२ साप्मुःन्धुम् 23 - लिम्बुअतल्याहरे़ कुदक्ले़ङ्वाओ पिफ्युङ् ( २ हाङ् ११:४-१६ ) 1 नुसिगेक्पा तङ्बेओ यहोयादारे़ कुमुक्साम्मिन् ओःन्धाक्तुसि॥ खुने़ॽ किप् थिक् किप् थिक्कोबा मनासुम्हाॽरे़ खुन्छिॽ थक्मोबाहाॽ, यरोहामरे़ कुस्सा अजर्याह, येहोहानानरे़ कुस्सा इस्माएल, ओबेदरे़ कुस्सा अजर्याह, अदायाहरे़ कुस्सा मासेयाह नु जिक्रिरे़ कुस्सा एलिसापाते़न्नु माङ्हुप् चोगु॥ 2 हे़क्क्याङ् खे़ङ्हाॽ यहुदाबा के़रे़क् पाङ्जुम्हाॽओ मे़बेआङ् ले़बिहाॽ नु इस्राइलबा हिम्सयङ्हाॽओबा लाम्लोबाहाॽ यरुसले़ःम्मो मे़दारुसि॥ खे़ङ्हाॽ यरुसले़ःम्मो मे़द्ये़ःल्ले़, 3 खे़प्मो के़जुम्बा के़रे़क् सङ्जुम्भोबा मनाहाॽरे़ यहवे दाङ्बे़ल्ले़ कुहिम्मो हाङ्ङिल्ले़ कुस्सा योआसे़न्नु माङ्हुप् मे़जोगु॥ यहोयादाःल्ले़ खे़ङ्हाॽ मे़त्तुसि, “यहवे दाङ्बे़ल्ले़ दाउदरे़ कुधिन्दाङ् सायोबोराहाॽरे़ खुन्छिॽ याःम्बेओ माङ्हुप् चोगुबा कुइसिक् हाङ्ङे़ल्ले़ कुस्साःल्ले़ युक् चोगुररो॥ 4 आल्ल खिनिॽ अक्खे के़जोगुम्ल पोङ्ॽ—सबाथ ये़न्नो आबाङे याःम्बक्को के़दाबा खिनिॽ निङ्वाॽफुसाम्बाहाॽ नु ले़बिहाॽरे़ खुन्छिॽ कुसुक्वा थिक् मालाम्धेःत्हाॽओ, 5 वेॽ कुलक् सुम्सिओ कुलक् थिक् चैँ हाङ्हिम्मो, हे़क्क्याङ् वेॽ कुलक् सुम्सिओ कुलक् थिक् चैँ हिम् युक्नाःल्ले़ कुबुङ्ङोबा मा लाम्धेःत्तो इक्के़गोबा मे़युङ्ल॥ वेॽ के़रे़क् मनाहाॽग यहवे दाङ्बे़ल्ले़ कुहिम्मोबा लक्खुम्हाॽओ मे़वाॽर पोङ्ॽ॥ 6 माङ्से़वा के़जोःक्पा निङ्वाॽफुसाम्बाहाॽ हे़क्क्याङ् ले़बिहाॽनुःल्ले़ वेॽ आत्तिन्हाॽआङ् यहवे दाङ्बे़ल्ले़ कुहिम्मो लाःप्मा मे़भाःक्ताम्सिम्मे़न्ने़ॽ॥ निङ्वाॽफुसाम्बाहाॽ नु ले़बिहाॽग लाःप्मा मे़सुक् थेआङ्भे़ल्ले़ खे़ङ्हाॽ मे़दोन्दुसिआङ् वाॽ॥ कर वेॽ के़रे़क् मनाहाॽरे़ यहवे दाङ्बे़ल्ले़ पिरुसिबा इङ्जाङ्ङिन् चक्मे़ल्लॽए मे़नाःत्तुआङ् मे़ल्लाःत्ने़न्ल॥ 7 ले़बिहाॽरे़ खुन्छिॽ खजुम्घया फे़जुम्भे़याहाॽ मे़गाप्सिङ्ङाङ् हाङ्ङिन् के़रे़क् पिसाङ् कम्ब्राङ् मे़मे़त्तुर॥ कुभा माङ्हिम्मो लासे़ने़भग्र खे़न् स्ये़प्मा पोङ्ॽ॥ खिनिॽग हाङ्ङिन् आत्ति पेःक्साङ् खुने़ॽ कुबेसाङ् वये़म्मे़ॽ॥” 8 निङ्वाॽफुसाम्बा यहोयादाःल्ले़ चोगुबा थे़प्पे़त् पाःन्हाॽ ले़बिहाॽ नु यहुदाबा के़रे़क्ले़ मे़इःत्तु मे़नाःत्तु॥ मनाधक्मा के़रे़क्ले़ खुन्छिॽ आप्फेक् मनाहाॽ, सबाथओ याःम्बक्को मुरा मे़मे़त्तुसिबाहाॽ नु याःम्बक् चोःक्मा के़सुःप्पाआङ् याःन्दिक् के़दाबाहाॽ मे़दारुसि, थेआङ्भे़ल्ले़ निङ्वाॽफुसाम्बा यहोयादाःल्ले़ कुभा मनासुम्हाॽ मे़ल्ले़त् मे़न्देसिङ्ङे कत्तुसि॥ 9 खे़ब्याङ् खुने़ॽ किप् थिक् किप् थिक् मनासुम्हाॽरे़ खुन्छिॽ थक्मोबाहाॽ निङ्वाॽफुमाङ्ङिल्ले़ कुहिम्मो के़ये़प्पा दाउद हाङ्ङिल्ले़ कुलाःक्हाॽ खम्भ्याङ् यम्बा नु चुक्पा खोहाॽ पिरुसि॥ 10 खे़न् एगाङ् खुने़ॽ के़रे़क् मनाहाॽ खुन्छिॽ फे़जुम्भे़याहाॽ खजुम्घयाहाॽ मे़गाप्सिङ्ल याःन्दुसिआङ् हाङ्ङिन् कब्रिङ् कप्मारे़ लागि ले़त्ति तोःम्मादे़न् नु माङ्हिम् पेसाङ् खुन्छिॽ ये़प्नादे़न्नो माङ्हिम् थोहाङ् नु योहाङ् ले़प्माङ् थिक् कुसुक्पोलाम् नासमा कुसुक्पो थारिक् ये़प्सुसि॥ 11 खे़न् एगाङ् यहोयादान् नु खुने़ॽ कुस्साहाॽरे़ हाङ्ङिल्ले़ कुस्सान् लाःक्कात् मे़लःत्तु, हे़क्क्याङ् खुने़ॽ कुधे़गेःक्पो तिच मे़घुःक्तु॥ खे़ङ्हाॽरे़ खुने़ॽ माङ्हुप्सक् लिङ्मनाबाधिक् मे़बिरुआङ् खुने़ॽ हाङ् पोःक्खे़बा उवा मे़जोगु॥ हे़क्क्याङ् खे़ङ्हाॽरे़ खुने़ॽ माङ्धोःक्ना मे़बिरुआङ् अक्खे मे़बाःत्तुर यम्बा इक्लाओ मे़अःक्ते़, “हाङ्ङिल्ले़ कुधाःक् चाॽररो!” 12 हाङ्ङिल्ले़ कुनारा मे़भोसुर मनाहाॽ ना नु कत्ना मे़लॽरे़आङ् मे़यागे़बा इक्लान् अतल्याहःल्ले़ खे़प्सुआङ् यहवे दाङ्बे़ल्ले़ कुहिम्मो खुने़ॽ खे़ङ्हाॽरे़ओ त्ये़॥ 13 हे़क्क्याङ् योआस हाङ्ङिन् सित्लाङ्ङिल्ले़ कुबेसाङ् सिगाङ् लाःप्मा लाम्धेःत्तिल्ले़ कुयाओ ये़बे़गरे़बा खुने़ॽ निसु॥ सुहाङ्युक्पाहाॽ नु सादाङ् के़मुःप्पाहाॽ हाङ्ङिल्ले़ कुबेसाङ् मे़ये़बे़, खम्भ्याङ् लाजेॽओबा के़रे़क् मनाहाॽरे़ खुने़ॽ कुमिङ्सो इङ्धाङ्ङो ये़ये़ लॽरिक् सोसोत्लराङ् मे़जोगे़र हे़क्क्याङ् सादाङ्हाॽ मे़मुक्खुर मे़यागे़॥ के़रे़क् मनाहाॽ मे़सःत्ते़र मे़यागे़॥ हे़क्क्याङ् साम्लो साम्गे़मे़प्पाहाॽ मुक्लाहाॽनु सोसोरिक् सोसोःत्लराङ्ङिन् लाम्लोमा याःम्बक् मे़जोगुर मे़यागे़॥ खे़ब्याङ् अतल्याह हाङ्मे़ल्ले़ कुजाङ्हाॽ थे़ःक्खुआङ् अःक्ते़आङ् पाःत्तु, “हाङ्बिफ्युङ् पोःक्से़रो! हाङ्बिफ्युङ् पोःक्खे़रो!” 14 निङ्वाॽफुसाम्बा यहोयादाःल्ले़ किप् थिक् किप् थिक् मनासुम्हाॽरे़ खुन्छिॽ थक्मोबाहाॽ अक्खे मे़त्तुसिआङ् इङ्जाङ् पिरुसि, “इक्के़गोबा कम्ब्राङ्हाॽरे़ खुन्छिॽ लुम्मोलाम् खे़न् लाःक्कात् लःत्ते़म्मे़ॽ, हे़क्क्याङ् खुने़ॽ के़दिम्बाहाॽआङ् के़रे़क् ताभेःल्ले़ च्ये़प्ते़म् से़रे़म्सिम्मे़ॽ॥” थेआङ्भे़ल्ले़ निङ्वाॽफुसाम्बे़ल्ले़ अक्खे पाःत्तुआङ् वये़, “यहवे दाङ्बे़ल्ले़ कुहिम्सिगाङ् खे़न् मे़स्ये़रे़म्मिन्ने़ॽ॥” 15 खे़ब्याङ् खे़ङ्हाॽरे़ अतल्याहन् मे़दे़म्सु, हे़क्क्याङ् हाङ्हिम् तगाङ् मे़देॽरुआङ् सिगाङ् लाःप्मा आम्भा खे़न् अन् लाम्धेःत्तिल्ले़ कुबुङ्ङो मे़स्ये़रुरो॥ यहोयादाःल्ले़ तोःन्दुबा याःम्बक्हाॽ ( २ हाङ् ११:१७-२० ) 16 खे़न् एगाङ् यहोदाःल्ले़ खुने़ॽ आप्फेक् नु के़रे़क् मनाहाॽ हे़क्क्याङ् हाङ्ङिन् यहवे दाङ्बे़ल्ले़ कुमना मे़बोङ्ल पोङ्ॽ फाॽआङ् माङ्हुप् चोगु॥ 17 हे़क्क्याङ् के़रे़क् मनाहाॽ बाल माङ्हिम्मो मे़लासे़आङ् खे़न् मे़लुःन्दु मे़देसु॥ खे़ङ्हाॽरे़ खे़प्मोबा ले़त्ति तोःम्मादे़न्हाॽ नु नावाइत्लाहाॽ कुम्जिक्मा मे़जोगु, खम्भ्याङ् बालरे़ कुयक्याबा मत्ताने़न् ले़त्ति तोःम्मादे़न्हाॽरे़ कुदगाङ् मे़स्ये़रु॥ 18 खे़ब्याङ् यहोयादाःल्ले़ यहवे दाङ्बे़ल्ले़ कुहिम्मिन् ओमे़प्मा याःम्बक्किन् निङ्वाॽफुसाम्बा ले़बिहाॽ हुक्सुप्तुसि॥ कुहेःक्सिङ्मा ये़म्माङ्धोए से़वासाम्लो साम्मे़त्नु हे़क्क्याङ् सःप्मार सोसोत्लराङ् चोःक्नु मोसाःल्ले़ कुसाम्योथिम्मो निःन्धो के़बोङ्बा कुइसिक् यहवे दाङ्बाओ मिधिङ्मनादेमनाबा वयागे़न् सिदुङ्जभा तोःम्मारे़ लागि हे़क्क्याङ् यहवे दाङ्बे़ल्ले़ कुहिम्मो याःम्बक् चोःक्मारे़ लागि दाउदरे़ ले़बिहाॽ मुरा मे़त्तुसिआङ् वये़॥ 19 कुभा परिक्पा आसुत्थो के़बोङ्बा आत्तिन् मनाःन्नाङ् सिगाङ् लाःप्मा मे़म्भाःक्मारे़ लागि यहवे दाङ्बे़ल्ले़ कुहिम्मोबा मालाम्धेःत्हाॽओ खुने़ॽ लाम्धेत् के़गोबाहाॽ ये़प्सुसि॥ 20 खे़ब्याङ् थक्मोबाहाॽ, तुम्म्याङ्हाङ्हाॽ, मनाहाॽरे़ खुन्छिॽ युक्साबाहाॽ नु लाजेॽओबा के़रे़क् मनाहाॽ याङ्सिङ्ङाङ् खुने़ॽ हाङ्ङिन् यहवे दाङ्बे़ल्ले़ कुहिम्मो तारु॥ खे़ङ्हाॽ थोसमा लाम्धेःत्तोलाम् मे़बोःक्खे़आङ् हाङ्हिम्मो मे़लासे़ हे़क्क्याङ् हाङ्ङिन् हाङ्युक्नाओ मे़युक्खु॥ 21 खक्पे़त् मनाहाॽरे़ खुन्छिॽ निङ्वाॽ त्ये़आङ् ये़क्यक्को चिजि ये़म्ये़म् पोःक्खे़, थेआङ्भे़ल्ले़ अतल्याह हाङ्मे़न् ताभेःल्ले़ मे़स्ये़रुआङ् वये़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.