२ साप्मुःन्धुम् 26 - लिम्बुयहुदाबा हाङ् उज्जियाह ( २ हाङ् १४:२१-२२ , १५:१-७ ) 1 खे़ब्याङ् यहुदाबा के़रे़क् मनाहाॽरे़ थिबोङ्ङाङ् तुक्सि तङ्बे के़योबा उज्जियाहन् मे़याङ्सिङ्ङाङ् खुने़ॽ कुम्बा अमस्याहःल्ले़ कुले़क्वाओ हाङ् मे़जोगु॥ 2 अमस्याहन् खुने़ॽ कुसुधे़बा कुदाक्थे़बाहाॽनु सोरिक् तङ्सिङ्से़ पेआङ् एगाङ् उज्जियाहःल्ले़ए एलात ये़क्यक्किन् याम्मो चोगुआङ् यहुदाओ नुःक्तु॥ 3 उज्जियाहन् हाङ्युक्नाओ थोःक्सिङ्ङे़ल्ले़ खुने़ॽ थिबोङ्ङाङ् तुक्सि तङ्बे योरे़॥ खुने़ॽ यरुसले़ःम्मो ङाबोङ्ङाङ् ने़त्छि तङ्बे हाङ्युक् चोगु॥ खुने़ॽ कुम्मारे़ कुमिङ् यकोल्याह वये़॥ खुने़ॽ यरुसले़म के़युङ्मा वये़॥ 4 उज्जियाहःल्ले़ खुने़ॽ कुम्बा अमस्याहरे़ चोगुबा कुइसिक् यहवे दाङ्बे़ल्ले़ कुनिमो आत्तिन् पाःन्निन् नुबा वये़ हाबा खे़न्ने चोगु॥ 5 खुने़ॽ यहवे दाङ्बे़न्नु किमाओ निसाम् के़हुॽबा जकरियाःल्ले़ कुये़म्मो खुने़ॽ के़रे़क् कुसिक्लुङ्माॽरे़ निङ्वाॽफुमाङ्ङिल्ले़ कुलाम्लोमान् कोःत्तु॥ यहवे दाङ्बे़न् कोःत्तु हक्सुर थारिक् निङ्वाॽफुमाङ्ङिल्ले़ खुने़ॽ नुॽमा तामा पिरु॥ 6 उज्जियाहन् पलिस्तिहाॽनु थङ् चोःक्से़ ते़न्धङ् चोःक्मादे़न्नो पेआङ् गात, यब्ने नु अस्दोदबा लुङ्धाक्हाॽ लुःन्दुदेसु॥ खुने़ॽ अस्दोद निःत्ताङ् नु पलिस्तिहाॽरे़ खुन्छिॽ लुम्मो ये़क्यक्हाॽ चोगु॥ 7 निङ्वाॽफुमाङ्ङिल्ले़ खुने़ॽ पलिस्तिहाॽ, गुर-बालओ के़युङ्बा अरबिहाॽ नु मोनिहाॽरे़ खुन्छिॽ तक्ले़ङ्वाओ थङ् चोःक्मा फाॽरु॥ 8 अम्मोनिहाॽरे़ उज्जियाहओ हुक्वाहाॽ मे़भे़त्तु, हे़क्क्याङ् खुने़ॽ कुमिङ्सो कुधाङ्सोन् मिस्र लाजेॽबा इःन्दोओ थारिक् इङे़, थेआङ्भे़ल्ले़ खुने़ॽ साॽरिक् मुक्के़गुबा पोःक्खे़आङ् वये़॥ 9 उज्जियाहःल्ले़ यरुसले़म कुसुक्पोबा यम्बा लाम्धेःत्तो, ने़ने़बादे़न्नोबा यम्बा लाम्धेःत्तो नु लुङ्धाक्कोबा कुसुक्पोबा इलाम्मोआङ् चङ्हिम्हाॽ चोगुआङ् खे़न् से़ःप्सिङ्माङ्दे़न् चोगु॥ 10 खुने़ॽ मुरे़क् खारे़क् थेआङ् के़होप्पादे़न्नो वेॽ चङ्हिम्हाॽ चोगु, हे़क्क्याङ् खुने़ॽ कोःक्मा फाङ्जङ् नु ने़ने़बादे़न् ने़प्माङ् पिसाङ् खुने़ॽ कुबित् कुधक्साहाॽ यरिक् कुलुप् मे़बोःक्खे़बाल्ले़ चोगुल्ले़ यरिक् वबाक्हाॽ तयुने़स्सु॥ कोःक्मा नु ते़म्बेॽओ खुने़ॽ कुयाःन्गे़मबा मनाहाॽ नु चे़ल्ले़क्सेॽ के़लेःप्पाहाॽआङ् मे़वये़, थेआङ्भे़ल्ले़ खुने़ॽ याःम्ममा इक्ताप्पो निङ्वाॽ के़बिबा वये़॥ 11 कन्नुःल्ले़ वेॽ उज्जियाहरे़ थङ् चोःक्मा के़हुॽसिङ्बा नु ते़न्धङ्ले़ लागि आभे़ल्ले़साङ् यारिप् के़बोङ्बा यरिक् थक्सुबाहाॽआङ् कत्तुसि॥ थक्सुबाहाॽओबा मा सुहाङ्मिबा यहिएल नु सुहाङ्युक्पा मासेयाहःल्ले़ याम्नाःत्निःत् कुइसिक् कुलुप् कुलुप् चोगे़सुआङ् हाङ्ङिल्ले़ लत्छा कुसुहाङ्युक्पा हनन्याहरे़ कुयुक्को कन्हाॽ मे़वये़र याःन्दे़सुसि॥ 12 मुक्के़गुबा के़गुबा थक्ले़ङ्बाहाॽ के़बाङ्बा हिम्सयङ्हाॽओबा लाम्लोबाहाॽरे़ खुन्छिॽ के़रे़क् खानिःत्तिन् २,६०० वये़॥ 13 निङ्मिहाॽरे़ खुन्छिॽ तक्ले़ङ्वाओ हाङ्ङिन् फाॽमारे़ लागि खे़ङ्हाॽरे़ खुन्छिॽ युक्को ३,०७,५०० थक्ले़ङ्बाहाॽ के़वाॽबा ते़न्धङ् के़जोःक्पा थक्सुबाहाॽआङ् मे़वये़॥ 14 के़रे़क् थक्सुबाहाॽरे़ खुन्छिॽ लागि उज्जियाहःल्ले़ खोहाॽ, लाःक्हाॽ, थाःक्खुःङ्हाॽ, साःङ्बे से़ःप्चाङ्हाॽ, लिहाॽ नु अर्दोहाॽ यारिप् चोगु॥ 15 चङ्हिम्हाॽओ नु चम्बे़त् चम्बे़त् लुङ्धाक् के़ये़प्पा थक्सुबा ये़प्नाहाॽओ ओगप् चोःक्मारे़ लागि फे़न्जेॽ के़धक्पाहाॽरे़ मे़धगुबा तोःङ्हाॽ थक्सुबाहाॽरे़ मे़आबुर हे़क्क्याङ् यम्बयम्बा लुङ्हाॽ मे़सुःक्सु मे़देसुर फाॽआङ् खुने़ॽ यरुसले़ःम्मो खजुम्घयाहाॽ यारिप् चोगु॥ खुने़ॽ कुमिङ्ङिन् के़रे़क् पिसाङ् से़रे़आङ् वये़॥ निङ्वाॽफुमाङ्ङिल्ले़ फाॽरुबाल्ले़ चोगुल्ले़ खुने़ॽ साॽरिक् मुक्के़गुबा पोःक्खे़रो॥ आङ्दिङ् लॽमारे़ चोगुल्ले़ उज्जियाहःल्ले़ खुम्दिङ् खोसु 16 कर उज्जियाहन् मुक्के़गुबा पोःक्खे़आङ् एगाङ् खुने़ॽ आङ्दिङ् कुलॽमारे़ चोगुल्ले़ खुने़ॽ चोःन्दे़॥ खुने़ॽ सुक्पा हाःम्मा ले़त्ति तोःम्मादे़न्नो सुक्पा हाःम्मारे़ लागि यहवे दाङ्बे़ल्ले़ कुहिम्मो लासे़आङ् यहवे दाङ्बा कुनिङ्वाॽफुमाङ्ङिल्ले़ कुदक्ले़ङ्वाओ लायो चोगु॥ 17 कर निङ्वाॽफुसाम्बा अजर्याहन् नु यहवे दाङ्बे़ल्ले़ वेॽ ये़प्पोङ् हाङ्हाङ् के़लॽबा निङ्वाॽफुसाम्बाहाॽ हाङ्ङिल्ले़ कुएगाङ् कुएगाङ् सिगाङ् मे़बे॥ 18 खे़ङ्हाॽरे़ खुने़ॽ नादुम्दुम्बा मे़मे़त्तु, “उज्जियाहए, यहवे दाङ्बे़ल्ले़ कुलागि सुक्पा हाःम्मा याःम्बक्किन् आदाङ्बारे़न् मेःन्॥ कन् याःम्बक्किल्ले़ लागिग तोःम्मनाबा हारुनरे़ कुधाःक्कोबा निङ्वाॽफुसाम्बाहाॽ मे़वाॽ॥ सेसेदे़न्नोलाम् लःन्दे़आङ् पेगे़ॽ, थेआङ्भे़ल्ले़ आदाङ्बारे़ नसान् के़ले़क्खुआङ् वाॽ॥ यहवे दाङ्बा निङ्वाॽफुमाङ्लाम् आदाङ्बारे़ थे़मा इङ्धाङ्ङाङ् के़ङ्घोसुन्ॽ॥” 19 कुहुक्को साङ्ते़रे़ःङ्ङिन् याङ्सिङ्ङाङ् सुक्पा हाःम्मा के़जोःक्पा उज्जियाह हाङ्ङिन् साॽरिक् कुसाक्के़न् फुइ पोगे़॥ निङ्वाॽफुसाम्बाहाॽनु कुसाक्के़न् पोगे़आङ् पत्छे़र खे़ङ्हाॽरे़ए खुन्छिॽ तगि यहवे दाङ्बे़ल्ले़ कुहिम्मो सुक्पा हाःम्मा ले़त्ति तोःम्मादे़न्निल्ले़ कुबेसाङ् खुने़ॽ कुद्वाबो आलिःक्लिःक्पा होरिक्पा तुक्मा लःन्दे़॥ 20 तुम् निङ्वाॽफुसाम्बा अजर्याहन् नु वेॽ निङ्वाॽफुसाम्बाहाॽरे़ ओमे़मे़त्तुआङ् मे़बत्छे़र कुद्वाबो लोगेॽ तुक्मा लःन्दे़बा खे़ङ्हाॽरे़ मे़निसु, खम्भ्याङ् खे़ङ्हाॽरे़ हाराहारा माङ्हिम्मोलाम् लाःक्कात् मे़लःत्तु, थेआङ्भे़ल्ले़ यहवे दाङ्बे़ल्ले़ कन् तुक्मे़ल्ले़ खुने़ॽ तरुर याःन्दुआङ् वये़॥ 21 उज्जियाह हाङ्ङिन् खुने़ॽ कुसिमा ये़न् थे़म्बाए लोगेॽ तुक्मे़ल्ले़ तरु॥ खुने़ॽ लाःत्लाःत् हिम्मो लोगेॽ पारामा तुक्मे़ल्ले़ के़दम्बा पोःक्खे़आङ् युङ्मा हेःक्ते़॥ यहवे दाङ्बे़ल्ले़ कुहिम्मो खुने़ॽ लाःप्मा मे़घोसे़न्॥ हाङ्जुम्मोबा के़रे़क् याःम्बक्हाॽलाम् खुने़ॽ मे़से़न्दु॥ हे़क्क्याङ् खुने़ॽ कुस्सा योतामे़ल्ले़ हाङ्हिम्मिन् ओमे़प्मा याःम्बक् चोगुआङ् लाजेॽओ हाङ्युक् चोःक्मा हेःक्तु॥ 22 उज्जियाहःल्ले़ हाङ्युक् चोगुबा ये़म्मोबा वेॽ हिन्दोक् पाःन्हाॽ कुहेःक्सिङ्आङ्धो कुनुप्मा थारिक्के आमोजरे़ कुस्सा माङ्निङ्वाॽपान् के़बाःप्पा यसैयाःल्ले़ साप्तुआङ् पत्॥ 23 उज्जियाहन् खुने़ॽ कुसुधे़बा कुदाक्थे़बाहाॽनु सोरिक् तङ्सिङ्से़ पे हे़क्क्याङ् खे़ङ्हाॽरे़ खुन्छिॽ पेसाङ् हाङ्हाॽरे़ खुन्छिॽ लत्छा इक्ताप्पो मे़लुप्तु, थेआङ्भे़ल्ले़ मनाहाॽरे़ मे़बाःत्तु, “खुने़ॽग लोगेॽ तुक्मे़ल्ले़ तरुबारो॥” हे़क्क्याङ् खुने़ॽ कुएगाङ् कुस्सा योतामे़न् हाङ् पोःक्खे़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.