२ साप्मुःन्धुम् 30 - लिम्बुहिजकियाःल्ले़ चोःक्युम्भो खोमा तङ्नाम् तोसु 1 हिजकियाःल्ले़ यरुसले़ःम्मो यहवे दाङ्बा इस्राइलबा निङ्वाॽफुमाङ्ङिल्ले़ कुलागि चोःक्युम्भो खोमा तङ्नाम्मिन् यहवे दाङ्बे़ल्ले़ कुहिम्मो तोमा फाॽआङ् के़रे़क् उःत्तुसि हे़क्क्याङ् के़रे़क् इस्राइल नु यहुदाओ इङ्घङ् हाक्तुसिआङ् एफ्राइम नु मनस्सेःन्नाङ् सक्इङ्घङ् साप्तुआङ् हाक्तुसि॥ 2 हाङ्ङिन्, खुने़ॽ कुसुहाङ्युक्पाहाॽ नु यरुसले़ःम्मो के़जुम्बा के़रे़क् सङ्जुम्भोबा मनाहाॽरे़ निसिगेक्पा लाओ चोःक्युम्भो खोमा तङ्नाम्मिन् तोमा निःन्धो मे़जोगु॥ 3 खे़ङ्हाॽरे़ थिम् कुइसिक् निःन्धो के़बोङ्बा ये़म्मो तङ्नाम्मिन् तोमा मे़न्छुक्के मे़वये़, थेआङ्भे़ल्ले़ यरिक् कुसिङ् निङ्वाॽफुसाम्बाहाॽ खुन्छिॽ आप्फेक् सेसेसाङ्साङ् मे़न्जोःक्सिङ्ङे मे़वये़, हे़क्क्याङ् मनाहाॽआङ् यरुसले़ःम्मो मे़न्जुम्मे मे़वये़॥ 4 कन् पाःन्निन् हाङ्ङिन् नु के़रे़क् सङ्जुम्भोबा मनाहाॽरे़ खुन्छिॽ सिराॽथाङे़॥ 5 खे़ब्याङ् खे़ङ्हाॽरे़ बेर्सेबाआङ्धो दान थारिक्के यहवे दाङ्बा इस्राइलबा निङ्वाॽफुमाङ्ङिल्ले़ कुलागि चोःक्युम्भो खोमा तङ्नाम् तोसे़ मनाहाॽ यरुसले़ःम्मो मे़दारए पोङ्ॽ फाॽआङ् इस्राइल के़रे़क् उवा चोःक्मा निःन्धो मे़जोगु॥ कन्नुःल्ले़ तगि निःन्धो के़बोङ्बा थिम् कुइसिक् कम्भ्यारिक् यरिक्ले़ कन् तङ्नाम्मिन् मे़न्दोए मे़वये़॥ 6 हिजकियाःल्ले़ कुइङ्जाङ् कुइसिक् हाङ्ङिन् नु खुने़ॽ कुसुहाङ्युक्पाहाॽलाम् अक्तङ्बा उवा-सक्किन् मे़देॽरुआङ् इङ्साबाहाॽ इस्राइल के़रे़क् नु यहुदा के़रे़क् मे़बेरो— “इस्राइलबा मनासे, अब्राहाम, इसहाक नु इस्राइलबा यहवे दाङ्बा निङ्वाॽफुमाङ् ले़प्माङ् खिनिॽ नुःक्खे़म्मे़ॽ, हे़क्क्याङ् अस्सुरबा हाङ्हाॽरे़ खुन्छिॽ हुक्कोलाम् के़घे़त्छिङ्बाहाॽ ले़प्माङ् खुने़ॽआङ् नुःङ्लरो॥ 7 खिनिॽ पाधे़बाहाॽ नु खिनिॽ इस्राइलि फुॽनुसाॽहाॽ हे़क्तङ्बा मे़बोःक्खे़म्मिन्ने़ॽ॥ खे़ङ्हाॽग यहवे दाङ्बा खुन्छिॽ निङ्वाॽफुमाङ्ङिल्ले़ कुदक्ले़ङ्वाओ नसान् के़ले़ङ्बा मे़बोःक्खे़, खम्भ्याङ् यहवे दाङ्बे़ल्ले़ खे़ङ्हाॽ किमा यङ्मा चाहाक् चोगुसि॥ खे़न् खिनिॽ आबाङे के़निसुम्॥ 8 खिनिॽ पाधे़बाहाॽ हे़क्के खिनिॽआङ् पान् मे़ङ्घे़म्मनाबा मे़बोःक्खे़म्मिन्ने़ॽ॥ यहवे दाङ्बाओ खिनिॽ आप्फेक् तोःन्नासिम्मे़ॽआङ् खुने़ॽ आभे़ल्ले़साङ् सदादिङ्ले़ लागि सेसे चोगुबा खुने़ॽ कुसेसेदे़न्नो लासाम्मे़ॽ॥ यहवे दाङ्बा खिनिॽ निङ्वाॽफुमाङ्ङिन् माङ्से़वा मे़त्ते़म्मे़ॽ, हे़क्क्याङ् खुने़ॽ किप्मा पघुगे़घुबा कुसाक्के़न्निन् खिनिॽलाम् थिक्नाहाङ् हिसिङ् पेःक्ल॥ 9 यहवे दाङ्बा ले़प्माङ् खिनिॽ के़नुःक्खिने़भग्र खिनिॽ फुॽनुसाॽहाॽ नु खिनिॽ साएहाॽ के़दे़म्बा के़देॽबाहाॽरे़ खे़ङ्हाॽ नुरिक् मे़मे़त्तुसि, हे़क्क्याङ् खे़ङ्हाॽ कन् लाजेॽओ मे़नुःङ् मे़भे़न्ॽ॥ थेआङ्भे़ल्ले़ यहवे दाङ्बा खिनिॽ निङ्वाॽफुमाङ्ङिन् के़नुॽबा नु लुङ्माॽ आदुक्तुक्पा चोक्॥ खिनिॽ खुने़ॽ ले़प्माङ् के़नुःक्खिने़भग्र खुने़ॽ खिनिॽलाम् मे़नुःङ्ने़न् मे़बेःक्ने़न्॥” 10 खे़ब्याङ् खे़न् इङ्साबाहाॽ एफ्राइम नु मनस्सेबा लाजेॽ कुले़ःम् ये़क्यक् ये़क्यक्हाॽओ मे़बोःक्खे़र जबुलुन थे़म्बाए मे़बे॥ कर मनाहाॽरे़ खे़ङ्हाॽ कुनामे़न्छाॽ मे़मे़त्तुसिआङ् मे़येःत्तुसि॥ 11 खम्भसाङ् आसेर, मनस्से नु जबुलुनबा कुभा कुभा मनाहाॽ आबाङे मे़नःम्सिङ्ङाङ् यरुसले़म मे़ये़॥ 12 कन्नुःल्ले़ वेॽ हाङ्ङिन् नु खुने़ॽ कुसुहाङ्युक्पाहाॽरे़ यहवे दाङ्बे़ल्ले़ कुबाःन्जाक् कुइसिक् पिरुसिबा इङ्जाङ्ङिन् थिक्हुप् पोङ्माआङ् इःप्मा नाःप्मारे़ लागि यहुदाबा मनाहाॽओ निङ्वाॽफुमाङ्ङिल्ले़ कुहुक् वये़रो॥ चोःक्युम्भो खोमा तङ्नाम् 13 निसिगेक्पा लाओ के़भङ्बा सिदाॽ मे़न्याक्केबा खरे़ःङ् तङ्नाम् तोसे़ साॽरिक् यरिक् मनासुम्हाॽ यरुसले़ःम्मो मे़जुप्से़॥ 14 खे़ङ्हाॽरे़ यरुसले़ःम्मो के़युङ्बा ले़त्ति तोःम्मादे़न्हाॽ मे़घे़त्तु मे़देसु, हे़क्क्याङ् सुक्पा हाःम्मा ले़त्ति तोःम्मादे़न्हाॽआङ् मे़घे़त्तु मे़देसुआङ् खे़ङ्हाॽ किद्रोन हःङ्गुओ लाप्पुङ् मे़देसु॥ 15 खे़ङ्हाॽरे़ निसिगेक्पा लाओबा थिबोङ्ङाङ् लिसिगेक्पा ये़न्नो चोःक्युम्भो खोमा तङ्नाम्मोबा मे़ल्लुक्किन् मे़स्ये़रु॥ निङ्वाॽफुसाम्बाहाॽ नु ले़बिहाॽ साॽरिक् मे़नुःन्दे़ हे़क्क्याङ् खुन्छिॽ लुम्मो आप्फेक् सेसेसाङ्साङ् मे़जोःक्सिङ्ङाङ् यहवे दाङ्बे़ल्ले़ कुहिम्मो मिधिङ्मनादेमनाबा वयागे़न् सिदुङ्जभाहाॽ मे़दारु॥ 16 खे़ब्याङ् निङ्वाॽफुमाङ्ङिल्ले़ कुमना मोसाःल्ले़ पिरुसिबा साम्योथिम् कुइसिक् खे़ङ्हाॽ खुन्छिॽ आबाङे आबाङेबा ताक्फाओ मे़युङ्सिङ्॥ ले़बिहाॽलाम् मे़दाःक्तुबा सामाक्खिन् निङ्वाॽफुसाम्बाहाॽरे़ ले़त्ति तोःम्मादे़न्निल्ले़ कुयाम्ले़ङ्बो छ्वाःक् लॽरिक् मे़हुक्खु मे़देसु॥ 17 कर सङ्जुम्भोबा यरिक् कुसिङ् मनाहाॽ खुन्छिॽ आप्फेक् लुम्मो सुत्थो मे़न्जोःक्सिङ्ङे मे़वये़॥ कल्ले़चोगुल्ले़ यहवे दाङ्बे़ल्ले़ कुदगि खुन्छिॽ मे़ल्लुक्हाॽ सुत्थो चोःक्मा मे़न्छुक्मनाबा कन् आसुत्थो के़बोङ्बा के़रे़क्ले़ खुन्छिॽ लागि चोःक्युम्भो खोमा तङ्नाम्मोबा थुःम्बाहाॽ ले़बिहाॽरे़ से़प्मासि के़बोङ्बा पोःक्से़॥ 18 एफ्राइम, मनस्से, इस्साखार नु जबुलुनलाम् के़युबा यरिक् मनाहाॽ थिम् कुइसिक् सेसेसाङ्साङ् मे़म्बोङ्ङे मे़वये़॥ हे़क्केसाङ् खे़ङ्हाॽरे़ थिम् मे़ङ्गे़त्ते चोःक्युम्भो खोमा तङ्नाम्मिन् मे़दोसु॥ कर हिजकियाःल्ले़ अक्खे पाःत्तुआङ् खे़ङ्हाॽरे़ खुन्छिॽ लागि पेलि फाक्तु पिरुसि, 19 “सेसेदे़न्नोबा सुत्थो पोङ्मा थिम्हाॽ कुभारे़ मे़न्इःत्ते मे़न्नाःत्ते मे़वाॽसाङ् यहवे दाङ्बा खुन्छिॽ पाधे़बाहाॽरे़न् निङ्वाॽफुमाङ्ङिन् के़रे़क् सिक्लुङ्मारे़ मे़ङ्गोःत्ते मे़ल्ले़प्मनाबाहाॽ के़रे़क् यहवे दाङ्बे़ल्ले़ ले़प्मि पिरुसिररो॥” 20 हे़क्क्याङ् यहवे दाङ्बे़ल्ले़ हिजकियाःल्ले़ कुबेलिन् खे़प्सुआङ् मनाहाॽ वेःन्दुसि॥ 21 यरुसले़ःम्मो के़जुम्बा इस्राइलिहाॽरे़ नुसि ये़न् थारिक् साॽरिक् मे़सःत्ते़आङ् ससाङ्स्रोत् मे़जोगे़र के़भङ्बा सिदाॽ मे़न्याक्केबा खरे़ःङ् चामा तङ्नाम्मिन् मे़दोसु॥ हन्नाङ् ले़बिहाॽ नु निङ्वाॽफुसाम्बाहाॽरे़ यहवे दाङ्बे़ल्ले़ कुमुक्लाहाॽनु सोसोरिक् थिक्याःन्धक्मा खुन्छिॽ सिक्समे़र यहवे दाङ्बे़ल्ले़ कुनारा मे़भोसु॥ 22 यहवे दाङ्बे़न् माङ्से़वा मे़प्मा याःम्बक्किल्ले़ कुयाःम्बेओ कुजे़क्पा निङ्वाॽ के़गप्पा ले़बिहाॽ हिजकियाःल्ले़ आःन्छिङ्मा पाःन्जाःक् मे़त्तुसि॥ कम्भलॽरिक् खे़ङ्हाॽरे़ तङ्नाम्बा नुसि ये़न् थे़ल्लिक् तङ्जुम् वयागे़न् सिदुङ्जभाहाॽ मे़दोन्दुर, यहवे दाङ्बा खुन्छिॽ पाधे़बाहाॽरे़न् निङ्वाॽफुमाङ्ङिल्ले़ कुनारा मे़भोसु हे़क्क्याङ् खुन्छिॽ लागि मे़जॽरुबा लक्हाॽ मे़जआङ् ये़म् मे़देसु॥ 23 के़रे़क् सङ्जुम्भोबा मनाहाॽ आल्लसाङ् वेॽ नुसि ये़न् थारिक् तङ्नाम् तोमा मे़दे़न्दे़॥ कल्ले़चोगुल्ले़ खे़ङ्हाॽरे़ मे़सःत्ते़र वेॽ नुसि ये़न् थारिक् तङ्नाम् मे़दोसु॥ 24 यहुदाबा हाङ् हिजकियाःल्ले़ सङ्जुम्भोहाॽरे़ लागि १,००० से़गम्बा पित्हाॽ नु ७,००० मे़ल्लुक् मे़ःन्दाहाॽ, हे़क्क्याङ् सुहाङ्युक्पाहाॽरे़ सङ्जुम्भोहाॽरे़ लागि १,००० से़गम्बा पित्हाॽ नु १०,००० मे़ल्लुक् मे़ःन्दाहाॽ मे़दारु मे़बिरुसिआङ् वये़॥ निङ्वाॽफुसाम्बाहाॽ खुन्छिॽ यरिक् खानिःत्तो आबाङे आबाङे सेसेसाङ्साङ् मे़जोःक्सिङ्॥ 25 यहुदाबा के़रे़क् मनाहाॽ, निङ्वाॽफुसाम्बाहाॽ, ले़बिहाॽआङ् सोरिक्, हे़क्क्याङ् इस्राइललाम् के़युबा के़जुम्बा के़रे़क् इस्राइल नु यहुदा के़युङ्बा वेॽ लाजेॽबाहाॽआङ् सोसोत्लराङ् मे़जोगे़॥ 26 यरुसले़ःम्मो साॽरिक् यम्बा सोसोत्लराङ् पोःक्खे़ थेआङ्भे़ल्ले़ हे़क्तङ्बाग इस्राइलबा हाङ् दाउदरे़ कुस्सा सोलोमनरे़ कुये़म्माङ्धो कॽयो अक्खे पोःक्खे़बा होःप्ते़॥ 27 निङ्वाॽफुसाम्बाहाॽ नु ले़बिहाॽ मनाहाॽ हाङ्वामुॽइ पिमासिरे़ लागि थःप्पे़त् मे़ये़म्सिङ्, हे़क्क्याङ् निङ्वाॽफुमाङ्ङिल्ले़ खुन्छिॽ पेलिन् खे़प्सु, थेआङ्भे़ल्ले़ खे़ङ्हाॽरे़ खुन्छिॽ पेलिन् साङ्ग्राम्पेदाङ्ङो निङ्वाॽफुमाङ्ङिल्ले़ सेसेबा कुयुङ्मादे़न्नो थारिक्के के़रे़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.