२ साप्मुःन्धुम् 29 - लिम्बुयहुदाबा हाङ् हिजकिया ( २ हाङ् १८:१-३ ) 1 हिजकियान् हाङ्युक्नाओ थोःक्सिङ्ङे़ल्ले़ खुने़ॽ निबोङ्ङाङ् ङासि तङ्बे योरे़॥ खुने़ॽ यरुसले़ःम्मो निबोङ्ङाङ् फाङ्सि तङ्बे हाङ्युक् चोगु॥ खुने़ॽ कुम्मारे़ कुमिङ् अबिया वये़, खुने़ॽ जकरियाःल्ले़ कुस्सा मे़न्छुमा वये़॥ 2 हिजकियाःल्ले़ खुने़ॽ कुसुधे़बा दाउदे़न् हे़क्केए यहवे दाङ्बे़ल्ले़ कुनिमो आत्तिन् पाःन्निन् नुबा चोगे़ खुने़ॽ हाबा खे़न्ने चोगुरो॥ माङ्हिम्मिन् सुत्थो मे़जोगु 3 हिजकियाःल्ले़ हाङ्युक् चोगुबा थिक्सिगेक्पा तङ्बेओबा थिक्सिगेक्पा लाओ खुने़ॽ यहवे दाङ्बे़ल्ले़ कुहिम्मोबा लाम्धेःत्हाॽ हन्दुआङ् खे़ङ्हाॽ चाःङ्वा मे़त्तु॥ 4 खुने़ॽ निङ्वाॽफुसाम्बाहाॽ नु ले़बिहाॽ तारुसिआङ् नाङ्गे़न् पिसाङ्बा लक्खुम्मो फुक्खुसि॥ 5 हे़क्क्याङ् खुने़ॽ खे़ङ्हाॽ मे़त्तुसि, “ले़बिसे, आङ्गाॽ आबाःन्निन् खे़प्से़प्मे़ॽओ! खिनिॽ लुम्मो खिनिॽ आप्फेक् आप्फेक् सेसेसाङ्साङ् चोःक्कासिम्मे़ॽ॥ यहवे दाङ्बा खिनिॽ पाधे़बाहाॽरे़ खुन्छिॽ निङ्वाॽफुमाङ्ङिल्ले़ कुहिम्मिन् सेसे चोगे़म्मे़ॽआङ् सेसेदे़न्नोलाम् आसुत्थो पाःन्हाॽ खे़त्ते़म्देसे़म्मे़ॽ॥ 6 आनिॽ पाधे़बाहाॽ नसान् के़ले़ङ्बा मे़बोःक्खे़आङ् यहवे दाङ्बा आनिॽ निङ्वाॽफुमाङ्ङिल्ले़ आत्तिन् पाःन्निन् ताप्फे़ःम्बा चोगे़ हाबा खे़न्ने खे़ङ्हाॽरे़ मे़जोगु॥ खे़ङ्हाॽरे़ खुने़ॽ मे़ले़रु मे़देसुआङ् खुने़ॽ कुयुङ्मादे़न्निन् निनि मे़ल्लाप्तुन्॥ खे़ङ्हाॽरे़ग खुने़ॽ ले़प्माङ् खुन्छिॽ एःक्थाक्मे़न्नाङ् मे़न्हिसुन्॥ 7 खे़ङ्हाॽरे़ आःम्भोॽओबा लाम्धेःत्हाॽ मे़ए़त्तु, हे़क्क्याङ् सेमिहाॽ सिमा मे़भाःक्तु॥ खे़ङ्हाॽरे़ इस्राइलबा निङ्वाॽफुमाङ्ङिल्ले़ कुसेसेदे़न्नो सुक्पा हाःम्मा नु वयागे़न् सिदुङ्जभाहाॽ तोःम्मा मे़ले़रु॥ 8 कल्ले़चोगुल्ले़ यहवे दाङ्बे़ल्ले़ कुसाक्के़न्निन् यहुदा नु यरुसले़ःम्मो थ्ये़आङ् वाॽ, हे़क्क्याङ् खिनिॽ ले़बिहाॽरे़ आप्फेक् मिक्के़ल्ले़ के़निसुम्ल के़वयिबा हे़क्के खुने़ॽ खे़ङ्हाॽ चिःप्मासि, किमा यङ्माओ थामासि नु एःप्मासि चाहाक् चोगुसिआङ् वाॽ॥ 9 खे़ल्ले़चोगुल्ले़ए आनिॽ पाधे़बाहाॽ ताभेःल्ले़ मे़ज्ये़प्तु मे़स्ये़रुसि, हे़क्क्याङ् आनिॽ साएहाॽ नु मेःत्हाॽ मे़दे़म्सु मे़देॽरुसिआङ् मे़वाॽ॥ 10 आल्ल आनिॽलाम् खुने़ॽ कुसाक्के़न्निन् खे़प्मारे़ लागि यहवे दाङ्बा इस्राइलबा निङ्वाॽफुमाङ्ङिन्नु आनिॽ माङ्हुप् थिक् चोःक्मा पोङ्ॽ के़लॽबा आङ्गाॽ आनिङ्वाॽ वाॽ॥ 11 आङ्गाॽ आस्सासे, आल्ल मे़न्निःमनाबा मे़ल्ले़मनाबा मे़बोःक्खे़म्मिन्ने़ॽ! थेआङ्भे़ल्ले़ यहवे दाङ्बे़ल्ले़ खुने़ॽ कुदगि ये़प्माआङ् खुने़ॽ माङ्से़वा मे़प्मारे़ लागि नु खुने़ॽ कुदगि याःम्बक् चोःक्मारे़ लागि हे़क्क्याङ् सुक्पा हाःम्मारे़ लागि खिनिॽ के़सेगिआङ् वाॽरो॥” 12 खे़ब्याङ् कन् ले़बिहाॽरे़ याःम्बक् चोःक्मा मे़हेःक्तुरो— कहातिहाॽलाम्— अमासैरे़ कुस्सा महत नु अजर्याहरे़ कुस्सा योएल॥ मरारिहाॽलाम्— अब्दिरे़ कुस्सा किस नु यहललेलरे़ कुस्सा अजर्याह॥ गेर्सोनिहाॽलाम्— जिम्माहरे़ कुस्सा योआ नु योआरे़ कुस्सा अदन॥ 13 एलिजापानरे़ कुधिन्दाङ् सायोबोराहाॽलाम्— सिम्रि नु यहिएल॥ आसापरे़ कुधिन्दाङ् सायोबोराहाॽलाम्— जकरिया नु मत्तन्याह॥ 14 हेमानरे़ कुधिन्दाङ् सायोबोराहाॽलाम्— यहिएल नु सिमि॥ यदुतुनरे़ कुधिन्दाङ् सायोबोराहाॽलाम्— समायाह नु उज्जिएल॥ 15 खे़ङ्हाॽरे़ खुन्छिॽ फुॽनुसाहाॽ मे़सुप्सुसिआङ् खे़ङ्हाॽ आप्फेक् सेसेसाङ्साङ् मे़जोःक्सिङ्॥ हे़क्क्याङ् यहवे दाङ्बे़ल्ले़ कुइङ्जाङ् कुइसिक् नु हाङ्ङिल्ले़ खे़ङ्हाॽ इङ्जाङ् पिरुसिबा हे़क्के यहवे दाङ्बे़ल्ले़ कुहिम्मिन् सुत्थो चोःक्से़ खे़ङ्हाॽ सिगाङ् मे़लासे़॥ 16 यहवे दाङ्बे़ल्ले़ कुहिम्मिन् सुत्थो चोःक्से़ निङ्वाॽफुसाम्बाहाॽ सिगाङ् मे़लासे़॥ खे़ङ्हाॽरे़ यहवे दाङ्बे़ल्ले़ कुहिम्मो मे़घोसुबा के़रे़क् आसुत्थो पाःन्हाॽ यहवे दाङ्बे़ल्ले़ कुहिम् लक्खुम्मो मे़लःत्तुआङ् मे़ने़स्सु॥ ले़बिहाॽरे़ खे़न् आसुत्थो पाःन्हाॽ मे़देॽरुआङ् किद्रोन हःङ्गुओ लाप्मे़देसु॥ 17 थिक्सिगेक्पा लाओबा थिक्सिगेक्पा ये़न्नो खे़ङ्हाॽरे़ सुत्थो चोःक्मा याःम्बक्किन् मे़हेःक्तु, हे़क्क्याङ् ये़त्छिगेक्पा ये़न्नो खे़ङ्हाॽ आःम्भोॽओ थारिक् मे़गे़रे़॥ हे़क्क्याङ् आल्लसाङ् ये़त्छि ये़न् थारिक् खे़ङ्हाॽरे़ यहवे दाङ्बे़ल्ले़ कुहिम्मिन्ने सुत्थो मे़जोगु॥ थिक्सिगेक्पा लाओबा थिबोङ्ङाङ् तुक्सिगेक्पा ये़न्नोए खे़ङ्हाॽरे़ खे़न् याःम्बक्किन् चोःक्मा मे़सुरुरो॥ माङ्हिम्मिन् याम्मो मे़दोन्दु 18 खे़न् एगाङ् ले़बिहाॽ हाङ्हिम्मो मे़बेआङ् हिजकिया हाङ्ङिन् मे़मे़त्तु, “मिधिङ्मनादेमनाबा वयागे़न् सिदुङ्जभा चोःक्मा ले़त्ति तोःम्मादे़न्निन्, खे़प्मोबा के़रे़क् खप्प्या सामाहाॽ, थे़ःक्पे़त् खरे़ःङ् तोःम्मना ने़मनाबा चप्ते़न्निन् नु खे़प्मोबा के़रे़क् सामाहाॽनु सोसोरिक् यहवे दाङ्बे़ल्ले़ कुहिम्मिम्मिन् के़रे़क् आनिगे सुत्थो चोःक्मा सुरुम्बे़॥ 19 हे़क्क्याङ् आहाज हाङ्ङिल्ले़ हाङ्युक् चोगुबा ये़म्मो खुने़ॽ नसान् के़ले़ङ्बा पोःक्खे़आङ् से़सुने़स्सुबा सामा चिगक्वाहाॽआङ् आनिगे सुत्थो चोगुम्बे़आङ् सामायुक्नादे़न्हाॽओ युक्खुम्बे़॥ आल्ल खे़ङ्हाॽ यहवे दाङ्बाओबा ले़त्ति तोःम्मादे़न्निल्ले़ कुदगि युङ्मनासिआङ् युङ्॥” 20 हिजकिया हाङ्ङिन् आन्देन् तानाम्सा पोगे़आङ् ये़क्यक्कोबा सुहाङ्युक्पाहाॽ फुक्खुसि हे़क्क्याङ् यहवे दाङ्बे़ल्ले़ कुहिम्मो थोःक्सिङ् पे॥ 21 खे़ङ्हाॽरे़ लायोलाम् ले़प्मि खोमा सिदुङ्जभा कुइसिक् से़गम्बा पित् नुसि, थुःम्बा नुसि, कुम्बाबा मे़ल्लुक् नुसि नु कुम्बाबा मे़ःन्दा नुसि हाङ्जुम्मिल्ले़ लागि, सेसेदे़न्निल्ले़ लागि नु यहुदाःल्ले़ लागि मे़दारुसि॥ हाङ्ङिल्ले़ हारुनरे़ कुधाःक्कोबा निङ्वाॽफुसाम्बाहाॽ कन्हाॽ के़रे़क् यहवे दाङ्बाओबा ले़त्ति तोःम्मादे़न्नो सिदुङ्जभा चोःक्मासि इङ्जाङ् पिरुसि॥ 22 कल्ले़चोगुल्ले़ खे़ङ्हाॽरे़ से़गम्बा पित्हाॽ मे़स्ये़रुसि, हे़क्क्याङ् निङ्वाॽफुसाम्बाहाॽरे़ खे़न् सामाक्खिन् मे़देॽरुआङ् ले़त्ति तोःम्मादे़न्निल्ले़ कुयाम्ले़ङ्बो छ्वाःक् लॽरिक् मे़हुक्खु मे़देसु॥ खे़ब्याङ् खे़ङ्हाॽरे़ थुःम्बाहाॽ मे़स्ये़रुसि, हे़क्क्याङ् सामाक्खिन् मे़देॽरुआङ् ले़त्ति तोःम्मादे़न्निल्ले़ कुयाम्ले़ङ्बो छ्वाःक् लॽरिक् मे़हुक्खु मे़देसु॥ खम्भ्याङ् कुम्बाबा मे़ल्लुक्हाॽ मे़स्ये़रुसि, हे़क्क्याङ् सामाक्खिन् मे़देॽरुआङ् ले़त्ति तोःम्मादे़न्निल्ले़ कुयाम्ले़ङ्बो छ्वाःक् लॽरिक् मे़हुक्खु मे़देसु॥ 23 खे़न् एगाङ् लायोलाम् ले़प्मि खोमा कुम्बाबा मे़ःन्दाहाॽ हाङ्ङिन् नु सङ्जुम्भोहाॽरे़ मे़दारुसि, हे़क्क्याङ् खे़न् मे़ःन्दाहाॽ सम्धाङ् खे़ङ्हाॽरे़ खुन्छिॽ हुक्हाॽ मे़ने़स्सु॥ 24 हे़क्क्याङ् निङ्वाॽफुसाम्बाहाॽरे़ खे़न् कुम्बाबा मे़ःन्दाहाॽ मे़स्ये़रुसि, हे़क्क्याङ् के़रे़क् इस्राइलरे़ कुलायोल्ले़ लागि लायोलाम् ले़प्मि नाःक्मा फाॽआङ् लायोलाम् ले़प्मि खोमा सिदुङ्जभा कुइसिक् ले़त्ति तोःम्मादे़न्नो मे़दोन्दुसि॥ थेआङ्भे़ल्ले़ मिधिङ्मनादेमनाबा वयागे़न् सिदुङ्जभा नु लायोलाम् ले़प्मि खोमा सिदुङ्जभान् के़रे़क् इस्राइलरे़ कुलागि तोःम्मा पोङ्ॽ के़लॽबा इङ्जाङ् हाङ्ङिल्ले़ पिरुसिआङ् वये़॥ 25 दाउद हाङ्ङिन्, हाङ्ङिल्ले़ कुधुम्या के़इबा गादे़न् नु माङ्निङ्वाॽपान् के़बाःप्पा नाताने़ल्ले़ निःन्धो मे़जोगु मे़बिरुसिबा थिम् कुइसिक् हिजकियाहःल्ले़ ले़बिहाॽ यहवे दाङ्बे़ल्ले़ कुहिम्मो ताहिप्हाॽ, अन्मेहाॽ नु तुःङ्गेहाॽनु सोसोरिक् खुन्छिॽ याःम्बक्को फत्छुसि॥ कन् थिम्मिङ्ग यहवे दाङ्बे़ल्ले़ कुमाङ्निङ्वाॽपान् के़बाःप्पाहाॽलाम् पिरुसिआङ् वये़॥ 26 हे़क्केलॽरिक् ले़बिहाॽ दाउदरे़ कुमुक्लाहाॽ मे़गाप्सिङ् हे़क्क्याङ् निङ्वाॽफुसाम्बाहाॽग सादाङ्हाॽ मे़याङ्सिङ्ङाङ् मे़ये़म्सिङ्॥ 27 मिधिङ्मनादेमनाबा वयागे़न् सिदुङ्जभान् ले़त्ति तोःम्मादे़न्नो तोःन्दे़म्मे़ॽ फाॽआङ् हिजकियाःल्ले़ इङ्जाङ् पिरुसि॥ मिधिङ्मनादेमनाबा वयागे़न् सिदुङ्जभा तोःम्मा याःम्बक्किन् मे़हेःक्तुल्ले़ सादाङ्हाॽ नु इस्राइलबा हाङ् दाउदे़ल्ले़ कुमुक्लाहाॽलाम् यहवे दाङ्बे़ल्ले़ कुनारा फोमा साम्लोन्नाङ् साम्मे़प्मा मे़हेःक्तु॥ 28 साम्लो साम्गे़मे़प्पाहाॽ साम्मे़लोरे़ हे़क्क्याङ् सादाङ्हाॽ के़मुःप्पाहाॽरे़ सादाङ्हाॽ मे़मुःत्तु हम्भ्याङ् के़रे़क् सङ्जुम्भोबा मनाहाॽ अःक्खुम् मे़भन्छिङ्ङाङ् से़वा मे़जोगे़॥ मिधिङ्मनादेमनाबा वयागे़न् सिदुङ्जभान् खाप्पुथ्यःङ् मे़म्बोङ्ङे थारिक् के़रे़क् याःम्बक्हाॽ कम्भलॽरिक्के चक्मे़ल्लॽए पोःक्खे़आङ् पत्छे़॥ 29 सिदुङ्जभाहाॽ खाप्पुथ्यःङ् पोःक्खे़चुरे़आङ् हिजकिया हाङ्ङिन् हे़क्क्याङ् खुने़ॽनु के़वाॽबा के़रे़क् सङ्जुम्भोहाॽ थुङ्बोॽहजॽ मे़युङ्सिङ्ङाङ् से़वा मे़जोगे़॥ 30 हिजकियान् नु खुने़ॽ कुसुहाङ्युक्पाहाॽरे़ दाउदे़न् नु थुम्या के़इबा आसापरे़ कुसुत्लाओ ले़बिहाॽ यहवे दाङ्बे़ल्ले़ कुनारा फोमा साम्लोन् साम्मे़प्मा मे़बाङ्घुसि॥ कम्भलॽरिक् खे़ङ्हाॽरे़ साॽरिक् सोसोत्लराङ् चोःक्नु खुने़ॽ कुनारा मे़भोसु, हे़क्क्याङ् साबन् मे़भन्छिङ्ङाङ् से़वा मे़मे़त्तु॥ 31 खे़ब्याङ् हिजकियाःल्ले़ मे़त्तुसि, “यहवे दाङ्बाओ खिनिॽ आबाङे के़दोःन्नादिआङ् के़वयिॽ॥ खिनिॽ सिदुङ्जभाहाॽ नु नुगे़न् तोःम्मा खिनिॽ सिदुङ्जभाहाॽ याङ्ङासिम्मे़ॽआङ् यहवे दाङ्बे़ल्ले़ कुहिम्मो खिनिॽ त्ये़म्मे़ॽ॥” कल्ले़चोगुल्ले़ सङ्जुम्भोहाॽरे़ सिदुङ्जभाहाॽ नु नुगे़न् तोःम्मा सिदुङ्जभाहाॽ मे़याङ्सिङ्ङाङ् निङ्वाॽलाम् के़सःप्पा के़रे़क्ले़ खुन्छिॽ मिधिङ्मनादेमनाबा वयागे़न् सिदुङ्जभाहाॽ मे़दारु॥ 32 सङ्जुम्भोहाॽरे़ मे़दारुसिबा मिधिङ्मनादेमनाबा वयागे़न् सिदुङ्जभा खानिःत् नुबोङ् से़गम्बा पित्हाॽ, किप् थिक् थुःम्बाहाॽ, किप् ने़त्छि कुम्बाबा मे़ल्लुक्हाॽ मे़वये़॥ कन्हाॽ के़रे़क् यहवे दाङ्बाओ मिधिङ्मनादेमनाबा वयागे़न् सिदुङ्जभा मे़दोन्दुसि॥ 33 हे़क्क्याङ् यहवे दाङ्बाओ मे़दोन्दुसिबा वयागे़न् सिदुङ्जभाहाॽग ६०० से़गम्बा पित्हाॽ हे़क्क्याङ् ३,००० मे़ल्लुक्हाॽ नु मे़ःन्दाहाॽ मे़वये़॥ 34 कर निङ्वाॽफुसाम्बाहाॽ साॽरिक् मे़सुःन्दे़बाल्ले़ चोगुल्ले़ मिधिङ्मनादेमनाबा वयागे़न् सिदुङ्जभाःल्ले़ के़रे़क् कुहोरक्पाहाॽ अङ्मा मे़न्छुक्तुन्॥ कल्ले़चोगुल्ले़ खे़न् याःम्बक्किन् मे़न्जुःत्ते थे़म्बा नु वेॽ निङ्वाॽफुसाम्बाहाॽ सेसेसाङ्साङ् मे़न्जोःक्सिङ्ङे थारिक् खुन्छिॽ ले़बि फुॽनुसाॽहाॽरे़ खे़ङ्हाॽ मे़भाॽरुसि॥ थेआङ्भे़ल्ले़ खुन्छिॽ आप्फेक् लुम्मो सेसेसाङ्साङ् चोःक्सिङ्मा पाःन्नो ले़बिहाॽ निङ्वाॽफुसाम्बाहाॽनुःल्ले़ साॽरिक् सिङ्सिङ् ये़क्ये़क् मे़लॽरे़आङ् मे़वये़॥ 35 के़रे़क् मिधिङ्मनादेमनाबा वयागे़न् सिदुङ्जभाःन्नु सोरिक् तोःम्मनाबा तङ्जुम् वयागे़न् सिदुङ्जभाःल्ले़ कुसोःत्तिन् हे़क्क्याङ् चे़ल्ले़क्सेॽ थि सिदुङ्जभाःन्नु सोरिक् मिधिङ्मनादेमनाबा सिदुङ्जभाहाॽ वे़त्ते़सरे़ वये़॥ कम्भलॽरिक् यहवे दाङ्बे़ल्ले़ कुहिम्मोबा माङ्से़वान् तगि हे़क्केए चोःक्मा मे़हेःक्तु॥ 36 निङ्वाॽफुमाङ्ङिल्ले़ कुमनाहाॽरे़ लागि चोगुबा याःम्बक्किन् नु खे़न् हे़म्म्याक् हारा चोःक्मा चुरे़बाल्ले़ चोगुल्ले़ हिजकिया हाङ्ङिन् नु के़रे़क् मनाहाॽ खुन्छिॽ निङ्वाॽ त्ये़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.