२ साप्मुःन्धुम् 9 - लिम्बुसेबाबा हाङ्मे़न् सोलोमनरे़ कुदुम्से़ फे़न् ( १ हाङ् १०:१-१३ ) 1 सेबाबा हाङ्मे़ल्ले़ सोलोमनरे़ कुमिङ्सो कुधाङ्सोन् खे़प्सु, हे़क्क्याङ् के़साक्पा के़साक्पा पाःन्सेःन्दोहाॽ थाक्तुआङ् सोलोमने़न् कुनिङ्वाॽ साॽमारे़ लागि सेबाबा हाङ्मे़न् यरुसले़ःम्मो थाङे़॥ खुने़ॽ साॽरिक् यरिक् कुदिःक् कुदिःक् मनाहाॽनु सोसोरिक् मारुक्, वे़त्ते़सरे़ साम्म्याङ् नु कुमे़ल्लुङ् के़घिःक्पा मुधिङ्लुङ्हाॽ उमेहाॽ कक् कुःत्तुसिआङ् थाङे़॥ खुने़ॽ सोलोमनरे़ओ थाङे़आङ् खुने़ॽ कुनिङ्वाॽओ के़वाॽबा के़रे़क् पाःन्हाॽ सोलोमने़न् चे़क्तु॥ 2 सोलोमनरे़ खे़ल्ले़ के़रे़क् कुसेःन्दो पाःन्हाॽ नुगप् पिरु॥ नुगप् पिमारे़ लागि आत्तिन् सेःन्दो पाःन्निन्नाङ् सोलोमनरे़ कुलागि के़साक्पा मे़बोःक्खे़न्॥ 3 आल्ल सोलोमनरे़ कुसिक्कुम् निङ्वाॽ, खुने़ॽ चोगुबा हाङ्हिम्मिन्, 4 खुने़ॽ कुजप्ते़न्नोबा कुजाःन्, कब्रिङ् के़युङ्बा खुने़ॽ कुसुहाङ्युक्पाहाॽ, चाङ्वाःन्हाॽरे़ काप्तुसिबा खुने़ॽ कुयाःम्बक् के़जोःक्पा से़वारोबाहाॽ, चे़ल्ले़क्सेॽ सेजःङ्वा के़हाबाहाॽरे़ मे़जाक्खुबा चाङ्हाॽ नु यहवे दाङ्बे़ल्ले़ कुहिम्मो सोलोमनरे़ तोःन्दुबा मिधिङ्मनादेमनाबा वयागे़न् सिदुङ्जभाहाॽ सेबाबा हाङ्मे़ल्ले़ निसु, खे़ब्याङ् खुने़ॽ कुनिङ्वाॽ मये़॥ 5 हाङ्मे़ल्ले़ हाङ्ङिन् मे़त्तु, “आदाङ्बारे़ थोबो के़जोगुबा पाःन्हाॽ नु आदाङ्बारे़ के़सिक्कुम् निङ्वाॽ पाःन्निल्ले़ कुयाःम्बेओ आङ्गाॽ आलाजेॽओ खे़प्सुङ्बा पाःन्हाॽ से़क्खारत्छ॥ 6 कर आङ्गाॽ थाङ्माआङ् आप्फेक् आमिक्किल्ले़ मे़न्निए थारिक् खे़ङ्हाॽरे़ मे़बाःत्तुबा पाःन्निन् नसान् मे़न्जोःक्के वयाङ्॥ से़क्खाए, आदाङ्बारे़ पयम् यम्बा के़सिक्कुम् निङ्वाॽ पाःन्निन् कुभ्रे़ःङ्ङाङ् आङ्गाॽ मे़म्मे़त्ते मे़गत्ताङ्लत्छ॥ आदाङ्बारे़ के़याःम्बेओ आङ्गाॽ खे़प्सुङ्बानुःल्ले़ग आदाङ्बा आत्तातान्ने पयम् यम्बा के़वाॽरत्छ॥ 7 आदाङ्बारे़ के़मनाहाॽ आक्खे़न् मे़नुॽ मे़दाबिला! आदाङ्बारे़ के़दगि थिक्याःन्धक् आदाङ्बारे़ के़याःम्बक्को के़वाॽबा नु आदाङ्बारे़ के़सिक्कुम् निङ्वाॽ कुसिङ् निःप्मा के़घोबा आदाङ्बारे़ कन् के़सुहाङ्युक्पाहाॽ साॽरिक् मुॽइसाबासिरो! 8 आदाङ्बानु कुनिङ्वाॽ के़दाबा यहवे दाङ्बा आदाङ्बारे़ के़निङ्वाॽफुमाङ्ङिल्ले़ कुलागि हाङ्युक् चोःक्से़ आदाङ्बा हाङ् युक्तिङ् के़जोःक्पा कुहाङ्युक्नाओ के़युङ्बा यहवे दाङ्बा आदाङ्बारे़ के़निङ्वाॽफुमाङ्ङिल्ले़ कुनारा पोररो॥ आदाङ्बारे़ के़निङ्वाॽफुमाङ्ङिल्ले़ लुङ्माॽ के़दुक्ते़बाल्ले़ चोगुल्ले़ हे़क्क्याङ् सदादिङ् इस्राइले़न् ने़र फाॽआङ् योधो मे़ल्लॽमनाबा निङ्वाॽ चोगुबाल्ले़ चोगुल्ले़ आदाङ्बारे़ के़वाॽबा खासे़न् के़जोगुर हे़क्क्याङ् साम्योनिमान् आप्फाल्ले़साङ् के़वाॽबा के़जोगुर फाॽआङ् खुने़ॽ आदाङ्बा इस्राइलबा हाङ् के़जोगे़आङ् वाॽ॥” 9 खे़न् एगाङ् हाङ्मे़ल्ले़ सोलोमने़न् १२० तेलेन्त साम्म्याङ्, आत्तातान्ने यरिक् मारुक् नु इमे़ल्लुङ्बा मुधिङ्लुङ्हाॽ पिरु॥ सेबाबा हाङ्मे़ल्ले़ सोलोमन हाङ्ङिन् पिरुबा यारिक् मारुक्हाॽ आभे़ल्ले़आङ् मे़म्बोङ्ङे वये़॥ 10 कन् के़रे़क्नुःल्ले़ वेॽ हेराम नु सोलोमनरे़ खुन्छिॽ से़वारोबाहाॽरे़ ओपिरलाम् साम्म्याङ् मे़धाक्तु॥ खे़ङ्हाॽरे़ तघॽसिङ्हाॽ नु इमे़ल्लुङ्बा मुधिङ्लुङ्हाॽआङ् मे़धाक्तु॥ 11 हाङ्ङिल्ले़ कन् सिङ्हाॽलाम् यहवे दाङ्बे़ल्ले़ कुहिम् नु हाङ्हिम्मोबा नाहाङ्सेःक्हाॽ हे़क्क्याङ् साम्गे़लोबाहाॽरे़ लागि अन्मे नु तुङ्गेहाॽआङ् चोगु॥ हे़क्तङ्बा सामाहाॽ यहुदा लाजेॽओ तगि आभे़ल्ले़आङ् मे़न्निए वये़॥ 12 सेबाबा हाङ्मे़ल्ले़ थाक्तुआङ् तोःन्दुबा थोःक्लाहाॽनुःल्ले़ यरिक् हाङ्मे़ल्ले़ इःत्तुआङ् नाःक्तुबा के़रे़क् पाःन्हाॽ सोलोमन हाङ्ङिल्ले़ खुने़ॽ पिरु॥ खे़ब्याङ् खुने़ॽ से़म्मुॽइ पोःक्खे़आङ् कुगक् के़गुबाहाॽनु थे़ःक्पे़त् कुलाजेॽओ नुःक्खे़आङ् पेरो॥ सोलोमन हाङ्ङिल्ले़ कुयाङ्साकुन्धे ( १ हाङ् १०:१४-२५ ) 13 सोलोमनरे़ओ तङ्बे थक्मा खोसुबा योनु के़धाङ्बा साम्म्याङ्ङिन् ६६६ तेलेन्त योरे़॥ 14 खे़न्नुःल्ले़ वेॽ सामाहाॽ के़लःप्पा के़देॽबा नु के़दाःप्पा ले़ङ्हङ्बाहाॽलाम् मे़भोक्खुबा याङ् लाम्बाआङ् एःङ्याङ् पोगे़॥ अरबि लाजेॽबा के़रे़क् हाङ्हाॽ नु ते़ङ्गप्पोबा चुक्सा हाङ्हाॽरे़आङ् हाङ्ङिल्ले़ कुलागि साम्म्याङ् नु युप्पा मे़दारु॥ 15 थवाःल्ले़ फे़मनाबा किप् ने़त्छि यम्बयम्बा साम्म्याङ् खोहाॽ सोलोमन हाङ्ङिल्ले़ थगु॥ खो थक्मारे़ लागि खो थप्मे थवाःल्ले़ फे़मनाबा किलोग्राम सुम्सिआङ् कुभ्रे़ःङ् साम्म्याङ् लासे़आङ् वये़॥ 16 थवाःल्ले़ फे़मनाबा साम्म्याङ्ङिल्ले़न् ३०० चुजुक्सा खोहाॽआङ् थगु॥ खो थक्मा ३०० साम्म्याङ् यागे़॥ हाङ्ङिल्ले़ ले़बनानबा ताम्भुङ् मे़प्मनाबा हाङ्हिम्मो खे़ङ्हाॽ युक्खु॥ 17 खे़ब्याङ् हाङ्ङिल्ले़ यम्बा हाङ्युक्ना थिक् चोगुआङ् खे़ल्ले़ कुभा कुलक्हाॽ तक्मिबा केःङ् नु इसेःङ्बा साम्म्याङ्ङिल्ले़ सुःप्तु॥ 18 हाङ्युक्नाओ थोःक्सिङ्मा कुधाॽ तुक्सि नाहाङ्सेक् पत्छे़, हे़क्क्याङ् साम्म्याङ्ङिल्ले़न् कुदोॽभेःत् थिक् हाङ्युक्नान्नु मे़गाम्सुआङ् पत्छे़॥ युक्नाःल्ले़ नाहाङ् कत्नाहाङ् हुक् नाःम्मा कुदे़म्सिगेःक् पत्छे़॥ खे़ल्ले़ कुया थक्मा तःक्पे़त् तःक्पे़त् के़ये़प्पा लत्छा लत्छा खिरिङ्बा ये़बे़॥ 19 तुक्सिए नाहाङ्सेःक्हाॽरे़ नाहाङ् कत्नाहाङ् थिक्थिक् लॽरिक् के़रे़क्ले़ थिबोङ्ङाङ् ने़त्छि खिरिङ्बाहाॽ मे़ये़बे़॥ आत्तिन् हाङ्जुम्मिल्ले़ लागिआङ् कन् परिक्ले़न् हाङ्युक्ना आभे़ल्ले़आङ् मे़न्जोःक्के वये़॥ 20 सोलोमनरे़ कुधुङ्मा के़रे़क् चल्लाङ्ना खोर्याहाॽ साम्म्याङ् इसेःङ्बा चोगे़॥ हे़क्क्याङ् ले़बनानबा ताम्भुङ् मे़प्मनाबा हाङ्हिम्मो के़युङ्बा के़रे़क् सामा पुमाहाॽ साम्म्याङ् इसेःङ्बा चोगे़॥ युप्पाःल्ले़न् थेआङ् मे़जोगुबा होःप्ते़, थेआङ्भे़ल्ले़ सोलोमनरे़ कुये़म्मो युप्पाःल्ले़ कुमे़न् सुःल्लिक् वये़॥ 21 हे़रामरे़ कुवाजाःक्पाहाॽनु सोरिक् तर्सिसओ के़बेःक्पा हाङ्ङिल्ले़ कुवालाधा कुलुप् थिक् मे़वये़॥ तङ्बे सुम्सि सुम्सिरे़ थिक्ले़ङ् कन् ले़ङ्हङ्बा वालाधा लुप्हाॽरे़ साम्म्याङ्, युप्पा, तक्मिबा केःङ्, खॽबुहाॽ नु सबाहाॽ मे़युरुआङ् मे़नुःक्खे़ मे़ये़॥ 22 सोलोमन हाङ्ङिन् याङ्साकुन्धे नु सिक्कुम्दिङ् निङ्वाॽओ इक्सादिङ् खाम्बेःक्मोबा के़रे़क् वेॽ हाङ्हाॽनुःल्ले़ थोधोक् वये़॥ 23 हे़क्क्याङ् खुने़ॽ कुनिङ्वाॽओ निङ्वाॽफुमाङ्ङिल्ले़ केःत्तु पिरुबा सिक्कुम्दिङ् निङ्वाॽ खे़म्से़ इक्सादिङ् खाम्बेःक्मोबा के़रे़क् हाङ्हाॽ खुने़ॽओ मे़द्ये़आङ् सुजा नाःक्मा मे़गोःत्तु॥ 24 के़दाबा के़रे़क्ले़ युप्पा नु साम्म्याङ् खप्प्या, चाङ्, खजुम्घया फे़जुम्भे़या हे़क्क्याङ् मारुक्, अन् नु अन्योक्हाॽ तङ्बे थक्मा हुक्वा मे़दारुआङ् मे़द्ये़॥ 25 सोलोमनरे़ कुअन् नु कअन्लाधाहाॽरे़ लागि ४,००० अन्ये़प्नाहाॽ ने़स्से़, खम्भ्याङ् खुने़ॽ १२,००० कुअन्हाॽ मे़वये़॥ खे़ङ्हाॽओ कुभाग खुने़ॽ अन्लाधा ये़म्मा ये़क्यक्हाॽओ नु वेॽहाॽ खुने़ॽनुए यरुसले़म्मो ये़प्सुसि॥ 26 खुने़ॽ युफ्रेतिस वहःङ्ङाङ् कत्ना पलिस्तिहाॽरे़ खुन्छिॽ लाजेॽ नु मिस्र लाजेॽबा इःन्दोओ थारिक्के के़रे़क् हाङ्हाॽओ युक् चोगुआङ् ने़स्से़॥ 27 खुने़ॽ यरुसले़ःम्मो युप्पान् लुङ् यारिक् नु साम्माङ्सिङ्हाॽ कोःक्माहाॽओबा ताम्भुङ्बा पःत्छेॽबुङ्हाॽ यारिक् यरिक् लुप्सु॥ 28 सोलोमनरे़ कुअन्हाॽग मिस्र लाजेॽ नु वेॽ के़रे़क् लाजेॽहाॽलाम् मे़दारुसिबाहाॽ मे़वये़रो॥ सोलोमनरे़ कुमासिङ्मा पान् ( १ हाङ् ११:४१-४३ ) 29 सोलोमनरे़ कुहाङ्युक् ये़म्मोबा वेॽ हिन्दोक्हाॽ कुहेःक्सिङ्माआङ्धो कुनुप्मा थारिक्के माङ्निङ्वाॽपान् के़बाःप्पा नातानरे़ कुसाप्मुःन्धुम्मो, हे़क्क्याङ् सिलोबा अहियाहरे़ पाःत्तुबा माङ्निङ्वाॽपान्नो, नाबातरे़ कुस्सा यारोबामरे़ कुयाःम्बेओ नुथुम्या के़इबा इद्दोरे़ कुसुफोओबा साप्पन्नो थे पोधक् पोःक्खे़आङ् मे़बत्ने़न्नाङ्बि? 30 सोलोमनरे़ यरुसले़ःम्मो के़रे़क् इस्राइलिहाॽओ लिबोङ् तङ्बे थारिक् हाङ्युक् चोगु॥ 31 खे़न् एगाङ् खुने़ॽ कुसुधे़बा कुदाक्थे़बाहाॽनु तङ्सिङ्से़ पे, हे़क्क्याङ् खुने़ॽ कुम्बा दाउदरे़ कुये़क्यक्को मे़जिक्खु॥ खुने़ॽ कुएगाङ् कुस्सा रहबामे़न् हाङ् पोःक्खे़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.