२ साप्मुःन्धुम् 36 - लिम्बुयहुदाबा हाङ् यहोआहाज ( २ हाङ् २३:३०-३५ ) 1 खे़न् एगाङ् लाजेॽओबा मनाहाॽरे़ योसियाहःल्ले़ कुस्सा यहोआहाजे़न् मे़देॽरुआङ् यरुसले़ःम्मो खुने़ॽ कुम्बारे़ कुले़क्वाओ हाङ् मे़जोगुरो॥ 2 यहोआहाजे़न् हाङ्युक्नाओ थोःक्सिङ्ङे़ल्ले़ खुने़ॽ निबोङ्ङाङ् सुम्सि तङ्बे योरे़॥ खुने़ॽ यरुसले़ःम्मो ला सुम्सि हाङ्युक् चोगु॥ 3 खम्भ्याङ् मिस्र लाजेॽबा हाङ्ङिल्ले़ यरुसले़ःम्मो खुने़ॽ हाङ्युक्नाओलाम् लःत्तुदेसुआङ् यहुदाओ १०० तोरा युप्पा नु तोरा थिक् साम्म्याङ् एःङ् कुःत्तु॥ 4 मिस्र लाजेॽबा हाङ्ङिल्ले़ यहोआहाजरे़ कुन्साॽ एल्याकिमे़न् यहुदा नु यरुसले़ःम्मो हाङ् चोगुआङ् एल्याकिमलाम् यहोयाकिम कुमिङ् ले़क्खु पिरु॥ कर नेकोल्ले़ खुने़ॽ कुम्भुॽ यहोआहाजे़न् मिस्र लाजेॽओ तेॽरुआङ् पेरो॥ यहुदाबा हाङ् यहोयाकिम ( २ हाङ् २३:३६–२४:७ ) 5 यहोयाकिमे़न् हाङ्युक्नाओ थोःक्सिङ्ङे़ल्ले़ खुने़ॽ निबोङ्ङाङ् ङासि तङ्बे योरे़॥ खुने़ॽ यरुसले़ःम्मो थिबोङ्ङाङ् थिक् तङ्बे हाङ्युक् चोगु॥ खे़ल्ले़ यहवे दाङ्बा खुने़ॽ कुनिङ्वाॽफुमाङ्ङिल्ले़ कुनिमो आत्तिन् पाःन्ने़न् ताप्फे़ःम्बा चोगे़ खुने़ॽ आम्भा खान्ने़ चोगु॥ 6 बेबिलोनबा हाङ् नबुकदनेसरे़ल्ले़ यहुदान् थङ्ङो फत्तु हे़क्क्याङ् यहोयाकिमे़न् कासा थक्क्रङ्ङे़ल्ले़ खेःक्खुआङ् बेबिलोन तेॽरु॥ 7 नबुकदनेसरे़ल्ले़ यहवे दाङ्बे़ल्ले़ कुहिम्मोबा कुभा खप्प्या सामाहाॽ तेॽरुआङ् बेबिलोनओ खुने़ॽ आप्फेक् कुमाङ्हिम्मो युक्खु॥ 8 यहोयाकिमे़ल्ले़ कुहाङ्युक् ये़म्मोबा वेॽ हिन्दोक्हाॽ हे़क्क्याङ् खुने़ॽ चोगुबा हिन्दोक्हाॽ नु आप्तिक् के़धाबा खुने़ॽ के़रे़क् कुयाःम्बक्हाॽ इस्राइल नु यहुदाबा हाङ्हाॽरे़ खुन्छिॽ साप्मुःन्धुम् साप्पन्नो साप्ते़आङ् पत्॥ खुने़ॽ कुएगाङ् कुस्सा यहोयाकिने़न् हाङ् पोःक्खे़रो॥ यहुदाबा हाङ् यहोयाकिन ( २ हाङ् २४:८-१७ ) 9 यहोयाकिने़न् हाङ्युक्नाओ थोःक्सिङ्ङे़ल्ले़ खुने़ॽ थिबोङ्ङाङ् ये़त्छि तङ्बे योरे़॥ खुने़ॽ यरुसले़ःम्मो ला सुम्सिआङ् थिबोङ् ये़न् हाङ्युक् चोगु॥ यहवे दाङ्बे़ल्ले़ कुनिमो आत्तिन् पाःन्ने़न् ताप्फे़ःम्बा चोगे़ खुने़ॽ आम्भा खे़न् चोगु॥ 10 हाङ्वामा ये़म्मो नबुकदनेसर हाङ्ङिल्ले़ यहोयाकिने़न् ते़म्मारे़ लागि मनाहाॽ पाङ्घु फे़न्छुसिआङ् यहवे दाङ्बे़ल्ले़ कुहिम्मोबा नुबा नुबा खप्प्या सामाहाॽआङ् खुने़ॽनु सोरिक् बेबिलोनओ तेॽरु, हे़क्क्याङ् यहोयाकिने़ल्ले़ कुम्बारे़ कुन्साॽ सिदकियाहःन् यहुदा नु यरुसले़ःम्मोबा हाङ् चोगुरो॥ यहुदाबा हाङ् सिदकियाह ( २ हाङ् २४:१८-२० ; यर्मि ५२:१-३ ) 11 सिदकियाहःन् हाङ् पोःक्खे़ल्ले़ निबोङ्ङाङ् थिक् तङ्बे योरे़॥ खुने़ॽ यरुसले़ःम्मो थिबोङ्ङाङ् थिक् तङ्बे हाङ्युक् चोगु॥ 12 खे़ल्ले़ यहवे दाङ्बा खुने़ॽ कुनिङ्वाॽफुमाङ्ङे़ल्ले़ कुनिमाओ आत्तिन् पाःन्ने़न् ताप्फे़ःम्बा चोगे़ आम्भा खान् चोगु॥ निङ्वाॽफुमाङ्ङिल्ले़ कुबाःन्जाक् के़बाःप्पा माङ्निङ्वाॽपान् के़बाःप्पा यर्मियाःल्ले़ कुदगि खे़न् नःम्नःम्बा मे़जोःक्सिङ्ङे़न्॥ 13 निङ्वाॽफुमाङ्ङिल्ले़ कुमिङ्ङो खुने़ॽ माङ्हे़क् चोःक्मा के़बाङ्बा हाङ् नबुकदनेसरे़ल्ले़ कुदक्ले़ङ्वाओ पिफ्युङ्बा पोःक्खे़॥ खुने़ॽ पाःन्मे़ङ्घे़म्मनाबा नु हादिङ् के़धक्पा पोःक्खे़आङ् यहवे दाङ्बा इस्रोइलबा निङ्वाॽफुमाङ् ले़प्माङ् नुःङ्मा तामा खुने़ॽ मे़दे़न्दे़न्॥ 14 कन्नुःल्ले़आङ् यरिक् यहुदाबा लाम्लोबाहाॽ, निङ्वाॽफुसाम्बाहाॽ नु मनाहाॽरे़ खुन्छिॽ पेसाङ्बा वेॽ मे़न्छाम् सुवाङ्हाॽरे़ मे़जोगुबा याम्गे़सिङ्बा खुन्छिॽ के़रे़क् याःम्बक्हाॽ मे़जोगु॥ हे़क्केलॽरिक् यहवे दाङ्बे़ल्ले़ आबाङे सेसे चोगुबा कुहिम्मिन् खे़ङ्हाॽरे़ आसुत्थो मे़जोगुरो॥ यरुसले़ःम्मिन् थ्यःङ् पोङ्ॽ ( २ हाङ् २५:१-२१ ) 15 यहवे दाङ्बे़ल्ले़ कुयुक्नादे़न्निन् नु कुमनाहाॽ लुङ्माॽ तुक्तुसिबाल्ले़ चोगुल्ले़ यहवे दाङ्बा खे़ङ्हाॽरे़ खुन्छिॽ पाधे़बाहाॽरे़न् निङ्वाॽफुमाङ्ङिल्ले़ ये़त्ले़ङ् ये़त्ले़ङ् खुन्छिॽओ इङ्साबाहाॽ पाङ्घु तासुसि॥ 16 कर यहवे दाङ्बे़ल्ले़ कुसाक्के़न्निन् कुमनाहाॽरे़ खुन्छिॽ सम्धाङ् मे़न्धाए थारिक् खे़ङ्हाॽरे़ खुने़ॽ कुइङ्साबाहाॽ येःप्मासि कुनामे़न्छाॽ मे़प्मासि, खुने़ॽ कुबाःन्जाक्हाॽओ चे़ॽया इङ्दो पाःप्मा नु माङ्निङ्वाॽपान् के़बाःप्पा खुने़ॽ कुमनाहाॽ केॽमासि मे़ल्ले़रुन् हे़क्क्याङ् खे़प्मो ताङ्मालाम् मे़बोःक्खे़न्॥ 17 खुने़ॽ खे़ङ्हाॽरे़ खुन्छिॽ तक्ले़ङ्वाओ बेबिलोनबा हाङ्ङिन् फे़त्तु, खे़ल्ले़ सेसेदे़न्नोए खे़ङ्हाॽरे़ खुन्छिॽ थाङ्बे़न् मनाहाॽ ताभेःल्ले़ च्ये़प्तु स्ये़रुसि, हे़क्क्याङ् नालिगे़न् थाङ्बे़न्, सिसागे़न् मे़न्छ्या, काप्पोबा इग्र तुम्भाक्सा आत्तिन्हाॽआङ् मे़दाङ्घुसिन्॥ निङ्वाॽफुमाङ्ङिल्ले़ खे़ङ्हाॽ खक्पे़त् नबुकदनेसरे़ल्ले़ कुहुक्को थासुसि॥ 18 खुने़ॽ निङ्वाॽफुमाङ्ङिल्ले़ कुहिम्मोबा यम्बा चुक्पा के़रे़क् खप्प्या सामाहाॽ नु यहवे दाङ्बे़ल्ले़ कुहिम्मोबा याङ्भुहाॽ खे़ब्याङ् हाङ्ङिल्ले़ कुयाङ्भुओबा नु कुसुहाङ्युक्पाहाॽरे़ खुन्छिॽ याङ्भुओबा कुमे़ल्लुङ् के़घिःक्पा सामाफुमाहाॽ के़रे़क् तेॽरुआङ् पे॥ 19 खे़ङ्हाॽरे़ यहवे दाङ्बे़ल्ले़ कुहिम्मे़न् फुत्लुम् मिमे़धिक्खु मे़देसु हे़क्क्याङ् यरुसले़म ये़क्यक्कोबा लुङ्धाक्किन् मे़लुःन्दु मे़देसु॥ खे़ङ्हाॽरे़ ये़क्यक्कोबा यम्बयम्बा हिम्हाॽ के़रे़क् मिमे़धिक्खु मे़देसु खम्भ्याङ् खे़प्मोबा के़रे़क् कुमे़न् के़घिःक्पा चिगक्वा सामाहाॽ खाप्पुथ्यःङ् मे़जोगु॥ 20 ताभेःल्ले़ च्ये़प्मा से़प्मासिलाम् के़बिम्बाहाॽ खुने़ॽ ते़म्सुसिआङ् बेबिलोन तेॽरुसि, हे़क्क्याङ् फारसबा हाङ्ङिल्ले़ हाङ्युक् चोःक्मा ये़म् मे़न्दाए थारिक् खे़ङ्हाॽ बेबिलोनबा हाङ्ङिन् नु कुस्साहाॽरे़ खुन्छिॽ योःग्बा योःग्मा मे़बोःक्खे़॥ 21 माङ्निङ्वाॽपान् के़बाःप्पा यर्मियाःल्ले़ पाःत्तुबा यहवे दाङ्बे़ल्ले़ कुबाःन्जाक्के़न् के़प्मारे़ लागि नुबोङ् तङ्बे मे़ङ्गे़त्ते थारिक् इस्राइल लाजेःल्ले़ कुनाःम्सिङ्मा ये़म्मिन् मे़ङ्गाःक्के थारिक् मे़गे़बा के़रे़क् ये़म् खाराक्के नाःम्सिङ्मा सबाथे़न् लाजेःल्ले़ ने़त्तुआङ् ने़स्से़॥ 22 फारसबा हाङ् कोरेसे़ल्ले़ हाङ्युक् चोगुबा थिक्सिगेक्पा तङ्बेओ यर्मियाःल्ले़ पाःत्तुबा यहवे दाङ्बे़ल्ले़ कुबाःन्जाक्के़न् के़प्मारे़ लागि यहवे दाङ्बे़ल्ले़ फारसबा हाङ् कोरेसे़न् कुसिक् के़सम्बा चोगु॥ हे़क्क्याङ् खुने़ॽ कुहाङ्जुम्मो के़रे़क् कुम्ब्राःल्ले़ए पाःत्तुआङ् हे़क्क्याङ् साप्तुआङ् अक्तङ्बा उवा चोगुरो— 23 “फारसबा हाङ् कोरेसे़ल्ले़ अक्खे पाःत्तुरो— “‘यहवे दाङ्बा साङ्ग्राम्पेदाङ्बा निङ्वाॽफुमाङ्ङिल्ले़ इक्सादिङ् खाम्बेःक्मोबा के़रे़क् हाङ्जुम्हाॽ आङ्गाॽ पिराङ्ङाङ् ने़रो॥ हे़क्क्याङ् खुने़ॽए आङ्गाॽ यहुदाओबा यरुसले़ःम्मो खुने़ॽ कुलागि लत्छा माङ्हिम् चोःक्मा इङ्जाङ् पिराङ्ङाङ् वाॽ॥ आल्लो खिनिॽ लुम्मो के़वाॽबा, खुने़ॽ कुमनाहाॽओबाहाॽ के़रे़क् आङ्गाॽ मे़त्तुङ्सिङ्ॽ, यहवे दाङ्बा खे़ङ्हाॽरे़ खुन्छिॽ निङ्वाॽफुमाङ्ङिन् खुन्छिॽनु सोरिक् वाॽर, हे़क्क्याङ् खे़ङ्हाॽ यरुसले़ःम्मो मे़धोःक्सिङ् मे़बेःक्लरो॥’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.