२ साप्मुःन्धुम् 19 - लिम्बुमाङ्निङ्वाॽपान् के़बाःप्पे़ल्ले़ यहोसापाते़न् फे़ःक्तु 1 यहुदाबा हाङ् यहोसापाते़न् यरुसले़ःम्बा कुहाङ्हिम्मो नुरिक् तारिक् नुःक्खे़भे़रे़आङ् एगाङ्, 2 हनानिरे़ कुस्सा थुम्या के़इबा येहुन् खुने़ॽ कुदुम्से़ त्ये़॥ येहुःल्ले़ यहोसापाते़न् मे़त्तु, “कुॽइगे़भे़म्बे़न् के़भाॽरु हे़क्क्याङ् यहवे दाङ्बे़ल्ले़ कुनिङ्मिहाॽनु चुम्दे़ःङ् के़मे़त्छिङ्ङाङ् थे आदाङ्बा के़निङ्वाॽ ताबि? कल्ले़चोगुल्ले़ यहवे दाङ्बे़ल्ले़ साॽरिक् कुसिक् पोःक्मे़न् आदाङ्बारे़ के़सम्धाङ् इदारो॥ 3 हे़क्केसाङ् आदाङ्बारे़ॽओ कुभा नुबा पाःन्नाङ् वाॽ, थेआङ्भे़ल्ले़ आदाङ्बारे़ असेरा माङ् सित्लाङ्हाॽ लाजेॽओलाम् के़इःक्खु के़देसुआङ् वाॽ, हे़क्क्याङ् यहवे दाङ्बे़न् कोःप्मा आदाङ्बारे़ निङ्वाॽ के़जोगुआङ् वाॽरो॥” यहोसापातरे़ खासे़न्लोःम्बाहाॽ युक्तिङ् चोगुसि 4 यहोसापातरे़ कुयुङ्मादे़न् यरुसले़ःम्मो ने़स्से़॥ खुने़ॽ याम्मो बेर्सेबाबा मनाहाॽओ एफ्राइमबा कोःक्मा लाजेॽओ पेआङ् खे़ङ्हाॽ यहवे दाङ्बा खुन्छिॽ पाधे़बाहाॽरे़न् निङ्वाॽफुमाङ्ङो नुःक्तु तारुसि॥ 5 खुने़ॽ लाजेॽ के़रे़क्के यहुदाबा थाप्थेःक् याम्धेक्पा ये़क्यक् थक्मा खासे़न्लोःम्बाहाॽ युक्तिङ् चोगुसि॥ 6 खुने़ॽ खे़ङ्हाॽ मे़त्तुसि, “खिनिॽ थेधे के़जोगुम्ॽ, खे़न् पाःन्नो सिङ्सिङ् ये़क्ये़क् लॽरे़म्मे़ॽ॥ थेआङ्भे़ल्ले़ मनाहाॽरे़ खुन्छिॽ लागि मेःन् कर कुदोःप्मा खासे़न्निल्ले़ निःन्धो पाःन्निन् खिनिॽ के़जे़क्तुम्सिम्मिल्ले़ खिनिॽनु के़वाॽबा निङ्वाॽफुमाङ्ङिल्ले़ कुलागि खिनिॽ खासे़न् के़लोःन्दुम्ॽ॥ 7 आल्ल यहवे दाङ्बे़न् किप्मा के़बोङ्बा पाःन्निन् खिनिॽओ वाॽर॥ खिनिॽ सिङ्सिङ् ये़क्ये़क्काङ् खासे़न् लोःन्दे़म्मे़ॽ, थेआङ्भे़ल्ले़ यहवे दाङ्बा आनिॽ निङ्वाॽफुमाङ्ङिल्ले़ मे़न्वाॽमनाबा पाःन्, एःक्पएःक् चोःक्मा नु सुरुत्याङ् ताःक्मनाबे़न् नासि मे़धःत्तुन्ॽ॥” 8 यहवे दाङ्बे़ल्ले़ कुसाम्योथिम् इङ्जाङ्ङो नु मनाहाॽरे़ खुन्छिॽ लुम्मो पाःन्धङ् के़बोङ्बा पाःन्हाॽ तङ्मारे़ लागि यहोसापाते़ल्ले़ यरुसले़ःम्मोआङ् कुभा ले़बिहाॽ, निङ्वाॽफुसाम्बाहाॽ नु हिम्सयङ् हिम्सयङ्बा लाम्लोबाहाॽ युक्तिङ् चोगुसि॥ 9 खुने़ॽ खे़ङ्हाॽ कन् इङ्जाङ्हाॽ पिरुसि—“खिनिॽ आभे़ल्ले़साङ् यहवे दाङ्बे़न्नु किसे़म्मे़ॽ हे़क्क्याङ् नसाःन्साबा पोङ्माआङ् याःम्बक् चोःक्मा पोङ्ॽ॥ 10 ये़क्यक्हाॽओ के़युङ्बा खिनिॽ काॽइहाॽलाम् खिनिॽ तगि के़दाबा के़रे़क् तुःन्देहाॽ, मनासे़प्मा तुःन्दे नाम्ला पोङ्साङ्, इग्र साम्योथिम् इङ्जाङ् किग्र साम्योथिम् इग्र थिम्हाॽरे़ कुदक्ले़ङ्वाओ पोङ्साङ् यहवे दाङ्बे़ल्ले़ कुदक्ले़ङ्वाओ आक्तङ्बा परिक्ले़न् फे़न्याःम्बक्काङ् मे़जोगे़म्मिन्ने़ॽ फाॽआङ् खिनिॽ खे़ङ्हाॽ साम्दिङ् पिरे़म्सिम्मे़ॽ॥ मेःन्ने़भग्र खिनिॽ नु खिनिॽ काॽइहाॽओआङ् खे़ल्ले़ लागि खुने़ॽ कुसाक्के़न्निन् इदारो॥ कर खिनिॽ चोःक्मा के़बोङ्बा पाःन्हाॽ के़जोगुम्ने़भग्र खिनिॽ आप्तिक्साबा के़म्बोःक्खिन्॥ 11 “यहवे दाङ्बे़ल्ले़ कुयाःम्बेओ खिनिॽ सम्धाङ् मानिङ्वाॽफुसाम्बा अमर्याहन् सुहाङ्युक्पा वाॽ॥ हाङ्जुम्बा पाःन्निल्ले़ कुयाःम्बेओ यहुदाबा थाःक्लाम्लोबा इस्माएलरे़ कुस्सा जबदियाहन् खिनिॽ थुङ्धो सुहाङ्युक्पा वाॽ॥ ले़बिहाॽग खिनिॽ तगि सुहाङ्युक्पा कुइसिक् याःम्बक् मे़जोक्॥ के़धुम्बा नु योधो मे़ल्लॽमनाबा पोःक्खे़म्मे़ॽ॥ यहवे दाङ्बे़न् कुदोःप्मा याःम्बक् के़जोःक्पाहाॽनु सोरिक् वाॽररो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.