२ साप्मुःन्धुम् 32 - लिम्बुसनहेरिबरे़ यरुसले़ःम्मिन् थक्मा साःत्तु ( २ हाङ् १८:१३-३७ ; यसै ३६:१-२२ ) 1 हिजकियाःल्ले़ कन् के़रे़क् नसाःन्साबा याःम्बक्हाॽ चोगु सुरुआङ् अस्सुरबा सनहेरिबे़ल्ले़ यहुदान् थङ्ङो फत्तु॥ खुने़ॽ यहुदाओबा हाङ्यक् के़ने़बा ये़क्यक्हाॽ खुने़ॽ कुयुक्को ताःप्मारे़ लागि खे़न् ये़क्यक्हाॽ कब्रिङ् कुधक्सुबाहाॽ ने़स्सुसि॥ 2 सनहेरिबे़न् फे़रे़आङ् वाॽ हे़क्क्याङ् यरुसले़ःम्मिन् फप्मा निङ्वाॽ निःन्धो चोगुआङ् वाॽ फाॽआङ् हिजकियाःल्ले़ निङ्वाॽ खोसुनुमे़ःन्ने, 3 ये़क्यक्हाॽ लाकात्पा च्वाःत् वबुन्दाक्वाहाॽ साक्मारे़ लागि खुने़ॽ कुसुहाङ्युक्पाहाॽ नु थक्सुबा सुहाङ्युक्पाहाॽ सुजा नाःक्तुसि॥ खे़ङ्हाॽरे़ कन् पाःन्नो खुने़ॽ मे़भाॽरु॥ 4 खे़ङ्हाॽरे़ यरिक् मनाहाॽ मे़सुप्सुसिआङ् लाजेॽलाम् के़बोङ्बार लाङ्गे़घेःक्पा वहःङ् नु के़रे़क् च्वाःत् वबुन्दाक्वाहाॽ चिसाक् मे़साक्तु॥ खे़ङ्हाॽरे़ कम्भे मे़बाःत्तु, “अस्सुरबा हाङ्हाॽ कप्मो मे़भे़न्नाङ् खुन्छिॽ पयो योरुसिर थेआङ् च्वाःत् मे़घोसुरबे?” 5 खे़ब्याङ् हाङ्ङिल्ले़ स्याङ्मे़न्दाङ् ये़क्यक्कोबा लुङ्धाक्हाॽओ के़धुप्पादे़न्हाॽ चाःङ्वा मे़त्तुआङ् खे़प्मो चङ्हिम्हाॽ चोगु॥ लुङ्धाक् लाःक्कात् ले़प्माङ् खुने़ॽ वेॽ लुङ्धाक् से़त्तु हे़क्क्याङ् दाउदरे़ कुये़क्यक् के़दक्पा कुधाॽकुधाॽ लुङ्धाक्हाॽ के़धुम्बा चोगु॥ खुने़ॽ यरिक् फे़जुम्भे़याहाॽ नु खोहाॽआङ् थगु॥ 6 खुने़ॽ मनाहाॽओ थक्सुबा सुहाङ्युक्पाहाॽ युक्तिङ् चोगुसि, खम्भ्याङ् मनाहाॽ ये़क्यक्कोबा मा लाम्धेःत्तोबा लक्खुम्मो सुप्सुसिआङ् अक्खे मे़त्तुसिर खे़ङ्हाॽ आःन्छिङ्मा पिरुसि— 7 “के़धुम्बा नु हाङ्हाङ् के़लॽबा पोःक्खे़म्मे़ॽ॥ अस्सुरबा हाङ्ङिन् नु खुने़ॽ फे़त्तुसिबा खे़न् यरिक् थक्सुबाहाॽरे़ खिनिॽ सिक्लुङ्मो किमा यङ्मा मे़बोङ्ने़न्ल, थेआङ्भे़ल्ले़ खे़ङ्हाॽनुःल्ले़ आल्लसाङ् साॽरिक् मुक्साम्साबाधिक् आनिॽनु वाॽ॥ 8 खे़ङ्हाॽरे़ नासिङ्गे़न् थक्लाओरक् मुक्साम् मे़गत्तु, कर यहवे दाङ्बा आनिॽ निङ्वाॽफुमाङ्ङिन् आनिॽ फाॽमारे़ लागि नु आनिॽ लागि थङ् चोःक्मारे़ लागि खुने़ॽ आनिॽनु वाॽ॥” यहुदाबा हाङ् हिजकियाःल्ले़ कुबाःन्जाक्किल्ले़ चोगुल्ले़ मनाहाॽ हाङ्हाङ् मे़लॽरे़॥ 9 खे़न् एगाङ् अस्सुरबा हाङ् सनहेरिबे़न् नु खुने़ॽ कुधक्सुबाहाॽरे़ लाकिसे़न् कब्रिङ् मे़गबुआङ् मे़ने़स्से़बा ये़म्मो खुने़ॽ यहुदाबा हाङ् हिजकियान् नु यरुसले़ःम्बा के़रे़क् यहुदिहाॽ कन् इङ्घङ्ङिन् हाक्मासि फाॽआङ् सुहाङ्युक्पाहाॽ यरुसले़म पाङ्घु फे़न्छुसि॥ 10 “अस्सुरबा हाङ् सनहेरिबरे़ अक्खे पाःत्तुॽ—कब्रिङ् किर्गप् कप्मना ने़मनाबा यरुसले़म्मो के़युङ्बाहाॽरे़ खिनिॽ आत्तिलाम् आःन्छिङ्मा के़घोसुम्बे? 11 ‘यहवे दाङ्बा खिनिॽ निङ्वाॽफुमाङ्ङिल्ले़ अस्सुरबा हाङ्ङिल्ले़ कुहुक्को थामालाम् के़से़ःप्तिॽ’ लॽरिक् हिजकियाःल्ले़ खिनिॽ के़मेःत्तिल्ले़ खिनिॽ के़युङिबादे़न्नोए वामिःक्मा नु साक्किल्ले़ से़प्मारे़ लागि खे़ल्ले़ खिनिॽ इङ्ले़क्को के़धासिर के़बत्छिॽ॥ 12 थे हिजकियाःल्ले़ खुने़ॽए कन् केःम्ब केःम्बा माङ्धाःन्हाॽ नु ले़त्ति तोःम्मादे़न्हाॽ लुःन्दुदेसुआङ् यहुदा नु यरुसले़ःम्बा मनाहाॽ अक्खे मे़मे़त्तुसिन्नाङ् मे़वये़न्ने़म्बि? ‘लत्छारक् ले़त्ति तोःम्मादे़न्नो माङ्से़वा चोगे़म्मे़ॽ हे़क्क्याङ् खे़प्मोरक् वयागे़न् सिदुङ्जभाहाॽ तोःन्दे़म्मे़ॽ॥’ 13 “आङ्गाॽ नु आङ्गाॽ आम्बा आन्धे़बासिरे़ वेॽ लाजेॽबा के़रे़क् मनाहाॽ थेधे मे़त्तुम्सिम्बे़ थे खे़न् खिनिॽ के़न्निसुम्मिन्बि? थे कन् मे़न्छाम् सुवाङ्हाॽरे़ खुन्छिॽ माङ्हाॽरे़ खुन्छिॽ लाजेॽहाॽ आङ्गाॽ आहुक्को थामालाम् से़ःप्मा मे़सुक्तुबि? 14 आङ्गाॽ आम्बा आन्धे़बासिरे़ युम्रे़क् मे़मे़क्खुसिबा मे़न्छाम् सुवाङ्हाॽरे़ खुन्छिॽ माङ्हाॽओबा आत्तिल्ले़ आङ्गाॽ आहुक्कोलाम् कुमनाहाॽ ताङ्से़ःप्मा सुक्तुसिबे? खे़ब्याङ् आभेलॽरिक् आङ्गाॽ आहुक्कोलाम् खिनिॽ माङ्ङिल्ले़ से़ःप्मा के़सुक्तिॽ? 15 खिनिॽ कम्भलॽरिक् नसान् के़ले़ङ्बा चोःक्मा नु इङ्ले़क्को थामारे़ लागि हिजकियान् सुये़म् मे़बिरे़म्मिन्ने़ॽ॥ खिनिॽ खुने़ॽ नसान् मे़जोगे़म्मिन्ने़ॽ, थेआङ्भे़ल्ले़ आत्तिन् सुवाङ्ङिल्ले़ कुमाङ्ङिल्ले़आङ् खुने़ॽ कुमनाहाॽ आङ्गाॽ इग्र आङ्गाॽ आम्बा आन्धे़बासिरे़ खुन्छिॽ हुक्को थामालाम् से़ःप्मा मे़सुक्तुसिन्निल्ले़, खिनिॽ निङ्वाॽफुमाङ्ङिल्ले़ आङ्गाॽ आहुक्कोलाम् आक्खेआङ् ताङ्से़ःप्मा के़सुक्तिबे!” 16 सनहेरिबे़ल्ले़ कुसुहाङ्युक्पाहाॽरे़ यहवे दाङ्बा निङ्वाॽफुमाङ्ङिन् नु खुने़ॽ कुसे़वारोबा हिजकियाःल्ले़ कुदक्ले़ङ्वाओ आल्लसाङ् छे़न्ना यरिक् मे़बाःत्तु॥ 17 हाङ्ङिल्ले़ आबाङे अक्खे पाःत्तुआङ् यहवे दाङ्बा इस्राइलबा निङ्वाॽफुमाङ्ङिन् कुनामे़न्छाॽ मे़त्तुर अक्तङ्बा साप्पेःत्ताहाॽ साप्तु—“आक्खेलॽरिक् वेॽ लाजेॽबा माङ्हाॽरे़ खुन्छिॽ मनाहाॽ आङ्गाॽ आहुक्को थामालाम् से़ःप्मा मे़न्छुक्तुसिन्, हे़क्केलॽरिक्के हिजकियाःल्ले़ कुनिङ्वाॽफुमाङ्ङिल्ले़आङ् कुमनाहाॽ आङ्गाॽ आहुक्को थामालाम् से़ःप्मासि मे़सुक्तुसिन्ॽ॥” 18 खे़ब्याङ् खे़ङ्हाॽरे़ ये़क्यक्किन् हुक्काप् चोःक्मारे़ लागि यरुसले़म लुङ्धाक्को के़ये़प्पा मनाहाॽ हिब्रु पाःन्दाङ्ङो किमा नु यङ्मासिमो थामासिरे़ लागि यम्बा इक्लाओ प्रअःक् प्रअःक् मे़अःक्ते़॥ 19 मनाहाॽरे़ हुक्किल्ले़ मे़जोगुसिबा इक्सादिङ् खाम्बेःक्मोबा वेॽ मे़न्छाम् याप्मिहाॽरे़ खुन्छिॽ माङ्हाॽ मे़मे़त्तुसिबा हे़क्केए खे़ङ्हाॽरे़ यरुसले़ःम्बा निङ्वाॽफुमाङ्ङिन् मे़मे़त्तु॥ 20 कन् ये़म्मो हिजकिया हाङ्ङिन् नु आमोजरे़ कुस्सा माङ्निङ्वाॽपान् के़बाःप्पा यसैयान् साङ्ग्राम्पेदाङ् ले़प्माङ् अःक्ते़सिआङ् पेलि फाक्ते़सु॥ 21 खम्भ्याङ् यहवे दाङ्बे़ल्ले़ माङ्लाइङ्बाधिक् पाङ्घुयुसुआङ् खे़ल्ले़ अस्सुरबा हाङ्ङिल्ले़ कुसाःङ्गाहिम्हाॽओ के़वाॽबा के़रे़क्, मुक्के़गुबा थङ्गे़जोःक्पाहाॽ, लाम्लोबाहाॽ नु सुहाङ्युक्पाहाॽ वरे़ङ्ले़ङ् युम्रे़क् मे़क्खुसि॥ खे़ब्याङ् सनहेरिबे़न् कुनाध्ये़आङ् आबाङे कुलाजेॽओ नुःक्खे़आङ् पे॥ हे़क्क्याङ् खुने़ॽ कुमाङ्ङिल्ले़न् माङ्हिम्मो लासे़ल्ले़ खुने़ॽ कुस्साहाॽओबा कुभारे़ ताभेःल्ले़ खुने़ॽ मे़ज्ये़प्तु मे़स्ये़रु॥ 22 कम्भलॽरिक् यहवे दाङ्बे़ल्ले़ हिजकियान् नु यरुसले़ःम्बा यक्युङ्बाहाॽ अस्सुरबा हाङ् सनहेरिबे़न् नु खुन्छिॽ वेॽ के़रे़क् निङ्मिहाॽलाम् ताङ्से़ःप्तुसि॥ खुने़ॽ के़रे़क् पिसाङ्लाम् खे़ङ्हाॽ ताप्थेक् याम्धेक् मे़त्तुसि॥ 23 यरिक् मनाहाॽरे़ यरुसले़ःम्मो यहवे दाङ्बे़ल्ले़ कुलागि हुक्वाहाॽ नु यहुदाबा हाङ् हिजकियाःल्ले़ कुलागि इमे़ल्लुङ्बा कुमे़न् के़घिःक्पा मिक्तोःक्हाॽ मे़दारु॥ खे़न् एगाङ् खुने़ॽ के़रे़क् मे़न्छाम् सुवाङ्हाॽलाम् यम्बा मिङ्सो इङ्धाङ् खोसुरो॥ हिजकियाःल्ले़ कुहे़न्छिङ्मा ( २ हाङ् २०:१-३ , १२-१९ ; यसै ३८:१-३ , ३९:१-८ ) 24 खे़न् एगाङ् हिजकियान् सत्ले़माङ्ले़ तुगे़आङ् खुने़ॽ यहवे दाङ्बे़न् पेलि फाक्तु॥ यहवे दाङ्बे़ल्ले़ खुने़ॽ नुगप् पिरुआङ् निङ्वाॽ के़माबा मिक्सेन् थिक् पिरु॥ 25 कर हिजकियान् के़हे़न्छिङ्बा पोःक्खे़आङ् वये़, यहवे दाङ्बे़ल्ले़ खुने़ॽ लुङ्माॽ तुक्तुबाओ नुगे़न्साबा मे़बोःक्खे़न्॥ कल्ले़चोगुल्ले़ खुने़ॽ कुसम्धाङ् हे़क्क्याङ् यहुदा नु यरुसले़म सम्धाङ् यहवे दाङ्बे़ल्ले़ कुसाक्के़न्निन् थ्ये़॥ 26 हिजकियाःल्ले़ कुहे़न्छिङ्मे़ल्ले़ लागि खुने़ॽ नु यरुसले़ःम्मोबा मनाहाॽ लायोलाम् खुन्छिॽ निङ्वाॽ लोसे़॥ खे़ल्ले़चोगुल्ले़ हिजकियाःल्ले़ कुहिङ्हिङ् थारिक्के यहवे दाङ्बे़ल्ले़ कुसाक्के़न्निन् याम्मो खुन्छिॽ सम्धाङ् मे़ध्ये़ने़न्लो॥ हिजकियाःल्ले़ कुयाङ्साकुन्धे नु कुमिमिदिङ् 27 हिजकियाःल्ले़ यरिक् कुयाङ्साकुन्धे कत्तुआङ् वये़ हे़क्क्याङ् मिङ्सोधाःङ्सो खोसुआङ् वये़॥ खुने़ॽ कुसाम्म्याङ् नु कुयुप्पा, इमे़ल्लुङ्बा मुधिङ्लुङ्हाॽ नु मारुक्हाॽ, खोहाॽ नु वेॽ कुमे़न् के़घिःक्पा सामाहाॽरे़ लागि थाःङ्हाॽ चोगु॥ 28 पोगुगे़न् कुजा, कुबोक् चे़ल्ले़क्सेॽ सेजःङ्वा नु निःङ्गेॽरे़ लागि चाधाःङ्हाॽ हे़क्क्याङ् वेॽवेॽ परिक्पा थक्साहाॽरे़ लागि पित् ये़प्ना नु मे़ल्लुक् मे़ःन्दाहाॽरे़ लागि खरहाॽआङ् खुने़ॽ चोगु॥ 29 खुने़ॽ यरिक् पित्थक्सा लुप्हाॽ नु मे़ल्लुक् मे़ःन्दा लुप्हाॽआङ् फुक्खुसि, थेआङ्भे़ल्ले़ निङ्वाॽफुमाङ्ङिल्ले़ खुने़ॽ से़क्खाए यरिक् याङ्साकुन्धे पिरुआङ् वये़॥ 30 आम्भा कन् हिजकियाःल्ले़ए गिहोन च्वाःत् वाबुन्दाक्वान् थोहाङ् ले़प्माङ् साक्तुआङ् योहाङ् ले़प्माङ् दाउदरे़ कुये़क्यक्किल्ले़ नाम्धा पिसाङ् हिमा तेॽमा पाङ्घुसिआङ् वये़॥ से़क्खाए खुने़ॽ चोगुबा के़रे़क् याःम्बक्हाॽ कुलिङ्दो के़रे़॥ 31 कर बेबिलोनबा युक्साबाहाॽरे़ मे़बाङ्घुसिबा हाङ्लाइङ्बाहाॽ लाजेॽओ निदे़त्ते़बा निङ्वाॽ के़माबा मिक्सेःन्निल्ले़ कुयाःम्बेओ पान् सेःन्दोसे़ मे़भे़रे़ल्ले़ निङ्वाॽफुमाङ्ङिल्ले़ हिजकियान् कुनिङ्वाॽ साॽमा नु कुनिङ्वाॽओबा के़रे़क् पाःन्हाॽ निङ्वाॽ खोमारे़ लागि ले़रुआङ् वये़रो॥ 32 हिजकियाःल्ले़ कुहाङ्युक् ये़म्मोबा वेॽ हिन्दोक्हाॽ नु खुने़ॽ चोगुबा माङ्से़वा याःम्बक्हाॽ यहुदा नु इस्राइलबा हाङ्हाॽरे़ खुन्छिॽ साप्मुःन्धुम् साप्पन्नो के़बप्पा आमोजरे़ कुस्सा माङ्निङ्वाॽपान् के़बाःप्पा यसैयाःल्ले़ कुसुफोओ साप्ते़आङ् पत्॥ 33 हिजकियान् कुसुधे़बा कुदाक्थे़बाहाॽनु सोरिक् तङ्सिङ्से़ पेआङ् खुने़ॽ दाउदरे़ कुमुॽइदाङ्साहाॽरे़ खुन्छिॽ इपुङ्ङो के़ने़बा थे़गुओ खुने़ॽ मे़जिक्खु॥ खुने़ॽ मासिङ्बाओ के़रे़क् यहुदा नु यरुसले़ःम्बा मनाहाॽरे़ खुने़ॽ सोधुङ्हुक्वा मे़बिरु, हे़क्क्याङ् खुने़ॽ कुएगाङ् कुस्सा मनस्सेन् हाङ् पोःक्खे़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.