२ साप्मुःन्धुम् 25 - लिम्बुयहुदाबा हाङ् अमस्याह ( २ हाङ् १४:२-६ ) 1 अमस्याहन् हाङ्युक्नाओ थोःक्सिङ्ङे़ल्ले़ खुने़ॽ निबोङ्ङाङ् ङासि तङ्बे योरे़॥ खुने़ॽ यरुसले़ःम्मो निबोङ्ङाङ् फाङ्सि तङ्बे हाङ्युक् चोगु॥ खुने़ॽ कुम्मारे़ कुमिङ् यहोअदिन वये़॥ खुने़ॽ यरुसले़म के़युङ्मा वये़॥ 2 अमस्याहःल्ले़ यहवे दाङ्बे़ल्ले़ कुनिमो आत्तिन् पाःन्निन् नुबा चोगे़ हाबा खे़न्ने चोगु, कर के़रे़क् कुनिङ्वाॽरे़ मे़जोगुन्॥ 3 खुने़ॽ कुहुक्को हाङ्जुम्मिन् योधो मे़ल्लॽमनाबा पोःक्खे़आङ् खुने़ॽ कुम्बा हाङ्ङिन् के़स्ये़प्पा सुहाङ्युक्पाहाॽ खुने़ॽ स्ये़रुसि॥ 4 कर खुने़ॽ मोसाःल्ले़ कुसाम्योथिम् इङ्जाङ्ङो “पानुदिङ् पाहाॽ खुन्छिॽ साएहाॽरे़ लागि नु साएहाॽ पानुदिङ् पाहाॽरे़ लागि से़प्मासि मेःन्, के़रे़क् मनाहाॽ खुन्छिॽ आप्फेक् लायोओ मे़सिर” लॽरिक् साप्ते़आङ् के़बप्पा यहवे दाङ्बे़ल्ले़ कुइङ्जाङ्ङिन् इःत्तु नाःत्तुआङ् खे़ङ्हाॽरे़ खुन्छिॽ साहाॽग मे़स्ये़रुसिन्लो॥ एदोमरे़ कुदक्ले़ङ्वाओ थङ् ( २ हाङ् १४:७ ) 5 अमस्याहःल्ले़ यहुदाबा मनाहाॽ फुक्खुसिआङ् खे़ङ्हाॽरे़ खुन्छिॽ हिम्सयङ् हिम्सयङ् कुइसिक् के़रे़क् यहुदा हे़क्क्याङ् बेन्यामिन हे़न्छिङ् हे़न्छिङ्ङोबा थक्मोबाहाॽ नु किप् थिक् किप् थिक्कोबा थक्मोबाहाॽरे़ खुन्छिॽ युक्को मे़वये़र याःन्दुसि॥ खुने़ॽ निबोङ् तङ्बे के़गे़प्पा हे़क्क्याङ् खे़न्नुःल्ले़आङ् यरिक् तङ्बे के़योबाहाॽ खक्पे़त् सुप्सुसि॥ खे़ङ्हाॽरे़ खुन्छिॽ खानिःत्तिन् ३,००,००० योरे़॥ खे़ङ्हाॽ के़रे़क् थङ् चोःक्मा के़सुक्पा हे़क्क्याङ् लाःक् नु खो याङ्मा के़सुक्पा मे़वये़॥ 6 खुने़ॽ किप् थिक् युप्पा तोरा हुङुआङ् इस्राइललाम् १,००,००० मुक्के़गुबा थक्ले़ङ्बाहाॽ युरुसि॥ 7 कर निङ्वाॽफुमाङ्ङिल्ले़ कुमनाधिक् खुने़ॽओ त्ये़आङ् मे़त्तु, “आदाङ्बा हाङ्ङे, इस्राइलि थक्सुबाहाॽ आदाङ्बारे़ मे़देॽरे़से़न्ने़ॽ॥ थेआङ्भे़ल्ले़ यहवे दाङ्बे़न् इस्राइलबा मनाहाॽनु होप्—एफ्राइमबा आत्तिन् मनाहाॽनुआङ् होप्॥ 8 आदाङ्बा हाङ्हाङ् लॽरिक् थङ् के़जोःक्साङ् निङ्वाॽफुमाङ्ङिल्ले़ आदाङ्बा निङ्मिहाॽरे़ खुन्छिॽ तगि हारि के़दार के़याःन्, थेआङ्भे़ल्ले़ हारि चाःप्मा मुक्साम् खुने़ॽ कत्तुॽ॥” 9 अमस्याहःल्ले़ निङ्वाॽफुमाङ्ङिल्ले़ कुमनान् मे़त्तु, “इस्राइलि थक्सुबाहाॽरे़ खुन्छिॽ लागि पिरुङ्सिङ्बा खे़न् किप् थिक् तोरा युप्पाःल्ले़ कुयाःम्बेओ आङ्गाॽ थे चोगुङ्बाबे?” निङ्वाॽफुमाङ्ङिल्ले़ कुमनाःल्ले़ नुगप् पिरु, “निङ्वाॽफुमाङ्ङिल्ले़ आदाङ्बा किप् थिक्नुःल्ले़आङ् यरिक् पिमा के़सुक्!” 10 कल्ले़चोगुल्ले़ अमस्याहःल्ले़ एफ्राइमलाम् खुने़ॽओ के़युबा थक्सुबाहाॽ से़न्दुसिआङ् हिम्मो पाङ्घुदेसुसि॥ कल्ले़चोगुल्ले़ खे़ङ्हाॽ यहुदाबाहाॽनु खुन्छिॽ साॽरिक् साक्के़न् पोगे़ॽ, हे़क्क्याङ् खुन्छिॽ सिक्पोःक्मे़ल्ले़ थेआङ् मे़न्निए हिम्मो मे़नुःक्खे़ मे़बे॥ 11 खे़न् एगाङ् अमस्याहःल्ले़ सुजा नाःक्तुआङ् खुने़ॽ कुधक्सुबाहाॽ तेॽरुसिआङ् युम्लाःक्खाङ् ने़ने़बादे़न्नो पे, हे़क्क्याङ् खे़प्मो सेइरबा १०,००० मनाहाॽ स्ये़रुसि॥ 12 यहुदाबा थक्सुबाहाॽरे़ वेॽ १०,००० मनाहाॽ कुहिङ्वे़त् मे़दे़म्सुसि, हे़क्क्याङ् खे़ङ्हाॽ लत्छा याक्पेॽइल्ले़ कुजङ्ङो मे़देॽरुसिआङ् मु मक्मे़धाःन्दुसि॥ खे़प्मो खे़ङ्हाॽ मे़दोःक्ते़आङ् कुभुदुक्मा मे़बोःक्खे़॥ 13 आम्भा खे़न् ये़म्मो अमस्याहःल्ले़ थङ्ङो मे़न्धाए हिम्मो पाङ्घुदेसुसिबा खे़न् थक्सुबाहाॽरे़ सामरियाआङ् यो यहुदाबा ये़क्यक्हाॽ बेथ-होरोन थारिक् मे़नाप्तुसि॥ खे़ङ्हाॽरे़ ३,००० मनाहाॽ मे़स्ये़रुसिआङ् यरिक् मे़नाप्तुसिबा चिगक्वा सामाहाॽ मे़देॽरु॥ 14 एदोमिहाॽ मे़नाःन्दुसिआङ् मे़नुःक्खे़ल्ले़ अमस्याहःल्ले़ सेइरबा मनाहाॽरे़ खुन्छिॽ माङ्हाॽ फे़त्तुसिआङ् खुने़ॽ आप्फेक् कुमाङ् चोगुसि॥ खुने़ॽ खे़न् माङ्हाॽ से़वा मे़त्तुसिआङ् खे़ङ्हाॽरे़ खुन्छिॽ लागि मिधिङ्मनादेमनाबा वयागे़न् सिदुङ्जभा तोःन्दु॥ 15 कल्ले़चोगुल्ले़ यहवे दाङ्बे़न् अमस्याहःन्नु कुयाःक्ले़ॽरे़आङ् खुने़ॽ माङ्निङ्वाॽपान् के़बाःप्पाधिक् पाङ्घुदासु, खे़ल्ले़ खुने़ॽ मे़त्तु, “आदाङ्बारे़ के़हुक्कोलाम् खुन्छिॽ आप्फेक् मनाहाॽ ताङ्मासे़ःप्मा मे़न्छुक्मनाबा माङ्हाॽलाम् कुभाॽ आदाङ्बारे़ थेआङ् के़गोःत्तुबाबे?” 16 खे़न् मनाःन् पारे़आङ् पत्छे़ल्ले़ अमस्याह हाङ्ङिल्ले़ खुने़ॽ मे़त्तु, “थे आनिगे खे़ने़ॽ हाङ्जुम्मोबा सुजासाबा युक्तिङ् चोःक्कासिगे़आङ् वये़बि? मे़म्बाःत्ते स्वाःत्! थेआङ् खे़ने़ॽ के़हिङ्मे़न् के़साक्पो के़धासु?” खे़न् माङ्निङ्वाॽपान् के़बाःप्पे़न् पाःप्मा नाॽमानुःल्ले़ तगि अक्खे लॽरे़, “आदाङ्बारे़ अक्खे के़जोगुआङ् आङ्गाॽ आसुजान् के़ङ्घे़प्सुम्बे़ल्ले़ चोगुल्ले़ निङ्वाॽफुमाङ्ङिल्ले़ आदाङ्बा मे़ङ्मा निःन्धो चोगुआङ् वाॽ के़लॽबा आङ्गाॽ निसुङ्ङाङ् वाॽरो॥” इस्राइलनु पोःक्खे़बा थङ् ( २ हाङ् १४:८-२० ) 17 खे़न् एगाङ् यहुदाबा हाङ् अमस्याहःल्ले़ खुने़ॽ कुसुजादाङ्बाहाॽ सुजा नाःक्तुसिआङ् इस्राइलबा हाङ् येहुरे़ कुम्मे़न्छाॽ, यहोआहाजरे़ कुस्सा येहोआसे़न् अक्खे मे़त्तुआङ् ते़न्धङ् चोःक्मारे़ लागि थक्मा साःत्तु, “ये़ॽ, आनिॽ नादुम्दुम्बा तन्नादि॥” 18 कर इस्राइलबा हाङ् येहोआसरे़ यहुदाबा हाङ् अमस्याहन् अक्तङ्बा नुगप् पिरु—“ले़बनानबा लत्छा सेर्दाःक्मे़ल्ले़ ले़बनानओबाए लत्छा साम्माङ्सिङ्ङिन् अक्तङ्बा इङ्घङ् हाक्तु, ‘खे़ने़ॽ के़स्सा मे़न्छुमान् आङ्गाॽ आस्सा ये़म्बित्छाःन्नु मेःक्खिम् मे़त्ते़ॽ॥’ खे़ब्याङ् ले़बनानबा ताम्भुङ् थक्साधिक् खे़प्मोलाम् पोःक्खे़आङ् पेःल्ले़ खे़ल्ले़ सेर्दाःक्मे़न् चिदोॽ तोॽरुरत्छ॥ 19 आल्ल अमस्याहए, खे़ने़ॽ एदोमिहाॽ नाःन्दुङ्सिङ् फाॽआङ् के़बाःत्तुॽ, हे़क्क्याङ् यम्बा के़हे़न्छिङ्ङाङ् आङ्दिङ् के़लॽ॥ आप्फेक् के़हिम्मोए हाबा युङे़गरे़ॽ॥ खे़ने़ॽ आप्फेक् नु यहुदाःन्नाङ् मे़ङ्मारे़ लागि थेआङ् के़साक्पो के़धासिङ्बाबे?” 20 कर अमस्याहःल्ले़ कन् पाःन्निन् खे़म्घे़म्माङ् मे़लाप्तुन्॥ थेआङ्भे़ल्ले़ खे़ङ्हाॽरे़ एदोमबा माङ्हाॽ मे़नाःत्तु मे़दिम्दुसिआङ् मे़वये़बाल्ले़ चोगुल्ले़ खे़ङ्हाॽ येहोआसरे़ कुहुक्को थामासिरे़ लागि निङ्वाॽफुमाङ्ङिल्ले़ याःम्बक् चोगुआङ् वये़॥ 21 कल्ले़चोगुल्ले़ इस्राइलबा हाङ् येहोआसे़न् तगि थासिङ् ये़, हे़क्क्याङ् खुने़ॽ नु यहुदाबा हाङ् अमस्याहन् यहुदाबा बेथ-सेमेसओ थङ् थक्ते़सि॥ 22 इस्राइलरे़ यहुदान् हारिजाःत्तु, हे़क्क्याङ् के़रे़क् मनाहाॽ खुन्छिॽ साःङ्गाहिम्हाॽओ मे़घे़त्छिङ्॥ 23 इस्राइलबा हाङ् येहोआसे़ल्ले़ अहज्याहरे़ कुम्मे़न्छाॽ, योआसरे़ कुस्सा यहुदाबा हाङ् अमस्याहन् बेथ-सेमेसओ ते़म्सुआङ् यरुसले़म थाक्तु॥ खुने़ॽ एफ्राइमबा लाम्धेःत्तोनु कुसुक्पोबा लुङ्ङो थारिक् किप् लिसि हुक्सिक् यारिक् यरुसले़म ये़क्यक्कोबा लुङ्धाक्किन् लुःन्दुदेसु॥ 24 खुने़ॽ ओबेद-एदोमरे़ ओमे़प्मा कुलक्पे़न्नो मे़युक्खुबा यहवे दाङ्बे़ल्ले़ कुहिम्मो खोसुबा के़रे़क् साम्म्याङ् नु युप्पा के़रे़क् खप्प्याहाॽ हे़क्क्याङ् हाङ्हिम्मो के़युङ्बा इमे़ल्लुङ्बा चिगक्वाहाॽनु पुङ्लाहिम्मो मे़साक्तुसिबा हाङ्बिफ्युङ्बाहाॽआङ् लःत्तुदेॽरुसिआङ् खुने़ॽ सामरिया नुःक्खे़बे॥ 25 इस्राइलबा हाङ् यहोआहाजरे़ कुस्सा येहोआसे़न्नुःल्ले़ यहुदाबा हाङ् येहोआसरे़ कुस्सा अमस्याहन् थिबोङ्ङाङ् ङासि तङ्बे यरिक् हिङे़॥ 26 अमस्याहरे़ कुहाङ्युक् ये़म्मोबा वेॽ हिन्दोक्हाॽ कुहेःक्सिङ्माआङ्धो कुनुप्मा थारिक् थेयहुदा नु इस्राइलबा हाङ्हाॽरे़ खुन्छिॽ साप्मुःन्धुम् साप्पन्नो साप्ते़आङ् मे़बत्ने़न्नाङ्बि? 27 अमस्याहन् यहवे दाङ्बे़न् लाम्बा लाःत्लाःत् पोःक्खे़बेआङ्धोए यरुसले़ःम्मो खुने़ॽ कुदक्ले़ङ्वाओ चे़म्भन् पोःक्खे़र वये़, हे़क्क्याङ् खुने़ॽ खे़त्छिङ्ङाङ् लाकिस पे॥ कर खे़ङ्हाॽरे़ खुने़ॽ कुएगाङ् कुएगाङ् मनाहाॽ लाकिस मे़बाङ्घुसिआङ् खुने़ॽ आम्भा खे़प्मो मे़स्ये़रु॥ 28 खे़न् एगाङ् खे़ङ्हाॽरे़ खुने़ॽ कुजेधक्किन् अन्निन् मे़गुःत्तुआङ् यरुसले़म मे़भे़त्तु॥ खुने़ॽ खे़प्मो कुसुधे़बा कुदाक्थे़बाहाॽनु सोरिक् दाउदरे़ कुये़क्यक्को मे़जिक्खुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.