२ साप्मुःन्धुम् 6 - लिम्बुसोलोमनरे़ कुउवा ( १ हाङ् ८:१२-२१ ) 1 खे़ब्याङ् सोलोमनरे़ पाःत्तु, “माक्स्दिःङ्ग्याःप्पा खाॽमिःप्पो आङ्गाॽ याङ्धोःक्का फाॽआङ् यहवे दाङ्बे़ल्ले़ पाःत्तुआङ् वाॽ॥ 2 आदाङ्बा सदादिङ् आभे़ल्ले़साङ् याङ्धोःक्मारे़ लागि आङ्गाॽ कप्मो आदाङ्बारे़ के़लागि लत्छा के़याङ्धोःक्मादे़न् लत्छा माङ्हिम् थिक् चोगुङ्ङाङ् युङ्॥” 3 इस्राइलबा के़रे़क् सङ्जुम्भोबा मनाहाॽ मे़ये़बे़ मे़गरे़ल्ले़ सोलोमन हाङ्ङिन् खे़ङ्हाॽ ले़प्माङ् हिसिङ्, हे़क्क्याङ् खे़ङ्हाॽ हाङ्वागे़न् मुॽइसाम् पिरुसि॥ 4 खे़ब्याङ् खुने़ॽ अक्खे पाःत्तुरो— “यहवे दाङ्बा इस्राइलबा निङ्वाॽफुमाङ्ङिल्ले़ कुनारा पोररो, आङ्गाॽ पानुदिङ् आम्बा दाउदे़न्नु खुने़ॽ आप्फेक् कुम्ब्राःल्ले़ पाःत्तुबा माङ्हुप्पिन् आप्फेक् कुहुक्किल्ले़ के़त्तुआङ् वाॽरो, थेआङ्भे़ल्ले़ खुने़ॽ अक्खे पाःत्तु, 5 ‘आङ्गाॽ आमनाहाॽ मिस्र लाजेॽलाम् लःत्तुङ् फे़त्तुङ्सिङ्बा ये़न्नाङ्धो आल्लो थारिक् लत्छा हिम्मो इस्राइलबा के़रे़क् थाःक्हाॽरे़ खुन्छिॽ आत्तिन् ये़क्यक्कोआङ् आङ्गाॽ आमिङ् पोङ्मारे़ लागि माङ्हिम् थिक् चोःक्मा फाॽआङ् सेगुङ्बा होप्, हे़क्क्याङ् आङ्गाॽ आमना इस्राइलिहाॽओ युक् चोःक्मारे़ लागि लाम्लोबा पोङ्मारे़ लागि कुभा मना आत्तिन्नाङ् सेःन्दुङ्बा होप्॥ 6 कर खे़प्मो आङ्गाॽ आमिङ् वाॽमारे़ लागि आङ्गाॽ आल्ल यरुसले़ःम्मिन्ने सेगुङ्ङाङ् ने़रो, हे़क्क्याङ् आङ्गाॽ आमना इस्राइलिहाॽओ युक् चोःक्मारे़ लागि आङ्गाॽ दाउदे़न्ने सेगुङ्ङाङ् वाॽ॥’ 7 “यहवे दाङ्बा इस्राइलबा निङ्वाॽफुमाङ्ङिल्ले़ कुमिङ्ङिल्ले़ लागि माङ्हिम् थिक् चोःक्मा निङ्वाॽ आङ्गाॽ आम्बा दाउदरे़ कुसिक्लुङ्मो वये़॥ 8 कर यहवे दाङ्बे़ल्ले़ आम्बा दाउदे़न् मे़त्तु, ‘आङ्गाॽ आमिङ्ङिल्ले़ लागि माङ्हिम् थिक् चोःक्मारे़ लागि खे़ने़ॽ के़सिक्लुङ्मो के़इःत्तुबान् नुबाए चोक्॥ 9 हे़क्केसाङ् कन् माङ्हिम्मिन् खे़ने़ॽ के़न्जोगुन्ॽ, कर खे़ने़ॽलाम् सागे़वाःन्छिङ्बा खे़ने़ॽ के़स्साःल्ले़ए आङ्गाॽ आमिङ्ले़ लागि खे़न् माङ्हिम्मिन् चोगुॽ॥’ 10 “यहवे दाङ्बे़ल्ले़ आल्ल खे़न् माङ्हुप्पिन् के़त्तुआङ् वाॽ॥ यहवे दाङ्बे़ल्ले़ माङ्हुप् चोगुबा कुइसिक् आङ्गाॽ आम्बा दाउदरे़ कुले़क्वाओ आङ्गाॽ हाङ् पोःक्खाङ्ङाङ् वाॽ, हे़क्क्याङ् इस्राइलबा हाङ्युक्नाओ आङ्गाॽ युङ्ङागन्ना॥ खे़ब्याङ् यहवे दाङ्बा इस्राइलबा निङ्वाॽफुमाङ्ङिल्ले़ कुमिङ्ङिल्ले़ लागि आङ्गाॽ कन् माङ्हिम्मिन् चोगुङ्ङाङ् युङ्॥ 11 खुने़ॽ इस्राइलिहाॽनु चोगुबा यहवे दाङ्बे़ल्ले़ कुमाङ्हुप् सन्दोक्किन् आङ्गाॽ खे़प्मो युक्खुङ्ङाङ् युङ्लो॥” सोलोमनरे़ कुबेलि ( १ हाङ् ८:२२-५३ ) 12 खे़ब्याङ् यहवे दाङ्बाओ ले़त्ति तोःम्मादे़न्निल्ले़ कुदगि के़रे़क् इस्राइलबा सङ्जुम्भोःल्ले़ खुन्छिॽ तगि यहवे दाङ्बाङ्बाओ ले़त्ति तोःम्मादे़न् तगि ये़म्सिङ्ङाङ् सोलोमनरे़ कुहुक्हाॽ थाःङ् फोःक्खु॥ 13 खुने़ॽ हुक्सिक् ङासि कुलाम्ति केःम्बा, हुक्सिक् ङासि कुभे़रे़ नु हुक्सिक् सुम्सि कुलिङ्गे़न् केःम्बा कासाःल्ले़न् चन्जम्बादे़न् थिक् चोगु हे़क्क्याङ् यम्बा लक्खुम्मिल्ले़ कुलुम्मो खे़न् ये़प्सुआङ् ये़बे़॥ खुने़ॽ खे़ल्ले़ कुसम्धाङ् थोःक्सिङ्ङाङ् इस्राइलबा के़रे़क् सङ्जुम्भो मे़वये़बादे़न्नो थुङ्बो चःत्लाङ् युङ्सिङ्, हे़क्क्याङ् खुने़ॽ कुहुक्हाॽ थाःङ् फोःक्खु॥ 14 खे़ब्याङ् खुने़ॽ अक्खे पाःत्तुरो— “यहवे दाङ्बा इस्राइलबा निङ्वाॽफुमाङ्ङे, खुन्छिॽ के़रे़क् निङ्वाःल्ले़ आदाङ्बारे़ के़लाम्मो चक्मे़ल्लॽए के़वाॽबा से़वारोबाहाॽनु के़मिःम्जिओ माङ्हुप् के़जोःक्पा आदाङ्बा हे़क्तङ्बा वेॽ निङ्वाॽफुमाङ् साङ्ग्राम्पेदाङ् नु इक्सादिङ् खाम्बेःक्मो हाःत्ताङ् होप्॥ 15 आदाङ्बारे़ के़से़वारोबा आङ्गाॽ पानुदिङ् आम्बा दाउदे़न्नु के़जोगुबा के़माङ्हुप्पिन् के़गे़त्तुआङ् वाॽ॥ आइन् पोःक्खे़आङ् वाॽबा कुइसिक् आप्फेक् के़म्ब्राःल्ले़ आदाङ्बारे़ माङ्हुप् के़जोगुआङ् आप्फेक् के़हुक्किल्ले़ खे़न् के़गे़त्तुबारो॥” 16 “आल्ल यहवे दाङ्बा इस्राइलबा निङ्वाॽफुमाङ्ङे, आङ्गाॽ पानुदिङ् आम्बा के़से़वारोबा दाउदे़न्नु के़जोगुबा कन् माङ्हुप्पिन् के़त्ते़ॽओ, आदाङ्बारे़ अक्खे के़बाःत्तु, ‘खे़ने़ॽ लाङ्गे़घेःक्पा कुइसिक् खे़ने़ॽ के़स्साहाॽ खुन्छिॽ लाम्हाॽओ सिङ्सिङ् ये़क्ये़क् लाङ्मे़घेःक्काङ् आङ्गाॽ आसाम्यो थिम्हाॽ मे़इःत्तु मे़नाःत्तुने़भग्ररक्, इस्राइलबा हाङ्युक्नाओ युङ्मारे़ लागि आभे़ल्ले़आङ् मना के़होप्पा मे़बोङ्ने़न्॥’ 17 हे़क्क्याङ् आल्ल यहवे दाङ्बा इस्राइलबा निङ्वाॽफुमाङ्ङे, आदाङ्बारे़ के़से़वारोबा दाउदे़न्नु के़जोगुबा माङ्हुप्पिन् के़त्ते़ॽओ॥” 18 “कर थे निङ्वाॽफुमाङ्ङिन् से़क्खाए इक्सादिङ् खाम्बेःक्मो मनाहाॽनु युङ्ङाङ्बि? साङ्ग्राम्पेदाङ्हाॽ, साङ्ग्राम्पेदाङ्नुःल्ले़आङ् थाःङ्धाक् साङ्ग्राम्पेदाङ्ङो आदाङ्बा के़न्हत्ने़न्ने़भग्र, आङ्गाॽ चोगुङ्बा कन् माङ्हिम्मोग छे़न्ना आक्खेलॽरिक् के़हप्पे? 19 हे़क्केसाङ् यहवे दाङ्बा निङ्वाॽफुमाङ्ङे, के़से़वारोबे़ल्ले़ कुदुवा नु लुङ्माॽ तुक्मारे़ लागि खुने़ॽ चोगुबा तुवाओ निङ्वाॽ पिरे़ॽओ॥ के़से़वारोबे़ल्ले़ आदाङ्बारे़ के़दगि चोगुबा पेलिन् नु तुवान् खे़प्से़ॽओ॥ 20 आदाङ्बारे़ के़मिक्किन् कन् माङ्हिम्मो से़न्दिक् ले़न्दिक् चुक्काङ् पत्लरो, कन् ते़न्निल्ले़ कुयाःम्बेओ आदाङ्बारे़ अक्खे के़बाःत्तुआङ् वये़, ‘कॽयो आङ्गाॽ आमिङ्ङिन् आभे़ल्ले़साङ् वाॽरो॥’ कल्ले़चोगुल्ले़ आदाङ्बारे़ के़से़वारोबे़ल्ले़ कन् ते़न् ले़प्माङ् हिसिङ्ङाङ् चोगुबा पेलिन् आदाङ्बारे़ खे़प्से़ॽओ॥ 21 आदाङ्बारे़ के़से़वारोबा नु आदाङ्बारे़ इस्राइलबा के़मनाहाॽरे़ कन् ते़न् ले़प्माङ् मे़हिसिङ्ङाङ् तुवा मे़जोगुल्ले़ खे़ङ्हाॽरे़ खुन्छिॽ चुङ्जिगे़न् नःम्नःम्बा पेलिन् खे़प्से़ॽओ॥ के़युक्नादे़न् साङ्ग्राम्पेदाङ्लाम् खे़प्से़ॽओ, हे़क्क्याङ् आल्ल आदाङ्बारे़ के़घे़प्सुल्ले़ ले़प्मि पिरे़से़ॽओ॥ 22 “कुभा मनाःल्ले़ कुहिम्बेसाङ्बे़न् मे़न्वाॽमना मे़त्तुआङ् माङ्हे़क्सिङ्मा पाङ्घुने़भग्र, हे़क्क्याङ् कन् माङ्हिम् सिगाङ् आदाङ्बारे़ॽओ ले़त्ति तोःम्मादे़न्निल्ले़ कुबेसाङ् माङ्हे़क्सिङ्ने़भग्र, 23 आदाङ्बारे़ साङ्ग्राम्पेदाङ्लाम् खे़प्से़ॽआङ् याःम्बक् चोगे़ॽ॥ के़से़वारोबाहाॽरे़ खुन्छिॽ लुम्मो खासे़न् चोगे़ॽ॥ आप्तिक्साबे़न् आप्तिक्साबा लेःत्ते़ॽ, हे़क्क्याङ् खे़ल्ले़ चोगुबा कुयाःम्बक्हाॽरे़ कुले़क्वा पिरे़ॽ॥ कुदोःप्मान् कुदोःप्माए लेःत्ते़ॽओ, खम्भ्याङ् खे़न् कुदोःप्मा कुयाःम्बक्कोए थधप् मे़ल्लॽए के़वाॽबा चोगे़ॽओ॥ 24 “आल्ल आदाङ्बारे़ के़मना इस्राइलिहाॽरे़ आदाङ्बारे़ के़दक्ले़ङ्वाओ लायो मे़जोगुल्ले़ खे़ङ्हाॽ खुन्छिॽ निङ्मिहाॽलाम् हारिमे़दारो, हे़क्क्याङ् खे़ङ्हाॽरे़ आदाङ्बारे़ के़मिङ्ङिन् मे़बाःत्तुर कन् माङ्हिम्मो तुवा नु चुङ्जिगे़न् नःम्नःम् पेलि के़म्भाक्ल आदाङ्बा ले़प्माङ् मे़नुःङ्ने़भग्र, 25 खम्भ्याङ् आदाङ्बारे़ साङ्ग्राम्पेदाङ्लाम् खे़ङ्हाॽरे़ खुन्छिॽ पेलिन् खे़प्से़ॽआङ् के़मना इस्राइलिहाॽरे़ खुन्छिॽ लायोन् ले़प्मि पिरे़से़ॽओ, हे़क्क्याङ् खे़ङ्हाॽरे़ खुन्छिॽ पाधे़बाहाॽ के़बिरुसिबा लाजेॽओ खे़ङ्हाॽ नुःक्ते़ तारे़से़ॽओ॥ 26 “आदाङ्बारे़ के़मनाहाॽरे़ आदाङ्बारे़ के़दक्ले़ङ्वाओ लायो मे़जोगुबाल्ले़ चोगुल्ले़ ताङ्साङ्बे़न् सुप्सिङ्ङाङ् वहित् मे़न्धाए वाॽ, हे़क्क्याङ् आदाङ्बारे़ खे़ङ्हाॽ तुक्खे के़जाःत्तुसिबाल्ले़ चोगुल्ले़ आदाङ्बारे़ के़मिङ्ङिन् पाःप्मा मे़दे़न् हे़क्क्याङ् खुन्छिॽ लायोलाम् मे़नुःङ् मे़दाआङ् कन् ते़न्नो पेलिगे़न् तुवा मे़जोःक्किल्ले़, 27 साङ्ग्राम्पेदाङ्लाम् खे़ङ्हाॽरे़ खुन्छिॽ पेलिन् खे़प्से़ॽओ, हे़क्क्याङ् खे़ने़ॽ के़से़वारोबा, के़मना इस्राइलिहाॽरे़ खुन्छिॽ लायोन् ले़प्मि पिरे़से़ॽओ॥ खे़ङ्हाॽ लाङ्घेःक्मा के़बोङ्बा नुबा ये़प्ले़क्किन् खे़ने़ॽ हुॽरे़से़ॽओ, हे़क्क्याङ् खे़ने़ॽ के़मनाहाॽ खुन्छिॽ लक्खोमारे़ लागि के़बिरुसिबा लाजेॽओ वहित् थासुर याःन्दे़ पिरे़से़ॽओ॥ 28 “आल्ल लाजेॽओ साक् पोक् इग्र तुक्खे लाक्खे ताःल्ले़, किग्र सिङ्सेॽहाॽ हेसि इग्र खुक्वामेःत् के़धाबा ये़म् किग्र निःङ्घुक्वा नु फेॽबाःत्हाॽ तामा ये़म् ताःल्ले़, इग्र खे़ङ्हाॽरे़ खुन्छिॽ कुभा ये़क्यक्किन् निङ्मिहाॽरे़ मे़गबुॽ, आक्तङ्बा तुक्मा लाःक्मा इग्र मे़क्मासिमा तासाङ् 29 हे़क्क्याङ् आदाङ्बारे़ के़मना इस्राइलिहाॽरे़ खुन्छिॽ तुक्खे लाक्खेःन् निङ्वाॽ मे़इःत्तुआङ् कन् माङ्हिम्मिन् ले़प्माङ् खुन्छिॽ हुक्किन् थाःङ् मे़भोःक्खुॽ हे़क्क्याङ् तुवा के़म्जोक् इग्र चुङ्जिगे़न् नःम्नःम् पेलि के़म्भाक्किल्ले़ आदाङ्बारे़ के़युक्नादे़न् साङ्ग्राम्पेदाङ्लाम् खे़प्से़ॽआङ् ले़प्मि पिरे़से़ॽओ॥ 30 आदाङ्बारे़ मनाए थक्मा खुन्छिॽ निङ्वाॽ के़निसुॽ॥ कल्ले़चोगुल्ले़ आदाङ्बारे़ खे़ङ्हाॽ ले़प्मि पिरे़से़ॽआङ् खुन्छिॽ के़रे़क् याःम्बक्हाॽरे़ कुले़क्वा पिरे़से़ॽ॥ (थेआङ्भे़ल्ले़ आदाङ्बारे़रक् मनाहाॽरे़ खुन्छिॽ निङ्वाॽ के़निसुॽ), 31 हे़क्केलॽरिक् आदाङ्बारे़ आनिगे पाधे़बाहाॽ के़बिरुसिबा लाजेॽओ खे़ङ्हाॽरे़ खुन्छिॽ के़रे़क् ये़म्मो खे़ङ्हाॽरे़ आदाङ्बा के़म्गित्ल हे़क्क्याङ् आदाङ्बारे़ के़लाम्मो लाङ्मे़घेःक्लरो॥ 32 “आदाङ्बारे़ के़मना इस्राइलि मेःम्बा कुभा वेॽ लाजेॽबाल्ले़ आदाङ्बारे़ पयम् यम्बा के़मिङ्ङिन् नु पयम् यम्बा मुक्साम्साबा के़हुक्किल्ले़ कुयाःम्बेओ खे़प्सुॽ हे़क्क्याङ् माःङ्घाबा लाजेॽलाम् ताआङ् कन् माङ्हिम् ले़प्माङ् हिसिङ्ङाङ् खे़ल्ले़ पेलिगे़न् तुवा चोगुने़भग्र, 33 आदाङ्बारे़ के़युक्नादे़न् साङ्ग्राम्पेदाङ्लाम् खे़प्से़ॽआङ् खे़न् वेॽ लाजेॽबाल्ले़ नाःक्तुबा पाःन्निन् पिरे़ॽओ, हे़क्केलॽरिक् आदाङ्बारे़ के़मना इस्राइलरे़ हे़क्के इक्सादिङ् खाम्बेःक्मोबा के़रे़क् मनाहाॽरे़ आदाङ्बारे़ के़मिङ्ङिन् कुसिङ् मे़निःत्तुररो, हे़क्क्याङ् आदाङ्बा के़म्गित्ताङ् आङ्गाॽ चोगुङ्बा कन् हिम्मो आदाङ्बारे़ए के़मिङ् युङ्मनाआङ् वाॽ फाॽआङ् निङ्वाॽ मे़घोसुररो॥ 34 “आदाङ्बारे़ आत्तिसाङ् के़बाङ्घुसिबा आदाङ्बारे़ के़मनाहाॽ खुन्छिॽ निङ्मिहाॽनु थक्से़ मे़बेःक्किल्ले़ आदाङ्बारे़ के़सेगुबा कन् ये़क्यक्किन् नु आङ्गाॽ आदाङ्बारे़ के़मिङ्ले़ लागि चोगुङ्बा कन् माङ्हिम् ले़प्माङ् मे़हिसिङ्ङाङ् आल्ल खे़ङ्हाॽरे़ पेलिगे़न् तुवा मे़जोःक्किल्ले़, 35 आदाङ्बारे़ खे़ङ्हाॽरे़ खुन्छिॽ तुवान् नु पेलिन् साङ्ग्राम्पेदाङ्लाम् खे़प्से़ॽआङ् खे़ङ्हाॽ खुन्छिॽ ले़प्माङ् कुदोःप्मा खासे़न् लोःन्दे़ पिरे़से़ॽओ॥ 36 “आल्ल खे़ङ्हाॽ आदाङ्बारे़ के़दक्ले़ङ्वाओ लायो मे़जोक्, थेआङ्भे़ल्ले़ लायो मे़न्जोःक्मनाबा मना हाःत्ताङ् होप्, हे़क्क्याङ् आदाङ्बारे़ के़साक्के़न् पोःक्मो निङ्मिहाॽरे़ खुन्छिॽ हुक्को खे़ङ्हाॽ के़धासुसिआङ् खे़ल्ले़ खे़ङ्हाॽ माःङ्घा इग्र निःत्ताङ्बा लाजेॽओ ते़म्सु तेॽरुसिॽ, 37 हे़क्क्याङ् खे़ङ्हाॽ ते़म्सु तेॽरुसिबा लाजेॽओ खे़ङ्हाॽरे़ तुक्खे लाक्खे मे़दुमुबाल्ले़ चोगुल्ले़ खुन्छिॽ निङ्वाॽ मे़नुःक्तुॽ खम्भ्याङ् लायोलाम् मे़हिन्नाङ् ‘आनिगे लायो चोगुम्बे़, हे़क्क्याङ् पाःन्मे़ङ्घे़म्मनाबा पोःक्खिगे़आङ् आनिगे फे़न्याःम्बक् चोगुम्बे़’ मे़लॽआङ् खे़न् लाजेॽओ आदाङ्बा अक्तङ्बा पेलि के़म्भाक्, 38 हे़क्क्याङ् खे़ङ्हाॽ मे़दे़म्सु मे़देॽरुसिबा लाजेॽओ याम्मो खुन्छिॽ के़रे़क् सिक्लुङ्माॽ नु सक्मा साम्मिल्ले़ आदाङ्बा ले़प्माङ् मे़हिसिङ्ङाङ् खुन्छिॽ पाधे़बाहाॽ आदाङ्बारे़ के़बिरुसिबा लाजेॽ ले़प्माङ् हे़क्क्याङ् आदाङ्बारे़ के़सेगुबा ये़क्यक् नु आदाङ्बारे़ के़मिङ्ङिल्ले़ लागि आङ्गाॽ चोगुङ्बा कन् माङ्हिम् ले़प्माङ् मे़हिसिङ्ङाङ् खे़ङ्हाॽरे़ आदाङ्बा पेलि के़म्भाक्किल्ले़, 39 के़युक्नादे़न् साङ्ग्राम्पेदाङ्लाम् खे़ङ्हाॽरे़ खुन्छिॽ तुवान् नु पेलिन् खे़प्से़ॽआङ् खे़ङ्हाॽ कुदोःप्मा खासे़न् लोःन्दे़ पिरे़से़ॽओ॥ हे़क्क्याङ् आदाङ्बारे़ के़दक्ले़ङ्वाओ लायो के़जोःक्पा आदाङ्बारे़ के़मनाहाॽ ले़प्मि पिरे़से़ॽओ॥ 40 “आल्ल आङ्गाॽ आनिङ्वाॽफुमाङ्ङे, के़मिक्हाॽ हन्लरो, हे़क्क्याङ् कन् ते़न्नो तोःम्मनाबा पेलिहाॽओ के़ने़क्खोॽबान् चाङ्जाङ् मे़त्ते़ॽओ॥ 41 यहवे दाङ्बा निङ्वाॽफुमाङ्ङे, आल्ल पोगे़ॽओ, हे़क्क्याङ् आदाङ्बा नु आदाङ्बारे़ मुक्साम्बा के़सन्दोक् के़नाःम्सिङ्मादे़न्नो त्ये़ॽओ॥ यहवे दाङ्बा निङ्वाॽफुमाङ्ङे, आदाङ्बारे़ के़निङ्वाॽफुसाम्बाहाॽ से़न्लप् चाङ् मे़जाक्तुसिररो, हे़क्क्याङ् आदाङ्बा के़नुॽबा के़जोःक्पाओ आदाङ्बारे़ के़सेसे मनाहाॽरे़ खुन्छिॽ निङ्वाॽ ताररो॥ 42 यहवे दाङ्बा निङ्वाॽफुमाङ्ङे, आदाङ्बारे़ माङ्थोःक्ना के़बोङ्बा के़मनान् मे़नाॽरे़न्ने़ॽओ॥ के़से़वारोबा दाउदे़न् साॽरिक् लुङ्माॽ के़दुक्तुबा माङ्हुप्पिन् निङ्वाॽ इःत्ते़ॽओ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.