२ हाङ् 14 - लिम्बुयहुदाबा हाङ् अमस्याह ( २ साप्मु २५:१-२४ ) 1 इस्राइलबा हाङ् यहोआहाजरे़ कुस्सा येहोआसरे़ हाङ्युक् चोःक्मा हेःक्तुबा निसिगेक्पा तङ्बेओ यहुदाबा हाङ् योआसरे़ कुस्सा अमस्याहरे़ हाङ्युक् चोःक्मा हेःक्तु॥ 2 आल्ल खुने़ॽ हाङ् पोःक्खे़ल्ले़ खुने़ॽ निबोङ्ङाङ् ङासि तङ्बे योरे़आङ् वये़, हे़क्क्याङ् खुने़ॽ यरुसले़ःम्मो निबोङ्ङाङ् फाङ्सि तङ्बे हाङ्युक् चोगु॥ खुने़ॽ कुम्मारे़ कुमिङ् यहोअदिन वये़॥ खुने़ॽ यरुसले़म के़युङ्मा वये़॥ 3 अमस्याहरे़ यहवे दाङ्बे़ल्ले़ कुनिमो आत्तिन् पाःन्निन् नुबा चोगे़ हाबा खे़न्ने चोगु, कर खुने़ॽ कसुधे़बा कुदाक्थे़बा दाउदरे़ चोगुबा हे़क्केग नुबा मे़जोगुन्॥ के़रे़क् पाःन्नो खुने़ॽ कुम्बा योआसरे़ चोगुबा कुइसिक् चोगु॥ 4 हे़क्केसाङ् चन्जम्बा ते़न्हाॽओबा माङ्धाःन्हाॽ खुने़ॽ मे़घे़त्तुन् मे़देसुन्, हे़क्क्याङ् मनाहाॽरे़ खे़प्मो चक्मे़ल्लॽए सिदुङ्जभा मे़दोन्दु सुक्पाआङ् मे़हाःन्दु॥ 5 खुने़ॽ कुहुक्को हाङ्जुम्मिन् योधो मे़ल्लॽमनाबा पोःक्खे़आङ् खुने़ॽ कुम्बा हाङ्ङिन् के़से़प्पा खे़न् कुसुहाङ्युक्पाहाॽ खुने़ॽ से़रुसि॥ 6 हे़क्केसाङ् मोसाःल्ले़ कुसाम्योथिम् इङ्जाङ्ङो साप्ते़आङ् के़बप्पा कुइसिक् अक्खे के़लॽबा यहवे दाङ्बे़ल्ले़ कुइङ्जाङ्ङिन् इःत्तु नाःत्तुआङ् खुने़ॽ मना के़से़प्पाहाॽरे़ खुन्छिॽ ये़म्बित्छासाहाॽ मे़से़रुसिन्—“पाहाॽ खुन्छिॽ साहाॽरे़ लागि हे़क्क्याङ् साहाॽ खुन्छिॽ पाहाॽरे़ लागि मे़से़रे़म्सिम्मिन्ने़ॽ॥ मनाए थक्मा आप्फेक् खुन्छिॽ फे़न्याःम्बक्हाॽरे़ कुले़क्वा मे़सिर॥” 7 युम् ने़ने़बादे़न्नो थिबोङ् हे़न्छिङ् एदोमिहाॽ के़नाःम्बा नु थङ्ङो सेलाःन् हुक्काप् के़जोःक्पाआङ् खे़ल्ले़ कुमिङ् योक्तेल के़वाःप्पा खुने़ॽए वये़॥ खे़न् ते़न्निल्ले़ कुमिङ् आइन् थारिक्साङ् हाबा खे़न्लो॥ 8 खे़न् एगाङ् अमस्याहःल्ले़ इङ्साबाहाॽ पाङ्घुसिआङ् इस्राइलबा हाङ् येहुरे़ कुम्मे़न्छाॽ, यहोआहाजरे़ कुस्सा येहोआसे़न् अक्खे मे़त्तुआङ् थङ् थक्मा साःत्तु, “फे़रे़ॽ, आङ्गाॽनु नादुम्दुम्बा थङ् थक्ते़ॽ॥” 9 कर इस्राइलबा हाङ् येहोआसरे़ यहुदाबा हाङ् अमस्याहन् अक्तङ्बा नोगप् हाक्तु, “ले़बनानबा सेर्दाःक्मा थिक्ले़ ले़बनानबाए साम्माङ्सिङ् थिक् अक्खे मे़त्तुआङ् इङ्घङ् हाक्तु, ‘खे़ने़ॽ के़स्सा मे़न्छुमान् आङ्गाॽ आस्सा ये़म्बित्छाःन्नु ते़न्धाम् मेःक्खिम् मे़त्ते़ॽ॥’ खे़ब्याङ् ले़बनानबा ताम्भुङ् थक्सा थिक् खे़न् लाम् पोःक्खे़आङ् ये़, हे़क्क्याङ् खे़न् सेर्दाःक्मे़न् चिदोॽ चिदोॽ तोॽरु॥ 10 “खे़ने़ॽ कुजे़क्पाए एदोमे़न् के़नाःन्दु, हे़क्क्याङ् आल्लो खे़ने़ॽ यम्बा के़हे़न्छिङ्ङाङ् के़वाॽ॥ खे़ने़ॽ थङ् के़नाःन्दुबाओ के़निङ्वाॽ तासे़ॽ, हे़क्क्याङ् आप्फेक् के़हिम्मो युङे़ॽ! खे़ने़ॽ आप्फेक् नु यहुदाःन्नाङ् मे़ङ्मारे़ लागि खे़ने़ॽ थेआङ् याःम्बक् के़भेःन्दुबाबे?” 11 हे़क्केसाङ् अमस्याहःल्ले़ कन् पाःन्निन् खे़म्घे़म् मे़लाप्तुन्॥ कल्ले़चोगुल्ले़ इस्राइलबा हाङ् येहोआसरे़ थङ्ङो फत्तु, हे़क्क्याङ् खुने़ॽ नु यहुदाबा हाङ् अमस्याहन् यहुदाबा बेथ-सेमेसओ थङ् थक्ते़सि॥ 12 इस्राइलरे़ यहुदान् हारिजाःत्तु, हे़क्क्याङ् के़रे़क् मनाहाॽ खुन्छिॽ साःङ्गाहिम्हाॽओ मे़घे़त्छिङ्॥ 13 इस्राइलबा हाङ् येहोआसरे़ अहज्याहरे़ कुम्मे़न्छाॽ, योआसरे़ कुस्सा यहुदाबा हाङ् अमस्याहन् बेथ-सेमेसओ ते़म्सु॥ खे़न् एगाङ् येहोआसे़न् यरुसले़म पे, हे़क्क्याङ् एफ्राइमबा लाम्धेःप्पोलाम् कुसुक्पोबा लाम्धेःत्तो थारिक् हप्मे़न् किप् ने़त्छि मितर केःम्बा ये़क्यक्कोबा कुलक् थिक् लुङ्धाक्किन् लुःन्दुदेसु॥ 14 खुने़ॽ यहवे दाङ्बे़ल्ले़ कुहिम्मो नु हाङ्हिम्मोबा थाःङ्हाॽओ खोसुबा के़रे़क् साम्म्याङ् युप्पा नु काक् सामाहाॽ तेॽरुआङ् पे॥ खुने़ॽ मे़दे़म्सु मे़युक्खुसिबा मनाहाॽआङ् तेॽरुसिआङ् सामरिया नुःक्खे़॥ 15 यहोआहाजरे़ हाङ्युक् चोगुबा ये़म्मो पोःक्खे़बा वेॽ हिन्दोक्हाॽ, खुने़ॽ चोगुबा याःम्बक्हाॽ, खुने़ॽ चोगुबा मुक्साम्बा याःम्बक्हाॽ, हे़क्क्याङ् यहुदाबा अमस्याहरे़ कुदक्ले़ङ्वा चोगुबा थङ्ङिन् थे खे़न् इस्राइलबा हाङ्हाॽरे़ खुन्छिॽ साप्मुःन्धुम् साप्पन्नो साप्ते़आङ् मे़बप्ने़म्बि? 16 येहोआसे़न् खुने़ॽ कुसुधे़बा कुदाक्थे़बाहाॽनु तङ्सिङ्से़ पे, हे़क्क्याङ् इस्राइलबा हाङ्हाॽनु सोरिक् सामरियाओ मे़लुप्तु॥ खम्भ्याङ् खुने़ॽ कुएगाङ् कुस्सा यारोबामे़न् हाङ् पोःक्खे़रो॥ यहुदाबा हाङ् अमस्याहन् मासिङ् ( २ साप्मु २५:२५-२८ ) 17 इस्राइलबा हाङ् यहोआहाजरे़ कुस्सा येहोआसे़न् मासिङ्ङाङ् एगाङ् यहुदाबा हाङ् योआसरे़ कुस्सा अमस्याहन् थिबोङ्ङाङ् ङासि तङ्बे हिङे़॥ 18 अमस्याहरे़ हाङ्युक् चोगुबा वेॽ हिन्दोक्हाॽ थे खे़न् यहुदाबा हाङ्हाॽरे़ खुन्छिॽ साप्मुःन्धुम् साप्पन्नो साप्ते़आङ् मे़बप्ने़म्बि? 19 अमस्याहरे़ कुदक्ले़ङ्वाओ यरुसले़ःम्मो लत्छा चे़म्भन् पोःक्खे़, हे़क्क्याङ् खुने़ॽ लाकिस खे़त्छिङ्ङाङ् पे॥ कर कुनिङ्मिहाॽरे़ खुने़ॽ कुएगाङ् मनाहाॽ मे़बाङ्घुसि हे़क्क्याङ् खुने़ॽ हाबा खे़प्मो मे़से़रु॥ 20 खुने़ॽ कुजेन् अन्निन् मे़गुःत्तु मे़भे़त्तु, हे़क्क्याङ् खुने़ॽ कुसुधे़बा कुदाक्थे़बाहाॽनु सोरिक् दाउदरे़ कुये़क्यक् यरुसले़ःम्मो मे़जिक्खु॥ 21 खे़ब्याङ् यहुदाबा के़रे़क् मनाहाॽरे़ थिबोङ्ङाङ् तुक्सि तङ्बे के़गे़प्पा अजर्याहन् मे़याङ्सिङ्ङाङ् खुने़ॽ कुम्बा अमस्याहरे़ कुले़क्वाओ हाङ् मे़जोगु॥ 22 अमस्याहन् कुसुधे़बा कुदाक्थे़बाहाॽनु सोरिक् तङ्सिङ्से़ पेआङ् एगाङ् कुस्सा अजर्याहःल्ले़ए एलात ये़क्यक्किन् याम्मो चोगु हे़क्क्याङ् यहुदान् नुःक्तु पिरुरो॥ इस्राइलबा हाङ् यारोबाम 23 यहुदाबा हाङ् योआसरे़ कुस्सा अमस्याहन् हाङ् पोःक्खे़बा थिबोङ्ङाङ् ङासिगेक्पा तङ्बेओ इस्राइलबा हाङ् येहोआसरे़ कुस्सा यारोबामे़न् सामरियाबा हाङ् पोःक्खे़, हे़क्क्याङ् खुने़ॽ लिबोङ्ङाङ् तङ्बे थिक् हाङ्युक् चोगु॥ 24 खुने़ॽ यहवे दाङ्बे़ल्ले़ कुनिमो थेःन् ताप्फे़ःम्बा चोगे़ हाबा खे़न्ने चोगु, हे़क्क्याङ् इस्राइले़न् चोक् पाङ्घुबा नाबातरे़ कुस्सा यारोबामरे़ कुलायोहाॽलाम् मे़नुःक्खे़न्॥ 25 यहवे दाङ्बा इस्राइलबा निङ्वाॽफुमाङ्ङिल्ले़ कुसे़वारोबा गात-हेपेरबा अमित्तैरे़ कुस्सा माङ्निङ्वाॽपान् के़बाःप्पा योनालाम् पाःत्तुबा पाःन्जाःक् इसिःक् ले़बोहमातआङ् कॽयो अराबाबा वरःङ्ङो थारिक् इस्राइलबा इःन्दोन् याम्मो मे़म्मुन्ने ने़स्से़र के़जोःक्पा खुने़ॽए वये़॥ 26 कुभा चोःक्युम्भोबा इग्र योग्बा आत्तिन्, इस्राइलिहाॽरे़साङ् साॽरिक् तुक्खे मे़दुमुबा यहवे दाङ्बे़ल्ले़ निसुआङ् वये़॥ खे़ङ्हाॽ के़भाॽबा हाःत्ताङ् होःप्ते़॥ 27 इक्सादिङ् खाम्बेःक्मोलाम् इस्राइलरे़ कुमिङ् मासुङ् पिरुङ् फाॽआङ् यहवे दाङ्बे़ल्ले़ पाःत्तुबा होःप्ते़बाल्ले़ चोगुल्ले़, खुने़ॽ येहोआसरे़ कुस्सा यारोबामरे़ कुहुक्कोलाम् खे़ङ्हाॽ से़ःप्तुसि॥ 28 यारोबामरे़ हाङ्युक् चोगुबा ये़म्मोबा वेॽ हिन्दोक्हाॽ नु खुने़ॽ चोगुबा के़रे़क् याःम्बक्हाॽ हे़क्क्याङ् खुने़ॽ चोगुबा मुक्साम्बा याःम्बक्हाॽ नु थङ् थक्ते़बालाम् खोसुबा पाःन्हाॽ, खम्भ्याङ् इस्राइलरे़ कुलागि यहुदाःल्ले़ कुलक्को ने़स्से़बा दमस्कस नु हमाते़न् याम्मो नुःक्तुबा याःम्बक्हाॽ थे खे़न् इस्राइलबा हाङ्हाॽरे़ खुन्छिॽ साप्मुःन्धुम् साप्पन्नो साप्ते़आङ् मे़बप्ने़म्बि? 29 यारोबामे़न् खुने़ॽ कसुधे़बा कुदाक्थे़बा इस्राइलबा हाङ्हाॽनु सोरिक् तङ्सिङ्से़ पे, हे़क्क्याङ् खुने़ॽ कुएगाङ् कुस्सा जकरियान् हाङ् पोःक्खे़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.