिबोङ्ङाङ् तुक्सि तङ्बे हाङ्युक् चोगु॥ खुने़ॽ कुम्मारे़ कुमिङ् यरुसा वये़ खे़न् सादोकरे़ कुस्सा मे़न्छुमा वये़॥ 34 खुने़ॽ कुम्बा अजर्याहःल्ले़ चोगुबा कुइसिक् यहवे दाङ्बे़ल्ले़ कुनिमो आत्तिन् पाःन्निन् नुबा चोगे़ योतामरे़ हाबा खे़न्ने चोगु॥ 35 हे़क्केसाङ् कोःक्माबा माङ्धाःन्हाॽ मे़घे़त्तुन् मे़देसुन्॥ मनाहाॽरे़ खे़प्मो आल्लसाङ् सिदुङ्जभा तोःम्मा नु सुक्पा हाःम्मा याःम्बक् मे़जोगुर मे़वये़॥ खुने़ॽए यहवे दाङ्बे़ल्ले़ कुहिम्मोबा थोसमा लाम्धेःत्तिन् चोगु॥ 36 योतामरे़ कुहाङ्युक् ये़म्मोबा वेॽ हिन्दोक्हाॽ नु खुने़ॽ चोगुबा याःम्बक्हाॽ थे खे़न् यहुदाबा हाङ्हाॽरे़ खुन्छिॽ साप्मुःन्धुम् साप्पन्नो साप्ते़आङ् मे़बत्ने़ङ्नाङ्बि? 37 (खे़न् ये़म्मो यहवे दाङ्बे़ल्ले़ अरामबा हाङ् रसिन नु रमल्याहरे़ कुस्सा पेकहःन् यहुदाःल्ले़ कुदक्ले़ङ्वाओ फोङ्मा हेःक्तुसि॥) 38 योतामे़न् खुने़ॽ कुसुधे़बा कुदाक्थे़बाहाॽनु सोरिक् तङ्सिङ्से़ पे, हे़क्क्याङ् खुने़ॽ कुन्धे़बा दाउदरे़ कुये़क्यक्को खुने़ॽ खे़ङ्हाॽनु सोरिक् मे़जिक्खु॥ खम्भ्याङ् खुने़ॽ कुएगाङ् कुस्सा आहाजे़न् हाङ् पोःक्खे़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.