२ साप्मुःन्धुम् 7 - लिम्बुमाङ्हिम्मिन् मे़दोन्दु ( १ हाङ् ८:६२-६६ ) 1 आल्ल सोलोमनरे़ कन् पेलिगे़न् तुवान् चोगुसुरुल्ले़ साङ्ग्राम्पेदाङ्लाम् मि थ्ये़, हे़क्क्याङ् मिःल्ले़ मिधिङ्मनादेमनाबा वयागे़न् सिदुङ्जभान् नु वेॽ सिदुङ्जभाहाॽ थ्यःङ् मिधिक्खुदेसुआङ् यहवे दाङ्बे़ल्ले़ कुमिमिदिङ्ङिल्ले़ माङ्हिम्मिन् तिम्से़॥ 2 यहवे दाङ्बे़ल्ले़ कुमिमिदिङ्ङिल्ले़ माङ्हिम्मिन् तिम्से़बाल्ले़ चोगुल्ले़ निङ्वाॽफुसाम्बाहाॽ सिगाङ् लाःप्मा मे़न्छुक्ते़न्॥ 3 मि थ्ये़आङ् पत्छे़बा नु यहवे दाङ्बे़ल्ले़ कुमिमिदिङ्ङिन् माङ्हिम्मो लासे़आङ् पत्छे़बा आल्ल के़रे़क् इस्राइलिहाॽरे़ मे़निसुल्ले़ लुङ् फे़मनाबा आःम्भोॽओ खे़ङ्हाॽ खाम्बाङ्ङो थारिक् साबन् हबत् मे़भन्छिङ् हे़क्क्याङ् अक्खे मे़बाःत्तुआङ् यहवे दाङ्बे़न् नुगे़न् मे़बिरुरो, “यहवे दाङ्बे़न् के़नुॽबा चोक्लो, थेआङ्भे़ल्ले़ खुने़ॽ कुमिःम्जिन् सदादिङ् वाॽरो॥” 4 खे़ब्याङ् हाङ्ङिन् नु के़रे़क् मनाहाॽरे़ यहवे दाङ्बे़ल्ले़ कुदगि वयागे़न् सिदुङ्जभाहाॽ मे़दोन्दु॥ 5 सोलोमन हाङ्ङिल्ले़ २२,००० से़गम्बाहाॽ नु १,२०,००० मे़ल्लुक् मे़ःन्दाहाॽ वयागे़न् सिदुङ्जभा तोःन्दुसि॥ हाङ्ङिन् नु के़रे़क् मनाहाॽरे़ कम्भलॽरिक् निङ्वाॽफुमाङ्ङिल्ले़ कुहिम्मिन् मे़दोन्दु॥ 6 निङ्वाॽफुसाम्बाहाॽ नु ले़बिहाॽआङ् निःन्धो के़बोङ्बादे़न्नो मे़ये़म्सिङ्, हे़क्क्याङ् दाउद हाङ्ङिल्ले़ यहवे दाङ्बे़ल्ले़ कुलागि से़वासाम्लो साम्मे़प्मा नु नुगे़न् पिमारे़ लागि खुने़ॽ चोगुबा मुक्लाहाॽ मे़याङ्सिङ्ङाङ् मे़मुक्सु हे़क्क्याङ् कम्भलॽरिक् यहवे दाङ्बे़ल्ले़ कुनारा फोसुरो, “खुने़ॽ लुङ्माॽ आदुक्तुक्पा कुमिःम्जिन् सदादिङ् वाॽरो॥” ले़बिहाॽरे़ खुन्छिॽ सामाहाॽ मे़याङ्सिङ्ङाङ् सादाङ्हाॽ के़मुःप्पा निङ्वाॽफुसाम्बाहाॽरे़ खुन्छिॽ तगि मे़ये़म्सिङ्॥ खे़न् ये़म्मो के़रे़क् इस्राइलिहाॽ खे़प्मो मे़ये़बे़॥ 7 खे़न् एगाङ् सोलोमनरे़ यहवे दाङ्बे़ल्ले़ कुहिम् तगिबा लक्खुम् लुम्मोबा लक्किन् सेसे चोगु॥ खे़प्मो खुने़ॽ मिधिङ्मनादेमनाबा वयागे़न् सिदुङ्जभाहाॽ नु तङ्जुम् वयागे़न् सिदुङ्जभाहाॽरे़ कुसोत् लक्हाॽ तोःन्दु, थेआङ्भे़ल्ले़ खुने़ॽ चोगुबा कासाःल्ले़न् ले़त्ति तोःम्मादे़न्नो मिधिङ्मनादेमनाबा वयागे़न् सिदुङ्जभा, पोगुगे़न् कुजा नु कुसोःत्तिल्ले़ कुलक्हाॽ मे़हत्तुन्॥ 8 कम्भलॽरिक् सोलोमन हे़क्क्याङ् खुने़ॽनु के़वाॽबा के़रे़क् इस्राइलिहाॽ, ले़बो-हमातलाम् मिस्रबा वहःङ् थारिक्पा लत्छा यम्बा सङ्जुम्भोहाॽरे़ खे़न् ये़म्मो नुसि ये़न् थारिक् तङ्नाम् मे़दोसुर मे़वये़॥ 9 ये़त्छिगेक्पा ये़न्नो खे़ङ्हाॽ चुम्लुङ् मे़जोगे़, थेआङ्भे़ल्ले़ खे़ङ्हाॽरे़ ले़त्ति तोःम्मा माङ्से़वा याःम्बक्किन् नुसि ये़न् थारिक् नु तङ्नाम्मिन् आल्लसाङ् नुसि ये़न् थारिक् मे़दोसुआङ् वये़॥ 10 नुसिगेक्पा लाओबा निबोङ्ङाङ् सुम्सिगेक्पा ये़न्नो सोलोमनरे़ मनाहाॽ खुन्छिॽ आप्फेक् आप्फेक् हिम्मो पेःक्मारे़ लागि से़म्मुइ पिरुसि, हे़क्क्याङ् यहवे दाङ्बे़ल्ले़ दाउदे़न् नु सोलोमने़न् खम्भ्याङ् खुने़ॽ कुमना इस्राइलिहाॽ पिरुसिबा के़रे़क् नुॽमादामा ये़न्निल्ले़ चोगुल्ले़ खे़ङ्हाॽ खुन्छिॽ निङ्वाॽ त्ये़आङ् मे़सःत्ते़र मे़बेरो॥ सोलोमन हाङ्ङिल्ले़ याम्मो सुफो निसुॽ ( १ हाङ् ९:१-९ ) 11 आल्ल सोलोमनरे़ यहवे दाङ्बे़ल्ले़ कुहिम्मिन् नु हाङ्हिम्मिन् चोगुसुरुल्ले़ माङ्हिम्मिन् नु खुने़ॽ कुहिम्मिल्ले़ लागि निङ्सेक् चोगुबा के़रे़क् पाःन्हाॽआङ् कुलिङ्दो के़रे़र चोगुसुरु॥ 12 खे़ब्याङ् यहवे दाङ्बे़न् से़न्दिक् सोलोमनरे़ओ ओःन्धाक्सिङ्ङाङ् अक्खे मे़त्तुरो— “आङ्गाॽ खे़ने़ॽ के़बेलिन् खे़प्सुङ्, हे़क्क्याङ् कन् ते़न्निन् आङ्गाॽ आलागि वयागे़न् सिदुङ्जभा तोःम्मादे़न् सेगुङ्॥ 13 “आल्ल आङ्गाॽ ताङ्साङ्बे़न् सुबुङ्ङाङ् वहित् मे़धाने़न्निल्ले़, इग्र लाजेन् मे़ङ्मा फाॽआङ् निःङ्घुक्वाहाॽ इङ्जाङ् पिरुङ्सिङ्ङिल्ले़, किग्र आङ्गाॽ आमनाहाॽओ माङ्दुक्मा पाङ्घुङ् तासुङ्ङिल्ले़, 14 आप्फेक् आमिङ् के़बाःप्पा आङ्गाॽ आमनाहाॽरे़ चुङ्जिगे़न् पेलि मे़भाक्का, हे़क्क्याङ् आङ्गाॽ मे़गोःत्ताआङ् खुन्छिॽ फे़न्याःम्बक्लाम् मे़नुःङ्ने़भग्र आङ्गाॽ साङ्ग्राम्पेदाङ्लाम् खे़ङ्हाॽरे़ खुन्छिॽ पेलिगे़न् तुवान् खे़प्सुङ्ॽ, खम्भ्याङ् खे़ङ्हाॽरे़ खुन्छिॽ लायोन् ले़प्मि पिरुङ्सिङ्ङाङ् खुन्छिॽ लाजेन् नुॽदार चोगुङ्ॽ॥ 15 आल्ल कन् ते़न्नो के़जोगुम्बा पेलिगे़न् तुवान् नुरिक्काङ् खे़म्मारे़ लागि आङ्गाॽ आने़क्खोॽबाहाॽ नु आमिक्हाॽ हङ् मे़त्तुङ्ॽ॥ 16 आङ्गाॽ आमिङ्ङिन् खे़प्मो सदादिङ् वाॽमारे़ लागि आङ्गाॽ कन् माङ्हिम्मिन् सेगुङ्ङाङ् युङ्ॽ, हे़क्क्याङ् खे़न् आङ्गाॽ सेसे चोगुङ्ङाङ् युङ्ॽ॥ आङ्गाॽ आमिक्सान् नु आङ्गाॽ आनिङ्वान् आभे़ल्ले़साङ् खे़प्मो वाॽरो॥ 17 “आङ्गाॽ खे़ने़ॽ पिने़बा के़रे़क् इङ्जाङ्हाॽ के़इःत्तु के़नाःत्तुर हे़क्क्याङ् साम्योथिम्हाॽ के़नाःत्तु के़दिम्दुर के़म्बा दाउदे़न् आङ्गाॽ आनिमो लाङ्घेगे़बा कुइसिक् खे़ने़ॽ लाङ्गे़घेःक्नेग्र, खे़ने़ॽ के़हाङ्युक्नान् योधो मे़ल्लॽमनाबा चोगुङ्ॽ॥ 18 खे़ने़ॽ के़म्बा दाउदे़न् माङ्हुप्लाम् अक्खे मे़त्तुङ्ङाङ् वयाङ्बा कुइसिक्, ‘इस्राइलओ हाङ्युक् चोःक्मारे़ लागि खे़ने़ॽ लत्छा मनारे़आङ् के़न्हाप्ने़न्ॽ॥’ 19 “कर आङ्गाॽ खिनिॽ पिनिङ्बा आङ्गाॽ आसाम्यो थिम्हाॽ नु आङ्गाॽ आइङ्जाङ्हाॽ के़न्नाःत्तुम्मिन्नाङ् खे़ङ्हाॽ के़ले़रुम् के़देसुम् हे़क्क्याङ् के़बेगिआङ् वेॽ माङ्हाॽ से़वा के़मे़त्तुम्सिम्माङ् खे़ङ्हाॽ माङ्से़वा के़मे़त्तुम्सिम्ने़भग्र, 20 आङ्गाॽ खे़निॽ पिनिङ्बा आलाजेॽओलाम् आङ्गाॽ इस्राइले़न् कुबुङ् थे़र्ले़ हाॽयाक् आःक्खुङ्देसुङ्ॽ हे़क्क्याङ् आङ्गाॽ आमिङ्ङिल्ले़ लागि सेसे चोगुङ्बा कन् माङ्हिम्मिन् नाॽरुङ्ॽ॥ के़रे़क् मे़न्छाम् सुवाङ्हाॽरे़ खुन्छिॽ लुम्मो खे़न् लत्छा चे़ॽया इङ्दो मे़प्मा नु कुनामे़न्छाॽ मे़प्मा चाहाक् चोगुङ्लो॥ 21 कम्भलॽरिक् कन् माङ्हिम्मिन् आल्लो कुहाङ्वा कुमाङ्वा के़याक्पा चोःक्साङ् के़बेःक्पा के़दाबा के़रे़क् मनाहाॽरे़ कन् मे़निसुॽ हे़क्क्याङ् खुन्छिॽ निङ्ले़ॽले़ॽ लॽआङ् अक्खे मे़लॽर पान् सेःन्दो मे़जोगुॽ, ‘यहवे दाङ्बे़ल्ले़ थेआङ् कन् लाजेन् हे़क्क्याङ् कन् माङ्हिम्मिन्नु अक्तङ्बा याःम्बक् चोगुबाबे?’ 22 मनाहाॽरे़ अक्तङ्बा नुगप् मे़बिरुसिॽ, ‘थेआङ्भे़ल्ले़ खे़ङ्हाॽ मिस्र लाजेॽलाम् के़लःप्पा के़भे़प्पा यहवे दाङ्बा खे़ङ्हाॽरे़ खुन्छिॽ पाधे़बाहाॽरे़ खुन्छिॽ निङ्वाॽफुमाङ्ङिन् खे़ङ्हाॽरे़ मे़नाॽरुआङ् वाॽ, हे़क्क्याङ् वेॽ माङ्हाॽ मे़दिम्दु मे़नाःत्तुसिआङ् माङ्से़वा मे़मे़त्तुसिर मे़हे़प्तुसिर वाॽ॥ कल्ले़चोगुल्ले़ यहवे दाङ्बे़ल्ले़ कन् के़रे़क् तुक्खे लाक्खेहाॽ खे़ङ्हाॽरे़ खुन्छिॽ सम्धाङ् तारुबारो॥’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.