२ साप्मुःन्धुम् 27 - लिम्बुयहुदाबा हाङ् योताम ( २ हाङ् १५:३२-३८ ) 1 योतामे़न् हाङ्युक्नाओ थोःक्सिङ्ङे़ल्ले़ खुने़ॽ निबोङ्ङाङ् ङासि तङ्बे योरे़॥ खुने़ॽ यरुसले़ःम्मो थिबोङ्ङाङ् तुक्सि तङ्बे हाङ्युक् चोगु॥ खुने़ॽ कुम्मारे़ कुमिङ् यरुसा वये़ खुने़ॽ सादोकरे़ कुस्सा मे़न्छुमा वये़॥ 2 योतामरे़ कुम्बा उज्जियाहःल्ले़ चोगुबा कुइसिक् आत्तिन् पाःन्निन् नुबा चोगे़ खुने़ॽ आम्भा खे़न् चोगु, कुम्बा कुइसिक् खुने़ॽ यहवे दाङ्बे़ल्ले़ कुहिम्मो मे़लासे़न्॥ हम्भसाङ् मनाहाॽरे़ग खुन्छिॽ ताप्फे़ःम्बा लाम्मिन्ने मे़नाःत्तुआङ् मे़बत्छे़॥ 3 खुने़ॽ यहवे दाङ्बे़ल्ले़ कुहिम्मोबा थोसमा लाम्धेःत्ते़न् याम्मो चोगु, हे़क्क्याङ् खुने़ॽए ओफेल कोःक्माओबा लुङ्धाक्किन् याम्मो से़त्तु चोगु॥ 4 खुने़ॽ यहुदाबा कोःक्माबा लाजेॽओ ये़क्यक्हाॽ चुक्ते़र चोगु, हे़क्क्याङ् सिङ्बुङ् के़युङ्बादे़न्हाॽओ यक्हाॽ नु चङ्हिम्हाॽ चोगु॥ 5 योतामे़न् अम्मोनिहाॽनु थङ् थक्ते़आङ् खे़ङ्हाॽ नाःन्दुसि॥ हे़क्क्याङ् खे़न् तङ्बेओ अम्मोनिहाॽरे़ खुने़ॽ ३५० तःन् युप्पा, २५,००० मुरि मासि नु २५,००० मुरि हःक्सि मे़बिरु॥ खे़ङ्हाॽरे़ खुने़ॽ निसिगेक्पा नु सुम्सिगेक्पा तङ्बेओआङ् खे़न् यारिक्के मे़भे़त्तुआङ् मे़बिरु॥ 6 यहवे दाङ्बा खुने़ॽ कुनिङ्वाॽफुमाङ्ङिल्ले़ कुदगि खुने़ॽ नुबा ये़प्ले़क्को वये़बाल्ले़ चोगुल्ले़ योतामे़न् साॽरिक् मुक्के़गुबा पोःक्खे़॥ 7 योतामरे़ कुहाङ्युक् ये़म्मोबा वेॽ हिन्दोक् पाःन्हाॽ, खुने़ॽ थक्ते़बा के़रे़क् थङ्हाॽ नु वेॽ याःम्बक्हाॽ इस्राइल नु यहुदाबा हाङ्हाॽरे़ खुन्छिॽ साप्पन्नो साप्ते़आङ् पत्॥ 8 योतामे़न् हाङ्युक्नाओ थोःक्सिङ्ङे़ल्ले़ खुने़ॽ निबोङ्ङाङ् ङासि तङ्बे योरे़॥ खुने़ॽ यरुसले़ःम्मो थिबोङ्ङाङ् तुक्सि तङ्बे हाङ्युक् चोगु॥ 9 खुने़ॽ कुसुधे़बा कुदाक्थे़बाहाॽनु सोरिक् तङ्सिङ्से़ पेआङ् दाउदरे़ कुये़क्यक्को मे़जिक्खु॥ खुने़ॽ कुएगाङ् कुस्सा आहाजे़न् हाङ् पोःक्खे़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.