२ हाङ् 11 - लिम्बुयहुदाबा हाङ्मा अतल्याह ( २ साप्मु २२:१०–२३:१५ ) 1 आल्ल अहज्याहरे़ कुम्मा अतल्याह हाङ्मे़ल्ले़ कुस्सान् मे़से़रुबा निसुआङ् हाङ्हिम्सयङ्बाहाॽ के़रे़क् मे़ङ्मासिरे़ लागि मुन्छिङ्॥ 2 कर यहोराम हाङ्ङिल्ले़ कुस्सा मे़न्छुमा, अहज्याहरे़ कुन्साॽ मे़न्छुमा यहोसेबाःल्ले़ अहज्याहरे़ कुस्सा योआसे़न् से़प्मा मे़जोगुसिबा हाङ्साहाॽरे़ खुन्छिॽ लुम्मोलाम् स्वाःत् खे़त्तुआङ् तेॽरु॥ खुने़ॽ खे़न् नु खे़न् नुगे़धुक्मे़न् अतल्याह हाङ्मे़न् लाम्बा चिङ्मासिरे़ लागि लत्छा इप्नादे़न् याक्फाङ्ङो चिक्खु युक्खुसि, हे़क्क्याङ् कम्भलॽरिक् खे़न् चाहिःन् मे़न्छे़रुन्॥ 3 अतल्याह हाङ्मे़ल्ले़ लाजेॽओ हाङ्युक् चोगुल्ले़ कम्भलॽरिक् योआसे़न् खुने़ॽ नुगे़धुक्मे़न्नु सोरिक् यहवे दाङ्बे़ल्ले़ कुहिम्मो तङ्बे तुक्सि थारिक् चिङ्सिङ्ङाङ् युङे़रो॥ अतल्याह हाङ्मे़ल्ले़ कुदक्ले़ङ्वाओ पिफ्युङ् 4 नुसिगेक्पा तङ्बेओ यहोयादारे़ किप् थिक्, किप् थिक् मनासुम्हाॽरे़ खुन्छिॽ थक्पेबाहाॽ, करिहाॽ, नु इक्के़गोबाहाॽ उःप्मासिआङ् यहवे दाङ्बे़ल्ले़ कुहिम्मो ताःप्मासिरे़ लागि मनाहाॽ पाङ्घुसि॥ खुने़ॽ खे़ङ्हाॽनु लत्छा माङ्हे़क् चोगु, हे़क्क्याङ् खे़ङ्हाॽ यहवे दाङ्बे़ल्ले़ कुहिम्मो माङ्हे़क्सिङ्मा पाङ्घुसि॥ खे़ब्याङ् खुने़ॽ खे़ङ्हाॽ हाङ्ङिल्ले़ कुस्सान् ओःन्धाक्तुसि॥ 5 खुने़ॽ खे़ङ्हाॽ अक्खे मे़त्तुसिआङ् इङ्जाङ् पिरुसि, “खिनिॽ अक्खे के़जोगुम्ल पोङ्ॽ—खिनिॽ कुलुप् सुम्सि सबाथ याःम्बक् चोःक्से़ के़बेगिॽ—खिनिॽ लुम्मोलाम् कुलक् थिक्ले़ग हाङ्हिम्मिन् कम्ब्राङ् के़मे़त्तुम्ल पोङ्ॽ, 6 कुलक् थिक् यम्बा लाम्धेःत्तो के़ये़बिर पोङ्ॽ, हे़क्क्याङ् हाङ्हिम्मे़न् के़ले़क्सिङ्बार कम्ब्राङ् के़मे़प्पा कुलक् थिक् कम्ब्राङ्बाहाॽरे़ खुन्छिॽ एगाङ् पिसाङ्बा लाम्धेःत्तो ये़बे़म्मे़ॽ— 7 हे़क्क्याङ् खिनिॽ कुलुप् ने़त्छिओ के़वाॽबाहाॽरे़ मे़न्छाक्मनाबा सबाथओ मुरा के़म्मे़त्तिबा याःम्बक्कोलाम् नाःम्सिङ्मा के़घोसुम्ॽ, खिनिॽ के़रे़क्ले़ हाङ्ङिल्ले़ कुलागि माङ्हिम्मिन् कम्ब्राङ् मे़त्ते़म्मे़ॽ॥ 8 खिनिॽ के़रे़क् मनाहाॽरे़ खिनिॽ फे़जुम्भे़या खजुम्घयाहाॽ हुक्को काप्पासिम्मे़ॽआङ् हाङ्ङिल्ले़ कुगब्रिङ् पिसाङ् इरे़म्मे़ॽआङ् वये़म्मे़ॽ॥ खिनिॽ पेसाङ् के़दाबा आत्तिन्छाङ् से़रे़म्मे़ॽ॥ हाङ्ङिन् आत्ति पेःक्साङ् खिनिॽ खुने़ॽ कुबेसाङ् के़वयिर पोङ्ॽ॥” 9 निङ्वाॽफुसाम्बा यहोयादाःल्ले़ इङ्जाङ् पिरुसिबा हे़क्केए किप् थिक् किप् थिक् मनासुम्मोबा थक्मोबाहाॽरे़ मे़जोगु॥ के़रे़क्ले़ खुन्छिॽ आप्फेक् आप्फेक् मनाहाॽ मे़मे़त्छिङ्—सबाथबा याःम्बक्को मुरा मे़मे़त्तुसिबाहाॽ नु याःम्बक् के़सुःप्पाआङ् नाःम्सिङ्मा के़घोबा ने़प्माङ्बा मनाहाॽ निङ्वाॽफुसाम्बा यहोयादाओ मे़द्ये़॥ 10 खे़ब्याङ् खुने़ॽ थक्मोबाहाॽ यहवे दाङ्बे़ल्ले़ कुहिम्मो के़ये़प्पा दाउद हाङ्ङिल्ले़ कुलाःक्हाॽ नु कुघोहाॽ मे़बिरुसि॥ 11 खे़न् थक्कम्ब्राङ् के़मे़प्पाहाॽ के़रे़क्ले़ खुन्छिॽ आप्फेक् आप्फेक् फे़जुम्भे़या खजुम्घयाहाॽ हुक्को मे़याङ्सिङ्ङाङ् ले़त्ति तोःम्मादे़न्नो नु माङ्हिम् निःत्ताङ् माङ्हिम्मोबा लाङ्गे़त् पिसाङ्लाम् थाङ्गे़त् पिसाङ् थारिक्के हाङ्ङिन् मे़गबुआङ् मे़ये़बे़॥ 12 खे़ब्याङ् यहोयादाःल्ले़ हाङ्ङिल्ले़ कुस्सान् लाःक्कात् लःत्तु, हे़क्क्याङ् खुने़ॽ कुधे़गेःक्को तिच खुःक्तु॥ यहोयादाःल्ले़ माङ्हुप्पोलाम् लिङ्मनाबा लत्छा सक् थिक् खुने़ॽओ तोःन्दु, हे़क्क्याङ् हाङ् पोःक्खे़बा उवा चोगु॥ खे़ङ्हाॽरे़ खुने़ॽ माङ्थोःक्ना मे़बिरुआङ् मनाहाॽरे़ हिप्ला मे़हिप्तु, खे़ब्याङ् अक्खे मे़लॽरे़आङ् मे़अःक्ते़, “हाङ्ङिल्ले़ कुधाःक् चाॽररो॥” अतल्याह हाङ्मे़न् स्ये़ 13 आल्ल अतल्याह हाङ्मे़ल्ले़ थक्कम्ब्राङ् के़मे़प्पाहाॽ नु मनाहाॽ मे़अःक्ते़बा इक्लान् खे़प्सु, खे़ब्याङ् खुने़ॽ यहवे दाङ्बे़ल्ले़ कुहिम्मो के़वाॽबा मनाहाॽओ पे॥ 14 हे़क्क्याङ् खुने़ॽ ओमये़ल्ले़ थिम् कुइसिक् हाङ्ङिन् सित्लाङ्ङिल्ले़ कुबेसाङ् ये़बे़बा निसु॥ सुहाङ्युक्पाहाॽ नु थुत्तुरिःप्पा सादाङ् के़मुःप्पाहाॽ हाङ्ङिल्ले़ कुबेसाङ् मे़ये़बे़, हे़क्क्याङ् लाजेॽओबा के़रे़क् मनाहाॽ थुत्तुरिःप्पा सादाङ् मुःत्नु मे़सःत्ते़र मे़यागे़॥ खे़ब्याङ् अतल्याह हाङ्मे़ल्ले़ कुजाङ्हाॽ थे़ःक्खु, हे़क्क्याङ् अःक्ते़आङ् पाःत्तु, “हाङ्बिफ्युङ् पोःक्खे़! हाङ्बिफ्युङ् पोःक्खे़रो!” 15 निङ्वाॽफुसाम्बा यहोयादाःल्ले़ किप् थिक् किप् थिक् लुप्पोबा थक्मोबाहाॽ अक्खे मे़त्तुसिआङ् इङ्जाङ् पिरुसि, “खे़न् हाङ्मे़न् माङ्हिम् लाःक्कात् लःत्ते़म्मे़ॽ, हे़क्क्याङ् खे़ल्ले़ कुएगाङ् के़बप्पाहाॽ के़रे़क् ताभेःल्ले़ च्ये़प्ते़म् से़रे़म्सिम्मे़ॽ॥” थेआङ्भे़ल्ले़ निङ्वाॽफुसाम्बे़ल्ले़ अक्खे पाःत्तुआङ् वये़, “यहवे दाङ्बे़ल्ले़ कुहिम्मो खे़न् मे़से़रे़म्मिन्ने़ॽ॥” 16 कल्ले़चोगुल्ले़ हाङ्हिम्मो अन्हाॽ लाःप्मादे़न्नो के़रे़ल्ले़ खुने़ॽ मे़दे़म्सु, हे़क्क्याङ् आम्भा खे़प्मोए खे़न् मे़से़रुरो॥ यहोयादाःल्ले़ तोःन्दुबा याःम्बक्हाॽ ( २ साप्मु २३:१६-२१ ) 17 खे़न् एगाङ् यहोयादाःल्ले़ खे़ङ्हाॽ यहवे दाङ्बे़ल्ले़ कुमना मे़बोङ्ल फाॽआङ् यहवे दाङ्बा, हाङ् नु मनाहाॽरे़ खुन्छिॽ लुम्मो माङ्हुप् चोगु॥ खुने़ॽ हाङ्ङिन् नु मनाहाॽरे़ खुन्छिॽ लुम्मोआङ् माङ्हुप् चोगु॥ 18 लाजेॽओबा के़रे़क् मनाहाॽ बाल माङ्हिम्मो मे़बेआङ् खे़न् मे़लुःन्दु मे़देसु॥ खे़ङ्हाॽरे़ खे़प्मोबा ले़त्ति तोःम्मादे़न्हाॽ नु नावाइत्लाहाॽ कुम्जिक्मा मे़जोगु, हे़क्क्याङ् बालरे़ कुयक्याबा मत्ताने़न् ले़त्ति तोःम्मादे़न्हाॽ तगि मे़से़रु॥ खे़ब्याङ् निङ्वाॽफुसाम्बा यहोयादाःल्ले़ यहवे दाङ्बे़ल्ले़ कुहिम्मो लाम्धेत् के़गोबाहाॽ युक्तिङ् चोगुसि॥ 19 खे़ल्ले़ खुने़ॽनु सोरिक् किप् थिक् किप् थिक् लुप्पोबा थक्मोबाहाॽ, करिहाॽ, लाम्धेत् के़गोबाहाॽ नु लाजेॽओबा के़रे़क् मनाहाॽ तारुसिआङ् हाङ्ङिन् इक्कोमा लाम्धेःत्तोलाम् लाङ्घेःक्खुर यहवे दाङ्बे़ल्ले़ कुहिम्मोलाम् हाङ्हिम्मो तारु॥ खे़ब्याङ् हाङ्ङिन् हाङ्हिम्मोबा हाङ्युक्नाओ युङ्सिङ्, 20 हे़क्क्याङ् लाजेॽओबा के़रे़क् मनाहाॽरे़ खुन्छिॽ निङ्वाॽ त्ये़आङ् ये़क्यक्को चिजि ये़म्ये़म् सनारुङ् पोःक्खे़, थेआङ्भे़ल्ले़ अतल्याह हाङ्मे़न् हाङ्हिम्मो ताभेःल्ले़ मे़से़रुआङ् वये़॥ 21 आल्ल योआसे़न् हाङ् पोःक्खे़ल्ले़ खुने़ॽ तङ्बे नुसि के़रे़आङ् वये़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.