२ हाङ् 12 - लिम्बुयहुदाबा हाङ् योआस ( २ साप्मु २४:१-१६ ) 1 इस्राइलबा हाङ् येहुःल्ले़ हाङ्युक् चोगुबा नुसिगेक्पा तङ्बेओ योआसे़न् हाङ् पोःक्खे़, हे़क्क्याङ् खुने़ॽ यरुसले़ःम्मो लिबोङ् तङ्बे थारिक् हाङ्युक् चोगु॥ खुने़ॽ कुम्मारे़ कुमिङ् सिब्या वये़॥ खे़न् बेर्सेबा के़युङ्मा वये़॥ 2 निङ्वाॽफुसाम्बा यहोयादाःल्ले़ खुने़ॽ हुॽरुबा तङ्बेहाॽओ खाराक्के यहवे दाङ्बे़ल्ले़ कुनिमो आत्तिन् पाःन्निन् नुबा चोगे़ हाबा खे़न्ने खुने़ॽ चोगु॥ 3 हे़क्केसाङ् चन्जम्बा दे़न्हाॽओबा माङ्धाःन्हाॽ खुने़ॽ मे़घे़त्तुन् मे़देसुन्॥ मनाहाॽरे़ खे़ङ्हाॽओ चक्मे़ल्लॽए सिदुङ्जभाहाॽ मे़दोन्दु हे़क्क्याङ् सुक्पा मे़हाःन्दु॥ 4 योआसरे़ निङ्वाॽफुसाम्बाहाॽ मे़त्तुसि, “यहवे दाङ्बे़ल्ले़ कुहिम्मो सेसे हुक्वा कुइसिक् याम्नाःत्निःत्तो मे़भुक्खुबा याङ्हाॽ, आप्फेक् लागि माङ्हे़क् मे़जोगुबा याङ्हाॽ नु आप्फेक् निङ्वाॽलाम् माङ्हिम्मो मे़दारुबा याङ्हाॽ फुक्खे़म्मे़ॽ॥ 5 के़रे़क् निङ्वाॽफुसाम्बाहाॽरे़ कुभा लत्छा याङ्सुम्बालाम् याङ्ङिन् मे़दाःक्तुर, हे़क्क्याङ् माङ्हिम्मो थे़मा हान्ति के़बोङ्बे़न्छाङ् चाःङ्वा मे़प्मारे़ लागि खे़न् याङ्ङिन् ओगप् मे़जोगुररो॥” 6 कर योआसे़न् हाङ् पोःक्खे़बा निबोङ्ङाङ् सुम्सिगेक्पा तङ्बे थारिक्साङ् निङ्वाॽफुसाम्बाहाॽरे़ माङ्हिम्मिन् चाःङ्वा मे़म्मे़त्ते मे़वये़॥ 7 कल्ले़चोगुल्ले़ योआस हाङ्ङिल्ले़ निङ्वाॽफुसाम्बा यहोयादान् नु वेॽ निङ्वाॽफुसाम्बाहाॽ उःत्तुसिआङ् मे़त्तुसि, “खिनिॽ थेआङ् माङ्हिम्मो के़धुप्पा के़लुःम्बादे़न्हाॽ चाःङ्वाॽ मे़म्मे़त्ते के़वयिबा? आल्लआङ्धो खिनिॽ याङ्सुम्बाहाॽलाम् याङ् मे़दाःक्ते़म्मिन्ने़ॽ, कर माङ्हिम्मिन् चाःङ्वा मे़प्मारे़ लागि खे़न् याङ्ङिन् हुक्सुप्ते़म्सिम्मे़ॽ॥” 8 कल्ले़चोगुल्ले़ आल्ल मनाहाॽ याङ् मे़म्भोःङ्मासि नु माङ्हिम्मिन् चाःङ्वा मे़प्मारे़ लागि खुन्छिॽ आप्फेक् याःम्बक् चोःक्मा लक्पे़न्निन् मे़न्दाःक्मारे़ लागि निङ्वाॽफुसाम्बाहाॽ मे़दे़न्दे़॥ 9 निङ्वाॽफुसाम्बा यहोयादाःल्ले़ सन्दोक् थिक् तारुआङ् खे़ल्ले़ कुसुःप्मो कुहङ् चोगु॥ यहवे दाङ्बे़ल्ले़ कुहिम्मो लाःप्मादे़न्नोबा चुक्वा ले़प्माङ् ले़त्ति तोःम्मादे़न्निल्ले़ कुबेसाङ् युक्खु॥ लाःप्मादे़न् कम्ब्राङ् के़मे़प्पा निङ्वाॽफुसाम्बाहाॽरे़ यहवे दाङ्बे़ल्ले़ कुहिम्मो मे़दारुबा के़रे़क् याङ्हाॽ हाबा खे़प्मो मे़गेःत्तु॥ 10 आल्ल खे़ङ्हाॽरे़ खे़न् सन्दोक्किन् यरिक् याङ्ङिल्ले़ तिम्से़बा मे़निसुल्ले़ हाङ्ङिल्ले़ कुसुहाङ्मिबान् नु तुम् निङ्वाॽफुसाम्बे़न् त्ये़सि हे़क्क्याङ् यहवे दाङ्बे़ल्ले़ कुहिम्मो कम्भलॽरिक् मे़दारुबा याङ्ङिन् निरे़त्छुआङ् सुक्वाहाॽओ याक्ते़छु॥ 11 खे़ङ्हाॽरे़ याङ्हाॽ मे़निरुआङ् यहवे दाङ्बे़ल्ले़ कुहिम्मो याःम्बक् के़जोःक्पाहाॽ ओमे़प्मारे़ लागि मुरामे़मे़त्तुसिबा मनाहाॽ खे़न् याङ्ङिन् मे़बिरुसि॥ आम्भा खे़प्मोलाम् खे़ङ्हाॽरे़ माङ्हिम् चोःक्मा याःम्बक् के़जोःक्पाहाॽ मे़बिरुसि, इग्र सिङ्गे़गाम्बा, 12 लुङ्गे़से़प्पाहाॽ नु लुङ् के़हे़प्पाहाॽ मे़बिरुसि॥ यहवे दाङ्बे़ल्ले़ कुहिम्मिन् चाःङ्वा मे़प्मारे़ लागि लुङ्सिङ् नु मे़घक्तु मे़हे़रुआङ् मे़दङ्घुबा लुङ्हाॽ खे़ङ्हाॽरे़ मे़इङु, हे़क्क्याङ् माङ्हिम्मिन् याम्मो चोःक्मारे़ लागि वेॽ के़रे़क् याङ्साहाॽ पेक् याङ्हाॽ मे़हुङु॥ 13 खे़ङ्हाॽरे़ युप्पा खोर्याहाॽ, सेमि हाःम्मा लाभिःत्हाॽ, सामाक्खिॽ साङ्मा छे़ःङ्ग्याहाॽ नु थुत्तुरिःप्पा सादाङ्हाॽ इग्र कुभा साम्म्याङ् युप्पा सामापुमाहाॽ चोःक्मारे़ लागि यहवे दाङ्बे़ल्ले़ कुहिम्मो मे़दारुबा याङ्हाॽ ओगप् मे़न्जोगुन्॥ 14 थेआङ्भे़ल्ले़ खे़न् याङ्ङिन् माङ्हिम् चाःङ्वा मे़प्मारे़ लागि याःम्बक् के़जोःक्पा मनाहाॽ मे़बिरुसि॥ 15 याःम्बक् के़जोःक्पाहाॽरे़ लागि याःम्बक् ओगे़मे़प्पाहाॽ मे़बिरुसिबा याङ्साहाॽरे़ खानिःत् खे़ङ्हाॽरे़ मे़न्युक्खुन्, थेआङ्भे़ल्ले़ खे़ङ्हाॽरे़ साॽरिक् कुदोःप्मा निरिक्काङ् याःम्बक् मे़जोगु॥ 16 आप्तिक्कोलाम् ले़प्मि खोमा सिदुङ्जभा नु लायोलाम् ले़प्मि खोमा हुक्वाहाॽरे़ याङ्ङिन् यहवे दाङ्बे़ल्ले़ कुहिम्मो मे़न्दारुन्॥ खे़न् निङ्वाॽफुसाम्बाहाॽरे़न्ने पोःक्खे़रो॥ योआसरे़ कुनुप्मा कुहाङ्युक् 17 खे़न् एगाङ् अरामबा हाङ् हजाएले़न् थो थोःक्सिङ् पे हे़क्क्याङ् गात ये़क्यक्किन् थङ्ङो फत्तुआङ् हुक्काप् चोगु॥ खे़न् एगाङ् खुने़ॽ यरुसले़ःम्मिन् फप्मारे़ लागि याङ्ना नुःक्खे़॥ 18 कर यहुदाबा हाङ् योआसरे़ कुम्बा अहज्याह, कुन्धे़बा योराम नु कुन्धे़बा यहोसापातसिरे़ मे़दोन्दुबा के़रे़क् सेसे चिगक्वा सामाहाॽ हे़क्क्याङ् खुने़ॽ आप्फेक् तोःन्दुबा मिक्तोःक्हाॽ नु यहवे दाङ्बे़ल्ले़ कुहिम्मोबा हे़क्क्याङ् हाङ्हिम्मोबा थाःङ्हाॽओ मे़घोसुबा के़रे़क् साम्म्याङ्हाॽ योआसरे़ याङ्सिङ्ङाङ् अरामबा हाङ् हजाएले़न् हाक्तुदेसु॥ खे़न् एगाङ् हजाएले़न् यरुसले़मलाम् नुःक्खे़॥ 19 योआसरे़ कुहाङ्युक् ये़म्मोबा वेॽ हिन्दोक्हाॽ नु खुने़ॽ चोगुबा के़रे़क् याःम्बक्हाॽ थे खे़न् यहुदाबा हाङ्हाॽरे़ खुन्छिॽ साप्मुःन्धुम्मोबा साप्पन्नो साप्ते़आङ् मे़बत्ने़न्नाङ्बि? 20 खुने़ॽ कुसुहाङ्युक्पाहाॽरे़ खुने़ॽ कुदक्ले़ङ्वाओ चे़म्भन् मे़जोगु, हे़क्क्याङ् खुने़ॽ सिल्लाबा सङ्माङ् पेःक्मा लाम्मो के़ने़बा बेथ-मिल्लोबा हिम्मो मे़से़रु॥ 21 योआसे़न् के़से़प्पा सुहाङ्युक्पाहाॽ सिम्मतरे़ कुस्सा योजाबादे़न् नु सोमेररे़ कुस्सा यहोजाबादे़न् वये़सि॥ खुने़ॽ स्ये़आङ् खुने़ॽ आप्फेक् कुसुधे़बा कुदाक्थे़बाहाॽनु दाउदरे़ कुये़क्यक्को मे़जिक्खु॥ खुने़ॽ कुएगाङ् खुने़ॽ कुस्सा अमस्याहन् हाङ् पोःक्खे़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.