२ साप्मुःन्धुम् 21 - लिम्बु1 खे़न् एगाङ् यहोसापाते़न् खुने़ॽ कुसुधे़बा कुदाक्थे़बाहाॽनु सोरिक् तङ्सिङ्से़ पेआङ् खे़ङ्हाॽनु सोरिक् दाउदरे़ कुये़क्यक्को मे़जिक्खु॥ हे़क्क्याङ् खुने़ॽ कुस्सा यहोरामे़न् हाङ् पोःक्खे़॥ 2 यहोरामरे़ कुन्साॽहाॽ अजर्याह, यहिएल, जकरिया, अजर्याह, मिखाएल नु सपत्याह मे़वये़॥ कन्हाॽ के़रे़क् इस्राइलबा हाङ् यहोसापातरे़ कुस्सा मे़वये़॥ 3 खे़ङ्हाॽरे़ खुन्छिॽ पानुदिङ् पाःल्ले़ खे़ङ्हाॽ साम्म्याङ्, युप्पा हे़क्क्याङ् कुमे़न् के़घिःक्पा सामाहाॽ नु यहुदाओ ताप्थेक् याम्धेक्पा ये़क्यक्हाॽआङ् पिरुसि॥ कर हाङ्जुम्मिन् खुने़ॽ यहोरामे़न् पिरु, थेआङ्भे़ल्ले़ खे़न् तुम्बा वये़रो॥ यहुदाबा हाङ् यहोराम ( २ हाङ् ८:१७-२४ ) 4 यहोरामे़न् खुने़ॽ कुम्बारे़ कुहाङ्युक्नाओ युङे़ल्ले़ खुने़ॽ के़रे़क् कुन्साॽसि नु इस्राइलबा कुभा सुहाङ्युक्पाहाॽआङ् ताभेःल्ले़ च्ये़प्तु स्ये़रुसि॥ 5 खुने़ॽ हाङ्युक्नाओ थोःक्सिङ्ङे़ल्ले़ सुम्बोङ्ङाङ् ने़त्छि तङ्बे योरे़॥ खुने़ॽ यरुसले़ःम्मो तङ्बे ये़त्छि हाङ्युक् चोगु॥ 6 आहाबरे़ कुहिम्सयङ् हे़क्के खुने़ॽ इस्राइलबा हाङ्हाॽरे़ खुन्छिॽ लाम्मो लाङ्घेगे़, थेआङ्भे़ल्ले़ खुने़ॽ आहाबरे़ कुस्सा मे़न्छुमान् ते़न्धाम् मेःक्खिम् लिःक्खुआङ् वये़॥ यहवे दाङ्बे़ल्ले़ कुनिमो आत्तिन् पाःन्निन् ताप्फे़ःम्बा चोगे़ खे़ल्ले़ हाबा खे़न् चोगु॥ 7 कर यहवे दाङ्बे़ल्ले़ दाउदे़न्नु चोगुबा माङ्हुप्पिल्ले़ चोगुल्ले़ खुने़ॽ दाउदरे़ कुहिम्सयङ्हाॽ मे़ङ्मासि निङ्वाॽ मे़जोगुन्, खुने़ॽ दाउदे़न् नु कुमुॽइदाङ्साहाॽरे़ लागि आभे़ल्ले़साङ् सदादिङ् के़दिःप्पाआङ् के़युङ्बा सेमि हाःम्मा माङ्हुप् चोगुआङ् वये़॥ 8 यहोरामरे़ हाङ्युक् चोगुबा ये़म्मो एदोमिहाॽ यहुदाःल्ले़ कुदक्ले़ङ्वाओ पिफ्युङ्बा मे़बोःक्खे़आङ् खुन्छिॽ आप्फेक् हाङ्धिक् मे़भोःक्खु॥ 9 कल्ले़चोगुल्ले़ यहोरामे़न् खुने़ॽ कुसुहाङ्युक्पाहाॽ हे़क्क्याङ् के़रे़क् कुअन्लाधाहाॽनु सोरिक् ए़दोम ले़प्माङ् थासिङ्॥ एदोमिहाॽरे़ खुने़ॽ नु कुअन्लाधा के़लोङ्बाहाॽ किर्गप् मे़गबुसि, कर खुने़ॽ पोगे़आङ् से़न्दिक्सा पिन्दे़घे़रे़॥ 10 एदोमे़न् आइन्बा ये़न् थारिक्के यहुदाःल्ले़ कुदक्ले़ङ्वाओ पिफ्युङ्बा पोःक्खे़आङ् वाॽ॥ आम्भा खे़न् ये़म्मो लिब्नाःल्ले़आङ् पिफ्युङ् चोगु, थेआङ्भे़ल्ले़ यहोरामे़ल्ले़ कुम्बा कुन्धे़बासिरे़ खुन्छिॽ निङ्वाॽफुमाङ्ङिन् ले़रुदेसुआङ् वये़॥ 11 खुने़ॽ यहुदाबा कोःक्मा लाजेॽओ माङ्धाःन्हाॽ चोगु खम्भ्याङ् खुने़ॽ यरुसले़म के़युङ्बाहाॽ नावाइत्ला से़वा मे़प्मा पाङ्घुसिआङ् के़त्निमा याःम्बक् के़जोःक्मानु कुदङ्बा चोगुसिआङ् यहुदान् ताप्फे़ःम्बा लाम्मो हिसु॥ 12 यहोरामे़ल्ले़ माङ्निङ्वाॽपान् के़बाःप्पा एलियान् लाम्बा साप्पेःत्ता थिक् खोसु॥ खे़प्मो अक्तङ्बा साप्ते़आङ् पत्छे़रो— “आदाङ्बारे़ के़सुधे़बा दाउदरे़ कुनिङ्वाॽफुमाङ् यहवे दाङ्बे़ल्ले़ अक्खे पाःत्तुॽ—‘के़म्बा यहोसापात नु यहुदाबा हाङ् आसाःल्ले़ नाःत्तुबा लाम्मिन् खे़ने़ॽ के़न्नाःत्तुन्॥ 13 कर इस्राइलबा हाङ्हाॽ नु आहाबरे़ कुहिम्सयङ्हाॽरे़ मे़जोगुबा कुसिङ् खुन्छिॽ ये़प्ले़क्को लाङ्गे़घेगे़आङ् यहुदा नु यरुसले़म के़युङ्बाहाॽ नावाइत्ला से़वा मे़प्मा के़बाङ्घुसिआङ् के़त्निमा याःम्बक् के़जोःक्मानु कुदङ्बा के़जोगुसि॥ खम्भ्याङ् खे़ने़ॽ के़म्बारे़ कुहिम्सङ्ङोबा पासिङ्पादाङ् खे़ने़ॽ आप्फेक् के़न्साॽसि के़स्ये़रुसि॥ खे़ङ्हाॽ खे़ने़ॽनुःल्ले़ के़नुॽबा मे़वये़॥ 14 खे़ङ्हाॽ के़रे़क् के़जोगुबाल्ले़ चोगुल्ले़ यहवे दाङ्बे़ल्ले़ खे़ने़ॽ के़मनाहाॽ, खे़ने़ॽ के़स्साहाॽ, खे़ने़ॽ के़मेःत्हाॽ नु के़रे़क् के़याङ्सा कुन्धेहाॽ खाप्पुथ्यःङ् के़बोङ्बा खुम्दिङ् ताःप्मा निङ्वाॽ इःत्तुॽ॥ 15 खे़ने़ॽ आबाङेग मे़न्वेःप्मनाबा साप्पोक् हिदुःत् तुक्मारे़ के़याङ्ॽ, हे़क्क्याङ् खे़न् तुक्मे़ल्ले़ चोगुल्ले़ के़साप्पोक् के़हिदुःत्हाॽ ना चम्बे़त् लःम्भे़न्॥’” 16 यहवे दाङ्बे़ल्ले़ यहोरामरे़ कुदक्ले़ङ्वाओ कुसिहाॽरे़ खुन्छिॽ पेसाङ् के़युङ्बा पलिस्तिहाॽ नु अरबिहाॽ हुसुसि पक्खुसि॥ 17 खे़ङ्हाॽरे़ यहुदान् मे़भत्तुआङ् खे़न् ना सिगाङ् थे़म्बा मे़लिसु मे़देॽरु॥ के़रे़क् याङ्साकुन्धेहाॽ खे़ङ्हाॽरे़ हाङ्ङिल्ले़ कुहिम्मो मे़याङ्घु, यहोरामरे़ कुस्साहाॽ नु कुमेःत्हाॽआङ् मे़दे़म्सुसिआङ् मे़देॽरुसि॥ खुने़ॽ कुस्सा फोक्वा अहज्याहन्लक् याःक्ते़ वेॽ आत्तिन् कुस्साहाॽआङ् मे़न्याःक्ते़न्॥ 18 कन्हाॽ के़रे़क् पोःक्खे़आङ् यहवे दाङ्बे़ल्ले़ यहोरामे़न् मे़न्वेःप्मनाबा साप्पोक् हिदुःत् तुक्मे़ल्ले़ तरुर याःन्दु॥ 19 खे़न् तुक्मे़ल्ले़ कुभा ये़म् थारिक् तुक्खे चाःत्तुआङ् वये़॥ हे़क्क्याङ् निसिगेक्पा तङ्बेःल्ले़ कुनुप्मो आम्भा खान् तुक्मे़ल्ले़ खुने़ॽ कुसाप्पोक् कुहिदुःत्हाॽ चम्बे़त् लःन्दे़भे़रे़, हे़क्क्याङ् साॽरिक् तुक्मे़न् थःत्तुआङ् खुने़ॽ स्ये़॥ खुने़ॽ कुमनाहाॽरे़ खुन्छिॽ सुधे़बा ताक्थे़बाहाॽरे़ लागि मे़जोगुबा कुसिङ् खुने़ॽ कुमिङ्सोओ मि मे़न्हाःन्दुन्॥ 20 यहोरामे़न् हाङ्युक्नाओ थोःक्सिङ्ङे़ल्ले़ खुने़ॽ सुम्बोङ्ङाङ् ने़त्छि तङ्बे योरे़॥ खुने़ॽ यरुसले़ःम्मो तङ्बे ये़त्छि हाङ्युक् चोगु॥ खुने़ॽ स्ये़ःल्ले़ हाःत्ताङ् मे़रिङ् मे़धक्ते़न्॥ हे़क्क्याङ् खुने़ॽ दाउदरे़ कुये़क्यक्को मे़जिक्खु, कर हाङ्हाॽरे़ खुन्छिॽ इपुङ्हाॽओ मे़न्ने़स्सुन्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.