२ साप्मुःन्धुम् 24 - लिम्बुयहुदाबा हाङ् योआस ( २ हाङ् १२:१-१६ ) 1 योआसे़न् हाङ्युक्नाओ थोःक्सिङ्ङे़ल्ले़ खुने़ॽ तङ्बे नुसि योरे़ हे़क्क्याङ् खुने़ॽ यरुसले़ःम्मो लिबोङ् तङ्बे हाङ्युक् चोगु॥ खुने़ॽ कुम्मा बेर्सेबा के़युङ्मा सिब्या वये़॥ 2 निङ्वाॽफुसाम्बा यहोयादाःल्ले़ कुहिङ्हिङ् यहवे दाङ्बे़ल्ले़ कुनिमो आत्तिन् पाःन्निन् नुबा चोगे़ योआसरे़ आम्भा खे़न् चोगु॥ 3 यहोयादाःल्ले़ योआसरे़ कुलागि मेःत् ने़त्छि सेगुसि, हे़क्क्याङ् खे़ङ्हाॽलाम् मे़न्छुमा ये़म्बित्छा कुस्सा मे़वये़॥ 4 कुभा ये़म् एगाङ् योआसे़ल्ले़ यहवे दाङ्बे़ल्ले़ कुहिम्मिन् चाःङ्वा मे़प्मा निङ्वाॽ चोगु॥ 5 खुने़ॽ निङ्वाॽफुसाम्बाहाॽ नु ले़बिहाॽ फुक्खुसिआङ् मे़त्तुसि, “यहुदाबा ये़क्यक्हाॽओ पेगे़म्मे़ॽआङ् के़रे़क् इस्राइलिहाॽलाम् निङ्वाॽफुमाङ्ङिल्ले़ कुहिम्मिन् चाःङ्वा मे़प्मारे़ लागि तङ्बे थक्मा मे़लःत्तुबा याङ्हाॽ फुक्खे़म्मे़ॽ॥ खम्भ्याङ् कन् याःम्बक्किन् खिमो चोगे़म्देसे़म्मे़ॽ॥” कर ले़बिहाॽरे़ खे़न् याःम्बक्किन् खिमो मे़न्जोगुन्॥ 6 कल्ले़चोगुल्ले़ हाङ्ङिल्ले़ मानिङ्वाॽफुसाम्बा यहोयादान् उःत्तुआङ् मे़त्तु, “माङ्हुप् साप्लुङ् के़याक्पा निङ्वाॽफुमाङ् सन्दोक् के़युङ्बा साःङ्गाहिम्मिन् खाप्मारे़ लागि यहवे दाङ्बे़ल्ले़ कुसे़वारोबा मोसान् नु इस्राइलबा सङ्जुम्भोहाॽरे़ मे़गुःत्तुसिबा एःङ्याङ्ङिन् यहुदा नु यरुसले़म लाम्बा आदाङ्बारे़ थेआङ् ले़बिहाॽ फोङ्मा के़म्बाङ्घुन्सिन्बाबे?” 7 आल्ल खे़न् कुॽइगे़भे़म्मा अतल्याहःल्ले़ कुस्साहाॽ निङ्वाॽफुमाङ्ङिल्ले़ कुहिम्मो मे़लासे़आङ् खे़प्मोबा के़रे़क् सेसे चिगक्वाहाॽ बाल माङ्हाॽ से़वा मे़प्मासि याःम्बक्को मे़याङुआङ् वये़॥ 8 हाङ्ङिल्ले़ सन्दोक् थिक् चोक् पाङ्घुसिआङ् यहवे दाङ्बे़ल्ले़ कुहिम्मोबा यम्बा लाम्धेत् लाःक्कात् युङ्मा पाङ्घुसि॥ 9 हे़क्क्याङ् निङ्वाॽफुमाङ्ङिल्ले़ कुसे़वारोबा मोसाःल्ले़ मुरे़क् खारे़क् थेआङ् के़होप्पादे़न्नो इस्राइलिहाॽ कुःत्तुसिबा एःङ्याङ्ङिन् मनाहाॽरे़ यहवे दाङ्बाओ मे़दारुर पोङ्ॽ फाॽआङ् यहुदा नु यरुसले़म के़रे़क् खुने़ॽ अक्खेलॽरिक् उवा चोगु॥ 10 हे़क्क्याङ् के़रे़क् सुहाङ्युक्पाहाॽ नु मनाहाॽरे़ आप्फेक् निङ्वाॽलाम्बा याङ् मे़दारुआङ् सःन्दोःक्किन् मे़न्दिम्मे थारिक् खे़प्मो मे़याक्तु॥ 11 ले़बिहाॽरे़ हाङ्ङिल्ले़ कुसुहाङ्युक्पाहाॽओ खे़न् सन्दोक्किन् मे़दारुल्ले़ खे़ङ्हाॽरे़ खे़न् सधे़क् तिम्से़बे़न् नुरिक् ओमे़मे़त्तु॥ खे़ब्याङ् हाङ्ङिल्ले़ कुसुहाङ्मिबे़न् नु मा निङ्वाॽफुसाम्बे़ल्ले़ कुसुहाङ्युक्पे़न् खे़न् कुघाले़म् लिङ्मारे़ लागि त्ये़सि, हे़क्क्याङ् खे़न् सन्दोक्किन् याम्मो आम्भा खे़न् कुयुक्नाओए मे़युक्खु॥ खे़ङ्हाॽरे़ थिक्याःन्धक् हाबा हे़क्केए मे़जोगु॥ खाम्भलॽरिक् खे़ङ्हाॽरे़ यरिक् याङ् मे़भुक्खु॥ 12 हाङ्ङिन् नु यहोयादाःल्ले़ खे़न् याङ्ङिन् यहवे दाङ्बे़ल्ले़ कुहिम्मो याःम्बक् चोःक्मा के़बाङ्बा मनाहाॽरे़ खुन्छिॽ लक्पे़न्नो पिरे़त्छुसि॥ खे़ङ्हाॽरे़ माङ्हिम्मिन् चाःङ्वा मे़प्मारे़ लागि नाम्याक्को मे़भत्छुसिबा लुङ्गे़गाम्बा नु सिङ्गे़गाम्बाहाॽ हे़क्क्याङ् माङ्हिम्मिन् चाःङ्वा मे़प्मारे़ लागि फे़न्जेॽ नु कासाओ याःम्बक् के़जोःक्पा चोबेगुहाॽ मे़बिरुसि॥ 13 कम्भलॽरिक् याःम्बक् के़जोःक्पाहाॽरे़ खुन्छिॽ निङ्वाॽ मे़बिरुआङ् याःम्बक् चोःक्मा मे़हेःक्तु, हे़क्क्याङ् खे़ङ्हाॽरे़ए खुन्छिॽ हुक्को कन् चाःङ्वा मे़प्मा याःम्बक्किन् तगि पोरे़॥ खे़ङ्हाॽरे़ तगिबाए कुबि कुइसिक् निङ्वाॽफुमाङ्ङिल्ले़ कुहिम्मिन् याम्मो मे़जोगुआङ् खे़न् चाःङ्वा मे़मे़त्तु॥ 14 खे़ङ्हाॽरे़ कन् याःम्बक्किन् मे़जोगु मे़सुरुआङ् के़नम्बा याङ्ङिन् हाङ्ङिन् नु यहोयादाओ मे़दारुआङ् मे़बिरुसि॥ खे़न् याङ्हाॽलाम् यहवे दाङ्बे़ल्ले़ कुहिम्मिल्ले़ लागि माङ्से़वा याःम्बक् नु मिधिङ्मनादेमनाबा वयागे़न् सिदुङ्जभा याःम्बक् ने़प्माङ्ले़ लागि सामापुमाहाॽ, हे़क्क्याङ् वेॽ साम्म्याङ् नु युप्पा खप्प्याहाॽ मे़धगु॥ यहोयादान् कुहिङ्हिङ् यहवे दाङ्बे़ल्ले़ कुहिम्मो मिधिङ्मनादेमनाबा वयागे़न् सिदुङ्जभाहाॽ चक्मे़ल्लॽए मे़दोन्दु॥ 15 आल्ल यहोयादान् यरिक् तङ्बे हिङे़ हे़क्क्याङ् काप्पोबा तुम्से़आङ् १३० तङ्बे योरे़ल्ले़ मासिङ्॥ 16 खुने़ॽ दाउदरे़ कुये़क्यक्को हाङ्हाॽरे़ए खुन्छिॽ इपुङ्ङो मे़जिक्खु, थेआङ्भे़ल्ले़ खुने़ॽ इस्राइलओ निङ्वाॽफुमाङ्ङिन् नु माङ्हिम्मिल्ले़ लागि नुबा याःम्बक् चोगुआङ् वये़रो॥ योआसरे़ कुभे़न् याःम्बक् 17 यहोयादान् मासिङ्ङाङ् एगाङ् यहुदाबा सुहाङ्युक्पाहाॽ योआस हाङ्ङिन् से़वा मे़त्छे़ मे़द्ये़, हे़क्क्याङ् खे़ङ्हाॽरे़ खुन्छिॽ पाःन्निन् खुने़ॽ खे़प्सुर मे़याःन्दु॥ 18 खे़ङ्हाॽरे़ यहवे दाङ्बा खुन्छिॽ पाधे़बाहाॽरे़न् निङ्वाॽफुमाङ्ङिल्ले़ कुहिम्मिन् मे़ले़रुआङ् असेरा माङ्सित्लाङ्हाॽ नु वेॽ नावाइत्लाहाॽ से़वा मे़मे़त्तु॥ कन् आप्तिक्के़ल्ले़ चोगुल्ले़ यहुदा नु यरुसले़म सम्धाङ् निङ्वाॽफुमाङ्ङिल्ले़ कुसाक्के़न्निन् इरे़द्ये़॥ 19 कर खे़ङ्हाॽ खुने़ॽओए हिमा ताःप्मासिरे़ लागि यहवे दाङ्बे़ल्ले़ माङ्निङ्वाॽपान् के़बाःप्पाहाॽ पाङ्घुसि॥ खे़न् माङ्निङ्वाॽपान् के़बाःप्पाहाॽरे़ खे़ङ्हाॽरे़ खुन्छिॽ आप्तिक्के़न् ओःन्मे़धाक्तुसि, कर खे़ङ्हाॽरे़ माङ्निङ्वाॽपान् के़बाःप्पाहाॽरे़ खुन्छिॽ पाःन्निन् खे़म्मा मे़न्दे़न्दे़न्॥ 20 खे़ब्याङ् निङ्वाॽफुमाङ्ङिल्ले़ कुयाम्साम्मिन् निङ्वाॽफुसाम्बा यहोयादाःल्ले़ कुस्सा जकरियाओ थासिङ् ये़॥ खुने़ॽ मनाहाॽरे़ खुन्छिॽ तगि ये़म्सिङ्ङाङ् पाःत्तु, “यहवे दाङ्बे़ल्ले़ अक्खे पाःत्तुॽ—‘खिनिॽ थेआङ् यहवे दाङ्बे़ल्ले़ कुइङ्जाङ्ङिन् के़भेःन्दुम्बाबे? खिनिॽ के़न्नुरिन् के़न्दासिन्लो॥ यहवे दाङ्बे़न् खिनिॽ के़नाॽरुम्बाल्ले़ चोगुल्ले़ खुने़ॽआङ् खिनिॽ के़नाॽरिआङ् वाॽ!’” 21 कर खे़ङ्हाॽरे़ जकरियाःल्ले़ कुदक्ले़ङ्वाओ ताप्फे़ःम्बा पाःन्दङ् मे़जोगु, हे़क्क्याङ् योआस हाङ्ङिल्ले़ कुइङ्जाङ् मे़घोसुआङ् खे़ङ्हाॽरे़ यहवे दाङ्बे़ल्ले़ कुहिम् लक्खुम्मो जकरियान् लुङ्ङिल्ले़ मे़ले़प्तु मे़स्ये़रु॥ 22 योआस हाङ्ङिल्ले़ जकरियाःल्ले़ कुम्बा यहोयादाःल्ले़ चोगुबा हाङ्से़वान् निङ्वाॽ मे़इःत्तुन्नाङ् कुस्सा जकरियान् से़प्मा पाङ्घुसि॥ सिमा चोगे़ल्ले़ जकरियाःल्ले़ अक्खे पाःत्तु, “यहवे दाङ्बे़ल्ले़ कन् निसुर, हे़क्क्याङ् कन् कुइसिक् खिनिॽ खुम्दिङ् के़बिरिररो!” योआसरे़ कुहाङ्युक् ये़म्मिल्ले़ कुनुप्मा 23 आम्भा खे़न् तङ्बेःल्ले़ कुनुप्मो अरामि थक्सुबाहाॽ योआसरे़ कुदक्ले़ङ्वाओ मे़भे़रे़॥ खे़ङ्हाॽरे़ यहुदा नु यरुसले़ःम्मो थङ् मे़जोगुआङ् मनाहाॽरे़ खुन्छिॽ के़रे़क् लाम्लोबाहाॽ मे़स्ये़रुसि॥ खे़ङ्हाॽरे़ मे़नाप्तुसिबा खुन्छिॽ चिगक्वा सामाहाॽ दमस्कसबा हाङ्ङे़ओ मे़हाङु मे़देसु॥ 24 अरामिहाॽरे़ खुन्छिॽ चबे़ःत्छिक् थक्सुबा लुप्हाॽरक् थङ् मे़जोगे़, हे़क्केसाङ् यहवे दाङ्बे़ल्ले़ इस्राइलबा यरिक् थक्सुबा सुम्हाॽ खे़ङ्हाॽरे़ खुन्छिॽ हुक्को थासुसि॥ यहुदाबा मनाहाॽरे़ यहवे दाङ्बा खुन्छिॽ पाधे़बाहाॽरे़न् निङ्वाॽफुमाङ्ङिन् मे़ले़रुबाल्ले़ चोगुल्ले़ योआसरे़ खोमा यारुबा खुम्दिङ्ङिन् इरे़द्ये़॥ 25 हाङ्ङिन् साॽरिक् मे़घाःन्दुआङ् आरामिहाॽ मे़बे खे़न् एगाङ् यहोयादाःल्ले़ कुस्सान् स्ये़बे़ल्ले़ कुले़क्वा नुःक्मारे़ लागि हाङ्ङिल्ले़ कुसुहाङ्युक्पाहाॽरे़ खुने़ॽ कुदक्ले़ङ्वाओ चे़म्भन् मे़जोगु, हे़क्क्याङ् खे़ङ्हाॽरे़ हाङ्ङिन् खुने़ॽ कुने़त्नाओए मे़स्ये़रु॥ कम्भलॽरिक् खुने़ॽ स्ये़आङ् दाउदरे़ कुये़क्यक्को मे़जिक्खु, कर हाङ्हाॽरे़ खुन्छिॽ इपुङ्ङोग मेःन्॥ 26 खे़न् ताप्फे़ःम्बा पाःन्दङ् के़जोःक्पाहाॽग अम्मोनि मे़न्छुमा सिम्मतरे़ कुस्सा जाबाद नु मोआबि मे़न्छुमा सिम्रितरे़ कुस्सा यहोजाबादे़न् वये़सि॥ 27 योआसरे़ कुमुॽइदाङ्साहाॽरे़ खुन्छिॽ याःम्बेओबा पाःन्, खुने़ॽ कुयाःम्बेओ यरिक् माङ्निङ्वाॽपान् नु निङ्वाॽफुमाङ्ङिल्ले़ कुहिम्मिन् खुने़ॽ याम्मो चोगुबा पाःन्निल्ले़ कुयाःम्बेओ हाङ्हाॽरे़ खुन्छिॽ साप्मुःन्धुम् साप्पन्नो साप्ते़आङ् पत्॥ खुने़ॽ कुएगाङ् कुस्सा अमस्याहन् हाङ् पोःक्खे़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.