२ हाङ् 13 - लिम्बुइस्राइलबा हाङ् यहोआहाज 1 यहुदाबा हाङ् अहज्याहरे़ कुस्सा योआसरे़ हाङ्युक् चोःक्मा हेःक्तुबा निबोङ्ङाङ् सुम्सिगेक्पा तङ्बेओ येहुरे़ कुस्सा यहोआहाजे़न् सामरियाओ इस्राइलबा हाङ् पोःक्खे़, हे़क्क्याङ् खे़ल्ले़ थिबोङ्ङाङ् नुसि तङ्बे हाङ्युक् चोगु॥ 2 इस्राइले़न् चोःक्मा पाङ्घुबा नाबातरे़ कुस्सा यारोबामरे़ कुलायोहाॽओ खुने़ॽ लाङ्घेगे़आङ् यहवे दाङ्बे़ल्ले़ कुनिमो आत्तिन् पाःन्निन् ताप्फे़ःम्बा चोगे़ हाबा खे़न्ने चोगु, हे़क्क्याङ् खे़न् लाम्बा खुने़ॽ मे़नुःक्खे़न्॥ 3 कल्ले़चोगुल्ले़ यहवे दाङ्बे़ल्ले़ कुसाक्के़न्निन् इस्राइलओ थ्ये़, हे़क्क्याङ् खुने़ॽ यरिक् ये़म् थारिक् अरामबा हाङ् हजाएल नु खुने़ॽ कुस्सा बेन-हददरे़ खुन्छिॽ युक्को थासुसि॥ 4 खे़ब्याङ् यहोआहाजरे़ यहवे दाङ्बालाम् नुरिक् मे़त्छिङ्मा कोःत्तु, हे़क्क्याङ् यहवे दाङ्बे़ल्ले़ खे़ल्ले़ कुबेलिन् खे़प्सु, थेआङ्भे़ल्ले़ अरामबा हाङ्ङिल्ले़ इस्राइलिहाॽ साॽरिक् ताप्फे़ःल्लिक् मे़त्तुसिआङ् वये़बा खुने़ॽ निसु॥ 5 यहवे दाङ्बे़ल्ले़ इस्राइलरे़ कुलागि लत्छा से़न्लप्दाङ्बा थिक् युक्तिङ् चोगु, हे़क्क्याङ् खे़ङ्हाॽ अरामबा मुक्साम्लाम् से़न्लप् मे़घोसे़॥ हे़क्क्याङ् इस्राइलिहाॽ याम्मो आप्फेक् खुन्छिॽ हिम्हाॽओ तगि मे़युङे़बा कुइसिःक्के युङ्मा वाॽमा मे़हेःक्ते़॥ 6 कर खे़ङ्हाॽरे़ इस्राइले़न् चोःक्मा मे़बाङ्घुबा यारोबामरे़ कुहिम्सयङ्हाॽरे़ खुन्छिॽ लायोहाॽ मे़ल्ले़रुन्, कर खे़ङ्हाॽ हाबा खे़प्मोए चक्मे़ल्लॽए मे़बत्छे़॥ असेरा माङ् सित्लाङ्ङिन्नाङ् सामरियाओए आम्भा युङे़॥ 7 यहोआहाजरे़ कुलागि ङाबोङ् अन्गे़युक्पाहाॽ, थिबोङ् अन्लाधाहाॽ नु थिबोङ् हे़न्छिङ् खाम्बाङ्ङो लाङ्गे़घेःक्पा थक्सुबाहाॽरक् मे़दाङे़ मे़याःक्ते़ वेॽ आत्तिन् थक्सुबाहाॽआङ् मे़न्दाङे़न्, थेआङ्भे़ल्ले़ अरामबा हाङ्ङिल्ले़ वेॽ के़रे़क् मे़क्खुसिआङ् चाधाम्मादे़न्नोबा खाम्हिःक् कुइसिक् चोगुसिआङ् वये़॥ 8 यहोआहाजरे़ हाङ्युक् चोगुबा वेॽ हिन्दोक्हाॽ हे़क्क्याङ् खुने़ॽ चोगुबा के़रे़क् याःम्बक्हाॽ नु चोगुबा मुक्साम्बा याःम्बक्हाॽ थे खे़न् इस्राइलबा हाङ्हाॽरे़ खुन्छिॽ साप्मुःन्धुम्मोबा साप्पन्नो साप्ते़आङ् मे़बत्ने़न्नाङ्बि? 9 खे़ब्याङ् यहोआहाजे़न् खुने़ॽ कुसुधे़बा कुदाक्थे़बाहाॽनु तङ्सिङ्से़ पेआङ् खुने़ॽ सामरियाओ मे़जिक्खु, हे़क्क्याङ् खुने़ॽ कुएगाङ् खुने़ॽ कुस्सा येहोआसे़न् हाङ् पोःक्खे़रो॥ इस्राइलबा हाङ् येहोआस 10 यहुदा हाङ् योआसरे़ हाङ्युक् चोःक्मा हेःक्तुबा सुम्बोङ्ङाङ् नुसिगेक्पा तङ्बेओ यहोआहाजरे़ कुस्सा येहोआसे़न् सामरियाओ इस्राइलबा हाङ् पोःक्खे़, खे़ब्याङ् खुने़ॽ थिबोङ्ङाङ् तुक्सि तङ्बे हाङ्युक् चोगु॥ 11 खुने़ॽ यहवे दाङ्बे़ल्ले़ कुनिमो आत्तिन् पाःन्निन् ताप्फे़ःम्बा चोगे़ हाबा खे़न्ने चोगु, हे़क्क्याङ् इस्राइले़न् चोःक्मा पाङ्घुबा नाबातरे़ कुस्सा यारोबामरे़ आत्तिन् कुलायोहाॽआङ् खुने़ॽ मे़ले़रुन्॥ खुने़ॽ खे़प्मोए चक्मे़ल्लॽए पत्छे़॥ 12 येहोआसरे़ कुहाङ्युक् ये़म्मोबा वेॽ हिन्दोक्हाॽ, खुने़ॽ चोगुबा के़रे़क् याःम्बक्हाॽ नु खुने़ॽ चोगुबा मुक्साम्बा याःम्बक्हाॽ, यहुदाबा हाङ् अमस्याहःन्नु थङ् थक्ते़सिबाहाॽआङ् सोसोरिक् थे खे़न् इस्राइलबा हाङ्हाॽरे़ खुन्छिॽ साप्मुःन्धुम्मोबा साप्पन्नो साप्ते़आङ् मे़बत्ने़न्नाङ्बि? 13 येहोआसे़न् खुने़ॽ कुसुधे़बा कुदाक्थे़बाहाॽनु सोरिक् तङ्सिङ्से़ पे, हे़क्क्याङ् खुने़ॽ कुएगाङ् यारोबामे़न् हाङ्युक्नाओ युङ्सिङ्॥ येहोआसे़न् इस्राइलबा हाङ्हाॽनु सामरियाओ मे़जिक्खुरो॥ एलिसान् मासिङ्बा नु कुनुप्मा माङ्निङ्वाॽपान् 14 आल्ल एलिसान् लत्छा तुक्मालाम् तुगे़र वये़ खे़न् तुक्मालाम् खुने़ॽ ताःन्दि मासिङ्॥ इस्राइलबा हाङ् येहोआसे़न् खुने़ॽ कुदुम्से़ पे, हे़क्क्याङ् खुने़ॽ कुदगि हाबे़आङ् मे़त्तु, “पानुदिङ् आम्बौ! पानुदिङ् आम्बौ! आङ्गाॽ इस्राइलबा अन्लाधाहाॽ नु अन्गे़युक्पाहाॽ निसुङ्सिङ्!” 15 एलिसाःल्ले़ मे़त्तु, “लत्छा लि नु कुभा तोःङ्हाॽ याङ्सिङ्ङे़ॽ॥” हे़क्क्याङ् येहोआसरे़ हे़क्केए चोगु॥ 16 खुने़ॽ इस्राइलबा हाङ्ङिन् मे़त्तु, “लिन् आदाङ्बारे़ के़हुक्को याङ्सिङ्ङे़ॽओ॥” खे़ल्ले़ हे़क्के चोगुआङ् एगाङ् एलिसाःल्ले़ खुने़ॽ कुहुक्हाॽ हाङ्ङिल्ले़ कुहुक्हाॽ सम्धाङ् ने़स्सु॥ 17 खे़ब्याङ् खुने़ॽ मे़त्तु, “नाङ्गे़न् पिसाङ्बा पेधाःप्पिन् हन्दे़ॽ॥” हे़क्क्याङ् हाङ्ङिल्ले़ खे़न् हन्दु॥ एलिसाःल्ले़ खुने़ॽ मे़त्तु, “तोःङ्ङिन् आबे़देसे़ॽ॥” एलिसाःल्ले़ मे़त्तु, “यहवे दाङ्बे़ल्ले़ थङ् के़नाःम्बा कुदोःङ्, अरामिहाॽ थङ् नाःन्दुसिबा कुदोःङ्! आदाङ्बारे़ अपेकओ अरामिहाॽ वरे़ङ्ले़ङ् के़मे़क्खुसिॽ॥” 18 खे़ब्याङ् एलिसाःल्ले़ मे़त्तु, “तोःङ्हाॽ याङ्सिङ्ङे़ॽ॥” खे़ब्याङ् हाङ्ङिन् खे़ङ्हाॽ याङ्सिङ्॥ एलिसाःल्ले़ मे़त्तु, “खाम्बाङ्ङिन् हिप्ते़ॽ॥” खुने़ॽ सुम्ले़ङ् थारिक् हिप्तु॥ 19 निङ्वाॽफुमाङ्ङिल्ले़ कुमनान् खे़न्नु कुसिक् पोगे़आङ् खुने़ॽ मे़त्तु, “आदाङ्बारे़ खाम्बाङ्ङो ङासि तुक्सि थारिक् हिप्मा के़बोङ्बा वये़॥ खे़ब्याङ्ने़ आदाङ्बारे़ अरामे़न् के़नाःन्दुबा वये़ हे़क्क्याङ् खे़न् वरे़ङ्ले़ङ् खाप्पुथ्यःङ् के़मे़क्खुबा वये़॥ कर आल्ल आदाङ्बारे़ अरामे़न् सुम्ले़ङ् थारिक्लक् के़नाःन्दुॽ॥” 20 खे़न् एगाङ् एलिसान् मासिङ्, हे़क्क्याङ् खुने़ॽ मे़लुप्तु॥ तङ्बे थक्मा के़नाप्पा के़हिप्पा मोआबिहाॽ हाङ्वामा ये़म्मो लाजेॽओ मे़लासे़र मे़वये़॥ 21 थिक्ले़ङ् कुभा इस्राइलिहाॽरे़ लत्छा चेधिक् मे़लुप्तुर मे़यागे़ल्ले़ थिक्ले़ङ्ले़ खे़ङ्हाॽरे़ कुलुप् थिक् के़नाप्पा के़हिप्पा मनाहाॽ मे़निसुसि॥ कल्ले़चोगुल्ले़ खे़ङ्हाॽरे़ चेःन् एलिसाःल्ले़ कुइपुङ्ङो हाबा लाप्मे़देसु मे़धआङ् मे़घे़त्छिङ् मे़बे॥ आल्ल खे़न् चेःल्ले़ एलिसाःल्ले़ कुये़त्हाॽ सुसुल्ले़ खे़न् मनान् कुहिङ्वे़त् पोःक्खे़आङ् कुलाङ्हाॽरे़ तक्तुआङ् ये़म्सिङ्लो॥ इस्राइल नु अरामिहाॽ लुम्मो ते़न्धङ् 22 यहोआहाजरे़ कुहाङ्युक् खाराक्के अरामबा हाङ् हजाएलरे़ इस्राइले़न् एःप्तु युक्तु॥ 23 कर अब्राहाम, इसहाक हे़क्क्याङ् याकुबनुबा यहवे दाङ्बे़ल्ले़ कुमाङ्हुप्पिल्ले़ चोगुल्ले़ खुने़ॽ खे़ङ्हाॽ लुङ्माॽ तुक्तुसिआङ् खुने़ॽ कुलुङ्माॽ स्याःत् मे़लॽरे़॥ खुने़ॽ खे़ङ्हाॽ ओमे़त्तुसि कम्ब्राङ् मे़त्तुसि॥ आइन्बा ये़न् थारिक्के खुने़ॽ खे़ङ्हाॽ मे़ङ्मासि इग्र खे़ङ्हाॽ खुने़ॽ कुदगिलाम् लःप्मादेमासि निङ्वाॽ मे़न्जोःक्के कत्तुसिॽ॥ 24 अरामबा हाङ् हजाएले़न् मासिङ्, हे़क्क्याङ् खुने़ॽ कुएगाङ् खुने़ॽ कुस्सा बेन-हददे़न् हाङ् पोःक्खे़॥ 25 खे़ब्याङ् यहोआहाजरे़ कुस्सा येहोआसरे़ खुने़ॽ कुम्बा यहोआहाजलाम् हजाएलरे़ कुस्सा बेन-हददरे़ थङ् चोगे़आङ् हुक्काप् चोगुबा ये़क्यक्हाॽ येहोआसरे़ याम्मो नुःक्तुदारु॥ येहोआसरे़ बेन-हददे़न् सुम्ले़ङ् नाःन्दु, हे़क्क्याङ् कम्भलॽरिक् इस्राइलबा ये़क्यक्हाॽ याम्मो नुःक्तुदारुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.