२ साप्मुःन्धुम् 28 - लिम्बुयहुदाबा हाङ् आहाज ( २ हाङ् १६:१-४ ) 1 आहाजे़न् हाङ्युक्नाओ थोःक्सिङ्ङे़ल्ले़ खुने़ॽ निबोङ् तङ्बे योरे़॥ खुने़ॽ यरुसले़ःम्मो थिबोङ्ङाङ् तुक्सि तङ्बे हाङ्युक् चोगु॥ खुने़ॽ कुसुधे़बा दाउदरे़ चोगुबा कुइसिक् यहवे दाङ्बे़ल्ले़ कुनिमो आत्तिन् पाःन्निन् नुबा चोगे़ खुने़ॽ खे़न् मे़जोगुन्॥ 2 खुने़ॽ इस्राइलबा हाङ्हाॽरे़ मे़नाःत्तुबा लाम्मिन् नाःत्तुआङ् बाल माङ्हाॽरे़ लागि योःम्मनाबा नावाइत्लाहाॽ चोगुसि॥ 3 खुने़ॽ बेन-हिन्नोमबा ने़ने़बादे़न्नो सिदुङ्जभाहाॽआङ् तोःन्दु॥ इस्राइलिहाॽरे़ खुन्छिॽ तगिलाम् यहवे दाङ्बे़ल्ले़ आत्तिन् मे़न्छाम् सुवाङ्हाॽ लाजेॽलाम् लःत्तुदेसुसिआङ् वये़, खे़ङ्हाॽरे़ए खुन्छिॽ याम्गे़सिङ्बा ये़प्ले़क्किन् नाःत्तुआङ् खुने़ॽ कुस्साहाॽ मिओ मिधिक्खुसिआङ् सिदुङ्जभा चोगुसि॥ 4 खुने़ॽ चन्जम्बादे़न्हाॽओ नु कोःक्माहाॽओ हे़क्क्याङ् हुम्बे़प्पा सिङ्बुङ् सिगाङ् सिदुङ्जभाहाॽ तोःन्दुआङ् सुक्पा हाःन्दुरो॥ अराम हे़क्क्याङ् इस्राइले़न्नु थङ् ( २ हाङ् १६:५ ) 5 कल्ले़चोगुल्ले़ यहवे दाङ्बा खुने़ॽ कुनिङ्वाॽफुमाङ्ङिल्ले़ खुने़ॽ आरामबा हाङ्ङिल्ले़ कुहुक्कोलाम् हारिद्ये़र याःन्दु॥ आरामिहाॽरे़ खुने़ॽ मे़नाःन्दुआङ् खुने़ॽ कुमनाहाॽओलाम् यरिक् मे़दे़म्सुसिआङ् दमस्कसओ मे़देॽरुसि॥ खुने़ॽ इस्राइलबा हाङ् पेकहःल्ले़ कुहुक्कोआङ् थ्ये़, हे़क्क्याङ् हाङ्ङिल्ले़ खुने़ॽ साॽरिक् कुजाभे़रे़र नाःन्दु॥ 6 रमल्याहरे़ कुस्सा पेकहःल्ले़ थिक्याःन्ले़ यहुदाबा १,२०,००० थक्सुबाहाॽ स्ये़रुसि, थेआङ्भे़ल्ले़ यहुदाःल्ले़ यहवे दाङ्बा कुसुधे़बा कुदाक्थे़बाहाॽरे़ खुन्छिॽ निङ्वाॽफुमाङ्ङिन् ले़रुआङ् वये़॥ 7 लत्छा सधासिङ्मा के़घोबा एफ्राइमि मना जिक्रिःल्ले़ हाङ्ङिल्ले़ कुस्सा मासेयाहन् हे़क्क्याङ् हाङ्ङिल्ले़ कुहिम्मिन् ओमे़प्मा याःम्बक् के़जोःक्पा सुहाङ्युक्पा अज्रकामे़न् नु हाङ्ङिल्ले़ कुसिगाङ् ताक्फाओबा एल्कानाःन् स्ये़रुसि॥ 8 इस्राइलिहाॽरे़ यहुदालाम् खुन्छिॽ चुम्देङ्हाॽओबा २,००,००० मे़न्छुमाहाॽ नु हिन्जाॽबित्छाॽहाॽ मे़दे़म्सु मे़देॽरुसि॥ खे़ङ्हाॽरे़ यरिक् मे़नाप्तुसिबा सामा चिगक्वाहाॽआङ् मे़देॽरुआङ् सामरियाओ मे़धाक्तुरो॥ माङ्निङ्वाॽपान् के़बाःप्पा ओदेद 9 कर सामरियाओ यहवे दाङ्बे़ल्ले़ ओदेद मे़प्मनाबा कुमाङ्निङ्वाॽपान् के़बाःप्पा थिक् वये़, थक्सुबाहाॽ सामरिया मे़नुःक्खे़ मे़धाङे़र मे़बत्छे़बा ये़म्मो खुने़ॽ खे़न् थक्सुबाहाॽरे़ खुन्छिॽ तुम्से़ लःन्दे़॥ खुने़ॽ खे़न् थक्सुबा मनाहाॽ मे़त्तुसि, “यहवे दाङ्बा खिनिॽ पाधे़बाहाॽरे़ खुन्छिॽ निङ्वाॽफुमाङ्ङिन् यहुदाबा मनाहाॽनु कुयाःक्ले़ॽरे़बे़ल्ले़ चोगुल्ले़ खुने़ॽ खे़ङ्हाॽ खिनिॽ हुक्को थासुसिबारो॥ कर खिनिॽग साॽरिक् सिक्पोःक्मे़ल्ले़ के़धुक्तिआङ् खे़ङ्हाॽ युम्रे़क् के़स्ये़रुम्सिम्बे़न् साङ्ग्राम्पेदाङ् थारिक् के़रे़आङ् वाॽ॥ 10 आल्ल यहुदा नु यरुसले़ःम्बा ये़म्बित्छाहाॽ नु मे़न्छुमाहाॽ खक्पे़त् खिनिॽ योःग्बा योःग्मा चोःक्मासि निङ्वाॽ के़जोगुम्ॽ॥ अक्खे के़जोगुम्मिल्ले़ थे खिनिॽआङ् यहवे दाङ्बा खिनिॽ निङ्वाॽफुमाङ्ङिल्ले़ कुदगि आप्तिक्साबा के़म्बोःक्खिन्नाङ्बि? 11 आल्ल आङ्गाॽ आबाःन्निन् खे़प्साम्मे़ॽ! खिनिॽ काइहाॽओलाम् के़दे़म्सुम् के़धाक्तुम्सिम्बाहाॽ नुःक्ते़म्देसे़म्सिम्मे़ॽ, थेआङ्भे़ल्ले़ यहवे दाङ्बे़ल्ले़ कुसाक्के़न्निन् खिनिॽ सम्धाङ् थ्ये़आङ् वाॽ॥” 12 खे़ब्याङ् कुभा कुभा एफ्राइमबा लाम्लोबा येहोहानानरे़ कुस्सा अजर्याह, मसिल्लेमोतरे़ कुस्सा बेरेक्याह, सल्लुमरे़ कुस्सा येहिजक्याहःन् नु हद्लैरे़ कुस्सा अमासान् थङ्ङोलाम् के़नुःङ्बाआङ् के़धाङ्बार के़बप्पाहाॽनु चिदुप् मे़दुमे़॥ 13 हे़क्क्याङ् खे़ङ्हाॽरे़ मे़मे़त्तुसि, “कन् पुङ्लाधाबाहाॽ खिनिॽ कत्थो थाक्मासि मे़नुॽने़न्॥ खिनिॽ च्याज्या चोःक्मा के़इःत्तुम्माङ् के़वयिॽ खे़ल्ले़चोगुल्ले़ यहवे दाङ्बे़ल्ले़ कुनिमो खिनिॽ आप्तिक्साबा के़बोःक्खिॽ॥ थे खिनिॽ लायोन् नु आप्तिक्किन् योॽमा निङ्वाॽ के़जोगुम्मि? थेआङ्भे़ल्ले़ आनिगे़ग आप्तिक्साबा पोःक्खिगे़ चुरिगे़आङ् वयिगे़, हे़क्क्याङ् इस्राइलरे़ कुदक्ले़ङ्वाओ खुने़ॽ साॽरिक् किप्मागे़घुबा कुसाक्के़न्निन् थ्ये़आङ् वाॽ॥” 14 कल्ले़चोगुल्ले़ सुहाङ्युक्पाहाॽ नु के़रे़क् सङ्जुम्भोबा मनाहाॽरे़ खुन्छिॽ तगि थक्ले़ङ्बाहाॽरे़ पुङ्लाधाबा मे़जोगुसिबाहाॽ मे़ले़रुसि हे़क्क्याङ् मे़नाप्तुसिबा चिगक्वा सामाहाॽ मे़ने़स्सुमे़ध॥ 15 खे़ङ्हाॽरे़ पुङ्लाधाबा मे़जोगुसिबाहाॽ आम्भा खे़न् याःम्बक्किल्ले़ लागि मुरामे़मे़त्तुसिबा मनाहाॽरे़ खुन्छिॽ हुक्को मे़ले़रुसि, हे़क्क्याङ् खे़ङ्हाॽरे़ मे़नाप्तुसिबा सामापुमाहाॽलाम् के़रे़क् ले़क्चाॽबुधुःक्पा मनाहाॽ चाङ्वान् मे़बिरुसि॥ खे़ङ्हाॽरे़ पुङ्लाधाबाहाॽ चाङ् नु लाङ्सुःप् मे़जाक्तुसि, खम्भ्याङ् चामा थुङ्मा मे़बिरुसिआङ् निःङ्गेॽआङ् मे़हुःत्तुसि॥ हे़क्क्याङ् चाॽरिक् के़नाबा के़घिःम्बाहाॽ नु लाङ्घेःक्मा मे़न्छुक्मनाबाहाॽ खे़ङ्हाॽरे़ अदङ्हाॽओ मे़गेःत्तुसिआङ् खुन्छिॽ काॽइहाॽओ खे़बक्सिङ् सिङ्बुङ्हाॽरे़न् ये़क्यक् यरिहो थारिक् मे़नुःक्तु मे़युरुसि॥ खे़न् एगाङ् खे़ङ्हाॽ थो सामरिया मे़नुःक्खे़ मे़बेरो॥ आहाजरे़ अस्सुरे़न् कुभाॽ नाःक्तु ( २ हाङ् १६:७-९ ) 16 खे़न् ये़म्मो आहाज हाङ्ङिल्ले़ अस्सुरबा हाङ्ङे़न् कुभाॽ नाःक्से़ पाङ्घुदेसुसि॥ 17 थेआङ्भे़ल्ले़ एदोमिहाॽरे़ याम्मो यहुदान् थङ्ङो मे़भत्तुआङ् मनाहाॽ पुङ्लाधाबा मे़जोगु मे़देॽरुसि॥ 18 पलिस्तिहाॽरे़आङ् थे़गुगुबा नु यहुदाबा नेगेबओबा ये़क्यक्हाॽओ मे़नाप्तुसि॥ खे़ङ्हाॽरे़ बेथ-सेमेस, अय्यालोन नु गदेरोत हे़क्क्याङ् सोखो, तिम्ना नु गिम्जो, खे़न् कब्रिङ्बा पाङ्जुम्हाॽ नु पाङ्भेॽहाॽआङ् हुक्काप् मे़जोगुआङ् युक् मे़जोगुआङ् ने़स्से़॥ 19 इस्राइलबा हाङ् आहाजरे़ चोगुल्ले़ए यहवे दाङ्बे़ल्ले़ यहुदान् नःम्नःम्बा चोगु, थेआङ्भे़ल्ले़ खुने़ॽ यहुदाओ फे़न्याःम्बक् फोसुआङ् खुने़ॽ यहवे दाङ्बा ले़प्माङ् साॽरिक्के नसान् के़ले़ङ्बा पोःक्खे़॥ 20 खे़ब्याङ् अस्सुरबा हाङ् तिग्लत-पिलेसरे़न् खुने़ॽ कुभाॽसे़ फे़रे़, कर खुने़ॽ फाॽमारे़ कुले़क्वा छे़न्ना साॽरिक् तुक्खे चाःत्तु॥ 21 आहाजरे़ यहवे दाङ्बे़ल्ले़ कुहिम्मिन्, हाङ्ङिल्ले़ कुहिम्मिन् नु खुने़ॽ कुसुहाङ्युक्पाहाॽलाम् कुभा पाःन्हाॽ तेॽरुआङ् अस्सुरबा हाङ्ङिन् पिरु, कर कन्हाॽ के़रे़क् थेनाधेबा पोःक्खे़रो॥ आहाजरे़ कुलायो 22 आम्भा कन् आहाज हाङ्ङिन्ने खुने़ॽ तुक्खे च्ये़बा ये़म्मो आल्लसाङ् छे़न्ना साॽरिक् यहवे दाङ्बा ले़प्माङ् नसान् के़ले़ङ्बा पोःक्खे़॥ 23 खुने़ॽ के़नाःम्बा दमस्कसबा माङ्हाॽओ सिदुङ्जभा तोःन्दु, थेआङ्भे़ल्ले़ खुने़ॽ अक्तङ्बा निङ्वाॽ इःत्तु, “अरामबा हाङ्हाॽरे़ खुन्छिॽ माङ्हाॽरे़ खे़ङ्हाॽ मे़भाॽरुसि॥ कल्ले़चोगुल्ले़ खे़ङ्हाॽरे़ आङ्गाॽ मे़भाॽआर फाॽआङ् आङ्गाॽआङ् खे़ङ्हाॽओ सिदुङ्जभा तोःन्दुङ्ॽ॥” कर से़क्खाःल्ले़ग खे़ङ्हाॽरे़ए खुने़ॽ नु के़रे़क् इस्राइलिहाॽ मे़आगे़र मे़जोगु॥ 24 आहाजरे़ निङ्वाॽफुमाङ्ङिल्ले़ कुहिम्मोबा खप्प्या सामाहाॽ फुक्खु हे़क्क्याङ् निङ्वाॽफुमाङ्ङिल्ले़ कुहिम्मोबा खप्प्या सामाहाॽ कुम्जिक्मा चोगु॥ खुने़ॽ यहवे दाङ्बे़ल्ले़ कुहिम्मोबा लाम्धेःत्हाॽ ए़त्तुआङ् यरुसले़ःम्मोबा के़रे़क् माराम्हाॽरे़ कुसुक्पो ले़त्ति तोःम्मादे़न्हाॽ चोगु॥ 25 हे़क्क्याङ् यहुदाबा ये़क्यक् थक्मा वेॽ माङ्हाॽओ वयागे़न् सिदुङ्जभा तोःम्मारे़ लागि थे़गुहाॽओ माङ्धाःन्हाॽ चोगु॥ कम्भलॽरिक् खुने़ॽ यहवे दाङ्बा खुने़ॽ कुसुधे़बा कुदाक्थे़बाहाॽरे़ खुन्छिॽ निङ्वाॽफुमाङ्ङिन् कुयाःक्ले़ॽरे़र याःन्दु॥ 26 खुने़ॽ हाङ्युक् चोगुबा ये़म्मोबा वेॽ हिन्दोक्हाॽ कुहेःक्सिङ्माआङ्धो कुनुप्मा थारिक् यहुदा नु इस्राइलबा हाङ्हाॽरे़ खुन्छिॽ साप्पन्नो साप्ते़आङ् पत्॥ 27 आहाजे़न् खुने़ॽ कुसुधे़बा कुदाक्थे़बाहाॽनु सोरिक् तङ्सिङ्से़ पेआङ् खुने़ॽ यरुसले़म ये़क्यक्को मे़जिक्खु, कर खे़ङ्हाॽरे़ खुने़ॽ इस्राइलबा हाङ्हाॽरे़ खुन्छिॽ इपुङ्ङो मे़न्ने़स्सुन्॥ खुने़ॽ कुएगाङ् कुस्सा हिजकियान् हाङ् पोःक्खे़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.