२ साप्मुःन्धुम् 31 - लिम्बु1 कन् सोसोःत्लराङ्ङिन् चुरे़ल्ले़ खे़प्मो के़जुम्बा काक् इस्राइलिहाॽ यहुदाबा ये़क्यक्हाॽओ मे़बेआङ् खे़ङ्हाॽ के़रे़क् युम्रे़क् मे़म्मे़ङ्ङे थारिक् खे़ङ्हाॽरे़ सेसे लुङ्हाॽ कुम्जिक्मा मे़यःप्सु हे़क्क्याङ् असेरा माङ् नावाइत्लाहाॽ मे़लुःन्दु मे़देसु॥ के़रे़क् यहुदा नु बेन्यामिन हे़क्क्याङ् एफ्राइम नु मनस्सेबा केःम्ब केःम्बा माङ्धाःन्हाॽ नु ले़त्ति तोःम्मादे़न्हाॽ मे़यन्छु मे़देसु॥ खे़म्म्याक् मे़जोगु मे़सुरुआङ् इस्राइलिहाॽ के़रे़क् खुन्छिॽ आप्फेक् ये़क्यक्हाॽओ नु पालाम्बाबा लाजेॽओ मे़नुःक्खे़ मे़बेरो॥ माङ्सेवारे़ लागि कुजा मे़दारु 2 खे़न् एगाङ् हिजकियाःल्ले़ निङ्वाॽफुसाम्बाहाॽ नु ले़बिहाॽ खुन्छिॽ याःम्बक् कुइसिक् निङ्वाॽफुसाम्बाहाॽ इग्र ले़बिहाॽ कुलुप् कुलुप् चोगुसिआङ् मिधिङ्मनादेमनाबा वयागे़न् सिदुङ्जभा तोःम्मारे़ लागि, तङ्जुम् सिदुङ्जभा तोःम्मारे़ लागि, माङ्से़वा चोःक्मारे़ लागि, नुगे़न् पिमारे़ लागि नु यहवे दाङ्बे़ल्ले़ कुहिम्मोबा लाम्धेःत्हाॽओ कुनारा फोमारे़ लागि खुन्छिॽ चोःक्मा के़बोङ्बा याःम्बक्हाॽओ खुने़ॽ खे़ङ्हाॽ मुरा मे़त्तुसि॥ 3 तानाम् नु युःन्छिक् मिधिङ्मनादेमनाबा वयागे़न् सिदुङ्जभारे़ लागि, हे़क्क्याङ् सबाथ, लादुप् नु चोःक्मा निःन्धो के़बोङ्बा तङ्नाम्हाॽरे़ लागि यहवे दाङ्बे़ल्ले़ कुसाम्योथिम्मो साप्ते़आङ् के़बप्पा कुइसिक् हाङ्ङिल्ले़ खुने़ॽ कुयाङ्सा कुन्धेहाॽओलाम् लःत्तु पिरुसि॥ 4 निङ्वाॽफुसाम्बाहाॽ नु ले़बिहाॽरे़ यहवे दाङ्बे़ल्ले़ए कुसाम्योथिम्मिन् चक्मे़ल्लॽए मे़नाःत्तुर फाॽआङ् हाङ्ङिल्ले़ यरुसले़ःम्मो के़युङ्बा मनाहाॽरे़ लःप्मा के़बोङ्बा लक्हाॽ खुन्छिॽ मे़लःत्तुर फाॽआङ् मे़त्तुसि॥ 5 हाङ्ङिल्ले़ इस्राइलिहाॽ इङ्जाङ् पिरुसिनुमे़ःन्ने खे़ङ्हाॽरे़ खुन्छिॽ पोगुगे़न् कुजा, कुबोक् चे़ल्ले़क्सेॽ थि, जैतुन निःङ्गेॽ नु सक्वाघु हे़क्क्याङ् खाम्बेःक्को के़धोःक्पा तगि के़दुम्बा कुजाहाॽ हुक्वा मे़दारु॥ खे़ङ्हाॽरे़ वे़त्ते़सरे़ कुजाहाॽ के़रे़र थिबोङ्लक् मे़दारु॥ 6 इस्राइल नु यहुदा हे़क्क्याङ् यहुदाबा ये़क्यक्को के़युङ्बा मनाहाॽरे़आङ् पित्थक्साहाॽरे़न् थिबोङ्लक् नु यहवे दाङ्बा खुन्छिॽ निङ्वाॽफुमाङ्ङो मे़दोन्दुबा के़रे़क् कुजाहाॽरे़न् थिबोङ् लक्हाॽ मे़दारुआङ् मे़लुप्सु॥ 7 खे़ङ्हाॽरे़ सुम्सिगेक्पा लाओ लुम्मा मे़हेःक्तुआङ् नुसिगेक्पा लाओ मे़सुरु॥ 8 हिजकियान् हे़क्क्याङ् खुने़ॽ कुसुहाङ्युक्पाहाॽ मे़द्ये़आङ् खे़न् मे़लुप्सुबा कुजाहाॽ मे़निसुल्ले़ खे़ङ्हाॽरे़ यहवे दाङ्बे़न् नु खुने़ॽ कुमना इस्राइलिहाॽ नुगे़न् मे़बिरुसि॥ 9 कन् मे़लुप्सुबा पाःन्हाॽरे़ कुयाःम्बेओ हिजकियाःल्ले़ निङ्वाॽफुसाम्बाहाॽ नु ले़बिहाॽ सेःन्दोसुसि॥ 10 सादोकरे़ कुधाःक्कोबा मानिङ्वाॽफुसाम्बा अजर्याहःल्ले़ नुगप् पिरु, “मनाहाॽरे़ यहवे दाङ्बे़ल्ले़ कुहिम्मो खुन्छिॽ आप्फेक् आप्फेक् हुक्वाहाॽ मे़दारुबा ये़म्माङ्धो चामारे़ लागि आनिगे पयो योरिगे़आङ् नरे़आङ्ङाङ् वाॽ, थेआङ्भे़ल्ले़ कन् यरिक् पाःन्हाॽ नरे़आङ् वाॽर थारिक् यहवे दाङ्बे़ल्ले़ खुने़ॽ कुमनाहाॽ यरिक् हाङ्वागे़न् मुॽइसाम् पिरुसिआङ् वाॽ॥” 11 खे़ब्याङ् यहवे दाङ्बे़ल्ले़ कुहिम्मो चाधाःङ्हाॽ यारिप् चोःक्मारे़ लागि इङ्जाङ् पिरुसिआङ् खे़ङ्हाॽ यारिप् मे़जोगु॥ 12 हे़क्क्याङ् मनाहाॽरे़ निरिक्काङ् खुन्छिॽ आबाङे आबाङे हुक्वाहाॽ, थिबोङ् लक्हाॽ नु खे़ङ्हाॽरे़ मे़लःत्तुबा पाःन्हाॽ मे़दारु॥ खे़न् पाःन्हाॽ के़दे़म्बा के़जोःक्पा लक्पे़न्साबा ले़बि कोनन्याहन् वये़, हे़क्क्याङ् कुन्साॽ सिमिन् खुने़ॽ कुसिःक्तोबा कुभाॽबाङ् वये़॥ 13 हिजकिया हाङ्ङिन् नु निङ्वाॽफुमाङ्ङिल्ले़ कुहिम्मोबा सुहाङ्युक्पा अजर्याहःल्ले़ कोनन्याहन् नु खुने़ॽ कुन्साॽ सिमिन् फाॽमारे़ लागि यहिएल, अजज्याह, नहत, असाहेल, यरिमोत, योजाबाद, एलिएल, यिस्मक्याह, महत नु बनायाहन् युक्तिङ् चोगुसिआङ् वये़॥ 14 यहवे दाङ्बे़न् मे़बिरुबा पाःन्हाॽ नु मे़लःत्तुबा हुक्वाहाॽ फःङ्मारे़ लागि निङ्वाॽफुमाङ्ङिल्ले़ कुलागि मे़दारुबा निङ्वाॽलाम्बाबा हुक्वाहाॽ ले़बि यिम्नाःल्ले़ कुस्सा नाङ्गे़न् लाम्धेःत्तोबा लाम्धेत् के़गोबा कोरे़ःल्ले़ कुलक्पे़न्नो वये़॥ 15 कुलुप् कुलुप् कुइसिक् यम्बा नु चुक्पा निङ्वाॽफुसाम्बाहाॽ के़लाॽबा खोमा लक् फःङ्मा पिमासिरे़ लागि निङ्वाॽफुसाम्बाहाॽरे़ खुन्छिॽ ये़क्यक्हाॽओ अदन, मिन्यामिन, येसुअ, समायाह, अमर्याह नु सकन्याहःल्ले़ निरिक्काङ् कोरे़न् मे़भाॽरु॥ 16 मिङ्स्राओ खुन्छिॽ मिङ् साप्ते़बा यहवे दाङ्बे़ल्ले़ कुहिम्मो चक्मे़ल्लॽए के़बप्पाआङ् याःम्बक् के़जोःक्पा तङ्बे सुम्सि के़योबा नु खे़न्नाङ्धो यरिक् तङ्बे के़गे़प्पा ये़म्बित्छाहाॽ के़रे़क् खुन्छिॽ लुप् नु खुन्छिॽ लक्पे़न् कुइसिक् खोमा लक्किन् खे़ङ्हाॽरे़ मे़भःक्खु मे़बिरुसि॥ 17 खे़न्नु सोसोरिक् मिङ्स्राओ खुन्छिॽ आप्फेक् आप्फेक् हिम्सयङ् कुइसिक् खुन्छिॽ मिङ् साप्ते़आङ् के़बप्पा निङ्वाॽफुसाम्बाहाॽ नु निबोङ् तङ्बे के़योबा हे़क्क्याङ् खे़न्नुःल्ले़ यरिक् तङ्बे के़योबा ले़बिहाॽ के़रे़क् खुन्छिॽ आप्फेक् लुप्पो नु लक्पे़न् कुइसिक् खुन्छिॽ खोमा लक्हाॽ खे़ङ्हाॽरे़ मे़भःक्खु मे़बिरुसि॥ 18 कन् मिङ्स्राओबा साप्पन्हाॽओ मिङ् साप्ते़आङ् के़बप्पा के़रे़क् सङ्जुम्भोओ, खे़ङ्हाॽरे़ खुन्छिॽ मेःत्हाॽ नु खुन्छिॽ ये़म्बित्छा मे़न्छुमा साहाॽआङ् काक् लक् मे़भःक्खु मे़बिरुसिआङ् वये़॥ थेआङ्भे़ल्ले़ खे़ङ्हाॽरे़ आप्फेक् आप्फेक् थिम् के़रे़र सेसेसाङ्साङ् मे़जोःक्सिङ्॥ 19 हे़क्क्याङ् ये़क्यक्हाॽरे़ कुयाकुयाबा पाङ्जुम्हाॽओ नु वेॽ कुभा पाङ्भेॽओ के़युङ्बा हारुनरे़ कुधाःक्कोबा निङ्वाॽफुसाम्बाहाॽलाम् ये़म्बित्छा थक्मा नु ले़बिहाॽरे़ खुन्छिॽ मिङ्स्राओ मिङ् साप्ते़आङ् के़बप्पा निङ्वाॽफुसाम्बाहाॽआङ् के़रे़क् खुन्छिॽ आप्फेक् आप्फेक् लक् पिमासिरे़ लागि मनाहाॽ मुरा मे़मे़त्तुसि॥ 20 हिजकियाःल्ले़ यहुदा के़रे़क्के कम्भलॽरिक् याःम्बक् चोगु॥ यहवे दाङ्बा खुने़ॽ कुनिङ्वाॽफुमाङ्ङिल्ले़ कुनिमो थेःन् नुबा, कुदोःप्मा नु नसाःन्साबा वये़, खुने़ॽ खे़ङ्हाॽए चोगु॥ 21 यहवे दाङ्बे़ल्ले़ कुहिम्मोबा माङ्से़वा याःम्बक्को नु खुने़ॽ कुनिङ्वाॽफुमाङ्ङिल्ले़ कुसाम्योथिम्मिन् हे़क्क्याङ् कुधिम्हाॽ इःत्तु नाःत्तुआङ् चोगुबा के़रे़क् याःम्बक्हाॽओ खुने़ॽ कुनिङ्वाॽफुमाङ्ङिन् हक्सुआङ् के़रे़क् निङ्वाॽरे़ याःम्बक् चोगु॥ हे़क्क्याङ् खुने़ॽ कुलिङ्दो के़गे़प्पा पोःक्खे़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.