२ साप्मुःन्धुम् 22 - लिम्बुयहुदाबा हाङ् अहज्याह ( २ हाङ् ८:२५-२९ , ९:२१-२८ ) 1 यरुसले़ःम्बा यक्युङ्बाहाॽरे़ यहोरामरे़ कुले़क्वा खुने़ॽ कुस्सा फोःक्वाबा अहज्याहन् हाङ् मे़जोगु, थेआङ्भे़ल्ले़ थङ्ङो अरबिहाॽनु के़दङ्बाआङ् नाप्मा हिप्मा याःम्बक् के़जोःक्पाहाॽरे़ खुने़ॽ के़रे़क् यम्बा कुस्साहाॽ मे़स्ये़रुसिआङ् वये़॥ कल्ले़चोगुल्ले़ यहोरामरे़ कुस्सा अहज्याहन् यहुदाबा हाङ् पोःक्खे़॥ 2 हाङ्युक्नाओ थोःक्सिङ्ङे़ल्ले़ खुने़ॽ निबोङ्ङाङ् ने़त्छि तङ्बे योरे़॥ खुने़ॽ यरुसले़ःम्मो तङ्बे थिक् हाङ्युक् चोगु॥ खुने़ॽ कुम्मारे़ कुमिङ् अतल्याह वये़॥ खुने़ॽ कुम्मा ओम्रिरे़ कुम्मे़न्छाॽमा वये़॥ 3 अहज्याहन्नाङ् आहाब हाङ्ङिल्ले़ कुहिम्सयङ्ङोबा ये़प्ले़क्को लाङ्घेगे़, थेआङ्भे़ल्ले़ फे़न्याःम्बक् चोःक्मारे़ लागि खुने़ॽ कुम्मारे़ खुने़ॽ आःन्छिङ्मा पिरु॥ 4 आहाबरे़ कुहिम्सयङ्हाॽरे़ मे़जोगुबा कुइसिक् यहवे दाङ्बे़ल्ले़ कुनिमो आत्तिन् पाःन्निन् ताप्फे़ःम्बा वये़ खुने़ॽआङ् आम्भा खे़न् चोगु, थेआङ्भे़ल्ले़ खुने़ॽ कुम्बा मासिङ्ङाङ् एगाङ् खे़ङ्हाॽ खुने़ॽ फे़क्के़लाःम्बा सुजासाबा मे़बोःक्खे़॥ 5 रामोत-गिलादओ अरामबा हाङ् हजाएलरे़ कुदक्ले़ङ्वाओ ते़न्धङ् चोःक्मारे़ लागि खुने़ॽ इस्राइलबा हाङ् आहाबरे़ कुस्सा योरामे़न्नु तेःङ् चोःक्सिङ्मारे़ लागि खे़ङ्हाॽ सुजा नाःक्तुसि॥ आरामिहाॽरे़ योरामे़न् मे़घाःन्दु, 6 हे़क्क्याङ् रामोतओ आरामबा हजाएले़न्नु के़बोङ्बा थङ्ङो काःन्दे़बालाम् वेःप्मारे़ लागि खुने़ॽ यिजरेलओ नुःक्खे़आङ् पे॥ खे़ब्याङ् यहुदाबा हाङ् यहोरामरे़ कुस्सा अहज्याहन् योरामे़न् तुम्मारे़ लागि यिजरेल पे, थेआङ्भे़ल्ले़ खुने़ॽ काःन्दे़आङ् ने़स्से़॥ 7 अहज्याहःल्ले़ योरामे़न् तुमुबाल्ले़ चोगुल्ले़ निङ्वाॽफुमाङ्ङिल्ले़ अहज्याहन् आगे़र याःन्दु॥ आम्भा खे़न् तुमे़सिबा ये़म्मो अहज्याहन् योरामे़न्नु सोरिक् निम्सिरे़ कुस्सा येहुन् तुम्से़ पे॥ आहाबरे़ कुहिम्सयङ्हाॽ मे़ङ्मासिरे़ लागि यहवे दाङ्बे़ल्ले़ येहुःन्ने युक्तिङ् चोगुआङ् वये़॥ 8 येहुःल्ले़ आहाबरे़ कुहिम्सयङ्ङो खासे़न् चोःक्मा खुम्दिङ् तारुल्ले़ अहज्याहरे़ कुलागि से़वा के़जोःक्पा यहुदाबा सुहाङ्युक्पाहाॽ नु अहज्याहरे़ कुन्नाक्पाहाॽ येहुःल्ले़ तुमुसिआङ् स्ये़रुसि॥ 9 खे़न् एगाङ् खुने़ॽ अहज्याहन् हक्सु, हे़क्क्याङ् येहुरे़ कुमनाहाॽरे़ खुने़ॽ सामरिया लाजेॽओ चिङ्सिङ्ङाङ् युङे़ल्ले़ मे़दुमु॥ खे़ङ्हाॽरे़ अहज्याहन् येहुओ मे़युरुआङ् मे़स्ये़रु॥ खे़ङ्हाॽरे़ खुने़ॽ मे़लुप्तु, थेआङ्भे़ल्ले़ खुन्छिॽ अक्खे मे़बाःत्तु, “खुने़ॽग के़रे़क् कुसिक्लुङ्माॽरे़ यहवे दाङ्बे़ल्ले़ कुलाम्लोमान् के़गोःप्पा यहोसापातरे़ कुस्सा वये़रो॥” खे़न् एगाङ् हाङ्जुम्मो अहज्याहरे़ कुहिम्सयङ्ङो आत्तिन्नाङ् मुक्के़गुबा मे़बोःक्खे़न्लो॥ अतल्याह नु योआस ( २ हाङ् ११:१-३ ) 10 अहज्याहरे़ कुम्मा अतल्याहरे़ कुस्सान् स्ये़बा निसुआङ् यहुदाबा हाङ्हिम्सयङ्हाॽ के़रे़क् मे़ङ्मासिरे़ लागि खुने़ॽ लःन्दे़॥ 11 कर यहोराम हाङ्ङिल्ले़ कुस्सा मे़न्छुमा यहोसेबाःल्ले़ अहज्याहःल्ले़ कुस्सा योआसे़न् से़प्मा मे़जोगुसिबा हाङ्साहाॽरे़ खुन्छिॽ लुम्मोलाम् स्वाःत् खे़त्तुआङ् तेॽरु, हे़क्क्याङ् खुने़ॽ के़गप्मा मे़न्छुमान्नु खुने़ॽ लत्छा इम्मादे़न् याक्फाङ्ङो चिक्खु युक्खुसि॥ यहोराम हाङ्ङिल्ले़ कुस्सा मे़न्छुमान्नु निङ्वाॽफुसाम्बा यहोयादारे़ कुमेत् यहोसेबान् अहज्याहरे़ कुन्ने़ॽ पोःक्खे़बाल्ले़ चोगुल्ले़ खुने़ॽ योआसे़न् अतल्याहरे़ कुहुक्को मे़न्धाए चिक्खु युक्खु, हे़क्क्याङ् अतल्याहःल्ले़ योआसे़न् स्ये़प्मा मे़घोसुन्॥ 12 अतल्याहरे़ यहुदा लाजेॽओ हाङ्युक् चोगुल्ले़ योआसे़न् खे़ङ्हाॽनुए सोरिक् यहवे निङ्वाॽफुमाङ्ङिल्ले़ कुहिम्मो तङ्बे तुक्सि थारिक् चिङ्सिङ्ङाङ् युङे़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.