२ साप्मुःन्धुम् 3 - लिम्बुसोलोमनरे़ माङ्हिम् चोगुॽ 1 खे़ब्याङ् सोलोमनरे़ कुम्बा दाउद हाङ्ङिल्ले़ माङ्हिम् चोःक्मा यारिप् चोगुसुरुआङ् वये़॥ खे़न् ते़न्निन् यरुसले़ःम्मोबा मोरियाह कोःक्माओ ने़स्से़, खे़प्मो यबुसि अरौनाःल्ले़ कुजा थाम्मादे़न् ने़स्से़, खे़प्मो यहवे दाङ्बे़ल्ले़ दाउदे़न् सुफो पिरुआङ् वये़॥ खे़न् ते़न्नो सोलोमनरे़ यहवे दाङ्बे़ल्ले़ कुहिम् चोःक्मा हेःक्तु॥ 2 खुने़ॽ हाङ्युक् चोगुबा लिसिगेक्पा तङ्बे निसिगेक्पा ला निसिगेक्पा ये़न्नो खे़न् चोःक्मा हेःक्तु॥ 3 निङ्वाॽफुमाङ्ङिल्ले़ कुहिम् चोःक्मारे़ लागि सोलोमनरे़ पाङ्यक्किल्ले़ कुबुङ् युक्खुबान् अक्तङ्बा चोगे़—तगिबा हुक्सिक् कुइसिक् कुलाम्ति तुक्पोङ् हुक्सिक् नु कुभे़रे़ निबोङ् हुक्सिक् ने़स्से़॥ 4 माङ्हिम्मिल्ले़ कुदगि खे़ल्ले़ कुभे़रे़ यारिक्के निबोङ् हुक्सिक् कुलाम्ति नु निबोङ् हुक्सिक् कुभे़रे़ केःम्बा आःम्भो ने़स्से़॥ सिगाङ् ले़प्माङ्बान् खुने़ॽ इसेःङ्बा साम्म्याङ्ङिल्ले़ सुःप्तु॥ 5 खुने़ॽ चुम्लुङ् चोःक्मादे़न् यम्बा याक्फाङ्ङोबा लुङ्धाक्को आःङ् सिङ्भे़ल्ले़क्हाॽ फत्छु, हे़क्क्याङ् खे़न् इसेःङ्बा साम्म्याङ्ङिल्ले़ सुःप्तुआङ् खे़प्मो खे़बक्सिङ् सिङ्बुङ्हाॽ नु सिक्क्रिहाॽ कुभुङ् लक्तु॥ 6 खे़ल्ले़ कुघे़म्सिङ्मारे़ लागि खुने़ॽ खे़न् माङ्हिम्मिन् कुमे़न् के़घिःक्पा मुधिङ्लुङ्हाॽरे़ खे़घे़म्सिङ्बा चोगु॥ खे़प्मो खुने़ॽ पर्वेमलाम् मे़धाक्तुबा साम्म्याङ्हाॽ ओगप् चोगु॥ 7 खुने़ॽ खे़प्मोबा पे़रे़म्सिङ्हाॽ, लाम्धेत् ये़प्नाहाॽ, लुङ्धाक्हाॽ नु लाम्धेःत्हाॽ साम्म्याङ्ङिल्ले़ सुःप्तु, हे़क्क्याङ् खुने़ॽ लुङ्धाक्हाॽओ करुबहाॽ कुभुङ् लक्तुआङ् फत्छुसि॥ 8 खुने़ॽ माङ्हिम्मिल्ले़ कुभे़रे़ कुइसिःक्के साॽरिक् सेसेबादे़न्निन् निबोङ् हुक्सिक् कुलाम्ति नु निबोङ् हुक्सिक् कुभे़रे़ के़ने़बा चोगु॥ खुने़ॽ सिगाङ् ले़प्माङ् किप् तुक्सि तेलेन्त इसेःङ्बा साम्म्याङ्ङिल्ले़ खे़न् सुःप्तु॥ 9 कुधे़प्मा साम्म्याङ्हाॽ कुभ्रे़ःङ् किलोग्राम यारिक् के़लिःप्पा चोगे़॥ खुने़ॽ थाःङ्समा कुलक्हाॽआङ् साम्म्याङ्ङिल्ले़ सुःप्तु॥ 10 खुने़ॽ के़रे़क्नुःल्ले़ साॽरिक् सेसेबादे़न्नो करुब ने़त्छिरे़ कुइत्छाप्हाॽ लक्तुआङ् साम्म्याङ्ङिल्ले़ सुःप्तु॥ 11 कन् ने़त्छि करुबहाॽरे़ खुन्छिॽ लाप्हाॽ थिक् कुयाओनु वेॽसमा कुयाओ थारिक् निबोङ् हुक्सिक् थे़म्बा हप्फे़ फे़सिङ्ङाङ् पत्छे़॥ लत्छा करुबरे़ कुलाप् थिक्के़न् हुक्सिक् ङासि पत्छे़, हे़क्क्याङ् माङ्हिम् लुङ्धाक्किन् सुसु॥ खे़ल्ले़ वेॽ कुलाप्पिन् वेॽ करुबे़ल्ले़ कुलाप्पिन् सुसुर थारिक् हुक्सिक् ङासिए पत्छे़॥ 12 हे़क्केलॽरिक्के निसिगेक्पा करुबे़ल्ले़ कुलाप्पिन् माङ्हिम् लुङ्धाक्किन् सुसुर थारिक् हुक्सिक् ङासि पत्छे़, हे़क्क्याङ् खे़ल्ले़ वेॽ कुलाप्पिन् वेॽसमा करुबे़ल्ले़ कुलाप्पिन् सुसुर हुक्सिक् ङासिए पत्छे़, 13 कन् करुबहाॽरे़ खुन्छिॽ लाप्हाॽ हुक्सिक् निबोङ् यारिक् हप्फे़ फे़सिङ्ङाङ् पत्छे़॥ खे़न् करुबहाॽ खुन्छिॽ लाङ्ङिल्ले़ तक्ने़सिआङ् ये़बे़सि, हे़क्क्याङ् खुन्छिॽ मुरान् माङ्हिम्मिल्ले़ यम्बा कुलक् ले़प्माङ् हिसिङ्ङाङ् पत्छे़॥ 14 खुने़ॽ हिःक्कोःम्कोःम्बा, पारान्ला नु हे़ःत्ताङ्बा चाःम्मनाबा खि नु नैनासुत् चिरिक्किल्ले़न् फोःन्दा चोगु, हे़क्क्याङ् खे़प्मो कुभुङ् लक्मनाबा करुबहाॽ चोगुसिरो॥ कुलःप्ला ने़त्छि कासा सित्लाङ् ( १ हाङ् ७:१५-२२ ) 15 माङ्हिम्मे़ल्ले़ कुदगाङ् ले़प्माङ् खुने़ॽ सुम्बोङ्ङाङ् ङासि हुक्सिक् कुलिङ्गे़न् केःम्बा सित्लाङ् ने़त्छि चोगुसि॥ सित्लाङ्हाॽरे़ कुसम् थक्मा हुक्सिक् ङासि कुलिङ्गे़न् केःम्बा कुहे़क् मे़ःथ पत्छे़॥ 16 खुने़ॽ चिॽले़ङ्गेॽनु सोरिक् के़भोःन्छिङ्बा सिक्क्रिहाॽ चोगुआङ् सित्लाङ्हाॽरे़ कुसम्हाॽ फत्छु॥ खुने़ॽ किप् थिक् फुॽले़ॽसे़ॽहाॽ चोगुआङ् खे़न् सिक्क्रिहाॽओ फत्छु॥ 17 खुने़ॽ माङ्हिम्मिल्ले़ कुदगाङ् लत्छा लाङ्गे़त् पिसाङ् नु वेॽइन् थाङ्गे़त् ले़प्माङ् खे़न् ने़त्छि सित्लाङ्हाॽ ये़प्सुसि॥ खुने़ॽ लाङ्गे़त् ले़प्माङ्बा सित्लाङ्ङिल्ले़ कुमिङ् याकिन वाःत्तु हे़क्क्याङ् थाङ्गे़त् ले़प्माङ्बा सित्लाङ्ङिल्ले़ कुमिङ् बोअज वाःत्तुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.