२ साप्मुःन्धुम् 5 - लिम्बु1 सोलोमनरे़ यहवे दाङ्बे़ल्ले़ कुहिम्मिल्ले़ लागि चोगुबा के़रे़क् पाःन्हाॽ सुरुआङ् खुने़ॽ पानुदिङ् कुम्बा दाउदरे़ सेसे याःम्बक्ले़ लागि लाःत्लाःत् ने़स्सुबा चिगक्वाहाॽ साम्म्याङ्, युप्पा हे़क्क्याङ् के़रे़क् सामापुमाहाॽ तारुआङ् यहवे दाङ्बे़ल्ले़ कुहिम्मोबा थाःङ्हाॽओ युक्खुरो॥ माङ्हुप् सन्दोक्किन् माङ्हिम्मो मे़दारुॽ ( १ हाङ् ८:१-९ ) 2 खे़न् एगाङ् सोलोमनरे़ इस्राइलबा लाम्लोबाहाॽ नु थाःक्थाःक्कोबा के़रे़क् थाःक्लाम्लोबाहाॽ हे़क्क्याङ् इस्राइलबा हिम्सयङ्हाॽओबा लाम्लोबा मनाहाॽ यहवे दाङ्बे़ल्ले़ कुमाङ्हुप् सदोक्के़न् दाउदरे़ कुये़क्यक् सियोनलाम् फे़प्मा फाॽआङ् यरुसले़ःम्मो चुम्मारे़ लागि उःत्तुसि॥ 3 हे़क्क्याङ् इस्राइलबा के़रे़क् मनाहाॽ नुसिगेक्पा लाओबा तङ्नाम्मोबा ये़म्मो हाङ्ङिल्ले़ कुदगि मे़जुप्से़॥ 4 इस्राइलबा के़रे़क् लाम्लोबाहाॽ मे़द्ये़ मे़जुरे़आङ्, ले़बिहाॽरे़ माङ्हुप् सन्दोक्किन् मे़भोःक्खु, 5 हे़क्क्याङ् सन्दोक्किन् नु तुम्मादे़न् साःङ्गाहिम् खे़ब्याङ् खे़प्मो के़युङ्बा के़रे़क् सेसे सामापुमाहाॽ मे़भोक्खुआङ् थाःङ् मे़युक्खु॥ निङ्वाॽफुसाम्बा ले़बिहाॽरे़ खे़न् मे़बक्खुआङ् थाःङ् मे़देॽरु॥ 6 सोलोमन हाङ्ङिल्ले़ नु खुने़ॽ कुदगि के़जुम्बाआङ् के़वाॽबा इस्राइलबा के़रे़क् मनाहाॽरे़ निःप्मे़न्दे़त् आत्तातान्ने यरिक् मे़ल्लुक्हाॽ नु से़गम्बा पित्हाॽ वयागे़न् सिदुङ्जभा मे़दोन्दुसिर माङ्हुप् सन्दोक्किल्ले़ कुदगि मे़वये़॥ 7 खे़न् एगाङ् निङ्वाॽफुसाम्बाहाॽरे़ यहवे दाङ्बे़ल्ले़ कुमाङ्हुप् सन्दोक्किन् माङ्हिम्मोबा साॽरिक् सेसेबादे़न्नो हाबा सन्दोक्किल्ले़ए कुयुक्नाओ मे़भे़त्तुआङ् करुबहाॽरे़ खुन्छिॽ लाप्सिगाङ् मे़युक्खु॥ 8 करुबहाॽरे़ खुन्छिॽ लाप्हाॽ माङ्हुप् सन्दोक् मे़युक्खुबा ते़न्निल्ले़ कुसम्धाङ् हप्फे़ लॽरे़आङ् पत्छे़, हे़क्क्याङ् लाप्हाॽरे़ माङ्हुप् सन्दोक्किन् नु कुबङ्मा तक्लाङ्हाॽ सुःप्तुआङ् पत्छे़॥ 9 तक्लाङ्हाॽरे़ कुसम्हाॽ सिगाङ्बा सेसेबादे़न्नोलाम् निमा सुक्ते़त्ते़र थारिक् खे़ङ्हाॽ साॽरिक् केःन्दे़र लःन्दे़आङ् पत्छे़, कर सेसेबादे़न्नोबा लाःक्कात्लाम्बा निमा सुक्मे़दे़त्ते़न्॥ खे़ङ्हाॽ आइन्बा ये़न् थारिक् खे़प्मोए पत्॥ 10 खे़न् माङ्हुप् सन्दोक्को वेॽ थेआङ् मे़यागे़न्, मोसाःल्ले़ होरेब कोःक्माओ माङ्हुप् सन्दोक्को केःत्तुआङ् यागे़बा ने़त्छि साप्लुङ्हाॽरक् यागे़, खे़ङ्ग इस्राइलिहाॽरे़ मिस्र लाजेन् मे़ले़रुआङ् एगाङ् यहवे दाङ्बे़ल्ले़ खे़ङ्हाॽनु माङ्हुप् चोगुआङ् वये़रो॥ यहवे दाङ्बे़ल्ले़ कुमिमिदिङ् 11 निङ्वाॽफुसाम्बाहाॽ सेसेदे़न्नोलाम् लाःक्कात् मे़लःन्दे़ मे़भे़रे़॥ खे़प्मो के़वाॽबा के़रे़क् निङ्वाॽफुसाम्बाहाॽरे़ खुन्छिॽ कुलुप् कुलुप् मे़न्जोःक्सिङ्ङे खुन्छिॽ आप्फेक् आप्फेक् सेसे मे़जोःक्सिङ्ङाङ् वये़॥ 12 के़रे़क् साम्लो के़लःप्पा ले़बिहाॽ—आसाप, हेमान नु यदुतुन हे़क्क्याङ् खे़ङ्हाॽरे़ खुन्छिॽ साहाॽ नु काॽइहाॽ सोसोरिक् पारान्ला चाःम्बा चाङ् मे़जाक्खुआङ् साप्फङ्गा, अन्मे नु तुङ्नाहाॽ मे़याङ्सिङ् हे़क्क्याङ् ले़त्ति तोःम्मादे़न् नाङ्गे़न् ले़प्माङ् मे़ये़म्सिङ्॥ खे़ब्याङ् खे़ङ्हाॽनु सोरिक् किप् थिक्काङ् निबोङ् निङ्वाॽफुसाम्बाहाॽआङ् मे़वये़॥ खे़ङ्हाॽरे़ सादाङ्हाॽ मे़मुःत्तु॥ 13 सादाङ् के़मुःप्पाहाॽ नु साम्लो के़लःप्पाहाॽरे़ यहवे दाङ्बे़न् कुनारा फोमा नु नुगे़न् पिमारे़ लागि लत्छा इक्ला मे़लःत्तु॥ हे़क्क्याङ् सादाङ्हाॽ, साप्फङ्गाहाॽ नु वेॽ मुक्लाहाॽ सोसोरिक् यहवे दाङ्बे़न् कुनारा फोमारे़ लागि खे़ङ्हाॽरे़ अक्खे मे़बाःत्तुआङ् साम्लो इक्ला मे़लःत्तुरो “खुने़ॽ के़नुॽबा चोक्लो, थेआङ्भे़ल्ले़ खुने़ॽ कुमिःम्जिन् आभे़ल्ले़साङ् वाॽरो॥” खे़ब्याङ् यहवे दाङ्बे़ल्ले़ कुहिम्मिन् खाॽमिःत्ते़ल्ले़ तिम्से़॥ 14 हे़क्क्याङ् खाॽमिःत्ते़ल्ले़ चोगुल्ले़ निङ्वाॽफुसाम्बाहाॽरे़ माङ्से़वा चोःक्मा मे़न्छुक्तुन्, थेआङ्भे़ल्ले़ यहवे दाङ्बे़ल्ले़ कुहिम्मिन् निङ्वाॽफुमाङ्ङिल्ले़ कुमिमिदिङ्ङिल्ले़ तिम्से़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.