२ साप्मुःन्धुम् 8 - लिम्बुसोलोमनरे़ चोगुबा याःम्बक्हाॽ ( १ हाङ् ९:१०-२८ ) 1 यहवे दाङ्बे़ल्ले़ कुहिम्मिन् नु सोलोमनरे़ आप्फेक् कुहाङ्हिम्मिन् चोःक्मा निबोङ् तङ्बे थरु॥ 2 हे़रामरे़ खुने़ॽ पिरुबा ये़क्यक्हाॽ सोलोमनरे़ याम्मो चोगुआङ् खे़ङ्हाॽओ खुने़ॽ इस्राइलिहाॽ युक्खुसि॥ 3 खे़ब्याङ् सोलोमने़न् हमात-सोबा पेआङ् खे़न् हुक्काप् चोगु॥ 4 हे़क्क्याङ् मुरे़क् खारे़क् थेआङ् के़होप्पादे़न्नो तदमोर ये़क्यक्किन् चोगु॥ हे़क्क्याङ् हमात ते़ङ्गप्पो चाधाःङ् युङ्मा के़रे़क् ये़क्यक्हाॽ चोगु॥ 5 खुने़ॽ थोसमा नु योसमा बेथ-होरोनओ कब्रिङ् लुङ्धाक् से़त्तु, हे़क्क्याङ् कुए़प्मा के़बप्पा यम्बा लाम्धेःत्हाॽ चोगुआङ् से़ःप्सिङ्मादे़न् ये़क्यक्हाॽ चोगु॥ 6 खुने़ॽ बालात नु खे़प्मोबा चाधाःङ् युङ्मा के़रे़क् ये़क्यक्हाॽ, हे़क्क्याङ् खुने़ॽ कुअन्लाधाहाॽ नु अन्हाॽरे़ के़रे़क् पाङ्जुम्हाॽ चोगु॥ यरुसले़मओ, ले़बनानओ नु खुने़ॽ युक् चोगुबा के़रे़क् कुलाजेॽ कुले़ःम् खुने़ॽ निङ्वाॽ चोगुबा कुइसिक् ये़क्यक्हाॽ चोगु॥ 7 लाजेॽओ आल्लसाङ् इस्राइल मेःम्बा मनाहाॽ मे़युङे़, खे़ङ्हाॽग हित्ति, एमोरि, परिज्जि, हिब्बि नु यबुसिहाॽ मे़वये़॥ 8 लाजेॽओ के़वाॽबा खे़ङ्हाॽरे़ खुन्छिॽ थिन्दाङ् सायोबोराहाॽ, इस्राइलिहाॽरे़ मे़म्मे़ङ्सिङ्ङे मे़वये़, सोलोमनरे़ खे़ङ्हाॽ योःग्बा याःम्बक्को फत्छुसि, हे़क्क्याङ् खे़ङ्हाॽ आइन्बा ये़न् थारिक् हे़क्तङ्बाए मे़वाॽ॥ 9 कर सोलोमनरे़ आत्तिन् इस्राइलिहाॽआङ् खुने़ॽ कुहाङ् याःम्बक्को याःम्बक् चोःक्मा मे़बाङ्घुसिन्॥ खे़ङ्हाॽ थक्सुबा नु खुने़ॽ कुधक्पे़बाहाॽओ थक्मोबा हे़क्क्याङ् अन्लाधा नु अन्लाधा के़लोङ्बाहाॽरे़ खुन्छिॽ थक्मोबा मे़वये़॥ 10 हे़क्क्याङ् खे़ङ्हाॽओ सोलोमन हाङ्ङिल्ले़ २५० मनाहाॽ मना ओगे़मे़प्पा युक्तिङ् चोगुसि॥ 11 सोलोमनरे़ फारोल्ले़ कुस्सा मे़न्छुमान् दाउदरे़ कुये़क्यक्कोलाम् खे़ल्ले़ कुलागि मे़जोगुबा हिम्मो तारु॥ सोलोमनरे़ पाःत्तु, “इस्राइलबा दाउद हाङ्ङिल्ले़ कुहिम्मो आङ्गाॽ आहिम्सामे़न् मे़युङ्ने़न्, थेआङ्भे़ल्ले़ यहवे दाङ्बे़ल्ले़ कुमाङ्हुप् सन्दोक् के़लाःप्पा ते़न्हाॽ सेसेबा चोक्॥” 12 सोलोमनरे़ माङ्हिम्मोबा आःम्भोॽ तगाङ् ले़प्माङ् खुने़ॽ चोगुबा ले़त्ति तोःम्मादे़न्नो यहवे दाङ्बे़ल्ले़ कुलागि मिधिङ्मनादेमनाबा वयागे़न् सिदुङ्जभा तोःम्मा याःम्बक् चोगु॥ 13 मोसाःल्ले़ कुइङ्जाङ् कुइसिक् सबाथ, लादुप् नु तङ्बे थक्मा सुम्ले़ङ् सिदुङ्जभा तोमा के़बोङ्बा तङ्नाम्हाॽ, के़भङ्बा सिदाॽ मे़न्याक्केबा खरे़ःङ् चामा तङ्नाम्, ये़त्नाम्बा तङ्नाम् नु साःङ्गाहिम्मोबा तङ्नाम्मो थिक्याःन्धक् तोःम्मा के़बोङ्बा कुइसिक् मिधिङ्मनादेमनाबा वयागे़न् सिदुङ्जभाहाॽ खुने़ॽ तोःन्दु॥ 14 पानुदिङ् कुम्बा दाउदरे़ कुसाम्योथिम् कुइसिक् पत्छे़आङ् थिक्याःन्धक् चाहागे़जोःक्पा याःम्बक् कुइसिक् निङ्वाॽफुसाम्बा सुम्हाॽ माङ्से़वा चोःक्मा याःम्बक्ले़ लागि हे़क्क्याङ् ले़बिहाॽ निङ्वाॽफुमाङ्ङिल्ले़ कुनारा फोमा साम्लो साम्मे़प्मा नु निङ्वाॽफुसाम्बाहाॽरे़ खुन्छिॽ याःम्बक्को फाॽमासिरे़ लागि खुने़ॽ युक्तिङ् चोगुसि॥ लाम्धेत् के़गोबाहाॽ खुन्छिॽ सुम्सुम् कुइसिक् के़रे़क् यम्बा लाम्धेःत्तो ये़प्मारे़ लागि खुने़ॽ युक्तिङ् चोगुसि, थेआङ्भे़ल्ले़ निङ्वाॽफुमाङ्ङिल्ले़ कुमना दाउदरे़ चोगुबा कुइङ्जाङ्ङिन् अक्तङ्बाए वये़॥ 15 हे़क्क्याङ् हाङ् याङ्सुम्मिन् वेॽ पाःन्हाॽरे़ कुयाःम्बेओ दाउदरे़ पिरुसिबा इङ्जाङ्ङिन् निङ्वाॽफुसाम्बाहाॽ नु ले़बिहाॽरे़ निङ्वाॽ मे़म्भेःत्छुन्॥ 16 यहवे दाङ्बे़ल्ले़ कुहिम्मिल्ले़ कुबुङ् मे़युक्खुआङ्धो खे़न् मे़न्छुःत्ते थारिक् सोलोमनरे़ के़रे़क् कुयाःम्बक्हाॽ मे़जोगुर मे़बत्छे़॥ कम्भलॽरिक् यहवे दाङ्बे़ल्ले़ कुहिम्मिन् मे़जोगुआङ् वये़॥ 17 खे़न् एगाङ् सोलोमने़न् एदोमरे़ कुयाओ के़ने़बा एस्योन-गेबेर नु एलातओ पे॥ 18 हे़क्क्याङ् हे़रामरे़ कुसुहाङ्युक्पाहाॽरे़ खुन्छिॽ युक्को के़वाॽबा वालाधाहाॽ नु के़ले़बा वाजाःक्पाहाॽ पाङ्घु तासुसि॥ खम्भ्याङ् कन्हाॽ सोलोमनरे़ कुसे़वारोबाहाॽनु सोरिक् ओपिरओ मे़बेआङ् १५० तेलेन्त साम्म्याङ् मे़दारुआङ् सोलोमन हाङ्ङिन् मे़बिरुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.