२ साप्मुःन्धुम् 33 - लिम्बुयहुदाबा हाङ् मनस्से ( २ हाङ् २१:१-९ ) 1 मनस्सेन् हाङ्युक्नाओ थोःक्सिङ्ङे़ल्ले़ खुने़ॽ थिबोङ्ङाङ् तङ्बे ने़त्छि योरे़॥ खुने़ॽ यरुसले़ःम्मो ङाबोङ्ङाङ् तङ्बे ङासि हाङ्युक् चोगु॥ 2 यहवे दाङ्बे़ल्ले़ इस्राइलिहाॽरे़ खुन्छिॽ तगिलाम् नाःत्तुदेसुसिबा मे़न्छाम् सुवाङ्हाॽरे़ खुन्छिॽ सिक्के़ले़ःङ्बा ये़प्ले़क्हाॽ खुने़ॽ नाःत्तु तिम्दुआङ् यहवे दाङ्बे़ल्ले़ कुनिमो आत्तिन् पाःन्निन् ताप्फे़ःम्बा चोगे़ खुने़ॽ हाबा खे़न् चोगु॥ 3 खुने़ॽ कुम्बा हिजकियाःल्ले़ लुःन्दुदेसुबा थुप्सुदेसुबा थे़गुहाॽओबा माङ्धाःन्हाॽ खुने़ॽ याम्मो चोगु॥ खुने़ॽ बाल माङ्हाॽरे़ लागि ले़त्ति तोःम्मादे़न्हाॽ चोगु हे़क्क्याङ् असेरा माङ्सित्लाङ्हाॽ ये़प्सु॥ खुने़ॽ ताङ्साङ्बोबा के़रे़क् खेसेबाहाॽ तगि साम्बोन् फन्छिङ्ङाङ् खे़ङ्हाॽ से़वा मे़त्तुसि॥ 4 खुने़ॽ यहवे दाङ्बे़ल्ले़ कुहिम्मो ले़त्ति तोःम्मादे़न्हाॽ चोगु, खे़न् माङ्हिम्मिल्ले़ कुयाःम्बेओ यहवे दाङ्बे़ल्ले़ अक्खे पाःत्तुआङ् वये़, “यरुसले़ःम्मोए आङ्गाॽ आमिङ्ङिन् सदादिङ् आभे़ल्ले़साङ् वाॽ॥” 5 खुने़ॽ ताङ्साङ्बोबा खेसेबाहाॽरे़ लागि यहवे दाङ्बे़ल्ले़ कुहिम्मोबा ने़प्माङ् लक्खुम्मो ले़त्ति तोःम्मादे़न्हाॽ चोगु॥ 6 खुने़ॽ कुस्सा ये़म्बित्छा मे़न्छुमाहाॽ बेन-हिन्नोमबा ने़ने़बादे़न्नो मिओ सिदुङ्जभा चोगुसि॥ खुने़ॽ कित्चाक् चोगुआङ् थुम्या इसु हे़क्क्याङ् खागे़इक्पाहाॽ नु साम्माङ् च्याःङ्हाॽ मुरा के़मे़प्पाहाॽ सुजा नाःक्तुसि॥ खुने़ॽ यहवे दाङ्बे़ल्ले़ कुनिमो साॽरिक् ताप्फे़ःम्बा चोगुआङ् खुने़ॽ कुसाक्के़न् फोःक्खु॥ 7 खुने़ॽ चोःक्मा पाङ्घुसिबा नावाइत्लान् निङ्वाॽफुमाङ्ङिल्ले़ कुहिम्मो युक्खु, खे़न् माङ्हिम्मिल्ले़ कुयाःम्बेओ यहवे दाङ्बे़ल्ले़ दाउदे़न् नु खुने़ॽ कुस्सा सोलोमने़न् अक्खे मे़त्तुसिआङ् वये़, “आङ्गाॽ इस्राइलबा के़रे़क् थाःक्हाॽलाम् सेगुङ्बा कन् माङ्हिम्मो नु यरुसले़ःम्मो आभे़ल्ले़साङ् सदादिङ्ले़ लागि आङ्गाॽ आमिङ् युक्खुङ्ॽ॥ 8 खे़ङ्हाॽरे़ आङ्गाॽ के़रे़क् आइङ्जाङ्हाॽ मे़इःत्तु मे़नाःत्तुआङ् मोसाःल्ले़ खे़ङ्हाॽ पिरुसिबा थिम्हाॽ नु साम्योथिम्हाॽ खक्पे़त् सिङ्सिङ् ये़क्ये़क्काङ् मे़नाःत्तु मे़इःत्तुने़भग्र, आङ्गाॽ खे़ङ्हाॽरे़ खुन्छिॽ पाधे़बाहाॽ पिरुङ्सिङ्बा लाजेॽओलाम् इस्राइलिहाॽ आङ्गाॽ याम्मो मे़लःत्तान् मे़देआसिङ्ङिन्ॽ॥” 9 कर निङ्वाॽफुमाङ्ङिल्ले़ इस्राइलिहाॽरे़ खुन्छिॽ तगिलाम् मे़क्खुसिबा मे़न्छाम् सुवाङ्हाॽनुःल्ले़आङ् मनस्सेःल्ले़ साॽरिक् ताप्फे़ःम्बा चोगुआङ् यहुदा नु यरुसले़ःम्बा मनाहाॽ ताप्फे़ःम्बा लाम्मिन् मे़नाःत्तुर याःन्दुसिरो॥ मनस्सेन् लायोलाम् हिन् 10 मनस्सेन् हे़क्क्याङ् खुने़ॽ कुमनाहाॽनु यहवे दाङ्बे़न् पारे़, कर खे़ङ्हाॽरे़ खे़म्घे़म् मे़ल्लाप्तुन्॥ 11 कल्ले़चोगुल्ले़ यहवे दाङ्बे़ल्ले़ कुदक्ले़ङ्वाओ अस्सुरबा हाङ्ङिल्ले़ कुधक्मोबाहाॽ फे़त्तुसि॥ खे़ङ्हाॽरे़ मनस्सेन् मे़दे़म्सुआङ् खुने़ॽ कुन्बोओ खेःङ्ङिन् मे़भत्छु, हे़क्क्याङ् खुने़ॽ कासा थक्क्रङ्ङिल्ले़ मे़घेःक्खुआङ् बेबिलोन मे़देॽरु॥ 12 खुने़ॽ तुक्खे च्ये़ःल्ले़ यहवे दाङ्बा कुनिङ्वाॽफुमाङ्ङिन् कुभाॽ नाःक्तु, हे़क्क्याङ् खुने़ॽ कुम्बा कुन्धे़बासिरे़ खुन्छिॽ निङ्वाॽफुमाङ् ले़प्माङ् नःम्नःम्बा चोःक्सिङ्॥ 13 हे़क्क्याङ् खुने़ॽ पेलिगे़न् तुवा चोगुल्ले़ निङ्वाॽफुमाङ्ङिल्ले़ खे़ल्ले़ कुबेलिन् खे़प्सुआङ् निङ्वाॽ पिरु॥ निङ्वाॽफुमाङ्ङिल्ले़ खुने़ॽ यरुसले़ःम्मो याम्मो नुःक्तु फे़त्तु, हे़क्क्याङ् खुने़ॽ कुहाङ्जुम्मो युक्खु॥ खे़ब्याङ् मनस्सेःल्ले़ यहवे दाङ्बे़न्ने निङ्वाॽफुमाङ्रत्छ फाॽआङ् निङ्वाॽ खोसु॥ 14 खे़न् एगाङ् मनस्सेःल्ले़ ने़ने़बादे़न्नो गिहोन च्वाःत् वबुन्दाओबा नाम्धा पिसाङ्लाम् ओफेल कोःक्मान् कबुआङ् ङा लाम्धेःत्तो थारिक् दाउदरे़ कुये़क्यक् लाःक्कात् ले़प्माङ्बा लुङ्धाक्किन् याम्मो चोगुआङ् खे़न् लुङ्धाक्किन् खुने़ॽ चाङ्जाङ्बा से़त्तु॥ खुने़ॽ यहुदाओबा हाङ्यक् के़ने़बा के़रे़क् ये़क्यक्हाॽओ थक्मोबाहाॽआङ् ये़प्सुसि॥ 15 खुने़ॽ वेॽ लाजेॽबा माङ्हाॽ नु मे़लक्तु मे़घोःन्दुआङ् मे़जोगुबा नावाइत्लान् यहवे दाङ्बे़ल्ले़ कुहिम्मोलाम् लःत्तुदेसु, हे़क्क्याङ् माङ्हिम्मोबा कोःक्माओ नु यरुसले़ःम्मो खुने़ॽ आप्फेक् चोगुबा के़रे़क् ले़त्ति तोःम्मादे़न्हाॽआङ् इःक्खुदेसु हे़क्क्याङ् खुने़ॽ खे़ङ्हाॽ के़रे़क् ये़क्यक्लाम् लाःक्कात् लाप्पुङ्देसु॥ 16 खे़न् एगाङ् खुने़ॽ यहवे दाङ्बाओ ले़त्ति तोःम्मादे़न्निन् याम्मो चोगुआङ् खे़प्मो तङ्जुम् वयागे़न् सिदुङ्जभा नु नुगे़न् सिदुङ्जभाहाॽ तोःन्दु, हे़क्क्याङ् यहवे दाङ्बा इस्राइलबा निङ्वाॽफुमाङ्ङिल्ले़ कुसे़वा चोःक्मारे़ लागि खुने़ॽ यहुदान् इङ्जाङ् पिरु॥ 17 हम्भसाङ् मनाहाॽरे़ थे़गुहाॽओबा माङ्धाःन्हाॽओ सिदुङ्जभाहाॽ मे़दोन्दुर मे़वये़, कर यहवे दाङ्बा खुन्छिॽ निङ्वाॽफुमाङ्ङिल्ले़ कुलागिरक् मे़दोन्दुरो॥ 18 मनस्सेःल्ले़ कुहाङ्युक्कोबा वेॽ हिन्दोक्हाॽ हे़क्क्याङ् खुने़ॽ कुनिङ्वाॽफुमाङ्ङिन् पेलि फाक्तुबा कुदुवान् नु यहवे दाङ्बा इस्राइलबा निङ्वाॽफुमाङ्ङिल्ले़ कुमिङ्ङो थुम्या के़इबाहाॽरे़ खुने़ॽ मे़मे़त्तुबा पाःन्जाःक्हाॽ इस्राइलबा हाङ्हाॽरे़ खुन्छिॽ साप्मुःन्धुम् साप्पन्नो साप्ते़आङ् पत्॥ 19 खुने़ॽ आप्फेक् नःम्नःम्बा चोःक्सिङ्मानुःल्ले़ तगि पेलि फाक्तुबा नु निङ्वाॽफुमाङ्ङिल्ले़ आक्खेलॽरिक् खुने़ॽ कुबेलिन् खे़प्सु, हे़क्क्याङ् खुने़ॽ के़रे़क् कुलायोहाॽ नु नसान् ले़क्खुआङ् चोगुबा याःम्बक्हाॽ, थे़गुहाॽओ खुने़ॽ चोगुबा माङ्धाःन्हाॽ नु असेरा माङ् सित्लाङ्हाॽ नु नावाइत्ला ये़प्सुसिबा कन् के़रे़क् पाःन्हाॽ खागे़इक्पाहाॽरे़ खुन्छिॽ साप्मुःन्धुम् साप्पन्नो साप्ते़आङ् पत्॥ 20 मनस्सेन् खुने़ॽ कुसुधे़बा कुदाक्थे़बाहाॽनु सोरिक् तङ्सिङ्से़ पेआङ् खुने़ॽ कुहाङ्हिम्मो मे़जिक्खु॥ खुने़ॽ कुएगाङ् कुस्सा आमोने़न् हाङ् पोःक्से़रो॥ यहुदाबा हाङ् आमोन ( २ हाङ् २१:१९-२६ ) 21 हाङ्युक्नाओ थोःक्सिङ्ङे़ल्ले़ आमोने़न् निबोङ्ङाङ् ने़त्छि तङ्बे योरे़॥ हे़क्क्याङ् खुने़ॽ यरुसले़ःम्मो तङ्बे ने़त्छि हाङ्युक् चोगु॥ 22 खुने़ॽ कुम्बा मनस्सेःल्ले़ चोगुबा कुइसिक् खुने़ॽ यहवे दाङ्बे़ल्ले़ कुनिमो आत्तिन् पाःन्ने़न् ताप्फे़ःम्बा चोगे़ खुने़ॽ हाबा खे़न्ने चोगु॥ खुने़ॽ कुम्बा मनस्सेःल्ले़ चोगुबा के़रे़क् नावाइत्लाहाॽओ सिदुङ्जभा तोःन्दुआङ् खे़ङ्हाॽ से़वा मे़त्तुसि॥ 23 कर खुने़ॽ कुम्बा मनस्सेःल्ले़ चोगुबा कुइसिक् खुने़ॽ यहवे दाङ्बे़ल्ले़ कुदगि नःम्नःम्बा मे़जोःक्सिङ्ङे़न्॥ खुने़ॽ कुभे़न् याःम्बक्किन् आल्लसाङ् छे़न्ना साॽरिक् यरिक् पोःक्खे़॥ 24 आमोनरे़ कुसुहाङ्युक्पाहाॽरे़ खुने़ॽ कुदक्ले़ङ्वाओ चे़म्भन् मे़जोगुआङ् खुने़ॽ आप्फेक् कुहाङ्हिम्मोए मे़स्ये़रु॥ 25 खे़ब्याङ् लाजेॽओबा मनाहाॽरे़ आमोन हाङ्ङिल्ले़ कुदक्ले़ङ्वाओ खे़न् चे़म्भन् के़जोःक्पाहाॽ के़रे़क् मे़स्ये़रुसि, हे़क्क्याङ् खुने़ॽ कुस्सा योसियाहन् हाङ् मे़जोगुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.