२ साप्मुःन्धुम् 4 - लिम्बुमाङ्हिम्मोबा चिगक्वा सामाहाॽ ( १ हाङ् ७:२३-५१ ) 1 सोलोमनरे़ निबोङ् हुक्सिक् कुलाम्ति केःम्बा, निबोङ् हुक्सिक् कुभे़रे़ नु थिबोङ् हुक्सिक् कुलिङ्गे़न् केःम्बा कासाःल्ले़न् ले़त्ति तोःम्मादे़न् थिक् चोगु॥ 2 हुरामे़ल्ले़ योःम्मनाबा कासालाम् काक्पे़प्पा पयम् यम्बा फसि थिक् चोगु॥ खे़ल्ले़ कुगःङ्ग्यान् थिक् कुयाओलाम् वेॽसमा कुयाओ थारिक् थिबोङ् हुक्सिक् पत्छे़, खम्भ्याङ् खे़न् हुक्सिक् ङासि केःम्बा कुलिङ्गे़न् चोगे़॥ खे़ल्ले़ कब्रिङ् कुसाप्पोःक्के़न् सिःक्मारे़ लागि हुक्सिक् सुम्बोङ्बा थाक्पा चाहा चोगे़॥ 3 खे़न् पयम् यम्बा फसिःल्ले़ कब्रिङ् लाःक्कात् ले़प्माङ्, कुगःङ्ग्याःल्ले़ कुसिगाङ्, हुक्सिक् थिक्को थिबोङ् कुम्बाबा पित्हाॽरे़न् चइःत्हाॽ, कुदिःक्ला ने़त्छिबा पत्छे़॥ फसिन् नु कुम्बाबा पित्हाॽ लत्छा कुले़प् कासालाम् मे़जोगुबा चोगे़॥ 4 खे़न् फसिन् थिबोङ्ङाङ् ने़त्छि से़गम्बा पित् इत्लाहाॽ सम्धाङ् मे़युक्खुआङ् युङे़, सुम्सि थाङ्गे़त् ले़प्माङ् के़हिसिङ्बा, सुम्सि नाम्धा पिसाङ् के़हिसिङ्बा, सुम्सि लाङ्गे़त् पिसाङ् के़हिसिङ्बा नु सुम्सि नाङ्गे़न् ले़प्माङ् के़हिसिङ्बा मे़जोगे़॥ खे़ङ्हाॽरे़ खुन्छिॽ एगाङ् ले़प्माङ्बा लक्किन् सिगाङ् ले़प्माङ् के़हिसिङ्बा चोगे़॥ खे़न् फसिन् खे़ङ्हाॽरे़ खुन्छिॽ सम्धाङ् युङे़॥ 5 खे़न् हुक्ताप्पे थिक् यारिक् के़धुङ्बा चोगे़, हे़क्क्याङ् खे़ल्ले़ कुगःङ्ग्यान् चल्लाङ्ना खोर्याःल्ले़ कुगःङ्ग्यान् हे़क्के के़भे़क्पा ले़क्वा फुङ् हे़क्तङ्बा चोगे़॥ खे़प्मो हप्मे़न् ६६,००० लितर च्वाःत् हत्तुरो॥ 6 खुने़ॽ वाहप्सिङ्मा थिबोङ् चुजुक्सा खप्प्याहाॽआङ् थगु॥ खे़न् खप्प्याहाॽ खुने़ॽ ङासि लाङ्गे़त् ले़प्माङ् नु ङासि थाङ्गे़त् ले़प्माङ् युक्खुसि॥ आम्भा कन्हाॽओ खे़ङ्हाॽरे़ मिधिङ्मनादेमनाबा वयागे़न् सिदुङ्जभाहाॽरे़न् के़रे़क् पाःन्हाॽ वामे़हप्तु॥ कर फसिन् निङ्वाॽफुसाम्बाहाॽरे़ वारुःम्सिङ्मारे़ लागि मे़याङु॥ 7 निःन्धो के़बोङ्बा कुइसिक् खुने़ॽ थिबोङ् साम्म्याङ् सेमियुङ्दे़न्हाॽ थगु॥ खुने़ॽ खे़ङ्हाॽ ङासि लाङ्गे़त् ले़प्माङ् नु ङासि थाङ्गे़त् ले़प्माङ् माङ्हिम्मो युक्खुसि॥ 8 खुने़ॽ थिबोङ् चप्ते़न्हाॽ चोगुसिआङ् ङासि लाङ्गे़त् ले़प्माङ् नु ङासि थाङ्गे़त् ले़प्माङ् माङ्हिम्मो युक्खुसि॥ खुने़ॽ सामाक्खिॽ साङ्मा किप् थिक् साम्म्याङ् छे़ःङ्ग्याहाॽ थगुसि॥ 9 खुने़ॽ निङ्वाॽफुसाम्बाहाॽरे़ खुन्छिॽ लक्खुम् नु यम्बा लक्खुम् हे़क्क्याङ् खे़प्मोबा लाम्धेःत्हाॽ चोगु, खम्भ्याङ् लाम्धेःत्हाॽ कासाःल्ले़ सुःप्तु॥ 10 खे़न् यम्बा फसिन् खुने़ॽ लाङ्गे़त् ले़प्माङ् माङ्हिम् योहाङ् ले़प्माङ्बा नाङ्गे़न् कुसुक्पो युक्खु॥ 11 हुरामे़ल्ले़ खप्प्या नु काःङ्हाॽ हे़क्क्याङ् वेॽ सामाक्खिॽ साङ्मा छे़ःङ्ग्याहाॽ थगु॥ कम्भलॽरिक् खुने़ॽ निङ्वाॽफुमाङ्ङिल्ले़ कुहिम्मो सोलोमन हाङ्ङिल्ले़ कुलागि खुने़ॽ कुलक्पे़न्नो चोःक्मा के़बोङ्बा याःम्बक्हाॽ चोगु सुरुरो— 12 ने़त्छि सित्लाङ्हाॽ, सित्लाङ्ङिल्ले़ कुसम्मो चल्लाङ्ना खोर्या कुसिङ्बा ने़त्छि सित्लाङ् मे़ःथहाॽ, सित्लाङ् सम्धाङ्बा सित्लाङ् मे़ःथहाॽरे़ कुघे़म्सिङ्मा फुङ् लक्मनाबा ने़त्छि चित्लिङ्गेॽहाॽ, सित्लाङ् सम्धाङ्बा चल्लाङ्ना खोर्या हे़क्तङ्बा मे़ःथहाॽ, 13 ने़त्छि चित्लिङ्गेॽहाॽरे़ लागि किप् लिसि फुॽले़सेॽहाॽ (ने़त्छि सित्लाङ्हाॽओबा चल्लाङ्ना खोर्या कुसिङ्बा मे़ःथहाॽरे़ कुसम्मिन् के़दे़प्पा के़रे़क् चित्लिङ्गेःल्ले़ लागि कुदिःक्ला ने़त्छि फुॽले़सेॽहाॽ), 14 लाधाहाॽ, खे़न्नु सोसोरिक् छे़ःङ्ग्याहाॽ, 15 लत्छा पयम् यम्बा फसि नु खे़ल्ले़ मु कुसिगाङ् थिबोङ्ङाङ् ने़त्छि पित् से़गम्बाहाॽ, 16 खप्प्याहाॽ, काःङ्हाॽ, साघम्मा सुम्जुलिहाॽ नु के़रे़क् वेॽ सामापुमाहाॽ॥ कन् के़रे़क् सामाहाॽ, यहवे दाङ्बे़ल्ले़ कुहिम्मिल्ले़ लागि सोलोमन हाङ्ङिल्ले़ कुलागि खे़न् हुराम अबिःल्ले़ चोगुआङ् वये़, खे़ङ्हाॽ तिल्ले़क् तिल्ले़क् इःङ्मनाबा कासा वये़॥ 17 हाङ्ङिल्ले़ खे़ङ्हाॽ यर्दन ने़ने़बादे़न् सुक्कोत नु सार्तान कुलुम्मो कुयोःम्मो खाम्मो योःम्माआङ् चोःक्मा पाङ्घुसिआङ् वये़॥ 18 सोलोमनरे़ साॽरिक् यरिक् चिगक्वा सामाहाॽ चोगुसि, खे़ङ्हाॽ मे़न्धाङ्सिङ्ङे़ युक्खुसि॥ खे़न् चोगुसिबा सामाहाॽरे़ लागि कासान् थाङ्मा निःन्धो मे़बोःक्खे़न्॥ 19 सोलोमनरे़ यहवे दाङ्बे़ल्ले़ कुहिम्मोबा के़रे़क् सामापुमाहाॽआङ् चोगुरो—साम्म्याङ्ङिल्ले़न् ले़त्ति तोःम्मादे़न्, यहवे दाङ्बे़ल्ले़ कुदगि सेसे खरे़ःङ् ने़मा चप्ते़न्हाॽ, 20 इसेःङ्बा साम्म्याङ्ङिल्ले़न् सेमियुङ्दे़न्हाॽ, सेमिहाॽ थिम् कुइसिक् सेसेदे़न्नो मे़हाःन्दु, 21 फुङ् कुसिङ्बा कुभुङ् लक्मनाबाहाॽ, सेमिहाॽ नु लाभिःत्हाॽ के़रे़क् इसेःङ्बा साम्म्याङ्ङिल्ले़न् वये़, 22 साम्म्याङ् इसेःङ्बा, सेमि हाःम्मा लाभिःत्हाॽ, सामाक्खिॽ साङ्मा छे़ःङ्ग्याहाॽ, चल्लाङ्ना खोर्याहाॽ नु साङ्ते़रे़ःङ्हाॽ, के़रे़क्नुःल्ले़ सिगाङ्बा याक्फाङ् इग्र के़रे़क्नुःल्ले़ साॽरिक् सेसेबादे़न्नोबा लाम्धेःप्पाहाॽरे़ लागि नु माङ्हिम्मोबा कुलुम् चुम्लुङ् चोःक्मा याक्फाङ्ङोबा लाम्धेःप्पाहाॽ इसेःङ्बा साम्म्याङ्ङिल्ले़ मे़सुःप्तुआङ् पत्छे़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.