२ साप्मुःन्धुम् 34 - लिम्बुयहुदाबा हाङ् योसियाह ( २ हाङ् २२:१-२ ) 1 योसियाहन् हाङ्युक्नाओ थोःक्सिङ्ङे़ल्ले़ खुने़ॽ तङ्बे ये़त्छि योरे़॥ यरुसले़ःम्मो खुने़ॽ सुम्बोङ्ङाङ् थिक् तङ्बे हाङ्युक् चोगु॥ 2 खुने़ॽ यहवे दाङ्बे़ल्ले़ कुनिमो आत्तिन् पाःन्निन् नुबा चोगे़ खुने़ॽ हाबा खे़न् चोगु॥ खुने़ॽ चुक्वा फे़ङ्वा मे़ल्लॽए खुने़ॽ कुसुधे़बा दाउदरे़ नाःत्तु तिम्दुबा के़रे़क् लाम्हाॽओ लाङ्घेगे़रो॥ 3 योसियाहःल्ले़ हाङ्युक् चोगुबा ये़त्छिगेक्पा तङ्बेओ खुने़ॽ थाङ्बे़न् वये़ल्ले़ खुने़ॽ कुसुधे़बा दाउदरे़ कुनिङ्वाॽफुमाङ्ङिन् कोःप्मा हङ्मा हेःक्तु॥ हे़क्क्याङ् थिबोङ्ङाङ् ने़त्छिगेक्पा तङ्बेओ यहुदा नु यरुसले़ःम्मो के़युङ्बा थे़गुहाॽओबा माङ्धाःन्हाॽ हे़क्क्याङ् असेरा माङ् सित्लाङ्हाॽ, मे़लक्तु मे़घोःन्दुआङ् मे़जोगुबा नु मे़योन्दुआङ् मे़जोगुबा नावाइत्लाहाॽ इःङ्मादेमा हेःक्तुसि॥ 4 बाल माङ्हाॽओबा ले़त्ति तोःम्मादे़न्हाॽ खुने़ॽ लुःम्मादेमा पाङ्घुसि, हे़क्क्याङ् खे़ङ्हाॽरे़ कुसम्धाङ्बा सुक्पा हाःम्मा साङ्ते़रे़ःङ्हाॽ कुम्जिक्मा मे़जोगु॥ खुने़ॽ असेरा माङ् सित्लाङ्हाॽ नु वेॽ के़रे़क् नावाइत्लाहाॽ हे़क्क्याङ् इत्हाॽ फयःप्फयःप् यःप्सुआङ् खाप्पुथ्यःङ् चोगु, हम्भ्याङ् खे़न् माङ्हाॽओ सिदुङ्जभा के़दोम्बा मनाहाॽरे़ खुन्छिॽ इपुङ्हाॽओ खे़न् कुम्जिक्माहाॽ से़सुदेसु॥ 5 खुने़ॽ खे़ङ्हाॽरे़ खुन्छिॽ निङ्वाॽफुसाम्बाहाॽरे़ खुन्छिॽ ये़त्हाॽआङ् खुन्छिॽए ले़त्ति तोःम्मादे़न्नो मिधिक्खुदेसु, हे़क्क्याङ् कम्भलॽरिक् खुने़ॽ यहुदा नु यरुसले़ःम्मिन् सुत्थो चोगु॥ 6 खुने़ॽ मनस्से, एफ्राइम, सिमियोन नु नप्तालि थारिक्पा ये़क्यक्हाॽ हे़क्क्याङ् खे़ङ्हाॽ कब्रिङ्बा के़धुप्पा के़लुःम्बा पाङ्यक्हाॽओ 7 खोसुबा खे़ङ्हाॽरे़ खुन्छिॽ ले़त्ति तोःम्मादे़न्हाॽ नु असेरा माङ् सित्लाङ्हाॽ सोःन्दुदेसु पिरुसि॥ हे़क्क्याङ् मे़योन्दुआङ् मे़जोगुबा नावाइत्लाहाॽ खुने़ॽ कुम्जिक्मा चोगु पिरुसि॥ इस्राइल लाजेॽ के़रे़क् के़ने़बा सुक्पा हाःम्मा साङ्ते़रे़ःङ्हाॽ खुने़ॽ खाप्पुथ्यःङ् चोगु पिरुसि॥ खे़ब्याङ् खुने़ॽ यरुसले़म नुःक्खे़ त्ये़रो॥ 8 योसियाहःल्ले़ हाङ्युक् चोगुबा थिबोङ्ङाङ् ये़त्छिगेक्पा तङ्बेओ लाजेन् नु माङ्हिम्मिन् सुत्थो चोःक्मारे़ लागि खुने़ॽ असल्याहरे़ कुस्सा सापाने़न्, ये़क्यक्कोबा युक्साबा मासेयाहन् नु हाङ्जुम्मोबा साप्ला के़साप्पा योआहाजरे़ कुस्सा योआःन् यहवे दाङ्बा खुने़ॽ कुनिङ्वाॽफुमाङ्ङिल्ले़ कुहिम्मे़न् चाःङ्वा मे़त्छे़ पाङ्घु युसुसि॥ 9 लाम्धेःत्तो इक्कोमा याःम्बक् के़जोःक्पा ले़बिहाॽरे़ मनस्से, एफ्राइम नु इस्राइलओ के़दाङ्बा के़याःक्पा के़रे़क् मनाहाॽलाम्, हे़क्क्याङ् यहुदा, बेन्यामिन नु यरुसले़ःम्बा के़रे़क् मनाहाॽलाम् मे़भोक्खुआङ् यहवे दाङ्बे़ल्ले़ कुहिम्मो मे़दारुबा याङ्हाॽ खे़ङ्हाॽरे़ मे़दाःक्तु हे़क्क्याङ् तुम् निङ्वाॽफुसाम्बा हिल्कियाहओ मे़बेआङ् खुने़ॽ मे़बिरु॥ 10 खुने़ॽ खे़न् याङ्ङिन् यहवे दाङ्बे़ल्ले़ कुहिम्मो याःम्बक् के़जोःक्पाहाॽरे़ खुन्छिॽ यम्बा लक्पे़न्साबाहाॽ हुक्सुप्तुसि, खम्भ्याङ् माङ्हिम्मो याःम्बक् के़जोःक्पाहाॽरे़ खे़न् याङ्ङिन् माङ्हिम् चाःङ्वा मे़प्मा नु खे़न् याम्मो के़धुम्बा चोःक्से़ ओगप् मे़जोगु॥ 11 खे़ङ्हाॽरे़ खे़न् याङ्ङोलाम् यहुदाबा हाङ्हाॽरे़ लुःम्मा पेःक्मारे़ लागि मे़ले़रु मे़देसुबा हिम्हाॽ चाःङ्वा मे़प्मा फाॽआङ् मे़घक्तुबा लुङ्हाॽ नु पे़रे़म्सिङ्हाॽ हे़क्क्याङ् कुजक्मा सिङ्हाॽ इङ्मारे़ लागिआङ् सिङ्गे़गाम्बाहाॽ नु लुङ्गे़गाम्बाहाॽ मे़बिरुसि॥ 12 कन् मनाहाॽरे़ कुदोःप्मा निरिक्काङ् याःम्बक् मे़जोगु॥ खे़ङ्हाॽरे़ मरारि थाःक्कोबा ले़बिहाॽ यहत नु ओबदिया, हे़क्क्याङ् कहात थाःक्कोबा जकरिया नु मसुल्लामरे़ खुन्छिॽ युक्को याःम्बक् मे़जोगु॥ कन् ले़बिहाॽ के़रे़क् मुक्ला मुङ्मा के़ले़बा मे़वये़॥ 13 हे़क्क्याङ् के़रे़क् परिक्पा याःम्बक् के़जोःक्पाहाॽ ओमे़प्मासि याःम्बक्काङ् कन्हाॽरे़ए मे़जोगु॥ खे़ङ्हाॽओबा कुभा सुहाङ्मिबा, साप्ला के़साप्पा नु कुभा लाम्धेत् के़गोबा मे़वये़रो॥ साम्योथिम् साप्पःन्ने़न् मे़घोसु 14 खे़ङ्हाॽरे़ यहवे दाङ्बे़ल्ले़ कुहिम्मो मे़दारुबा याङ्ङिन् ओमे़मे़त्तुल्ले़ यहवे दाङ्बे़ल्ले़ मोसान् पिरुबा साम्योथिम् साप्पःन्ने़न् निङ्वाॽफुसाम्बा हिल्कियाहःल्ले़ खोसु॥ 15 खम्भ्याङ् हिल्कियाहःल्ले़ सुहाङ्मिबा सापाने़न् अक्खे मे़त्तु, “आङ्गाॽ यहवे दाङ्बे़ल्ले़ कुहिम्मो साम्योथिम् साप्पःन्ने़न् खोसुङ्ङाङ् वाॽ॥” हे़क्क्याङ् हिल्कियाहःल्ले़ खे़न् साप्पन्निन् सापाने़न् पिरु॥ 16 सापाने़ल्ले़ खे़न् साप्पःन्ने़न् हाङ्ङे़ओ तेॽरुआङ् मे़त्तु, “आदाङ्बारे़ चोःक्मा के़बाङ्घुसिबा के़रे़क् याःम्बक्हाॽ आदाङ्बारे़ के़सुहाङ्युक्पाहाॽरे़ मे़जोगुर मे़याक्॥ 17 खे़ङ्हाॽरे़ यहवे दाङ्बे़ल्ले़ कुहिम्मो के़युङ्बा याङ्हाॽ मे़देॽरुआङ् यम्बा लक्पे़न्साबाहाॽ नु याःम्बक् के़जोःक्पाहाॽ मे़बिरुसिआङ् वाॽ॥” 18 निङ्वाॽफुसाम्बा हिल्कियाहःल्ले़ खुने़ॽ लत्छा साप्पन् पिरुबा पाःन्ने़न्नाङ् सुहाङ्मिबा सापाने़ल्ले़ हाङ्ङिन् चे़क्तु॥ खुने़ॽ खे़न् साप्पःन्ने़न् हाङ्ङिल्ले़ कुदगि निरुबिरु॥ 19 हाङ्ङिल्ले़ साम्योथिम् साप्पन्नो साप्ते़बा पाःन्हाॽ खे़प्सु, हे़क्क्याङ् खुने़ॽ कुजाङ्हाॽ थे़ःक्खु॥ 20 हे़क्क्याङ् खुने़ॽ हिल्कियाह, सापानरे़ कुस्सा अहिकाम, मिकारे़ कुस्सा अब्दोन, सुहाङ्मिबा सापाने़न् नु हाङ्ङिल्ले़ कुसे़वारोबा असायाहन् कन् इङ्जाङ्हाॽ पिरुसि— 21 “आङ्गाॽ आप्फेक् आलागि हे़क्क्याङ् इस्राइल नु यहुदाओ आल्लसाङ् के़वाॽबा के़याःक्पाहाॽरे़ लागि खे़न् साप्पन्नो साप्ते़आङ् के़बप्पा पाःन्हाॽरे़ कुयाःम्बेओ यहवे दाङ्बे़न् सेःन्दोसे़म्मे़ॽ॥ आनिॽ पाधे़बाहाॽरे़ यहवे दाङ्बे़ल्ले़ कुबाःन्जाक्किन् मे़न्इःत्तुन् मे़न्नाःत्तुम्बा नु कन् साप्पन्नो साप्ते़आङ् के़बप्पा के़रे़क् पाःन्हाॽ इःप्मा नाःप्मा मे़न्दे़न्दे़न्बाल्ले़ चोगुल्ले़ यहवे दाङ्बे़ल्ले़ साॽरिक् कुसिक् पोःक्मान् आनिॽ सम्धाङ् थ्ये़आङ् वाॽ॥” 22 हिल्कियाहन् नु हाङ्ङिल्ले़ इङ्जाङ् पिरे़सुसिबा मनाहाॽ हाङ्हिम्मोबा चाङ्वाःन्हाॽ ओगे़मे़प्पा हसराःल्ले़ कुम्मे़न्छाॽ तोखतरे़ कुस्सा सल्लुमरे़ कुमेत् माङ्निङ्वाॽपान् के़बाःप्मा हुल्दाओ पान् सेःन्दोमारे़ लागि मे़बे॥ खुने़ॽ यरुसले़ःम्मोबा कुसङ् पाङ्जुम् लक्को युङे़॥ 23 खुने़ॽ खे़ङ्हाॽ मे़त्तुसि, “यहवे दाङ्बा इस्राइलबा निङ्वाॽफुमाङ्ङिन् आम्भा कॽयो वाॽ—खिनिॽ आङ्गाॽओ के़बाङ्बा मनान् मे़त्ते़म्मे़ॽ, 24 ‘यहवे दाङ्बे़ल्ले़ अक्खे पाःत्तुॽ—यहुदाबा हाङ्ङिल्ले़ कुदगि मे़निरुबा साप्पन्नो साप्ते़आङ् के़बप्पा के़रे़क् माङ्दे साङ्ग्राहाॽ के़प्मारे़ लागि आङ्गाॽ कन् ते़न्नो नु खे़ल्ले़ कुमनाहाॽरे़ खुन्छिॽ सम्धाङ् मे़क्मासिमे़न् तारुङ्ॽ॥ 25 खे़ङ्हाॽरे़ आङ्गाॽ मे़नाॽराङ्ङाङ् वाॽ, हे़क्क्याङ् वेॽ माङ्हाॽओ सुक्पा मे़हाःन्दुआङ् वाॽ, खम्भ्याङ् खे़ङ्हाॽरे़ खुन्छिॽ आप्फेक् हुक्किल्ले़ मे़जोगुबा पाःन्हाॽलाम् आङ्गाॽ आसिक् मे़भोक्खुआङ् वाॽ॥ कल्ले़चोगुल्ले़ आङ्गाॽ आसाक्के़न्निन् कल्ले़ कुसम्धाङ् थासुङ्ॽ हे़क्क्याङ् खे़न् चिजि ये़म्ये़म् मे़बोङ्ने़न्॥’ 26 यहवे दाङ्बे़न् सेःन्दोमारे़ लागि खिनिॽ के़बाङ्बा यहुदाबा हाङ्ङिन् आम्भा कन् पाःन्ने़न् मे़त्ते़म्मे़ॽ, ‘आदाङ्बारे़ के़घे़प्सुबा इङ्घङ्ङिल्ले़ कुयाःम्बेओ यहवे दाङ्बा इस्राइलबा निङ्वाॽफुमाङ्ङिल्ले़ हाबा कन् पाःत्तुॽ— 27 पान् नुःक्मारे़ लागि खे़ने़ॽ के़निङ्वान् यारिप् पोःक्खे़ हे़क्क्याङ् आङ्गाॽ कन् लाजेन् नु कप्मोबा मनाहाॽरे़ खुन्छिॽ याःम्बेओ पाःत्तुङ्बा पाःन्हाॽ के़घे़प्सुआङ् निङ्वाॽफुमाङ्ङिल्ले़ कुदगि खे़ने़ॽ नःम्नःम्बा के़बोःक्खे़, हम्भ्याङ् आङ्गाॽ आदगि खे़ने़ॽ चुङ्जिगे़न् के़बोक्खे़आङ् खे़ने़ॽ के़जाङ्ङिन् के़धे़ःक्खुआङ् आङ्गाॽ आदगि मे़रिङ् के़धक्ते़बाल्ले़ चोगुल्ले़ खे़ने़ॽ के़बाःन्निन् आङ्गाॽ खे़प्सुङ्ङाङ् वाॽ, यहवे दाङ्बे़ल्ले़ उवा चोगुॽ॥ 28 कल्ले़चोगुल्ले़ आङ्गाॽ खे़ने़ॽ के़सुधे़बा के़दाक्थे़बाहाॽनु सोरिक् फुङ्ने़आङ् खे़ने़ॽ के़निङ्वाॽ तुक्खे मे़न्जाए के़म्जिङ्ॽ॥ कन् ते़न्नो नु कप्मो के़युङ्बाहाॽओ आङ्गाॽ ताःप्मा चोगुङ्बा मे़क्मासिमे़न् खे़ने़ॽ के़मिक्किल्ले़ निमा के़ङ्घोसुन्ॽ॥’” खे़ब्याङ् खे़ङ्हाॽरे़ कन् नुगप् पाःन्ने़न् योसियाहओ मे़देॽरुरो॥ 29 खे़न् एगाङ् हाङ्ङिल्ले़ यहुदा नु यरुसले़ःम्बा के़रे़क् लाम्लोबाहाॽ सोरिक् चुम्मारे़ लागि उःत्तुसि॥ 30 खुने़ॽ यहुदाबा मनाहाॽ, यरुसले़म के़युङ्बाहाॽ, निङ्वाॽफुसाम्बाहाॽ नु ले़बिहाॽ, चुक्पा यम्बा के़रे़क् मनाहाॽनु सोसोरिक् यहवे दाङ्बे़ल्ले़ कुहिम्मो थोःक्सिङ् पे॥ यहवे दाङ्बे़ल्ले़ कुहिम्मो मे़घोसुबा माङ्हुप् साप्पन्नोबा के़रे़क् पाःन्जाःक्हाॽ खे़ङ्हाॽरे़ मे़घे़प्सुर खुने़ॽ निरु पिरुसि॥ 31 हम्भ्याङ् सित्लाङ्ङिल्ले़ कुबेसाङ् ये़म्सिङ्ङाङ् निङ्वाॽफुमाङ्ङिन् तिम्मा नु खुने़ॽ कुइङजाःङ्हाॽ, कुधिम्हाॽ हे़क्क्याङ् कुइङ्दत्हाॽ के़रे़क् सिक्लुङ्माॽ नु निङ्वाःल्ले़ इःप्मा नाःप्मा, हे़क्क्याङ् कन् साप्पन्नो साप्ते़आङ् के़बप्पा पाःन्जाःन्हाॽ के़प्मारे़ लागि यहवे दाङ्बे़ल्ले़ कुदगि माङ्हुप्पिन् याम्मो कुसङ् चोगु॥ 32 खे़न् एगाङ् बेन्यामिन मनाहाॽ नु यरुसले़ःम्मो के़जुम्बाआङ् के़वाॽबाहाॽ के़रे़क्नु खे़न् माङ्हुप्पिन् के़प्मारे़ लागि खुने़ॽ माङ्हे़क् चोःक्मा पाङ्घुसि॥ यरुसले़मबा मनाहाॽरे़ निङ्वाॽफुमाङ्, खुन्छिॽ पाधे़बाहाॽरे़ हुन्छिॽ निङ्वाॽफुमाङ्ङिल्ले़ कुमाङ्हुप् इसिःक् कन् मे़जोगु॥ 33 योसियाहःल्ले़ इस्राइलिहाॽरे़ खुन्छिॽ के़रे़क् ते़ङ्गप्हाॽओलाम् याम्गे़सिङ्बा खक्पे़त् नावाइत्लाहाॽ इःक्खुदेसुसि, हे़क्क्याङ् इस्राइलओ के़युङ्बाहाॽ के़रे़क् यहवे दाङ्बे़न् माङ्से़वा मे़प्मा पाङ्घुसि॥ खुने़ॽ कुहिङ्हिङ् यहवे दाङ्बा खे़ङ्हाॽरे़ खुन्छिॽ पाधे़बाहाॽरे़ हुन्छिॽ निङ्वाॽफुमाङ्ङिन् तिम्मा नाःप्मालाम् एगाङ् मे़न्नुःक्से़न्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.