२ साप्मुःन्धुम् 35 - लिम्बुयोसियाहःल्ले़ तङ्नाम् तोसु ( २ हाङ् २३:२१-२३ ) 1 योसियाहःल्ले़ यहवे दाङ्बे़ल्ले़ कुलागि यरुसले़ःम्मो चोःक्युम्भो खोमा तङ्नाम् तोसु॥ थिक्सिगेक्पा लाओबा थिबोङ्ङाङ् लिसिगेक्पा ये़न्नो चोःक्युम्भो खोमा तङ्नाम्मोबा मे़ल्लुक्साःत्तिन् मे़स्ये़रु॥ 2 खुने़ॽ निङ्वाॽफुसाम्बाहाॽ खुन्छिॽ आप्फेक् आप्फेक् याःम्बक्को युक्तिङ् चोगुसि, हे़क्क्याङ् यहवे दाङ्बे़ल्ले़ कुहिम्मो माङ्से़वा याःम्बक् चोःक्मारे़ लागि आःन्छिङ्मा पिरुसि॥ 3 खुने़ॽ यहवे दाङ्बाओ के़दोःन्छिङ्बा के़रे़क् इस्राइलिहाॽ के़हुॽबा ले़बिहाॽ मे़त्तुसि, “इस्राइलबा हाङ् दाउदरे़ कुस्सा सोलोमनरे़ चोगुबा माङ्हिम्मो सेसे सन्दोक्किन् युक्खे़म्मे़ॽ॥ खे़न् खिनिॽ फक्ताङ्ङो पङ्मागप्मा मे़नुॽने़न्ॽ॥ आल्लग यहवे दाङ्बा खिनिॽ निङ्वाॽफुमाङ्ङिन् नु खुने़ॽ कुमना इस्राइलिहाॽरे़ खुन्छिॽ लागि याःम्बक् चोगे़म्मे़ॽ॥ 4 इस्राइलबा हाङ् दाउदे़न् नु खुने़ॽ कुस्सा सोलोमनरे़ के़बिरिबा साप्मनाबा इङ्जाङ्हाॽ इःत्ते़म् नाःत्ते़म्मे़ॽर खिनिॽ मनासुम्हाॽ कुइसिक् हिम्सयङ् हिम्सयङ् चोःक्कासिम्मे़ॽआङ् यारिप् पोःक्खे़म्मे़ॽ॥ 5 “खिनिॽ हिम्बेसाङ्बा फुॽनुसाॽहाॽ ले़बिहाॽरे़ खुन्छिॽ लुप्मो कुलक् कुलक् पोःक्खे़म्मे़ॽआङ् मनाहाॽ फाॽमासिरे़ लागि सेसेबादे़न्नो ये़बाम्मे़ॽ॥ 6 चोःक्युम्भो खोमा तङ्नाम्मोबा मे़ल्लुक्साःत्हाॽ स्ये़रे़म्सिम्मे़ॽ, खिनिॽ आप्फेक् आप्फेक् सुत्थो चोःक्कासिम्मे़ॽआङ् मोसान् लाम्बा यहवे दाङ्बे़ल्ले़ इङ्जाङ् के़बिरिबा हे़क्के खिनिॽ हिम्बेसाङ्बा फुॽनुसाहाॽरे़ लागि मे़ल्लुक्साःत्हाॽ यारिप् चोगे़म्सिम्मे़ॽ॥” 7 योसियाहःल्ले़ चोःक्युम्भो खोमा तङ्नाम्मो खे़प्मो के़जुम्बाआङ् के़वाॽबा मे़न्जोबा मनाहाॽरे़ लागि खुने़ॽ आप्फेक् कुयाङ्सा कुन्धेलाम् हे़न्छिङ् सुम्बोङ् मे़ल्लुक्हाॽ नु मे़ःन्दाहाॽ हे़क्क्याङ् हे़न्छिङ् सुम्सि पित्थक्साहाॽआङ् पिरुसि॥ 8 खुने़ॽ कुसुहाङ्युक्पाहाॽरे़आङ् मनाहाॽ, निङ्वाॽफुसाम्बाहाॽ नु ले़बिहाॽरे़ लागि आबाङे निङ्वाॽलाम्बाबा हुक्वा मे़बिरुसि॥ यहवे दाङ्बे़ल्ले़ कुहिम्मो युक् के़जोःक्पा हिल्कियाह, जकरिया नु यहिएलरे़ चोःक्युम्भो खोमा तङ्नाम्मिल्ले़ लागि २,६०० चुजुक्सा थक्साहाॽ नु ३०० पित्थक्साहाॽ निङ्वाॽफुसाम्बाहाॽ मे़बिरुसि॥ 9 हे़क्क्याङ् कोनन्याह नु खुने़ॽ कुन्साॽसि समायाह हे़क्क्याङ् नतनेल, खम्भ्याङ् ले़बिहाॽरे़ खुन्छिॽ लाम्लोबा हसब्याह, यहिएल नु योजाबादरे़ चोःक्युम्भो खोमा सिदुङ्जभा ५,००० चुजुक्सा थक्साहाॽ नु ५०० पित्थक्साहाॽ ले़बिहाॽ मे़बिरुसि॥ 10 माङ्से़वा चोःक्मा याःम्बक्किन् निःन्धो पोःक्खे़चुरे़आङ् निङ्वाॽफुसाम्बाहाॽ नु ले़बिहाॽग खुन्छिॽ आप्फेक् आप्फेक् मनासुम्हाॽ हे़क्के हाङ्ङिल्ले़ कुइङ्जाङ् कुइसिक् ये़बाम्मे़ॽ मे़त्तुसिबा ते़न्नो मे़ये़म्सिङ्॥ 11 खे़ब्याङ् ले़बिहाॽरे़ चोःक्युम्भो खोमा तङ्नाम्मोबा मे़ल्लुक्साःत्हाॽ मे़स्ये़रुसि, हे़क्क्याङ् ले़त्ति तोःम्मादे़न्निल्ले़ कुयाम्ले़ङ्बो सामाक्खिःन् छ्वाःक् हुङ्मादेमारे़ लागि निङ्वाॽफुसाम्बाहाॽ मे़बिरुसि, हे़क्क्याङ् खे़न् थक्साहाॽरे़ कुहोरिक्पाहाॽ मे़धिक्तु॥ 12 खे़ङ्हाॽरे़ मोसाःल्ले़ कुसाप्पन्नो साप्ते़आङ् के़बप्पा कुइसिक् मनाहाॽरे़ खुन्छिॽ हिम्सयङ्हाॽरे़ यहवे दाङ्बाओ तोःम्मारे़ लागि मिधिङ्मनादेमनाबा सिधुङ्जभाहाॽ लाःत्लाःत् मे़से़न्दु मे़बिरुसि, हे़क्क्याङ् पित्थक्साहाॽआङ् मे़से़न्दु मे़बिरुसि॥ 13 खे़ङ्हाॽरे़ थिम् कुइसिक् चोःक्युम्भो खोमा तङ्नाम्मोबा सान् मिओ मे़ओॽरु, हे़क्क्याङ् सेसे हुक्वाहाॽग फसि, खप्प्या नु खेःक्याओ मे़धे़न्दुआङ् खे़ङ्हाॽ खक्पे़त् हाराहारा मनाहाॽ मे़हाःत्तुसि॥ 14 खे़न् एगाङ् हारुनरे़ कुधाःक्कोबा निङ्वाॽफुसाम्बाहाॽ युःन्छिक् थे़म्बाए मिधिङ्मनादेमनाबा वयागे़न् सिदुङ्जभा नु सासोःत् तोःम्माओ सिॽमे़न्छिॽ मे़यागे़बाल्ले़ चोगुल्ले़ खे़ङ्हाॽरे़ खुन्छिॽ आप्फेक् लागि नु निङ्वाॽफुसाम्बाहाॽरे़ लागि साहाॽ कुलक् मे़से़न्दु॥ कम्भलॽरिक् खे़ङ्हाॽरे़ खुन्छिॽ लागि नु हारुनरे़ कुधाःक्कोबा निङ्वाॽफुसाम्बाहाॽरे़ लागि सालक्हाॽ यारिप् मे़जोगु॥ 15 दाउद हाङ्ङिल्ले़ कुइजाःङ्ङो मुरामे़मे़त्तुसिबा खुन्छिॽ आप्फेक् आप्फेक् ते़न्नो के़वाॽबा आसापरे़ कुधिन्दाङ् सायोबोरा साम्लो साम्गे़मे़प्पा ले़बिहाॽ आम्भा कन्हाॽए मे़वये़रो—आसाप, हेमान नु हाङ्ङिल्ले़ कुधुम्या के़इबा यदुतुन॥ खुन्छिॽ फुॽनुसाॽ ले़बिहाॽरे़ खे़ङ्हाॽरे़ हुन्छिॽ लागि यारिप् मे़जोगुबाल्ले़ चोगुल्ले़ मा लाम्धेत् थक्माबा लाम्धेत् के़गोबाहाॽरे़ खुन्छिॽ याःम्बक्किन् ले़प्मा मे़बोःक्खे़न्॥ 16 कन् परिक्ले़ योसियाह हाङ्ङिल्ले़ कुइङ्जाङ् कुइसिक् चोःक्युम्भो खोमा तङ्नाम् तोमा नु यहवे दाङ्बाओ ले़त्ति तोःम्मादे़न्नो मिधिङ्मनादेमनाबा वयागे़न् सिदुङ्जभा तोःम्मारे़ लागि यहवे दाङ्बाओबा माङ्से़वा याःम्बक्किन् के़रे़र खे़न् ये़म्मो मे़जोगु॥ 17 के़जुम्बाआङ् के़वाॽबा के़रे़क् इस्राइलिहाॽरे़ खे़न् ये़म्मो चोःक्युम्भो खोमा तङ्नाम् मे़दोसु, हे़क्क्याङ् नुसि ये़न् थारिक् के़भङ्बा सिदाॽ मे़न्याक्केबा खरे़ःङ् चामा तङ्नाम् मे़दोसु॥ 18 माङ्निङ्वाॽपान् के़बाःप्पा समुएलरे़ कुये़म्माङ् कत्थो कन् परिक्ले़ चोःक्युम्भो खोमा तङ्नाम् इस्राइलओ आभे़ल्ले़आङ् मे़न्दोए वये़॥ निङ्वाॽफुसाम्बाहाॽ, ले़बिहाॽ नु यरुसले़म के़युङ्बाहाॽनु के़जुम्बाआङ् के़वाॽबा के़रे़क् यहुदा हे़क्क्याङ् इस्राइलबानु सोसोरिक् योसियाहःल्ले़ तोसुबा हे़क्के इस्राइलबा वेॽ आत्तिन् हाङ्हाॽरे़आङ् कन् परिक्ले़ चोःक्युम्भो खोमा तङ्नाम् आभे़ल्ले़आङ् मे़न्दोए मे़वये़॥ 19 योसियाह हाङ्ङिल्ले़ हाङ्युक् चोगुबा थिबोङ्ङाङ् ये़त्छिगेक्पा तङ्बेओ कन् चोःक्युम्भो खोमा तङ्नाम्मिन् मे़दोसुआङ् वये़रो॥ योसियाह हाङ्ङिन् मासिङ् ( २ हाङ् २३:२८-३० ) 20 कन्हाॽ के़रे़क् एगाङ् योसियाहःल्ले़ कम्भलॽरिक् माङ्हिम्मोबा के़रे़क् याःम्बक्हाॽ तङ्सुसुरुल्ले़ मिस्रबा हाङ् नेकोन् युफ्रेतिस वहःङ्ङिल्ले़ कुयाओबा कर्कमिस ये़क्यक्किन् थङ्ङो फप्मारे़ लागि लःन्दे़ थाङे़, हे़क्क्याङ् योसियाहन् खे़न्नु थक्से़ पे॥ 21 कर नेकोल्ले़ कम्भ मे़त्तुसिआङ् खुने़ॽओ हाङ्लाइङ्बाहाॽ पाङ्घु तासुसि, “यहुदाबा हाङ्ङे, आदाङ्बा नु आङ्गाॽ लुम्मो थे खे़माॽ वाॽइ? आइन् आङ्गाॽ आदाङ्बानु थे़माआङ् खे़माॽ होप्, कर आङ्गाॽ आत्तिन्हाॽनु थङ् चोःक्कार पत्ता खे़ङ्हाॽनुरक् खे़माॽ वाॽ॥ आङ्गाॽ हारा पेगे़ॽ फाॽआङ् निङ्वाॽफुमाङ्ङिल्ले़ मे़त्ताङ्ङाङ् वाॽ, कल्ले़चोगुल्ले़ निङ्वाॽफुमाङ्ङिल्ले़ कुदक्ले़ङ्वाओ मे़म्बोःक्के़ॽ, खुने़ॽ आङ्गाॽ ले़प्माङ् वाॽ, मेःन्ने़भग्र खुने़ॽ आदाङ्बा खाप्पुथ्यःङ् के़जोक्॥” 22 हे़क्केसाङ् योसियाहन् खुने़ॽ चोःक्मा निङ्वाॽ इःत्तुबालाम् नुःङ्मा मे़दे़न्दे़न्, कर नेकोःन्नु ते़न्धङ् चोःक्मारे़ लागि खुने़ॽ कुजाङ्हाॽ ले़क्तु॥ निङ्वाॽफुमाङ्ङिल्ले़ नेकोन् मे़त्तुबा इङ्जाङ्ङिन् खुने़ॽ खे़म्मा मे़दे़न्दे़न्, हे़क्क्याङ् मगिद्दोबा ने़ने़बादे़न्नो थङ् चोःक्से़ खुने़ॽ खिमो थासिङ्॥ 23 खे़ब्याङ् तोङ् लि के़गप्पाहाॽरे़ योसियाह हाङ्ङिन् मे़आबु, हे़क्क्याङ् खुने़ॽ कुधक् कम्ब्राङ् के़मे़प्पाहाॽ मे़त्तुसि, “आङ्गाॽ ते़न्धङ् के़बोङ्बादे़न्नोलाम् लाःक्कात् आलःत्ते़ॽ, थेआङ्भे़ल्ले़ आङ्गाॽ साॽरिक् काःन्दाङ्॥” 24 कल्ले़चोगुल्ले़ खे़ङ्हाॽरे़ खुने़ॽ कुअन्लाधाओलाम् मे़लःत्तु हे़क्क्याङ् खुने़ॽ ने़त्छिगेक्पा कुअन्लाधाओ मे़गेःत्तुआङ् यरुसले़म मे़धाक्तु॥ हे़क्क्याङ् खुने़ॽ खे़प्मोए यगुजङ्सि पेआङ् खुने़ॽ कुसुधे़बा कुधाक्थे़बाहाॽरे़ खुन्छिॽ इपुङ्ङो मे़ने़स्सु॥ हे़क्क्याङ् के़रे़क् यहुदा नु यरुसले़म के़युङ्बाहाॽ मे़रिङ् मे़धक्ते़॥ 25 यर्मियाःल्ले़आङ् योसियाहःल्ले़ कुलागि मे़रिङ्धक्मा साम्लोहाॽ साप्तु॥ साम्लो साम्गे़मे़प्पाहाॽ, ये़म्बित्छा नु मे़न्छुमा खक्पे़त्ले़ आइन्बा ये़न् थारिक् कन् मे़रिङ्धक्मा साम्लोहाॽओ योसियाहन् निङ्वाॽ मे़इःत्तुॽ॥ कन् मे़रिङ्धक्मा साम्लोहाॽ इस्राइलओ लत्छा थाःक्युथिम् पोःक्से़आङ् वाॽ, हे़क्क्याङ् मे़रिङ् साप्पन्नो कन्हाॽ खोदे़त्॥ 26 योसियाहःल्ले़ कुहाङ्युक् ये़म्मोबा वेॽ हिन्दोक्हाॽ नु यहवे दाङ्बे़ल्ले़ कुसाम्योथिम् साप्पन्नो साप्ते़आङ् पप्पा कुइसिक्— 27 खुने़ॽ चोगुबा के़रे़क् याःम्बक्हाॽ कुहेःक्सिङ्माआङ्धो कुनुप्मा थारिक्के इस्राइल नु यहुदाबा हाङ्हाॽरे़ खुन्छिॽ साप्मुःन्धुम् साप्पन्नो साप्ते़आङ् पत्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.