२ हाङ् 10 - लिम्बुआहाबरे़ कुस्साहाॽ मे़से़रुसि 1 आल्ल आहाबरे़ कुहिम्सयङ्ङो नुबोङ् कुधिन्दाङ् सायोबोराहाॽ सामरियाबा ये़क्यक्को मे़वये़॥ कल्ले़चोगुल्ले़ येहुःल्ले़ अक्तङ्बा सक्इङ्घङ् साप्पेःत्ताहाॽ साप्तुआङ् सामरिया ये़क्यक्को सुहाङ्युक्पाहाॽ, लाम्लोबाहाॽ नु आहाबरे़ कुस्सा कुएहाॽ के़हिङ्बा के़गुम्बाहाॽ हाक्तुसि॥ खुने़ॽ पाःत्तु, 2 “कन् सक्इङ्घङ्ङिन् के़घोसुम्नुमे़ःन्ने खिनिॽ दाङ्बे़ल्ले़ कुस्साहाॽ खिनिॽनु मे़वाॽबाल्ले़ चोगुल्ले़, हे़क्क्याङ् खिनिॽ अन्लाधाहाॽ नु अन्हाॽ हे़क्क्याङ् यक् के़ने़बा ये़क्यक् नु फे़जुम्भे़या खजुम्घयाहाॽआङ् वाॽबाल्ले़ चोगुल्ले़, 3 खिनिॽ दाङ्बे़ल्ले़ कुस्साहाॽओबा के़रे़क्नुःल्ले़ नुबा नु के़रे़क्नुःल्ले़ सुम्बोधासाबा थिक् सेगे़म्मे़म्मे़ॽआङ् खुने़ॽ कुम्बारे़ कुहाङ्युक्नाओ युक्खे़म्मे़ॽ॥ खे़न् एगाङ् खिनिॽ दाङ्बे़ल्ले़ कुहिम्सयङ्हाॽरे़ लागि ते़न्धङ् चोगे़म्मे़ॽ॥” 4 कर खे़ङ्हाॽ मे़गिसे़ मे़यक्खे़आङ् मे़बाःत्तु, “हाङ् ने़त्छिरे़सा खुने़ॽ मे़दोगुसिन्भे़ल्ले़, आनिगे आक्खेआङ् तक्मा सुक्तुम्बे़बे?” 5 कल्ले़चोगुल्ले़ हाङ्हिम्मोबा सुहाङ्युक्पाहाॽ, ये़क्यक्कोबा पयम् युक्साबाहाॽ, लाम्लोबाहाॽ नु के़हिङ्बा के़गुम्बाहाॽरे़ येहुओ कन् इङ्घङ्ङिन् मे़हाङु मे़देसु—“आनिगे आदाङ्बारे़ के़सेवारोबादिगे़॥ आदाङ्बारे़ आनिगे च्या आग्मे़त् खे़न् आनिगे चोगुम्बे़॥ आनिगे हाःत्ताङ् हाङ् मे़जोगुम्बे़न्॥ आदाङ्बारे़ आत्तिन् पाःन्निन् नुबा के़इःत्तु हाबा खे़न्ने चोगे़ॽओ॥” 6 खे़ब्याङ् येहुःल्ले़ अक्तङ्बा साप्तुआङ् निसिगेक्पा सक्इङ्घङ् हाक्तुसि, “खिनिॽ आङ्गाॽ ले़प्माङ् के़वयिने़भग्र हे़क्क्याङ् आङ्गाॽ आइङ्जाङ्ङिन् के़इःत्तुम् के़नाःत्तुम्ने़भग्र, खिनिॽ दाङ्बे़ल्ले़ कुस्साहाॽरे़ खुन्छिॽ थे़गेःक्हाॽ युरे़म्मे़ॽआङ् हाबा कन् ये़म्मो ताःन्दिक् यिजरेल ये़म्मे़ॽ॥ खे़न् ये़म्मो खिनिॽनु के़वाॽबा के़रे़क् नुबोङ् हाङ्साहाॽ चाहिःन् ये़क्यक्कोबा लाम्लोबाहाॽरे़ मे़हिङ्सु मे़गुम्सुसिआङ् मे़वये़॥” 7 आल्ल खे़न् सक्इङ्घङ्ङिन् खुन्छिॽओ के़रे़, खे़ब्याङ् खे़ङ्हाॽरे़ खे़न् नुबोङ् हाङ्साहाॽ मे़देॽरुसिआङ् मे़से़रुसि॥ खे़ङ्हाॽरे़ कन्हाॽरे़ खुन्छिॽ थे़गेःक्हाॽ साप्लिङ्गेहाॽओ मे़याक्तुआङ् यिजरेलओ येहुन् मे़हाक्तु॥ 8 आल्ल इङ्साबे़न् के़रे़आङ् खे़ल्ले़ येहुन् मे़त्तु, “खे़ङ्हाॽरे़ हाङ्साहाॽरे़ खुन्छिॽ थे़गेःक्हाॽ मे़युरुआङ् वाॽरो॥” खे़ब्याङ् येहुःल्ले़ इङ्जाङ् पिरुसि, “खे़ङ्हाॽ कुलुप् ने़त्छि से़त्ते़म्सिम्मे़ॽआङ् तानाम् थारिक् ये़क्यक्कोबा यम्बा लाम्धेःत्तिल्ले़ कुदगि ने़स्से़म्सिम्मे़ॽ॥” 9 कुदाःक्दिक्मा तानाम् येहुन् लाःक्कात् पे॥ खे़प्मो के़रे़क् मनाहाॽरे़ खुन्छिॽ तगि ये़म्सिङ्ङाङ् खुने़ॽ मे़त्तुसि, “खिनिॽ आप्तिक् थेआङ् होप्॥ आङ्गाॽ आन्दाङ्बे़ल्ले़ कुदक्ले़ङ्वाओ चे़म्भन् के़जोःक्पाआङ् के़से़प्पे़ङ्ग आङ्गाॽएरो॥ कर कन्हाॽ के़रे़क् हाःत्ले़ से़रुसिबे? 10 कल्ले़चोगुल्ले़ आहाबरे़ कुहिम्सयङ्हाॽरे़ खुन्छिॽ तक्ले़ङ्वाओ यहवे दाङ्बे़ल्ले़ पाःत्तुबा पाःन्निन् लत्छाआङ् हने़बा मे़बोङ्ने़न् फाॽआङ् खिनिॽ कुसिङ् निःत्ते़म् युक्खे़म्मे़ॽ॥ यहवे दाङ्बे़ल्ले़ खुने़ॽ कुसे़वारोबा एलियान् लाम्बा पाःत्तुबा इङ्घङ्ङिन् के़रे़बारो॥” 11 खे़ब्याङ् यिजरेलओ के़वाॽबा आहाबरे़ कुहिम्सयङ्ङोबा के़दाङ्बा के़याःक्पाहाॽ, हे़क्क्याङ् खे़ङ्हाॽरे़ खुन्छिॽ यम्बा मनाहाॽ, खे़ङ्हाॽरे़ खुन्छिॽ यम्बा चुम्देङ्हाॽ नु खे़ङ्हाॽरे़ खुन्छिॽ निङ्वाॽफुसाम्बाहाॽ लत्छाआङ् मे़ल्ले़त्छिङ्ङे येहुःल्ले़ खक्पे़त् से़रुसिरो॥ अहज्याह हाङ्ङिल्ले़ कुगाॽइहाॽ मे़से़रुसि 12 खे़न् एगाङ् येहुन् पेआङ् सामरिया ले़प्माङ् थासिङ्॥ मे़ल्लुक्कम्बाहाॽरे़ खुन्छिॽ बेथ-एकेदओ, 13 यहुदाबा हाङ् अहज्याहरे़ कुभा कुगाॽइहाॽ खुने़ॽ तुमुसिआङ् खुने़ॽ खे़ङ्हाॽ सेःन्दोसुसि, “खिनिॽ हाःत्निङ्बे?” खे़ङ्हाॽरे़ खुने़ॽ मे़मे़त्तु, “आनिगे़ग अहज्याहरे़ निःत्ताङ्बा कुगाॽइदिगे़, हे़क्क्याङ् हाङ्ङिल्ले़ कुहिम्सयङ्हाॽ नु पयम् हाङ्मे़ल्ले़ कुहिम्सयङ्हाॽ से़वा मे़प्मासिरे़ लागि आनिगे ये़ॽइगे़बारो॥” 14 येहुःल्ले़ कुमनाहाॽ इङ्जाङ् पिरुसि, “खे़ङ्हाॽ कुहिङ्वे़त् ते़म्से़म्सिम्मे़ॽ!” खे़ब्याङ् खुन्छिॽ खे़ङ्हाॽ कुहिङ्वे़त् मे़दे़म्सुसिआङ् लिबोङ्ङाङ् ने़त्छि ये़म्बित्छाहाॽ बेथ-एकेदबा च्वाःत् याङ्घोःप्मा वबाक्को मे़से़रुसि॥ खुने़ॽ लत्छाआङ् कुहिङ्वे़त् मे़ले़रुसिन्लो॥ आहाबरे़ के़दाङ्बा के़याःक्पा कुगाॽइहाॽ मे़से़रुसि 15 येहुःल्ले़ खे़न् ते़न्निन् ले़रुआङ् एगाङ्, रेकाबरे़ कुस्सा यहोनादाबे़न् खुने़ॽ तुम्मारे़ लागि फे़रे़र पत्छे़बा खुने़ॽ तुमु॥ येहुःल्ले़ खे़न् से़वा मे़त्तुआङ् अक्खे मे़त्तु, “आङ्गाॽ खे़ने़ॽ ले़प्माङ् वाॽआबा कुइसिक् थे खे़ने़ॽ आङ्गाॽ ले़प्माङ् के़वाॽबि?” यहोनादाबरे़ मे़त्तु, “आङ्गाॽ खे़ने़ॽ ले़प्माङ् वाॽआ॥” येहुःल्ले़ मे़त्तु, “हे़क्केने़भग्र, खे़ने़ॽ के़हुक्किन् सन्छे़ पिराङ्ङे़ॽ॥” खे़ल्ले़ कुहुक्किन् सन्छु पिरु, हे़क्क्याङ् येहुःल्ले़ खुने़ॽ ते़म्सुआङ् कुअन्लाधाओ युक्खु॥ 16 येहुःल्ले़ मे़त्तु, “आङ्गाॽनु सोरिक् पित्छि हे़क्क्याङ् यहवे दाङ्बे़ल्ले़ कुलागि आङ्गाॽ आसिक्सम्मे़न् ओमे़त्ते़ॽ॥” खे़ब्याङ् खे़न् खुने़ॽनु सोरिक् कुअन्लाधाओ तेॽरुआङ् पे॥ 17 आल्ल येहुन् सामरिया के़रे़भे़रे़, खे़ब्याङ् यहवे दाङ्बे़ल्ले़ एलियान् मे़त्तुबा इङ्घङ् कुइसिक् आहाबरे़ कुहिम्सयङ्ङो के़दाङ्बा के़याःक्पाहाॽ के़रे़क् खुने़ॽ थ्यःङ् मे़क्खुसिरो॥ बाल माङ्ङिन् से़वा के़मे़प्पाहाॽ मे़से़रुसि 18 खे़ब्याङ् येहुःल्ले़ के़रे़क् मनाहाॽ फुक्खुसिआङ् खे़ङ्हाॽ मे़त्तुसि, “आहाबरे़ग चबे़ःत्छिक्लक् बाल माङ्ङिन् से़वा मे़त्तु॥ कर येहुःल्ले़ आल्लसाङ् साॽरिक् यरिक् खे़न् से़वा मे़त्तुॽ॥ 19 आल्ल बालरे़ के़रे़क् कुमाङ्निङ्वाॽपान् के़बाःप्पाहाॽ, खे़ल्ले़ के़रे़क् कुसे़वारोबहाॽ नु के़रे़क् कुयक्याबाहाॽ उःत्ते़म्सिम्मे़ॽ॥ लत्छाआङ् मे़याःक्ने़ल्ल, थेआङ्भे़ल्ले़ आङ्गाॽ बालरे़ कुलागि लत्छा साॽरिक् यम्बा सिदुङ्जभा तोःन्दुङ्ॽ॥ कुभा ले़रे़ याःक्ते़ने़भग्र खे़न् मे़हिङ्ने़न्॥” कर बालरे़ कुसे़वारोबाहाॽ मे़ङ्मासिरे़ लागि येहुःल्ले़ इङ्ले़क् याःम्बक् चोगुर वये़॥ 20 येहुःल्ले़ मे़त्तुसि, “बालरे़ कुमिङ्सो कुधाःङ्सोओ लत्छा यम्बा चुम्लुङ् उःत्ते़म्सिम्मे़ॽ॥” कल्ले़चोगुल्ले़ खे़ङ्हाॽरे़ खे़न् उवा मे़जोगु॥ 21 खे़ब्याङ् खुने़ॽ के़रे़क् इस्राइलओ इङ्घङ् हाक्तुसि, हे़क्क्याङ् बाले़न् से़वा के़मे़प्पाहाॽ के़रे़क् मे़द्ये़॥ लत्छाआङ् मे़वये़न् मे़याःक्ते़न्॥ थिक् कुसुक्पो नु वेॽसमा कुसुक्पो थारिक् मे़दिम्से़न्ल थारिक् खे़ङ्हाॽ बाल माङ्हिम्मो सधे़क् सधे़क् मे़जुप्से़॥ 22 खे़ब्याङ् येहुःल्ले़ चाङ्वान् ने़मादे़न् हिम्मोबा सुहाङ्युक्पे़न् मे़त्तु, “बालरे़ के़रे़क् कुसे़वारोबाहाॽरे़ मे़जाक्खुबा खुन्छिॽ चाङ्हाॽ फे़त्ते़ॽ॥ खे़ब्याङ् खुने़ॽ खे़ङ्हाॽरे़ खुन्छिॽ लागि चाङ्हाॽ लःत्तु॥” 23 खे़ब्याङ् येहुन् नु रेकाबरे़ कुस्सा यहोनादाबे़न् बाल माङ्हिम्मो लासे़त्छि॥ येहुःल्ले़ बाले़न् से़वा के़मे़प्पाहाॽ मे़त्तुसि, “खिनिॽनु सोरिक् कप्मो यहवे दाङ्बे़ल्ले़ आत्तिन् कुसे़वारोबाहाॽआङ् मे़न्वाॽने़न्ल—बालरे़ कुसे़वारोबाहाॽरक् मे़वाॽर फाॽआङ् खिनिॽ के़रे़क् पिसाङ् ओमे़त्ते़म्मे़ॽआङ् निःन्धो चोगे़म्मे़ॽ॥” 24 खे़ब्याङ् खे़ङ्हाॽ सिदुङ्जभाहाॽ तोःन्छे़ नु मिधिङ्मनादेमनाबा सिदुङ्जभाहाॽ तोःन्छे़ सिगाङ् मे़बे॥ आल्ल येहुःल्ले़ लाःक्कात् मे़ये़प्सुसिबा ये़प्पोङ् मनाहाॽ अक्तङ्बा साम्दिङ् पिरुसिआङ् मुरा मे़त्तुसिआङ् वये़, “आङ्गाॽ खिनिॽ हुक्को लक्पे़न् पिनिङ्बा कन् मनाहाॽओबा कुभा लत्छा मनारक्साङ् आत्तिल्ले़ खे़त्छिङ्मा फाःक्तुॽ, खे़ल्ले़ कुहिङ्मे़ल्ले़ कुले़क्वा खे़न् खे़त्छिङ्मा के़भाःक्पे़न् सिरो॥” 25 येहुःल्ले़ मिधिङ्मनादेमनाबा सिदुङ्जभा तोःन्दु सुरुनुमे़ःन्ने खुने़ॽ लाम्धेत् के़गोबाहाॽ नु सुहाङ्सुक्पाहाॽ अक्खे मे़त्तुसिआङ् इङ्जाङ् पिरुसि, “खिनिॽ पेगे़म्मे़ॽआङ् खे़ङ्हाॽ के़रे़क् से़रे़म्सिम्मे़ॽ, लत्छाआङ् खे़त्छिङ्मा मे़भाःक्ते़म्सिम्मिन्ने़ॽ॥” कल्ले़चोगुल्ले़ लाम्धेत् के़गोबाहाॽ नु सुहाङ्युक्पाहाॽरे़ खे़ङ्हाॽ ताभेःल्ले़ मे़ज्ये़प्तु मे़से़रुसि, हे़क्क्याङ् खे़न् चेहाॽ लाःक्कात् लाप्मे़देसुसि, खे़ब्याङ् माङ्हिम्मोबा सिगाङ्बा माङ्धाःन्नो मे़लासे़॥ 26 खे़ङ्हाॽरे़ बाल माङ्हिम्मो के़ये़प्पा सित्लाङ्ङिन् लाःक्कात् मे़लःत्तुआङ् खे़न् मिमे़धिक्खु मे़देसु॥ 27 खे़ङ्हाॽरे़ बाल माङ् सित्लाङ्ङिन् मे़लुःन्दु हे़क्क्याङ् माङ्हिम्मिन् हत्छे़ हत्छे़ मे़से़सु॥ हे़क्क्याङ् आइन्बा ये़न् थारिक् मनाहाॽरे़ खे़न् हिधाःम्बु मे़जोगुॽ॥ 28 कम्भलॽरिक् येहुःल्ले़ इस्राइलओ बाल से़वा मे़प्मान् नुप्सु॥ 29 हे़क्केसाङ् नाबातरे़ कुस्सा यारोबाम हाङ्ङिल्ले़ बेथेल नु दानबा साम्म्याङ् पित्सात्हाॽ इस्राइले़न् से़वा मे़प्मा पाङ्घुबा लायोहाॽ खुने़ॽ मे़ले़रुन्॥ 30 यहवे दाङ्बे़ल्ले़ येहुन् मे़त्तु, “आङ्गाॽ आनिमो आत्तिन् पाःन्निन् के़लाॽबा चोगे़, खे़न् खे़ने़ॽ के़गे़त्तु, खे़ब्याङ् आङ्गाॽ आनिङ्वाॽओ के़वाॽबा के़रे़क् पाःन्हाॽ खे़ने़ॽ आहाबरे़ कुहिम्सयङ्ङो के़जोगु॥ कल्ले़चोगुल्ले़ खे़ने़ॽ के़धिन्दाङ् सायोबोराहाॽ लिसिगेक्पा थाःक् थे़म्बा इस्राइलबा हाङ्युक्नाओ मे़युङ्ॽ॥” 31 हम्भसाङ् येहुन् के़रे़क् कुनिङ्वाःल्ले़ यहवे दाङ्बा इस्राइलबा निङ्वाॽफुमाङ्ङिल्ले़ कुसाम्योथिम् इङ्जाङ्हाॽ इःप्मा नाःप्मारे़ लागि खुने़ॽ सिङ्सिङ् ये़क्ये़क् मे़लॽरे़न्॥ इस्राइले़न् चोःक्मा पाङ्घुबा यारोबामरे़ कुलायोहाॽलाम् खुने़ॽ मे़नुःक्खे़न्लो॥ येहुन् मासिङ् 32 खे़न् ये़म्मो यहवे दाङ्बे़ल्ले़ इस्राइलरे़ कुलाम्ति कुभे़रे़हाॽ चुक्सा चोःक्मा हेःक्तु॥ 33 यर्दन वहःङ्ङोनु नाङ्गे़न् पिसाङ् गिलादबा के़रे़क् लाजेॽहाॽ (गाद, रुबेन, नु मनस्सेबा लाजेॽ) अर्नोन वहःङ्ङिल्ले़ कुयाओबा अरोएरलाम् गिलाद पोःक्खे़र बासान थारिक् अरामबा हाङ् हजाएलरे़ इस्राइलिहाॽरे़ खुन्छिॽ ते़ङ्गप्हाॽ युक्तुदेॽरुआङ् ने़स्से़॥ 34 येहुःल्ले़ कुहाङ्युक् ये़म्मोबा वेॽ हिन्दोक्हाॽ हे़क्क्याङ् खुने़ॽ चोगुबा के़रे़क् याःम्बक्हाॽ नु खुने़ॽ हुक्काप् चोगुबा पाःन्हाॽ थे खे़न् इस्राइलबा हाङ्हाॽरे़ खुन्छिॽ साप्मुःन्धुम् साप्पन्नो साप्ते़आङ् मे़बत्ने़न्नाङ्बि? 35 येहुन् खुने़ॽ कुसुधे़बा कुदाक्थे़बाहाॽनु सोरिक् तङ्सिङ्से़ पे, हे़क्क्याङ् खुने़ॽ सामरियाओ मे़जिक्खु॥ हे़क्क्याङ् खुने़ॽ कुएगाङ् खुने़ॽ कुस्सा यहोआहाजे़न् हाङ् पोःक्खे़॥ 36 येहुन् इस्राइलबा हाङ् पोःक्खे़आङ् सामरियाओ हाङ्युक् चोगुबा ये़म्मिन् निबोङ्ङाङ् ये़त्छि तङ्बे थारिक् वये़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.