२ साप्मुःन्धुम् 20 - लिम्बुयहोसापातरे़ मोआब नु अम्मोने़न् थङ्ङो नाःन्दुसि 1 कुभा ये़म् एगाङ् मोआबि, अम्मोनि हे़क्क्याङ् कुभा मिनुइहाॽनु मे़भुङ्सिङ्ङाङ् यहोसापातरे़ कुदक्ले़ङ्वाओ थङ् चोःक्से़ मे़भे़रे़॥ 2 यरिक् थक्सुबा सुम्हाॽ युम्लाःक्खाङ् वरःङ् नाधाःम्बि एदोमलाम् खे़ने़ॽ के़दक्ले़ङ्वाओ थङ् चोःक्से़ मे़भे़न्ल मे़बत्, हे़क्क्याङ् खे़ङ्हाॽ हासेसोन-तामार (एन-गदि) मे़गे़रे़ मे़जुरे़आङ् मे़वाॽ फाॽआङ् कुभा मनाहाॽ मे़द्ये़आङ् यहोसापाते़न् मे़मे़त्तु॥ 3 कम्भदाङ्बा के़साक्पा इङ्घङ् खे़प्सुआङ् यहोसापाते़ल्ले़ यहवे दाङ्बे़न् कोःप्मारे़ लागि पेलि फाक्तु॥ खुने़ॽ यहुदाओ के़रे़क् तःक्ने़त् युङ्मारे़ लागि उवा चोगु॥ 4 निङ्वाॽफुमाङ्ङिन् कुभाॽ नाःक्मारे़ लागि यहुदाबा मनाहाॽ मे़जुप्से़॥ खुने़ॽ सुजा नाःक्मारे़ लागि लाजेॽओबा ये़क्यक् थक्मालाम् खे़ङ्हाॽ मे़द्ये़॥ 5 यहुदा नु यरुसले़मबा चुम्लुङ्ङिल्ले़ कुदगि यहवे दाङ्बे़ल्ले़ कुहिम्मोबा कुसङ् लक्खुम् तगि ये़म्सिङ्ङाङ् 6 यहोसापातरे़ पाःत्तु— “यहवे दाङ्बा आनिगे पाधे़बाहाॽरे़ खुन्छिॽ निङ्वाॽफुमाङ्ङे, थे आदाङ्बाए साङ्ग्राम्पेदाङ्ङो के़युङ्बा निङ्वाॽफुमाङ्ने़ मेःम्बि? आदाङ्बारे़ मे़न्छाम् सुवाङ्हाॽरे़ खुन्छिॽ हाङ्जुम्हाॽओ युक् के़जोगुॽ॥ आदाङ्बारे़ए के़हुक्को मुक्साम् नु मुक् के़गत्तुॽ॥ आदाङ्बानु थक्मा के़सुक्पा हाःत्ताङ् होप्॥ 7 आनिगे निङ्वाॽफुमाङ्ङे, थे आदाङ्बारे़ए के़मना इस्राइलिहाॽरे़ खुन्छिॽ तगिलाम् कन् लाजेॽओ के़युङ्बाहाॽ के़नाःत्तु के़देसुसि हे़क्क्याङ् के़न्देःङ्बा अब्राहामरे़ कुधिन्दाङ् सायोबोराहाॽ सदादिङ्ले़ लागि कन् लाजेन् के़बिरुसिबा मेःन्नाङ्बि? 8 खुने़ॽ कुमुॽइदाङ्साहाॽ खे़प्मो मे़युङ्ल मे़वाॽ, हे़क्क्याङ् आदाङ्बारे़ के़मिङ्ङिल्ले़ लागि अक्खे मे़बाःत्तुआङ् के़सेसेदे़न् थिक् मे़जोगुआङ् ने़रो, 9 ‘के़साक्पा तुक्खे आनिगे सम्धाङ् पोङ्दाने़भग्र, इग्र खासे़न्ले़ ताभेन् किग्र माङ्दुक्मा ताने़भग्र, साक्वान् पोःक्ने़भग्र, आदाङ्बारे़ के़मिङ् के़वाॽबा कन् माङ्हिम्मे़ल्ले़ कुदगि आदाङ्बारे़ के़दगि ये़म्मादिगे़रो॥ खम्भ्याङ् आनिगे के़साक्पा तुक्खेओ आदाङ्बा पेलि फाक्कासिगे़ॽ, हे़क्क्याङ् आदाङ्बारे़ आनिगे पेलिन् के़घे़प्सुआङ् आनिगे आग्से़ःप्॥’ 10 “इस्राइलिहाॽ मिस्र लाजेॽलाम् मे़धाङे़ल्ले़ आदाङ्बारे़ खे़ङ्हाॽ अम्मोनि नु मोआबिहाॽ हे़क्क्याङ् सेइर कोःक्मा फाङ्जङ्बा मनाहाॽरे़ खुन्छिॽ लाजेॽओ लाःप्मा के़म्भाःक्तुसिन्नाङ् मे़वये़, हे़क्क्याङ् कल्ले़ चोगुल्ले़ए खे़ङ्हाॽ वेॽ लाम्बा मे़हिसिङ्ङाङ् कप्मो मे़भे़रे़आङ् मे़वाॽ॥ इस्राइलिहाॽरे़ अम्मोनि नु मोआबिहाॽ हे़क्क्याङ् सेइर कोःक्मा फाङ्जङ्बा मनाहाॽ मे़म्मे़क्खुसिन्॥ 11 कर आल्ल ओमे़त्ते़ॽ, कन् मनाहाॽरे़ आनिगे़नु आक्तङ्बा कुले़क्वा मे़नुःक्तुर मे़वाॽ॥ आदाङ्बारे़ आनिगे लक्खोमा आग्बे़रे़बा लाजेॽओलाम् आनिगे नाःत्छे़देसे़ खे़ङ्हाॽ मे़भे़न्ल मे़बत्॥ 12 आनिगे निङ्वाॽफुमाङ्ङे, थे आदाङ्बारे़ खे़ङ्हाॽ खासे़न् के़न्जोगुसिन्बि? थेआङ्भे़ल्ले़ आनिगे लाजेन् थङ्ङो फप्मारे़ लागि के़भे़म्बार के़बप्पा कन् यरिक् थक्सुबा सुम्हाॽनु थक्मा आनिगे मुक्साम् थे़माआङ् मे़गत्तुम्बे़न्॥ आनिगे थे चोःक्मा के़बोङ्बा खे़न् आनिगे मे़निसुम्बे़न्, कर आनिगे मिक्के़ल्ले़ आदाङ्बा ओमे़त्तासिगे़ॽ॥” 13 यहुदाबा के़रे़क् मनाहाॽ, खे़ङ्हाॽरे़ खुन्छिॽ मेःत्हाॽ नु खुन्छिॽ अङे़ःक्वा साहाॽआङ् खे़प्मो यहवे दाङ्बे़ल्ले़ कुदगि मे़ये़बे़॥ 14 खे़ब्याङ् सङ्जुम्भो के़ये़प्पा आसापरे़ कुधाःक्कोबा लत्छा ले़बि यहासेलरे़ओ यहवे दाङ्बे़ल्ले़ कुयाम्साम्मिन् थासिङ् ये़॥ खुने़ॽ मत्तन्याहरे़ कुधाःक्मे़न्छाॽ, यहिएलरे़ कुबे़न्मे़न्छाॽ, बनायाहरे़ कुम्मे़न्छाॽ हे़क्क्याङ् जकरियारे़ कुस्सा वये़॥ 15 खुने़ॽ पाःत्तु, “यहुदा नु यरुसले़ःम्बा के़रे़क् यक्युङ्बासे हे़क्क्याङ् यहोसापात हाङ्ङे खे़प्साम्मे़ॽओ, आदाङ्बासि यहवे दाङ्बे़ल्ले़ हाबा कन् के़मे़त्तिरो—‘मे़गिसाम्मे़न्ने़ॽ, कन् यरिक् थक्सुबा सुम्हाॽनु खिनिॽ यङ्मा मे़स्ये़म्मे़न्ने़ॽ॥ थेआङ्भे़ल्ले़ ते़न्धङ्ङिन् यहवे दाङ्बे़ल्ले़ कुहुक्को वाॽ, खिनिॽ हुक्को मेःन्॥ 16 ताःन्दिक् खे़ङ्हाॽनु थङ् चोःक्से़ लःन्दे़म्मे़ॽ॥ खे़ङ्हाॽ जिजबा थाम्माङ्बा लाम्मो मे़बोङ्ङाङ् मे़धाङ्॥ खिनिॽ खे़ङ्हाॽ यरुएलबा मुरे़क् खारे़क् थेआङ् के़होप्पा ये़ःङ्घादे़न्नो के़ने़बा वहःङ्ङिल्ले़ नासमा कुयाओ के़दुमुम्सिम्ॽ॥ 17 कन् थङ्ङिन् खिनिॽ थक्मा मे़बोङ्ने़न्॥ पे़न्बे़न् थे़ःक्पे़त् पे़न्नासिम्मे़ॽआङ् हाङ्घाम्मे़ॽआङ् ये़बे़म्मे़ॽ॥ यहवे दाङ्बे़ल्ले़ खिनिॽ ताङ्गे़से़ःप्तिबा याःम्बक्किन् खिनिॽ निमा के़घोसुम्ॽ॥ मे़गिसे़म्मिन्ने़ॽआङ् खिनिॽ यङ्माआङ् मे़गे़रे़म्मिन्ने़ॽ॥ ताःन्दिक् खे़ङ्हाॽनु थक्से़ खिनिॽ लःन्दे़म् फे़रे़म्मे़ॽ, थेआङ्भे़ल्ले़ यहवे दाङ्बे़न् खिनिॽ ले़प्माङ् वाॽ॥’” 18 यहोसापाते़न् खाम्बाङ्ङो साबन् हबत् फन्छिङ्, हे़क्क्याङ् यहुदा नु यरुसले़ःम्बा के़रे़क् यक्युङ्बाहाॽ यहवे दाङ्बे़ल्ले़ कुदगि माङ्से़वा मे़प्मारे़ लागि साबन् हबत् मे़भन्छिङ्॥ 19 खे़ब्याङ् कहात नु कोरह थाःक्कोबा कुभा ले़बिहाॽ मे़ये़म्सिङ् हे़क्क्याङ् यम्बा इक्लाओ यहवे दाङ्बा इस्राइलबा निङ्वाॽफुमाङ्ङिल्ले़ कुनारा मे़भोसु॥ 20 खे़ब्याङ् खे़ङ्हाॽ तानाम् आन्देन् मे़बोगे़आङ् तकोबा मुरे़क् खारे़क् थेआङ् के़होप्पा ये़ःङ्घादे़न्नो मे़बे॥ खे़ङ्हाॽ मे़लःन्दे़ मे़बेःल्ले़ ये़म्सिङ्ङाङ् यहोसापातरे़ मे़त्तुसि, “यहुदाबा नु यरुसले़मबा यक्युङ्बासे, आङ्गाॽ आबाःन्निन् खे़प्से़म्मे़ॽ! यहवे दाङ्बा खिनिॽ निङ्वाॽफुमाङ्ङिन् नसान् के़जोगुम्बाओ खिनिॽ थधप् मे़ल्लॽए पत्छे़म्मे़ॽ, हे़क्क्याङ् खुने़ॽ खिनिॽ के़दक्ति के़भत्छिॽ॥ खुने़ॽ कुमाङ्निङ्वाॽपान् के़बाःप्पाहाॽ नसान् चोगे़म्सिम्मे़ॽ, खम्भ्याङ् खिनिॽ कुलिङ्दो के़गे़प्पा के़बोक्खिरो॥” 21 मनाहाॽनु पान् मे़हुप्तुआङ् खुने़ॽ कुभा मनाहाॽ यहवे दाङ्बे़ल्ले़ कुनारा फोमा साम्लो साम्मे़प्मा नु खुने़ॽ कुसेसेगे़न् कुहाङ्वा कुमाङ्वाःल्ले़ कुनारा फोमारे़ लागि थक्सुबाहाॽरे़ खुन्छिॽ तगि तगि पेःक्माआङ् साम्लोमारे़ लागि युक्तिङ् चोगुसि॥ हे़क्क्याङ् खे़ङ्हाॽरे़ अक्खे मे़बाःत्तुआङ् साम्मे़लोरे़रो— “यहवे दाङ्बे़न् नुगे़न् पिरे़म्मे़ॽओ! थेआङ्भे़ल्ले़ खुने़ॽ लुङ्माॽ आदुक्तुक्पा कुमिःम्जिन् सदादिङ् वाॽरो॥” 22 खे़ङ्हाॽरे़ यम्बा इक्लाओ साम्लोन् साम्मे़मे़त्तुनुमे़ःन्ने़ यहुदाःन्नु थङ् चोःक्से़ के़भे़म्बा अम्मोनि, मोआबि नु सेइरबा कोःक्मा फाङ्जङ् थे़गु माङ्बा मनाहाॽ यहवे दाङ्बे़ल्ले़ वेॽहाॽरे़ साप्फ मे़भत्तुसिर याःन्दुसि, हे़क्क्याङ् खे़ङ्हाॽ हारिमे़द्ये़॥ 23 सेइर कोःक्मालाम् के़भे़म्बा मनाहाॽरे़ खुन्छिॽ तक्ले़ङ्वाओ खे़ङ्हाॽ युम्रे़क् तेमासि नु मे़ङ्मासिरे़ लागि अम्मोनि नु मोआबिहाॽ मे़बोगे़॥ आल्ल खे़ङ्हाॽरे़ सेइर कोःक्मालाम् के़भे़म्बा मनाहाॽ मे़मे़क्खु मे़सुरुसि, खे़ब्याङ् खुन्छिॽ आप्फेक् लुम्मो मे़हिसिङ्ङाङ् इमे़न्नि खामे़न्नि मे़से़त्छिङ्॥ 24 यहुदाबा मनाहाॽ लुङ्घ्रे़ःक् याक्ख्रे़ःक् के़ने़बा चन्जम्बादे़न्नो मे़गे़रे़आङ् आत्तातान्ने यरिक् निङ्मि थक्सुबा सुम्हाॽ ओमे़मे़त्तुसिल्ले़ खे़प्मो खे़ङ्हाॽ मे़स्ये़रुसिआङ् खाम्बाङ्ङो मे़ने़स्से़ मे़गरे़बा मे़निसुसि, हे़क्क्याङ् खे़ङ्हाॽओ लत्थिक्काङ् के़घे़त्छिङ्बा होःप्ते़॥ 25 खे़ल्ले़चोगुल्ले़ यहोसापाते़न् नु खुने़ॽ कुमनाहाॽरे़ मे़नाप्तुसिबा सामा चिगक्वाहाॽ सुम्से़ मे़ये़ःल्ले़ खे़ङ्हाॽरे़ साॽरिक् यरिक् निःप्मे़न्दे़त् सामापुमाहाॽ, चाङ्वाःन्हाॽ नु कुमे़ल्लुङ् के़घिःक्पा पाःन्हाॽ तेॽमाए मे़न्छुक्के मे़नाप्तु मे़देॽरुसि॥ खे़ङ्हाॽरे़ सुम्यान् थारिक् मे़नाप्तुसिबा चिगक्वाहाॽ मे़भुक्खु, थेआङ्भे़ल्ले़ खे़ङ्हाॽ हाम्भ्यारिक् यरिक् योरे़॥ 26 लियाःन्बा ये़न्नो खे़ङ्हाॽ बराकाहबा ने़ने़बादे़न्नो मे़जुप्से़॥ खे़ङ्हाॽरे़ खे़प्मो यहवे दाङ्बे़ल्ले़ कुनारा मे़भोसुबाल्ले़ चोगुल्ले़ आइन्बा ये़न् थारिक्के खे़न् ते़न्निल्ले़ कुमिङ् हाबा खे़न्ने ने़रो॥ 27 खे़न् एगाङ् यहुदा नु यरुसले़ःम्बा के़रे़क् मनाहाॽ यहोसापातरे़ तगि लाम्लोसुसिआङ् थङ् नाःम्मानु सोरिक् मे़सःत्ते़र ये़क्यक्को मे़नुःक्खे़, थेआङ्भे़ल्ले़ यहवे दाङ्बे़ल्ले़ खे़ङ्हाॽरे़ खुन्छिॽ निङ्मिहाॽ मे़नाःन्दुसिर चोगुआङ् वये़॥ 28 खे़ङ्हाॽरे़ अन्मे, अन्मे खिङ्मनाबा मुक्ला मे़मुक्खुर हे़क्क्याङ् सादाङ्हाॽ मे़मुःत्तुर यरुसले़ःम्मो मे़लासे़आङ् यहवे दाङ्बे़ल्ले़ कुहिम्मो मे़लासे़॥ 29 यहवे दाङ्बे़ल्ले़ए इस्राइलबा निङ्मिहाॽरे़ खुन्छिॽ तक्ले़ङ्वाओ थङ् चोगु के़लॽबा मे़घे़प्सुआङ् के़रे़क् लाजेॽबा हाङ्जुम्हाॽओ निङ्वाॽफुमाङ्ङिन्नु मे़गिसे़रो॥ 30 यहोसापातरे़ कुहाङ्जुम्मो नुॽमादामा पोःक्खे़, थेआङ्भे़ल्ले़ निङ्वाॽफुमाङ्ङिल्ले़ खुने़ॽ के़रे़क् पिसाङ् नाःम्सिङ्मा पिरुरो॥ यहोसापातरे़ कुहाङ्युक्किल्ले़ कुनुप्मा ( १ हाङ् २२:४१-५० ) 31 कम्भलॽरिक् यहोसापाते़ल्ले़ यहुदाओ हाङ्युक् चोगु॥ हाङ्युक्नाओ लासे़ल्ले़ खुने़ॽ सुम्बोङ्ङाङ् ङासि तङ्बे योरे़, हे़क्क्याङ् खुने़ॽ यरुसले़ःम्मो निबोङ्ङाङ् ङासि तङ्बे हाङ्युक् चोगु॥ खुने़ॽ कुम्मारे़ कुमिङ् अजुबा वये़, खुने़ॽ सिल्हिरे़ कुस्सा मे़न्छुमा वये़॥ 32 यहोसापाते़न् कुम्बारे़ नाःत्तुबा लाम्मो लाङ्घेगे़, हे़क्क्याङ् खे़न् लाम्बा थिक्नाहाङ् मे़बेने़न्॥ यहवे दाङ्बे़ल्ले़ कुनिमो आत्तिन् पाःन्निन् नुबा चोगे़ हाबा खे़न्ने खुने़ॽ चोगु॥ 33 कर कोःक्माहाॽओ के़ने़बा माङ्धाःन्हाॽ खुने़ॽ मे़घे़त्तुन् मे़देसुन्, हे़क्क्याङ् मनाहाॽरे़ खुन्छिॽ पाधे़बाहाॽरे़न् निङ्वाॽफुमाङ्ङो सिक्लुङ्मोलाम् निङ्वाॽ मे़म्बिरुन्॥ 34 यहोसापातरे़ कुहाङ्युक् ये़म्मोबा वेॽ हिन्दोक्हाॽ कुहेःक्सिङ्माआङ्धो कुनुप्मा थारिक्के हनानिरे़ कुस्सा येहुरे़ कुसाप्मुःन्धुम्मो साप्ते़आङ् पत्॥ खे़ङ्हाॽ इस्राइलबा हाङ्हाॽरे़ खुन्छिॽ साप्मुःन्धुम् साप्पन्नो मे़गाम्सुआङ् पत्॥ 35 याङ्सि यहुदाबा हाङ् यहोसापातरे़ फे़न्याःम्बक् चोःक्मा कुआप्तिक्को के़धाबा इस्राइलबा हाङ् अहज्याहन्नु सोॽबु सुःप्तु॥ 36 ले़ङ्हङ् चोःक्मारे़ लागि वालाधाहाॽ चोःक्मा फाॽआङ् खुने़ॽ अहज्याहन्नु काॽइ हुप्तु॥ कन् वालाधाहाॽ एस्योन-गेबेर वागप्खेःङ्ङो मे़जोगु मे़सुरुसिआङ्, 37 मारेसाबा दोदाबाहुरे़ कुस्सा एलिएजरले़ यहोसापातरे़ कुदक्ले़ङ्वाओ कन् माङ्निङ्वाॽपान्निन् पाःत्तु, “आदाङ्बारे़ अहज्याहन्नु सोॽबु के़सुःप्तुबाल्ले़ चोगुल्ले़ यहवे दाङ्बे़ल्ले़ आदाङ्बारे़ के़याःम्बक्किन् कुलिङ्दो मे़ङ्गप्मनाबा चोगुॽ॥” हे़क्क्याङ् खे़न् वालाधाहाॽ मे़यरे़ मे़बेआङ् ले़ङ्हङ् चोःक्मा लाम् मे़बोःक्खे़न्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.